Baebolo ne ɛnle buluku gyɛne bie ala. Folɛdulɛ kpalɛ mɔɔ vi yɛ Bɔvolɛ ne ɛkɛ la wɔ nu. (2 Temɔte 3:16) Edwɛkɛ mɔɔ wɔ nu la kola nyia yɛ nwo zo tumi. Nɔhalɛ nu, Baebolo ne ka kɛ: “Nyamenle Edwɛkɛ ne gyi zo na ɔyɛ se.” (Hibuluma 4:12) Ɔlɛ tumi mɔɔ ɔkola ɔmaa yɛ ɛbɛlabɔlɛ yɛ kpalɛ wɔ ndenle nwiɔ azo​—ɔmaa yɛ adehilelɛ wɔ ɛbɛlabɔlɛ nu kɛkala yɛɛ ɔmaa yɛnwu Nyamenle nee ye ɛwɔkɛ ne mɔ.​—1 Temɔte 4:8; Gyemise 4:8.

Ɔbamaa wɔ ɛbɛlabɔlɛ ayɛ kpalɛ ɛnɛ. Baebolo ne kola boa ɛdawɔ mumua ne. Ɔfa folɛdulɛ kpalɛ ɔmaa wɔ edwɛkɛ ɛhye mɔɔ anwo.

•   Ɛ nee mbusuafoɔ nee awie mɔ avinli agɔnwolɛvalɛ.​—Ɛfɛsɛsema 4:31, 32; 5:22, 25, 28, 33.

• Nganeɛdelɛ nu nee wɔ kpɔkɛdelɛ.​—Edwɛndolɛ 37:8; Mrɛlɛbulɛ 17:22.

• Ɛbɛlabɔlɛ kpalɛ nwo ngyinlazo nwo.​—1 Kɔlentema 6:9, 10.

• Kɛzi yɛbali yɛ nwonane afoa nu ngyianlɛ nwo gyima la.​—Mrɛlɛbulɛ 10:4; 28:19; Ɛfɛsɛsema 4:28. *

Agyalɛma bie mɔɔ bɛwɔ Asia la anye liele nvasoɛ mɔɔ wɔ Baebolo folɛdulɛ zo la anwo kpalɛ. Kɛ mɔɔ bɛdabɛ mɔɔ bɛgya fofolɛ yɛ la, bɛpele kpalɛ na bɛahola bɛazukoa bɛ nwo na eza bɛali adwelie. Noko, bɛbɔle ɔ bo kɛ bɛfa mɔɔ bɛzukoale ye wɔ Baebolo ne anu la bɛali gyima. Duzu a vile nu rale a? Vicent, mɔɔ le kunli ne la ka kɛ: “Mɔɔ menzukoale ye wɔ Baebolo ne anu la boale me maanle menluale ɛlɔlɛ adenle zo menlile ngyegyelɛ mɔɔ wɔ yɛ agyalɛ ne anu la anwo gyima. Baebolo ngyinlazo ɛmaa yɛ nye ɛlie wɔ ɛbɛlabɔlɛ nu.” Ɔ ye, Annalou se: “Neazo ngakyile mɔɔ yɛgengale ye wɔ Baebolo ne anu la ɛboa yɛ. Kɛkala me nye die na me kunlu dwo yɛ agyalɛ ne nee yɛ ɛbɛlabɔlɛ nu bodane ne mɔ anwo.”

Kɛzi yɛnwu Nyamenle la. Saa ɛfa ye agyalɛ nu edwɛkɛ ne ɛsie ahane a, Vicent eza hanle kɛ: “Baebolo ɛgengalɛ ɛmaa mebikye Gyihova kpalɛ medɛla mekɛ biala.” Vicent edwɛkɛ ne maa yɛnwu debie mɔɔ anwo hyia la​—Baebolo ne bahola aboa wɔ yeamaa wɔanwu Nyamenle kpalɛ. Saa ɛyɛ zɔ a, ɛbanyia ye folɛdulɛ zo nvasoɛ na wɔanwu Nyamenle kɛ ɛ gɔnwo. Ɛbanwu kɛ yeha kenle bie asetɛnla kpalɛ nwo edwɛkɛ dɔɔnwo, mekɛ mɔɔ ɛbanyia “nɔhalɛ ngoane” ne mɔɔ badɛnla ɛkɛ dahuu la. (1 Temɔte 6:19) Ɛhye le debie mɔɔ buluku gyɛne biala ɛnga nwolɛ edwɛkɛ a.

Saa ɛyɛ ngyehyɛleɛ kɛ ɛbagenga Baebolo ne dahuu a, ɛdawɔ noko ɛbanyia nvasoɛ ɛhye bie​—wɔ ɛbɛlabɔlɛ bayɛ kpalɛ ɛnɛ na wɔanwu Nyamenle kpalɛ. Noko, saa ɛlɛkenga Baebolo ne a, bie a ɛbadwenle kpuya dɔɔnwo anwo. Saa ɔba ye zɔ a, kakye Yiteyopeanli sonvolɛ kpanyinli ne mɔɔ dɛnlanle aze ɛvolɛ 2,000 mɔɔ ɛpɛ nu la neazo ne. Ɛnee ɔlɛ Baebolo ne anwo kpuya dɔɔnwo. Mɔɔ bɛbizale ye kɛ ɔte mɔɔ ɔlɛkenga abo la, ɔbuale kɛ: “Na kɛ mesi meyɛ mete ɔ bo ɛ? Kyesɛ awie kilehile nu kile me.” * Ɔnyianle moalɛ ɔvile Felepe mɔɔ ɛnee le Baebolo kilehilevolɛ mɔɔ fɛta na ɔle Gyisɛse ɛdoavolɛ la ɛkɛ. (Gyima ne 8:30, 31, 34) Ɔti, saa ɛkulo kɛ ɛnwu dɔɔnwo ɛfale Baebolo ne anwo a, yɛse wɔ kɛ dua yɛ yintanɛte, www.pr418.com/nzi azo fa wɔ ademizalɛ ne nwa anzɛɛ dua adelɛse ne mɔɔ wɔ magazine ɛhye anu la azo kɛlɛ yɛ. Ɛbahola wɔanwu Gyihova Alasevolɛ mɔɔ bikye wɔ la anzɛɛ kɔ Belemgbunlililɛ Asalo mɔɔ wɔ ɛleka mɔɔ ɛde la. Duzu ati a ɛnlie Baebolo ne bie ɛnɛ, na ɛmmaa ɔngile wɔ ɛbɛlabɔlɛ kpalɛ adenle ɛ?