DEƐMƆTI ƆHYIA LA: Saa “sonla adwenle mɔɔ wɔ ɔ ti anu la le kɛ azule buma” a, ɛnee kpuya le kɛ bokiti mɔɔ yɛbava yɛaza la. (Mrɛ 20:5) Kpuya boa maa yɛ tievolɛma fa bɛ nwo wula adawubɔlɛ ne anu. Kpuya kpalɛ anwo mualɛ boa maa yɛnwu ninyɛne mɔɔ anwo hyia la. Gyisɛse vale kpuya lile gyima kpalɛ. Kɛzi yɛbazukoa ye neazo ne ɛ?

KƐZI BƐYƐ YE LA:

• Biza Kpuya fa nwu tievolɛ ne adwenle. Gyisɛse bizale ye ɛdoavolɛ ne mɔ kpuya ngakyile ɔvale ɔnwunle bɛ adwenle. (Mt 16:13-16; be 238 ¶3-5) Kpuya boni a ɛbabiza wɔava wɔanwu wɔ tievolɛma adwenle a?

• Biza kpuya fa twe ye adwenle kɔ debie zo. Mɔɔ Gyisɛse tenrɛ Pita adwenle la, ɔbizale ye kpuya na ɔmaanle ye mualɛ ngakyile, ɛhye maanle Pita nwunle mɔɔ ɔwɔ kɛ ɔyɛ la. (Mt 17:24-26) Kpuya boni a ɛbabiza wɔava wɔahwe awie adwenle wɔahɔ debie mɔɔ ɔwɔ kɛ ɔyɛ la azo a?

• Kanvo wɔ tievolɛ ne. Mekɛ mɔɔ mɛla kilehilevolɛ bie ‘buale Gyisɛse nrɛlɛbɛ’ nu la, ɔhanvole ye. (Mk 12:34) Kɛzi ɛbahanvo awie mɔɔ babua wɔ kpuya la ɛ?

NEA YƐ GYIMA MƆƆ GYISƐSE YƐLE LA BIE—KILEHILE VIDIO NE FOA MƆƆ LIMOA LA NA BUA KPUYA ƐHYE MƆ:

• Ɔnva nwo kɛ edwɛkɛ ne le nɔhalɛ la, duzu ati a ɛhye le neazo ɛtane a?

• Duzu ati a saa yɛkilehile edwɛkɛ ne anu ala a ɛnee yɛtɛwiele a?

NEA VIDIO NE FOA MƆƆ TƆ ZO NWIƆ LA NA BUA KPUYA ƐHYE MƆ:

• Kɛzi adiema nrenyia ne vale kpuya lile gyima kpalɛ ɛ?

• Neazo kpalɛ boni bieko a ɔyɛle mɔɔ yɛbahola yɛazukoa a?