YƐ DASELƐLILƐ GYIMA NE KPALƐ | MAA ANYELIELƐ MƆƆ ƐLƐ YE WƆ ƐZONLENLƐ GYIMA NE ANWO LA ƐYƐ KPOLE
Dwu Menli Ahonle Nu
Yɛfi yɛ ahonle nu a yɛyɛ tieyɛ yɛmaa Nyamenle a. (Mrɛ 3:1) Ɔti saa yɛlɛkilehile a, ɔwɔ kɛ yɛbɔ mɔdenle yɛdwu menli ahonle nu. Kɛzi yɛbayɛ ye ɛ?
Mmakilehile wɔ sukoavo ne Baebolo nu nɔhalɛ ala, boa ye maa ɔnwu kɛzi ɔfale ye ɛbɛlabɔlɛ nee ɔ nee Gyihova avinli agɔnwolɛvalɛ ne anwo la. Maa ɔnwu kɛzi Baebolo ngyinlazo da Nyamenle ɛlɔlɛ, ye kpalɛyɛlɛ nee ye tenleneyɛlɛ ali la. Dua nrɛlɛbɛ adenle zo bizebiza ye kpuya mɔɔ baboa ye yeamaa yeadwenledwenle kɛzi ɔte nganeɛ wɔ mɔɔ ɔlɛsukoa la anwo la. Boa ye maa ɔnwu nvasoɛ mɔɔ ɔbanyia ye saa ɔkakyi adwenle bie mɔɔ ɛndenrɛ anzɛɛ subane bie mɔɔ ɛnfɛta la a. Saa ɛnwu kɛ wɔ sukoavo ne ɛlɛfi ye ahonle nu ahulo Gyihova a, anyelielɛ mɔɔ ɛlɛ la bayɛ kpole.
NEA NYIA FƐLƐKOLILƐ NE MƆƆ ƐDOAVOLƐYƐLƐ GYIMA NE FA BA LA BIE—NYIA ANYUHƆLƐ—DWU MENLI AHONLE NU VIDIO NE NA BUA KPUYA ƐHYE MƆ:
-
Duzu ati a Manzakyi bizale Rose kɛ: “Ɛdwenledwenlenle mɔɔ yɛbɔle nwolɛ nkɔmɔ Kenlenzile ne la anwo ɔ?”
-
Kɛzi Manzakyi boale Rose maanle ɔnwunle kɛ Baebolo ngyinlazo kile kɛ Gyihova kulo ye ɛ?
-
Saa yɛdwu yɛ sukoavo ne ahonle nu a, ɔbamaa ye anwosesebɛ yeamaa yeanyia anyuhɔlɛ
Kɛzi Manzakyi boale Rose maanle ɔnwunle kɛ ɔbahola yeala ye ali kɛ ɔkulo Nyamenle ɛ?
