Daselɛlilɛ ayia le kɛ asafo ayia mɔɔ ɛha la, ɔle nziezielɛ mɔɔ ɔvi Gyihova ɛkɛ mɔɔ boa yɛ ɔmaa yɛmaa yɛ nwo anwosesebɛ yɛkɔ ɛlɔlɛ nee gyima kpalɛ ɛyɛlɛ nu a. (Hi 10:24, 25) Ɔwɔ kɛ daselɛlilɛ ayia ne mɔɔ ekpunli ne mɔ ɛhyɛlɛ, azɛlɛsinli ne ɛhyɛlɛ nee asɔneyɛlɛ boka nwo la yɛ mitini nnu mɔɔ kɔ nsuu ala. (Saa daselɛlilɛ ayia ne doa debiezukoalɛ zo a, yemɔ ɔnle kɛ ɔdwu bɔbɔ.) Ɔwɔ kɛ ahenle mɔɔ banlea ayia ne azo la fa nzuzulɛ mɔɔ baboa bɛdabɛ mɔɔ bɛwɔ ayia ne abo kenle zɔhane la maa. Kɛ neazo la, kɛmɔ nolobɔlɛma dɔɔnwo mɔɔ kɔ daselɛlilɛ wɔ Folɛ la ɛngɔ bie wɔ dapɛne ne anu la ati, bie a ɔbayɛ kpalɛ kɛ bɛbazuzu edwɛkɛ mɔɔ ɔwɔ kɛ bɛka la anwo. Ninyɛne mɔɔ baboa la boni mɔ a ɔwɔ kɛ bɛsuzu nwo a?

• Adwelielilɛ nwo neazo ne mɔɔ wɔ Yɛ Kilisiene Ɛbɛlabɔlɛ Nee Yɛ Ɛzonlenlɛ​—Nyianu Buluku ne anu la

• Kɛzi bɛbahola bɛava amaneɛbɔlɛ anzɛɛ edwɛkɛ bie mɔɔ ɛzi kenlensa ye la bɛabɔ adwelielilɛ bo la

• Kɛzi bɛbabua edwɛkɛ mɔɔ bɛta bɛfa bɛpɛ adawubɔlɛ zo la

• Kɛzi bɛ nee awie mɔɔ ɔnlie ɔnli kɛ Nyamenle wɔ ɛkɛ, awie mɔɔ die ngakyihakyililɛ di, awie mɔɔ ka aneɛ gyɛne, awie mɔɔ wɔ ɛzonlenlɛ mɔɔ bie ɛnle bɛ azɛlɛsinli ne anu bɛali adwelie la

• Kɛzi bɛbahola bɛava ninyɛne mɔɔ wɔ jw.org wɛbsaete ne azo, JW Library^® app anzɛɛ ninyɛne mɔɔ wɔ Baebolo ne anu bɛali gyima la

• Kɛzi bɛbava Ninyɛne Titili Mɔɔ Yɛfa Yɛkilehile la bɛali gyima la

• Kɛzi bɛbayɛ daselɛlilɛ afoa ngakyile le kɛ telefonu zo daselɛlilɛ, kɛlata ɛhɛlɛlɛ, bagua nu daselɛlilɛ, sia kɔkpɔla anzɛɛ Baebolo ɛzukoalɛ la

• Bɛbahola bɛava ngakyelɛ mɔɔ fale banebɔlɛ, yɛ edwɛkɛ mɔɔ ɔwɔ kɛ yɛkakyihakyi nu, subane kpalɛ, adwenle kpalɛ anzɛɛ ninyɛne gyɛne mɔɔ le kɛ ɛhye mɔ anwo la bɛamaa

• Bɛbahola bɛazuzu Maa Ɛ Nye Ɛbolo Ɛgengalɛ Nee Ngilehilelɛ Nwo brohyua ne anu ɛzukoalɛdeɛ bie anzɛɛ vidio ne bie mɔ anwo

• Kɛzi ɛbamaa ahenle mɔɔ ɛ nee ye lua daselɛlilɛ nu anwosesebɛ na wɔaboa ye la

• Ngɛlɛlera anzɛɛ anwubielɛ bie mɔɔ maa anwosesebɛ mɔɔ fale daselɛlilɛ nwo la