Yɛlɛ mediema mɔɔ bɛva ɛvolɛ dɔɔnwo bɛzonle Gyihova la wɔ yɛ asafo ne mɔ anu. Yɛbahola yɛazukoa anwodozo mɔɔ bɛlɛ ye wɔ Gyihova anu la. Yɛbahola yɛabiza bɛ Gyihova ahyehyɛdeɛ ne anwo tetedwɛkɛ yɛɛ ngyegyelɛ ngakyile mɔɔ bɛyiale nee kɛzi Gyihova boale bɛ maanle bɛgyinlanle ɔ nloa la anwo edwɛkɛ. Eza yɛbahola yɛavɛlɛ bɛ wɔ yɛ Abusua Ɛzonlenlɛ bo na bɛaha bɛ anwubielɛ bɛahile yɛ.

Saa ɛle Kilisienenli mɔɔ ɛlɛ anwubielɛ a, ka wɔ diedi ne anwo edwɛkɛ kile mgbavolɛ nee mbɛlɛra. Gyekɔbo nee Dwosefi hanle bɛ anwubielɛ ne anwo edwɛkɛ hilele bɛ mra. (Gyn 48:21, 22; 50:24, 25) Nzinlii, ɛnee Gyihova anye la kɛ mbusua tile baha ye gyima mgbole mɔɔ yeyɛ la anwo edwɛkɛ ahile bɛ mra. (Di 4:9, 10; Ed 78:4-7) Ɛnɛ, awovolɛ nee mediema gyɛne bahola aha nwanwane gyima mɔɔ Gyihova ɛlua ye ahyehyɛdeɛ ne azo ɛyɛ la anwo edwɛkɛ ahile ngakula.

NEA YƐYƐ KO WƆ MEKƐ MƆƆ BƐVA BƐ SA BƐDO YƐ GYIMA NE AZO LA VIDIO NE NA BUA KPUYA ƐHYE MƆ:

• Kɛzi Austria ɔfese ne boale yɛ mediema wɔ maanle ngakyile mɔɔ ɛnee bɛva bɛ sa bɛdo yɛ gyima ne azo la ɛ?

• Kɛzi yɛ mediema ɛhye mɔ gyinlanle kpundii wɔ diedi ne anu ɛ?

• Duzu ati a Romania nolobɔlɛma dɔɔnwo vile Gyihova ahyehyɛdeɛ ne anu a, na kɛzi bɛziale bɛrale ɛ?

• Kɛzi anwubielɛ ɛhye mɔ maa wɔ anwosesebɛ ɛ?