Fa ye kɛ ɛde Galeli wɔ Gyisɛse mekɛ zo. Wɔdu adenle wɔhɔ Gyɛlusalɛm kɛ ɛkali Kpɔda Bo Ɛdɛnlanlɛ Ɛvoyia ne. Sua ne azo ɛyɛ gbudugbudu ɔluakɛ menli dɔɔnwo vi moamoa ɛlɛba arazonle. Ɛkulo kɛ ɛbɔ afɔle ɛmaa Gyihova. Yemɔti ɛhwenle wɔ abɔnkye ɛlile ɛ nzi na ɛbɔle wɔ adendulɛ ne abo. Ɛdwule ɛkɛ ne la, ɛnwunle kɛ menli ɛyi ɛzonlenlɛ sua ne anu na bɛlɛba barabɔ bɛ afɔle. Akee bɔ zo mɔɔ yedwu ɛ nwo zo mɔɔ ɛfa wɔ abɔnkye ne wɔamaa ɛsɔfo kpanyinli ne a. Ɛkɛ ne yɛɛ ɛhakyele kɛ ɛ diema bie mɔɔ bie a ɔgyi menli ne anu anzɛɛ ɔwɔ sua zo la lɛ edwɛkɛ tia wɔ. Gyisɛse hilehilele mɔɔ ɔwɔ kɛ ɛyɛ la anu. (Kenga Mateyu 5:24.) Kɛ ɔkɛyɛ na ɛ nee ɛ diema ne mɔɔ wɔvo ye la akpondɛ anzodwolɛ kɛ mɔɔ Gyisɛse hanle la ɛ? Kpa muala ne mɔɔ wɔ ɔ bo ɛkɛ ne la ko mɔɔ fɛta la.

ƆWƆ KƐ . . .

• ɛ nee ɛ diema ne tendɛ saa ɛnea na amgba wɔha ye wɔmaa yeva ɛya a

• ɛbɔ mɔdenle ɛboa ɛ diema ne ɛmaa ɔnwu ye kɛ ɔlɛyɛ debie yeamaa yeabo zo anzɛɛ ɔboka nwo bie a ngyegyelɛ ne ɛra a

• ɛnyia abotane ɛtie ɛ diema ne wɔ mekɛ mɔɔ ɔlɛka ye ahonle nu edwɛkɛ la, saa bɔbɔ ɛnde ɔ bo kpalɛ a, fi ahonle nu kpa ye kyɛlɛ na ka kɛ ɛnze kɛ mɔɔ bavi wɔ nyɛleɛ ne anu ara la ɛne

ƆWƆ KƐ Ɛ DIEMA NE. . .

• kpondɛ moalɛ fi asafo ne anu amra ɛkɛ na ɔka kɛzi ɛvonle ye la anwo edwɛkɛ ɔkile bɛ

• tea wɔ na ɔ nee wɔ suzu wɔ nvonleɛ ne anwo ngoko ngoko na ɔnea kɛ ɛbalie wɔ nvonleɛ wɔado nu

• nwu wɔ mɛlɛbɛnwoaze nee akɛnrasesebɛ mɔɔ wɔnyia ye wɔra ɔ nwo ɛkɛ ne la na ɔfi ye ahonle nu ɔfa ɔkyɛ wɔ

Ɛnɛ yɛnva nane yɛmbɔ afɔle ɛdeɛ, noko kɛzi Gyisɛse ngilehilelɛ ɛhye maa yɛnwu ye kɛ anzodwolɛ mɔɔ tɛnla yɛ nee yɛ mediema avinli la fale ɛzonlenlɛ mɔɔ Nyamenle die to nu mɔɔ yɛfa yɛmaa ye la anwo ɛ?