Bɛyɛ nvoninli wɔ Tie Nyamenle brohyua ne anu kɛ bɛfa bɛahilehile menli mɔɔ bɛngola kenga la mɔlebɛbo Baebolo nu ngilehilelɛ ne. Bɛyɛ nvoninli ngɛnlɛma wɔ ɛzukoalɛdeɛ ne mukelɛ nwiɔ biala anu na bɛva debie mɔɔ bamaa bɛanwu nvoninli ko biala la bɛboka nwolɛ.

Nvoninli mɔɔ wɔ Tie Nyamenle ne anu la ko ne ala a wɔ Tie Nyamenle Na Nyia Dahuu Ngoane brohyua ne noko anu a, noko edwɛkɛ dɔɔnwo wɔ nu yɛɛ yɛbahola yɛ nee sukoavoma mɔɔ kola kenga la azukoa. Ɔyɛ a, nolobɔlɛma kulo kɛ bɛfa yemɔ bɛkilehile wɔ mekɛ mɔɔ sukoavo ne lɛ Tie Nyamenle ne la. Bɛyɛ ɛlɛka wɔ mukelɛ ne mɔ dɔɔnwo anu mɔɔ bɛva edwɛkɛ gyɛne bɛboka nwo mɔɔ bɛbahola bɛ nee sukoavo ne azuzu nwo, kɛ mɔɔ ye mɔdenlebɔlɛ ne de la.

Ɛbahola wɔava brohyua ne anu ko biala wɔamaa mekɛ biala, saa bɔbɔ tɛ yemɔ a bɛlɛfa bɛamaa wɔ siane ne anu a. Saa ɛlɛyɛ Baebolo ɛzukoalɛ a, gyinla nvoninli ne mɔ azo kilehile Baebolo ne anu edwɛkɛ ne anu. Biza ye kpuya maa ɔva ɔ nwo ɔwula nu na nea kɛ ɔte mɔɔ ɔlɛsukoa la abo. Kenga na bɛzuzu ngɛlɛlera mɔɔ wɔ mukelɛ biala abo la anwo. Saa bɛsukoa brohyua ne bɛwie a, ɛ nee wɔ sukoavo ne ɛzukoa Duzu A Baebolo Ne Kola Kilehile Yɛ A? amaa wɔaboa ye wɔamaa yeafɛta ɛzɔnenlɛ.