Yɛde ewiade mɔɔ bɛka kɛ kpalɛ le ɛtane yɛɛ ɛtane le kpalɛ la anu. (Ay 5:20) Ɔyɛ alɔbɔlɛ kɛ, menli bie mɔ yɛ ninyɛne mɔɔ Gyihova kyi le kɛ nwɔhoa ɛtane mɔɔ menli mɔɔ bɛ awodeɛ le ko di la. Atipɛnema mɔɔ wɔ sukulu nee menli gyɛne bɔ mɔdenle kɛ bɛbabɛlɛbɛla yɛ ngakula ne mɔ bamaa bayɛ kɛ bɛdabɛ la. Kɛ ɔkɛyɛ na wɔaziezie ɛ mra wɔamaa bɛali ngyegyelɛ ɛhye nee gyɛne azo konim ɛ?

Fa Gyihova ngyinlazo ne mɔ kilehile ɛ mra. (Lɛ 18:3) Gyinla bɛ ɛvolɛ mɔɔ bɛli la azo fa mɔɔ Baebolo ne ka ye wɔ nla nwo la kilehile bɛ ngyikyi ngyikyi. (Di 6:7) Biza ɛ nwo kɛ: ‘Asoo me mra ne mɔ ze mɔɔ awie yɛ a ɔkile kɛ ɔlɛ bɛ nwo ɛhulolɛ ɛtane, kɛzi ɔhyia kɛ bɛwula adɛladeɛ mɔɔ ɔfɛta nee bɛ nwonane nvɛyeba mɔɔ ɔnle kɛ awie mɔ fa di nwɔhoa la ɔ? Asoo bɛze mɔɔ ɔwɔ kɛ bɛyɛ wɔ mekɛ mɔɔ awie kɛva nlanwonvoninli kɛhile bɛ anzɛɛ ɔkɛha kɛ bɛyɛ debie bie mɔɔ Gyihova kyi la ɔ?’ Amaa bɛahola bɛali ngyegyelɛ ɛhye mɔ anwo gyima la, ɔwɔ kɛ ɛdimoa ɛkilehile bɛ. (Mrɛ 27:12; No 7:12) Saa ɛkilehile ɛ mra ne mɔ a, ɛnee ɛlɛda ye ali kɛ ɛkulo agyapadeɛ ɛhye mɔɔ ɔvi Gyihova ɛkɛ ne la.​—Ed 127:3.

NEA SI SUA MƆƆ BAGYINLA ƐKƐ NE DAHUU LA​—BƆ Ɛ MRA NWO BANE FI “ƐTANE NWO” VIDIO NE NA BUA KPUYA ƐHYE MƆ:

• Kɛmɔti a ɔyɛ se ɔmaa awovolɛ bie mɔ kɛ bɛbahilehile bɛ mra nla nwo debie ɛ?

• Duzu ati a ɔhyia kɛ awovolɛ fa “Gyihova folɛdulɛ nee ye ngilehilelɛ” tete bɛ mra ɛ?​—Ɛf 6:4

• Duzu a Gyihova ahyehyɛdeɛ ne ɛyɛ mɔɔ awovolɛ bahola ava ahilehile bɛ mra nla nwo debie a?​—w19.05 12, ɛlɛka

• Duzu ati a ɔwɔ kɛ ɛta ɛ nee ɛ mra di adwelie kolaa na bɛayia ngyegyelɛ a?