YƐ ƐZONLENLƐ gyima ne anwo hyia yɛɛ ɔsonle bolɛ. Noko tɛ awie biala mɔɔ yɛdi ye daselɛ la a te ɔ bo zɔhane a. Saa menli ne bie mɔ anye die mɔɔ Baebolo ne ka la anwo bɔbɔ a, bɛnda bɛnde nganeɛ kɛ ɔwɔ kɛ bɛmaa yɛ nee bɛ sukoa Nyamenle Edwɛkɛ ne.

Fa Gavin kɛ neazo. Ɛnee ɔkɔ debiezukoalɛ noko ɛnee ɔngulo kɛ bɛ nee ye sukoa Baebolo ne. Gavin se ɔnze Baebolo ne anwo edwɛkɛ dɔɔnwo yemɔti ɔngulo kɛ awie mɔ banwu ye. Ɛnee ɔsulo kɛ bɛbaha kɛ ɔva ɔ nwo ɔwula ɛzonlenlɛ bie anu, yɛɛ ɛnee ɔngulo kɛ bɛyɛ ye koasea. Kɛzi ɛdwenle nwo ɛ? Asoo awie bahola aboa Gavin? Dwenle kɛzi Baebolo ngilehilelɛ kola boa awie la anwo. Gyihova hanle hilele Yizilayɛma kɛ: “Me ɛdendɛlɛ bavie kɛ ɛbɔlɛ. Me ɛdendɛlɛ bayɛ kɛ nyenyesuo mɔɔ gugua ndile zo.” (Mɛla ne 31:19, 30; 32:2) Maa yɛzukoa ɛbɔlɛ nwo debie ekyi na yɛva yɛtoto yɛ ɛzonlenlɛ gyima ne anwo amaa yɛahola yɛaboa “menli kɔsɔɔti” kpalɛ.​—1 Temɔte 2:3, 4.

Ɛbɔlɛ ɛndɔ gidigidi. Kpukpuke mɔɔ wɔ anwomanyunlu la a kakyi ngyikyingyikyi yɛ ɛbɔlɛ a. Kɛzi Gyihova ɛdendɛlɛ viele “kɛ ɛbɔlɛ” ɛ? Ɔdendɛle ɔhilele ye menli ne wɔ adenle mɔɔ ɔle kɛnlɛma, ɔle bɛtɛɛ na ɔkile kɛ ɔdwenle bɛ nwo la azo. Saa yɛkile ɛbulɛ yɛmaa awie mɔ wɔ mɔɔ bɛdie bɛdi la anwo a, ɛnee yɛlɛsukoa Gyihova. Yɛboa bɛ yɛmaa bɛdwenle ninyɛne nwo na bɛsi bɛ ti anwo kpɔkɛ. Saa yɛkile menli nwo anyelielɛ zɔhane a, bɛbadie mɔɔ yɛka la na yɛ ɛzonlenlɛ gyima ne bazo ma kpalɛ.

Ɛbɔlɛ maa ahonle tɔ azule nu. Saa yɛdwenle ndenle ngakyile mɔɔ yɛbalua zo yɛaboa awie mɔ yɛamaa bɛazukoa nɔhalɛ ne la anwo a, yɛ ɛzonlenlɛ gyima ne bamaa bɛ ahonle adɔ bɛ azule nu. Adiema bie mɔɔ bɛfɛlɛ ye Chris mɔɔ limoale hanle kɛ ɔ nee Gavin sukoa Baebolo ne la antinlitinli ɔ nwo zo. Emomu, ɔbɔle mɔdenle ɔkpondɛle ndenle ngakyile mɔɔ ɔdua zo a Gavin anye balie Baebolo ne ɛzukoalɛ nwo la. Chris hanle hilele Gavin kɛ bɛhilehile edwɛkɛ bie mɔɔ hyia la anu wɔ Baebolo ne anu amuala ɔti saa ɔsukoa Baebolo ne a, ɔbaboa ye yeamaa yeade debiezukoalɛ ne abo kpalɛ. Akee Chris hanle kɛ Baebolo nu ngapezo maanle ɔdaye mumua ne ɔnwunle kɛ Baebolo ne le nɔhalɛ. Ɛhye maanle bɛbɔle kɛzi ngapezo ne mɔ rale nu la anwo adawu dɔɔnwo. Adawubɔlɛ ɛhye mɔ maanle Gavin ahonle dɔle ye azule nu na akee ɔliele ɔdole nu kɛ ɔ nee ye ɛzukoa Baebolo ne.

Ɛbɔlɛ hyia amaa yɛadɛnla ngoane nu. Saa ɔdwu wawaa mekɛ nu mɔɔ maanle nu dɔ kpalɛ wɔ Yizilayɛ la a, bie a siane dɔɔnwo bapɛ nu ɛnee ezule ne ɛtɛtɔle. Saa ɛbɔlɛ ne noko andɔ a, mbaka ne mɔ we na bɛwu. Gyihova hanle yɛ mekɛ ye azo anwo edwɛkɛ dole ɛkɛ kɛ wawaa bie bara, mɔɔ yemɔ a le Gyihova “edwɛkɛ ne anwo ɛhɔne nee nzuhɔne” mɔɔ ɔbahu menli la. (Emɔso 8:11) Ɔbɔle ɛwɔkɛ kɛ menli mɔɔ bɛkpokpa bɛ la bayɛ kɛ ‘ɛbɔlɛ mɔɔ Gyihova ɛlɛmaa yeadɔ’ wɔ mekɛ mɔɔ bɛlɛka Belemgbunlililɛ ne anwo edwɛkpa ne na ‘mboane gyɛne’ ne ɛlɛboa bɛ la. (Maeka 5:7; Dwɔn 10:16) Edwɛkɛ ne mɔɔ yɛka la boka nziezielɛ mɔɔ Gyihova ɛyɛ kɛ ɔbamaa menli mɔɔ nɔhalɛ ne anwo ɛhɔne ɛlɛku bɛ la ngoane la anwo. Asoo edwɛkɛ ɛhye sonle bolɛ maa yɛ?

Ɛbɔlɛ le nyilalɛ mɔɔ vi Gyihova ɛkɛ. (Mɛla ne 33:13) Yɛ ɛzonlenlɛ gyima ne bahola ayɛ nyilalɛ anzɛɛ ahyɛlɛdeɛ amaa menli mɔɔ bɛtie yɛ la. Baebolo ɛzukoalɛ yɛle nyilalɛ maanle Gavin ɔluakɛ ɔboale ye ɔmaanle ɔnyianle ye kpuya ne mɔ amuala anwo mualɛ. Ɔnyianle anyuhɔlɛ ndɛndɛ, bɛzɔnenle ye, na kɛkala ɔ nee ɔ ye Joyce anye die kɛ bɛbabɔ edwɛkpa ne nolo.

Saa yɛfa yɛ edwɛkɛhanlɛ gyima ne yɛtoto ɛbɔlɛ nwo a, ɔbaboa yɛ yeamaa yɛanwu kɛ mɔdenle mɔɔ yɛ nuhua ko biala bɔ wɔ ɛzonlenlɛ gyima ne anu la sonle bolɛ. Adenle boni azo? Saa nzule kpɔnwo ko biala pe a, ɔboa ekyi, noko saa ɛbɔlɛ ne tɔ kpalɛ a, ɔmaa azɛlɛ ne doa. Zɔhane ala a bie a mɔɔ yɛyɛ ye wɔ ɛzonlenlɛ gyima ne anu la bayɛ yɛ nye zo ekyi a. Noko saa yɛfa Gyihova azonvolɛ mgbe dɔɔnwo ne gyima ne yɛbɔ nu a, yɛdi daselɛ wɔ “aleɛabo amuala.” (Mateyu 24:14) Yɛ ɛzonlenlɛ gyima ne bayɛ nyilalɛ mɔɔ Gyihova ɛlɛfa amaa awie mɔ ɔ? Ɛhɛe, yɛ edwɛkɛ ne bayɛ kɛ ɛbɔlɛ, ɔnrɛyɛ gidigidi, ɔbamaa awie mɔ ahonle adɔ bɛ azule nu na yeamaa bɛanyia ngoane!