Duzu ati a yɛ nye die yɛ ɛvolɛ ɛvolɛ nyianu ne mɔ anwo a? Kɛ mɔɔ ɛnee ɔde ye wɔ tete Yizilayɛ la, yɛ nyianu ne mɔ maa yɛnyia adenle yɛ nee yɛ mediema diedima apenle dɔɔnwo bɔ nu sonle Gyihova. Yɛ nye die sunsum nu aleɛ ngakyile mɔɔ bɛfa bɛmaa yɛ la anwo. Eza yɛnyia adenle yɛ nee yɛ gɔnwo mɔ nee mbusua ngakyile bɔ nu di adwelie. Ɔlua anyezɔlɛ mɔɔ yɛlɛ yɛmaa ninyɛne ɛhye mɔ la ati, yɛkulo kɛ yɛkɔ kenle nsa nyianu ne amuala.

Saa yɛnyia nwolɛ adenle yɛyia nu zɛhae a, ɔnle kɛ yɛdwenle mɔɔ yɛbanyia ye la angome anwo. Emomu ɔwɔ kɛ yɛdwenle kɛzi yɛbala ɛlɔlɛ ali yɛahile yɛ mediema la noko anwo. (Ga 6:10; Hi 10:24, 25) Saa yɛbuke anlenkɛ yɛmaa yɛ mediema anzɛɛ yɛanva ninyɛne yɛantoto mbia mɔɔ yɛngyia nwo la azo a, ɛnee yɛlɛda ye ali kɛ yɛdwenle awie mɔ noko boɛyɛlɛ nwo. (Fe 2:3, 4) Nyianu maa yɛnyia nwolɛ adenle yɛnyia agɔnwolɛma fofolɛ. Yɛbahola yɛava yɛayɛ yɛ bodane kɛ, kolaa na bɛabɔ gyimalilɛ ne abo anzɛɛ ewiazo ɛnwomenlelielɛ mekɛ ne anzɛɛ mekɛ mɔɔ bɛkpɔne gyimalilɛ ne la, yɛ nee awie mɔɔ yɛnze ye la badendɛ. (2Kɔ 6:13) Yɛbahola yɛabɔ agɔnwolɛvalɛ mɔɔ bɛadɛnla ɛkɛ ne dahuu la abo! Mɔɔ tɛla biala la, saa menli nwu kɛ yɛlɛda ɛlɔlɛ ali wɔ adenle zɛhae azo a, bie a, bɛbazi kpɔkɛ kɛ bɛ nee yɛ babɔ nu azonle Gyihova.​—Dwn 13:35.

NEA “ƐLƆLƐ ƐNWIE ƐLƐ”! MAANLE MAANLE AVINLI NYIANU VIDIO NE NA BUA KPUYA ƐHYE MƆ:

• Kɛzi bɛlale ɛlɔlɛ ali bɛhilele menli mɔɔ hɔle ɛvolɛ 2019 maanle maanle avinli nyianu ne bie la ɛ?

• Duzu a maa koyɛlɛ nee ɛlɔlɛ mɔɔ Gyihova menli da ye ali la yɛ nwanwane a?

• Kilisiene ɛlɔlɛ afoa boni mɔ a Neazo Eku ne anu amra zile zo a?

• Kɛzi Kilisiene ɛlɔlɛ ɛha yɛ mediema mɔɔ bɛwɔ Germany nee South Korea la ɛbɔ nu ɛ?

• Duzu a ɔwɔ kɛ yɛsika yɛ bo kɛ yɛbayɛ a?