Gyisɛse bɔle “Nyamenle Belemgbunlililɛ ne anwo edwɛkpa ne nolo.” (Lu 4:43) Ɔhilehilele menli kɛ bɛyɛ Belemgbunlililɛ ne anwo asɔne. (Mt 6:9, 10) Wɔ November, yɛbayɛ biala mɔɔ yɛbahola la yɛabɔ Nyamenle Belemgbunlililɛ ne nolo. (Mt 24:14) Yɛ ngyehyɛleɛ mɔɔ ɔbaboa wɔ yeamaa wɔava ɛ nwo wɔawula nolobɔlɛ titili ɛhye anu la kpalɛ. Bɛdabɛ mɔɔ bɛbayɛ adekpakyelɛ boavolɛ la bahola ava dɔnehwele 30 anzɛɛ 50 ayɛ daselɛlilɛ gyima ne wɔ siane ɛhye anu.

Ka ngɛlɛlera mɔɔ ɔfale Nyamenle Belemgbunlililɛ ne anwo la anwo edwɛkɛ kile menli dɔɔnwo wɔ wɔ azɛlɛsinli ne anu. Saa ɛlɛkpa ngɛlɛlera bie a, suzu ɛzonlenlɛ ngakyile mɔɔ wɔ tievolɛma wɔ nu la anwo. Saa awie kile nwolɛ anyelielɛ wɔ mekɛ mɔɔ limoa la a, fa maanlema Ɛzinzalɛ Arane No. 2 2020 ne ko maa ye. Akee yɛ ye ndɛ sia kɔkpɔla ye na bɔ mɔdenle kɛ ɛbava Ninyɛne Titili Mɔɔ Yɛfa Yɛkilehile la ko ɛ nee ye abɔ Baebolo ɛzukoalɛ bo. Ɔnrɛhyɛ fee, Nyamenle Belemgbunlililɛ ne barazɛkye arelemgbunlililɛ kɔsɔɔti mɔɔ dwazo tia ye la. (Da 2:44; 1Kɔ 15:24, 25) Ɛhye ati, bɛmaa yɛyɛ biala mɔɔ yɛbahola la wɔ mekɛ titili ɛhye anu na yɛhile kɛ yɛgyi Gyihova nee ye Belemgbunlililɛ ne anzi!