Ndeanlɛ kile adehilelɛ yɛɛ ndetelɛ, noko eza ɔkola ɔkile ɛdenrɛdenrɛlɛ yɛɛ anzohwenlɛ. Gyihova tea yɛ amaa yɛazonle ye wɔ adenle mɔɔ ɔdie ɔto nu la azo. (Wlo 12:1; Hi 12:10, 11) Ɔdwu mekɛ ne bie a, ɔyɛ nyane, noko ɔmaa yɛyɛ mɔɔ tenrɛ la na yɛnyia nyilalɛ. (Mrɛ 10:7) Duzu a ɔwɔ kɛ menli mɔɔ fa ndeanlɛ maa yɛɛ menli mɔɔ die la kakye a?

Menli mɔɔ fa ndeanlɛ maa. Ɔwɔ kɛ asafo mgbanyima, awovolɛ, nee awie mɔ gyɛne fi atiakunlukɛnlɛma nee ɛlɔlɛ nu fa ndeanlɛ maa kɛ mɔɔ Gyihova yɛ la. (Gyɛ 46:28) Saa ɔhyia kɛ bɛfa ndeanlɛ mɔɔ anloa yɛ se la bɛmaa bɔbɔ a, ɔwɔ kɛ bɛfi ɛlɔlɛ nu bɛyɛ zɔ.​—Ta 1:13.

Menli mɔɔ die ndeanlɛ. Ɔnva nwo kɛzi ndeanlɛ ne de biala la, ɔnle kɛ yɛkpo, emomu ɔwɔ kɛ yɛfa yɛyɛ gyima ndɛndɛ. (Mrɛ 3:11, 12) Kɛ menli mɔɔ yɛnli munli la, yɛhyia ndeanlɛ nwo ɔnva nwo adenle mɔɔ yɛdua zo yɛnyia ye la. Yɛnyia bie yɛfi Baebolo ɛgengalɛ nu anzɛɛ edwɛkɛ mɔɔ yɛte ye wɔ debiezukoalɛ bo la anu. Ɔdwu mekɛ ne bie a, edwɛkɛlilɛ kɔmatii ne noko tea yɛ. Saa yɛdie yɛto nu na yɛfa yɛyɛ gyima a, ɔbaboa yɛ dahuu.​—Mrɛ 10:17.

NEA “GYIHOVA TEA BƐDABƐ MƆƆ ƆKULO BƐ LA” VIDIO NE NA BUA KPUYA ƐHYE MƆ:

• Kɛzi ɛnee Canon ɛbɛlabɔlɛ de ɛ, na kɛzi ɔhakyile ɛ?

• Ndeanlɛ mɔɔ vi ɛlɔlɛ nu la boni a ɔnyianle ɔvile Gyihova ɛkɛ a?

• Duzu a yɛsukoa yɛfi ye anwubielɛ ne anu a?