Ɛnɛ, esiane sisi tɛla mekɛ biala. Saa esiane bie si a, ngyehyɛleɛ kpalɛ nwo hyia amaa bɛava moalɛ mɔɔ ɔfɛta la bɛamaa. Ɛhye ati, Neazo Eku ne ɛyɛ ngyehyɛleɛ ɛmaa bɛde Esiane Mekɛ Nu Moalɛ Gyimalilɛleka wɔ Bɛtɛle biala anu.

Saa mediema mɔɔ yɛ gyima wɔ ɛleka ɛhye la te kɛ esiane bie ɛzi a, ndɛndɛ ne ala bɛdua asafo nu mgbanyima ne mɔ anwo zo bɛkpondɛ nolobɔlɛma mɔɔ bɛhyia moalɛ la. Saa bɛnwu kɛ asafo ne ɛnrɛhola ɛnrɛli ngyegyelɛ ne anwo gyima a, Bɛtɛle bɛakpa mediema mrenyia mɔɔ bɛfɛta la yeamaa bɛaboa bɛ. Bie a mediema ɛhye mɔ bahyia mediema mɔɔ bɛbadu bɛ nwo bɛamaa bɛaboa, ninyɛne mɔɔ bɛbava bɛayɛ gyima ne la anzɛɛ bɛbatotɔ ninyɛne bie mɔ bɛahyɛ bɛamaa menli mɔɔ esiane ne ɛdo bɛ la.

Saa bɛdua ngyehyɛleɛ ɛhye azo bɛyɛ gyima a, nvasoɛ dɔɔnwo wɔ zo tɛla kɛ bɛbali bɛ ti anwo bɛayɛ mɔɔ bɛkulo la. Ɔmmaa bɛnzɛkye bɛ anwosesebɛ, ezukoa nee ninyɛne, yɛɛ ɔnva akɛsakɛsa ɔmba.

Mediema mɔɔ Bɛtɛle bɛakpa bɛ la bahola ahile ezukoa dodo nee mediema dodo mɔɔ bɛhyia amaa bɛahola bɛava moalɛ ne bɛamaa la. Eza bɛbahola bɛ nee sua ne azo mgbanyima ali ngitanwo ɔluakɛ fane dɔɔnwo ne ala bɛboa bɛmaa gyima ne kɔ ndɛ. Ɛhye ati yɛsɛlɛ bɛ, bɛmmamaa awie biala di ɔ ti anwo dielie ezukoa, fa moalɛ nwo ngyianlɛ nwa anzɛɛ kɔ ɛleka mɔɔ esiane ne ɛzi la kyesɛ bɛmaa adenle kɛ ahenle ɛyɛ zɔ.

Noko saa esiane si a, yɛkulo kɛ yɛboa. (Hi 13:16) Yɛkulo yɛ mediema! Ɔti duzu a yɛbahola yɛayɛ a? Mɔɔ hyia kpalɛ la a le kɛ yɛbayɛ asɔne yɛamaa mediema mɔɔ esiane ne ɛdo bɛ la nee bɛdabɛ mɔɔ bɛlɛfa moalɛ bɛamaa la. Eza yɛbahola yɛaye ndoboa yɛaboa ewiade amuala gyima ne. Neazo Eku ne fa kɛzi ɔwɔ kɛ bɛfa ezukoa ɛhye bɛdi gyima kpalɛ la anwo adehilelɛ maa Bɛtɛle ne mɔ. Saa awie kulo kɛ ɔtu ɔ nwo ɔmaa na ɔboa a, ɔbahola yeahyehyɛ Local Design/Construction Volunteer Application (DC-50) kɛlata ne bie.

NEA AZUYILƐ KPOLE BIE MƆƆ ZILE WƆ BRAZIL LA VIDIO NE NA BUA KPUYA ƐHYE:

Duzu a ɛ nye liele nwo wɔ moalɛ mɔɔ Gyihova Alasevolɛ vale maanle bɛ mediema mɔɔ azuyilɛ ne vale bɛ wɔ Brazil wɔ 2020 anu la anwo ɛ?