Gyisɛse holale lile Samɛleanli raalɛ ne daselɛ wɔ mekɛ mɔɔ ɛnee ɔnle daselɛlilɛ nu la ɔluakɛ ɔvale adwelielilɛ a ɔbɔle ɔ bo a. Kɛ ɔkɛyɛ na yɛanyia anyuhɔlɛ wɔ kɛzi yɛbabɔ ɔ bo yɛ nee menli mɔɔ yɛnze bɛ la ali adwelie ɛ?

• Da agɔnwolɛvalɛ subane ali na ɛ nee menli ɛdendɛ. Ɛnee Gyisɛse ɛvɛ ɛdeɛ, noko ɔluale nzule mgbane mɔɔ ɔzɛlɛle la azo ɔbɔle adwelielilɛ bo. Yemɔti ɛbahola wɔabiza ahenle ahye wɔava wɔabɔ ɔ bo. Ɛbahola wɔaha kɛzi maanle nu ɛyɛ, anzɛɛ wɔaha ninyɛne mɔɔ ɛlɛkɔ zo kenlensa ye la anwo edwɛkɛ. Kakye kɛ bodane ne a le kɛ ɛbɔ adwelielilɛ bo, ɔti ka debie mɔɔ ahenle anye balie nwo la anwo edwɛkɛ. Saa yeambua wɔ a, ɛnee ɛtɛminlinle debie biala. Kɔ awie fofolɛ ɛkɛ. Sɛlɛ Gyihova ɛkɛ ne akɛnrasesebɛ.​—Ni 2:4; Gyi 4:29.

• Maa ɛ nye ɛla ɛkɛ amaa saa nwolɛ adenle ne buke a wɔabɔ edwɛkpa ne nolo, noko mmapele ɛ nwo. Maa adawubɔlɛ mumua ne ɛva ɔ nwo ɛrɛla. Saa ɛpele ɛ nwo a, ahenle ɛnrɛbuke ye nu na ɔbazi adawubɔlɛ ne adenle. Saa adawubɔlɛ ne ba awieleɛ na wɔangola wɔanli daselɛ a, mmamaa ɛ sa nu to. Saa ɔyɛ se ɔmaa wɔ kɛ ɛbali daselɛ a, bɔ ɔ bo kɛ ɛ nee menli bali adwelie mɔɔ tɛ ye bodane a le kɛ ɛdi daselɛ. [Ye vidio 1 na bɛzuzu nwolɛ.]

• Bɔ mɔdenle kpondɛ nwolɛ adenle ka wɔ diedi ne anwo edwɛkɛ kpalɛ mɔɔ ɔbahola yeamaa wɔ tievolɛ ne abiza kpuya mɔɔ ɛbahola wɔalua zo wɔali ye daselɛ la. Gyisɛse hanle azibɛnwo edwɛkɛ bie na ɛhye maanle raalɛ ne bizale ye kpuya ngakyile. Mɔɔ ɔbɔle ɔ bo kɛ ɔka edwɛkpa ne la, ɛnee ɔlɛbua raalɛ ne kpuya ne mɔ. [Ye vidio 2 na bɛzuzu nwolɛ, akee ye vidio 3 na bɛzuzu nwolɛ.]