Wɔ September, yɛbabɔ mɔdenle yeava Nyia Anyelielɛ Dahuu! brohyua ne yɛabɔ Baebolo ɛzukoalɛ bo wɔ awuke biala anu. Nolobɔlɛma bahola ava dɔnehwele 30 ayɛ adekpakyelɛ boavolɛ. Kɛzi yɛbayɛ nolobɔlɛ titili ɛhye ɛ?

• Ɛlɛyɛ Ɛkpɔlalɛ Mɔɔ Limoa A: Fa edwɛkɛ ne mɔɔ wɔ brohyua ne anzi la di gyima na kile ye kɛzi bɛyɛ Baebolo ɛzukoalɛ la. Mmamaa ɛ rɛle fi menli mɔɔ bɛhilele edwɛkɛ ne anwo anyelielɛ nee wɔ sia kɔkpɔla ne mɔ. Saa ɛnee bɛngulo kɛ bɛsukoa bɔbɔ a, bie a kɛkala bɛ nye balie buluku fofolɛ ɛhye nee ndenle fofolɛ mɔɔ yɛdua zo yɛ nee menli sukoa la anwo. Ɔnle kɛ ɛgyakyi brohyua ne bie wɔ menli mɔɔ bɛnle sua nu la anlenkɛ nloa anzɛɛ ɛfa bie ɛwula kɛlata mɔɔ wɔhɛlɛ la anu ɛnwa menli mɔɔ alimoa ne bɛangile nwolɛ anyelielɛ la. Asafo Ɛzonlenlɛ Kɔmatii ne bayɛ daselɛlilɛ ayia gyɛne nwo ngyehyɛleɛ wɔ siane ne anu.

• Ndenle Gyɛne Mɔɔ Ɛbalua Zo Wɔava Wɔali Gyima: Saa wɔ asafo ne yɛ bagua nu daselɛlilɛ a, bɛbahola bɛava Nyia Anyelielɛ Dahuu! brohyua ne bie bɛagua ɛhwili ne azo. Ka Baebolo ɛzukoalɛ nwo ngyehyɛleɛ mɔɔ bɛndua ɛhwee la anwo edwɛkɛ kile menli mɔɔ bɛbahile nwolɛ anyelielɛ anzɛɛ bɛbava bie la. Ka kɛzi yɛyɛ Baebolo ɛzukoalɛ la anwo edwɛkɛ sikalɛ kile ye wɔ adawubɔlɛ ne anu anzɛɛ yɛ ngyehyɛleɛ kɛ ɛbazia wɔara na wɔahile ye kɛzi bɛyɛ Baebolo ɛzukoalɛ la. Ɛzonlenlɛ gyima zo neavolɛ ne bahola ayɛ ngyehyɛleɛ amaa nolobɔlɛma bie mɔ ahɔbɔ Baebolo ɛzukoalɛ bo wɔ gyima gyima mɔɔ wɔ azɛlɛsinli ne anu la anu. Eza ɛbahola wɔaha Baebolo ɛzukoalɛ nwo edwɛkɛ wɔahile wɔ gyima nu amra anzɛɛ menli mɔɔ ɛbayia bɛ wɔ mekɛ mɔɔ ɛnle daselɛlilɛ nu la.

Gyisɛse zele yɛ kɛ yɛyɛ menli ye “ɛdoavolɛma” na ‘yɛhilehile bɛ.’ (Mt 28:19, 20) Ɔrɛla ye kɛ nolobɔlɛ titili ɛhye mɔɔ yɛbalua Nyia Anyelielɛ Dahuu! buluku ne azo yɛayɛ la baboa yɛ yeamaa yɛadwu bodane ɛhye anwo.