Wɔ Mosisi Mɛla ne abo, ɛnee ɔwɔ kɛ awie mɔɔ kulo kɛ ɔbɔ ewole la die mɛla adenle zo kɛlata. Ɛnee bɛyɛ ɛhye amaa awie ampele ɔ nwo ambɔ ewole. Noko wɔ Gyisɛse mekɛ zo, ɛzonlenlɛ nu mgbanyima ne mɔ maanle ewolebɔlɛ yɛle sikalɛ. Ɛnee mrenyia kola gyinla debie biala azo bɔ bɛ ye mɔ ewole. (“ewolebɔlɛ kɛlata,” “kɛbɔ ɔ ye ewole ɛzɛkye agyalɛ,” “yeyɛ ɛtane yetia ɔ ye” nwtsty ngilenu maa Mk 10:4, 11) Gyisɛse hwenle adwenle ziele zo kɛ Gyihova a hyehyɛle agyalɛ a. (Maake 10:2-12) Ɔwɔ kɛ kunli nee yelɛ yɛ “nwonane ko” na bɛbɔ nu bɛtɛnla dahuu. Debie mɔɔ Ngɛlɛlera ne ka kɛ awie bahola agyinla zo abɔ ewole la a le “adwɔmane ɛbɛla” na yɛnwu ɛhye wɔ Mateyu kɛlɛtokɛ ne anu.​—Mt 19:9.

Ɛnɛ, menli dɔɔnwo ɛnnwu agyalɛ kɛ mɔɔ Gyisɛse nwunle ye la na emomu kɛ mɔɔ Falasiima ne nwunle ye la. Saa ngyegyelɛ ba a, bɛpele bɛ nwo bɛbɔ ewole. Kilisiene agyalɛma ɛnle zɔ, bɛbu bɛ agyalɛ ndane ne kɛ anyebolo wɔ nu, na saa ngyegyelɛ ba a, bɛfa Baebolo ngyinlazo bɛdi gyima na bɛsiezie.Saa ɛnea Ɛlɔlɛ Nee Ɛbulɛ Ka Abusua Bɔ Nu vidio ne ɛwie a, bua kpuya ɛhye mɔ:

• Kɛzi ɛbahola wɔava Mrɛlɛbulɛ 15:1 ne wɔali gyima wɔ wɔ agyalɛ nu ɛ, na kɛzi ɛhye anwo hyia ɛ?

• Saa ɛfa Mrɛlɛbulɛ 19:11 ne ɛyɛ gyima a, kɛzi ɛbahola wɔahoati ngyegyelɛ ɛ?

• Saa wɔ agyalɛ ne ɛdwu ɛleka mɔɔ asɛɛ yezɛkye yewie a, kɛ anrɛɛ ɛbazuzu ewolebɔlɛ nwo la, kpuya boni mɔ a ɔwɔ kɛ ɛdwenle nwo a?

• Kɛzi Mateyu 7:12 mɔɔ ɛbava wɔayɛ gyima la baboa wɔ yeamaa wɔayɛ kunli anzɛɛ yelɛ kpalɛ ɛ?