Kilisienema ɛnle Mosisi Mɛla ne abo ɛnɛ ɛdeɛ, noko nuhua mɛla mgbole nwiɔ ne​—Nyamenle nee yɛ gɔnwo mɔ mɔɔ yɛkulo bɛ la​—pɛ mɔɔ Gyihova kpondɛ avi yɛ ɛkɛ ne la sikalɛ maa yɛ. (Mt 22:37-39) Bɛnva ɛlɔlɛ zɔhane bɛnwo. Ɔwɔ kɛ yɛnyia ye. Adenle boni azo? Adenle titili ko a le kɛ yɛbagenga Baebolo ne dahuu. Saa yɛzuzu Nyamenle subane ngakyile ne mɔ anwo wɔ Ngɛlɛlera ne anu a, ‘yɛnwu kɛ Gyihova kɛnlɛma si de la.’ (Ed 27:4) Ɛhye maa ɛlɔlɛ mɔɔ yɛlɛ yɛmaa ye la yɛ kpole na yɛdwenle kɛ ɔdaye la. Ɛhye boa yɛ maa yɛdi Nyamenle mɛla ngakyile ne mɔ azo. Kɛ neazo la, mɛla mɔɔ se yɛla ɛlɔlɛ mɔɔ angomedi ɛnle nu ali yɛhile awie mɔ la. (Dwn 13:34, 35; 1Dw 5:3) Nzuzulɛ nsa mɔɔ baboa yɛ yeamaa yɛ Baebolo ɛgengalɛ ayɛ anyelielɛ la a le ɛhye mɔ:

• Pɛ edwɛkɛ ne nvoninli na fa ɛ nwo wula nu. Fa ye kɛ ɛwɔ ɛkɛ. Boni a ɛbanwu ye a, yɛɛ boni a ɛbade a? Nganeɛ boni a menli mɔɔ boka nwo la bade a?

• Kakyihakyi wɔ ɛgengalɛ ne anu. Nzuzulɛ bie mɔ ɛne: Kenga ye kpole anzɛɛ di ɔ nzi wɔ mekɛ mɔɔ ɛlɛtie ye ɔdio la. Kɛ anrɛɛ ɛbagenga tile ko, ɛwie a wɔahɔ fofolɛ zo la, kenga Baebolo nu sonla bie anzɛɛ edwɛkɛ titili bie anwo debie. Kɛ neazo la, dua Nyamenle Edwɛkɛ Ɛzukoalɛ Adehilelɛ Foa 4 anzɛɛ 16 ne azo sukoa Gyisɛse anwo debie. Kenga tile ne mɔɔ bɛyele alehyenlɛ ne anu tɛkese ne bɛvile nu la amuala. Kenga Baebolo mbuluku ne mɔ nidiso nidiso kɛ mɔɔ bɛhɛlɛle bɛ la.

• Kenga te ɔ bo. Saa ɛkenga tile ko pɛ kenle ko na ɛdwenledwenle nwo ɛte ɔ bo a, ɔle kpalɛ ɔtɛla kɛ ɛbagenga adile dɔɔnwo na wɔawie ndɛ la. Suzu kɛzi edwɛkɛ ne bɔle ɔ bo la anwo. Suzu nwolɛ kɔ moa. Fa azɛkɛlata nee edwɛkɛ mɔɔ fale nwolɛ la di gyima. Yeanyɛ boɛ fee la, yɛ edwɛkɛ ko mɔɔ ɛnde ɔ bo la anwo neɛnleanu. Saa ɔbayɛ boɛ a, ɔwɔ kɛ mekɛ dodo mɔɔ ɛvale ɛgengale la nee mekɛ mɔɔ ɛfa ɛdwenledwenle nwo la yɛ ko.