1. Kɛ ɔkɛyɛ na yɛadie Gyihova nee alesama arane ne mɔ ɛ?

BAEBOLO ne kilehile yɛ kɛ yɛdie alesama arane, noko eza ɔka ɔkile yɛ kɛ yɛlimoa yɛdie Nyamenle. (Gyima ne 5:29; Taetɛse 3:1) Kɛ ɔkɛyɛ na yɛahola yɛayɛ ɛhye ɛ? Gyisɛse hilehilele ngyinlazo bie mɔɔ ɔbaboa yɛ yeamaa yɛanwu awie mɔɔ ɔwɔ kɛ yɛtie ye la anu. Ɔhanle kɛ ‘yɛva mɔɔ le Siza ɛdeɛ la yɛmaa ye, na yɛva mɔɔ le Nyamenle ɛdeɛ noko la yɛmaa ye.’ ^[1] (Nea awieleɛ edwɛkɛ ne.) (Mateyu 22:21) Saa yɛdi arane mɛla ne mɔ azo, yɛda ɛbulɛ ali yɛkile arane mgbanyima na yɛtua adwule a, ɛnee yɛlɛfa mɔɔ le ‘Siza ɛdeɛ la yɛamaa ye.’ (Wulomuma 13:7) Noko saa arane ne ka kɛ yɛyɛ debie mɔɔ Nyamenle ɛngulo la a, yɛnyɛ, na yɛyɛ zɔ wɔ ɛbulɛ adenle zo dahuu.

2. Duzu a yɛyɛ yɛkile kɛ yɛngyi afoa biala wɔ ewiade ne maanyɛlɛ nu a?

² Adenle ko mɔɔ yɛdua zo yɛfa ‘mɔɔ le Nyamenle ɛdeɛ yɛmaa ye’ la a le kɛ yɛbahwe yɛ nwo yɛavi maanyɛlɛ nwo. Yɛngyinla afoa biala. (Ayezaya 2:4) Kɛmɔ Gyihova ɛmaa alesama arane ne mɔ adenle kɛ bɛli tumi la ati, yɛndwazo yɛntia  bɛ. Eza yɛnva yɛ nwo yɛnwula maanlehulolɛ nyɛleɛ biala anu. (Wulomuma 13:1, 2) Yɛmbɔ mɔdenle kɛ yɛbahakyi arane ne mɔ anzɛɛ yɛbaboa maanyɛlɛma, yɛɛ yɛndo ɛra anzɛɛ yɛngyinla kɛ bɛdo ɛra bɛmaa yɛ.

3. Duzu ati a ɔnle kɛ yɛgyinla afoa biala ɛ?

³ Ninyɛne dɔɔnwo ati a Nyamenle se yɛmmagyinla afoa biala a. Ko a le kɛ yɛsukoa Gyisɛse mɔɔ ɛnee ‘ɔnle ewiade ne ɛdeɛ’ la. Yeanva ɔ nwo yeanwulowula maanyɛlɛ anzɛɛ konle nu ɛlɛ. (Dwɔn 6:15; 17:16) Debie bieko a le kɛ yɛgyi Nyamenle Belemgbunlililɛ ne anzi. Kɛmɔ yɛngyinla alesama arane ne mɔ anzi la ati, yɛfa adwenle mɔɔ anu te la yɛbɔ nolo kɛ Nyamenle Belemgbunlililɛ ne ala a bahola aye alesama ngyegyelɛ kɔsɔɔti avi ɛkɛ a. Adalɛ ɛzonlenlɛ fa bɛ nwo wula maanyɛlɛ nu, na ɛhye kpakyekpakye menli avinli. Noko kɛmɔ yɛngyi afoa biala la ati, koyɛlɛ wɔ yɛ nee yɛ mediema mɔɔ wɔ ewiade amuala la avinli.​—1 Pita 2:17.

4. (a) Kɛzi yɛkola yɛnwu kɛ ɔbayɛ se kɛ yɛnrɛgyinla afoa biala ɛ? (b) Duzu ati a ɔwɔ kɛ yɛsiezie yɛ nwo kɛkala kɛ yɛnrɛgyinla afoa biala ɛ?

⁴ Bie a yɛde ɛleka mɔɔ menli anye ɛnla kɛ yɛbava yɛ nwo yɛawula maanyɛlɛ nu la. Noko mekɛ mɔɔ yɛlɛbikye Seetan ewiade ne awieleɛ kpalɛ la, ɛnee ɔlɛyɛ se kɛ yɛnrɛgyinla afoa biala. Ɛnɛ, menli ‘di mgbonde’ anzɛɛ bɛ nee bɛ ɛnyɛ ngyehyɛleɛ yɛɛ ‘bɛ ti yɛ se,’ na bɛ nuhua bakpakyekpakye kpalɛ bɔbɔ. (2 Temɔte 3:3, 4) Nzenzaleɛ mɔɔ ɛra maanyɛlɛ nu arɛlevilɛ nu wɔ maanle bie mɔ anu la ati, yɛ mediema dɔɔnwo anwo ɛhyele bɛ. Ɛhye ati a ɔhyia kɛ yɛsiezie yɛ nwo kɛ yɛnrɛgyinla afoa biala saa bɔbɔ tɛnlabelɛ ne anu yɛ se a. Bɛmaa yɛzuzu ninyɛne nna mɔɔ yɛbahola yɛayɛ yɛaziezie yɛ nwo la anwo.

5. Kɛzi Gyihova bu alesama arane ne mɔ ɛ?

⁵ Adenle ko mɔɔ yɛbalua zo yɛaziezie yɛ nwo kɛkala na yɛangyinla afoa biala la a le kɛ yɛbabu alesama arane kɛ mɔɔ Gyihova bu bɛ la. Gyihova bɔle alesama la, yeammaa bɛ adenle kɛ bɛnlea bɛ gɔnwo dasanli nwo zo. (Gyɛlɛmaya 10:23) Ɔbu alesama kɔsɔɔti kɛ bɛle abusua ko. Noko arane ne mɔ ɛkpakyekpakye menli nu ɔluakɛ biala se ye maanle ɛdeɛ ne a le kpalɛ a. Saa arane ne mɔ le kpalɛ bɔbɔ a, bɛnrɛhola bɛnrɛli alesama ngyegyelɛ kɔsɔɔti anwo gyima. Eza bɛrayɛ Nyamenle Belemgbunlililɛ ne mɔɔ bɔle ɔ bo kɛ ɔdi tumi wɔ 1914 la agbɔvolɛ. Ɔnrɛhyɛ Belemgbunlililɛ ɛhye baye alesama arane ne mɔ kɔsɔɔti avi ɛkɛ.​—Kenga Edwɛndolɛ 2:2, 7-9.

6. Kɛzi ɔwɔ kɛ yɛ nee menli mɔɔ lɛ tumi wɔ alesama arane ne mɔ anu la di ɛ?

⁶ Nyamenle ɛmaa alesama arane ne mɔ adenle yemaa bɛdɛnla ɛkɛ ɔluakɛ bɛkola bɛtoto ninyɛne boɛ na bɛnea bɛmaa yɛnyia anzodwolɛ ekyi. Ɛhye boa yɛ ɔmaa yɛbɔ edwɛkpa ne mɔɔ fale Belemgbunlililɛ ne anwo la nolo. (Wulomuma 13:3, 4) Nyamenle se yɛyɛ asɔne yɛmaa menli mɔɔ  tumi wɔ bɛ sa nu la amaa yɛahola yɛazonle ye wɔ anzodwolɛ nu. (1 Temɔte 2:1, 2) Saa awie mɔ nee yɛ anli ye boɛ a, bie a yɛbava yɛ edwɛkɛ yɛado arane mgbanyima nyunlu yɛamaa bɛaboa yɛ. Zɔhane ala a Pɔɔlo yɛle a. (Gyima ne 25:11) Ɔwɔ nuhua kɛ Baebolo ne ka kɛ Seetan a sie alesama arane ne mɔ a, noko ɔnga kɛ Seetan a nea sonla ko biala mɔɔ lɛ tumi wɔ arane nu la anwo zo a. (Luku 4:5, 6) Ɔti ɔnle kɛ yɛmaa awie nyia adwenle kɛ Abɔnsam a kile arane nu kpanyinli bie adenle a. Baebolo ne ka ye wienyi kɛ ɔnle kɛ yɛyɛ awie mɔ aholoba.​—Taetɛse 3:1, 2.

7. Adwenle boni a ɔnle kɛ yɛnyia a?

⁷ Saa maanyɛlɛ nu sonla anzɛɛ ekpunli bie lɛ adwenle mɔɔ baboa yɛ bɔbɔ a, yɛngulo bie edwɛkɛ yɛngyakyi bie, yɛyɛ ɛhye yɛfa yɛtie Nyamenle. Ɔyɛ a ɛhye ɛyɛlɛ bayɛ se amaa yɛ. Kɛ neazo la, fa ye kɛ menli ɛdwazo ɛtia arane bie mɔɔ ɛmaa bɛ nwo ɛhyele bɛ kpalɛ, mɔɔ bie a Gyihova Alasevolɛ noko boka nwo la. Bie a ɛnrɛva ɛ nwo ɛnrɛwula atuadelɛ ne anu, noko asoo ɛbaha kɛ mɔɔ atuadelɛma ne ɛlɛyɛ la le kpalɛ na ɛ kunlu anu a anrɛɛ bɛli konim ɔ? (Ɛfɛsɛsema 2:2) Saa yɛmkpondɛ kɛ yɛgyinla afoa biala a, ɔnle kɛ yɛnyia adwenle kɛ afoa bie edwɛkɛ yɛ fɛ yɛɛ bie edwɛkɛ ɛnyɛ fɛ. Ɛhye bala ali wɔ yɛ edwɛkɛhanlɛ nee yɛ nyɛleɛ nu.

8. Kɛ ɔkɛyɛ na yɛamaa ‘yɛ nye ala ɛkɛ’ na yɛayɛ “bɛlɛvo” wɔ mekɛ mɔɔ ɔyɛ se kɛ yɛnrɛgyinla afoa biala la ɛ?

⁸ Adenle mɔɔ tɔ zo nwiɔ mɔɔ ɔnrɛmaa yɛnrɛgyinla afoa biala la a le kɛ ‘yɛbamaa yɛ nye ɛla ɛkɛ kɛ nwɔlɛ, na yɛayɛ bɛlɛvo kɛ abubule.’ (Kenga Mateyu 10:16, 17.) Saa yɛdimoa yɛdwenle ngyegyelɛ mɔɔ yɛbayia la anwo a, ɛnee ‘yɛ nye la ɛkɛ.’ Eza yɛyɛ “bɛlɛvo” wɔ mekɛ mɔɔ yɛnrɛgyinla afoa biala wɔ zɔhane tɛnlabelɛ ɛsesebɛ ne anu la. Bɛmaa yɛzuzu zɔhane tɛnlabelɛ ne bie mɔ ɔ nee mɔɔ yɛbahola yɛayɛ na yɛangyinla afoa biala la anwo.

9. Duzu a ɔwɔ kɛ yɛnea boɛ wɔ nwo wɔ yɛ adawubɔlɛ nu ɛ?

⁹ Adawubɔlɛ. Saa awie mɔ ɛlɛka maanyɛlɛ nwo edwɛkɛ a ɔwɔ kɛ yɛnea boɛ kpalɛ. Kɛ neazo la, saa yɛlɛka Nyamenle Belemgbunlililɛ ne anwo edwɛkɛ yɛahile awie a, yɛnrɛha kɛ yɛdie maanyɛlɛ fane bie anzɛɛ bɛ kpanyinli ne nzuzulɛ yɛto nuhua anzɛɛ yɛnlie yɛndo nu. Kɛ anrɛɛ ɛbaha mɔɔ alesama kpondɛ kɛ bɛyɛ bɛdi yɛ ngyegyelɛ nwo gyima la, maa bɛnwu kɛzi Belemgbunlililɛ ne bali nwolɛ gyima bɔkɔɔ la wɔ Baebolo ne anu. Saa awie mɔ kpondɛ kɛ bɛsu menli mɔɔ bɛ awodeɛ le ko la agyalɛ anzɛɛ ɛkolɛyelɛ nwo kpolera a, ka mɔɔ Baebolo ne ka wɔ nwolɛ la nee kɛzi ɛlɛfa wɔali gyima wɔ wɔ ɛbɛlabɔlɛ nu la kile bɛ. Saa awie ka kɛ ɔwɔ kɛ bɛye mɛla bie mɔ bɛfi ɛkɛ anzɛɛ bɛkakyi bɛ a, yɛnva yɛ nloa yɛndo nu yɛɛ yɛnga kɛ ahenle noko ɛhakyi ye adwenle.

10. Kɛ ɔkɛyɛ na yɛangyinla afoa biala wɔ mekɛ mɔɔ yɛlɛnea anzɛɛ yɛlɛkenga amaneɛbɔlɛ edwɛkɛ bie la ɛ?

¹⁰ Amaneɛbɔlɛ ninyɛne. Ɔdwu mekɛ ne bie a menli mɔɔ tendɛ wɔ TV nee riledio zo anzɛɛ bɛkɛlɛ adwelie ngɛlata la edwɛkɛhanlɛ kile kɛ bɛgyi afoa bie. Ɛhye ta si wɔ maanle maanle mɔɔ arane ne a kile bɛ edwɛkɛ mɔɔ ɔwɔ kɛ bɛka la anu. Saa menli ɛhye mɔ gyinla afoa bie a, ɔwɔ kɛ yɛnea boɛ na yɛ nee bɛ anyɛ adwenle.  Kɛ neazo la, biza ɛ nwo kɛ, ‘Asoo me nye die kɛ mebadie amaneɛbɔvo bie edwɛkɛ ɔluakɛ medie maanyɛlɛ nwo edwɛkɛ mɔɔ ɔka la meto nu la ati ɔ?’ Amaa wɔangyinla afoa biala la, mmanea anzɛɛ mmakenga amaneɛbɔlɛ biala mɔɔ foa maanyɛlɛ edwɛkɛ bie azo la. Emomu bɔ mɔdenle kpondɛ amaneɛbɔlɛ mɔɔ ɛngyi afoa biala la. Akee fa mɔɔ ɛte la toto “nɔhalɛ ne mɔɔ ɛdele ɛvile” Baebolo ne anu la anwo dahuu.​—2 Temɔte 1:13.

11. Saa yɛmaa ninyɛne mɔɔ yɛlɛ la kyia yɛ a, kɛzi ɔbayɛ se kɛ yɛnrɛgyinla afoa biala ɛ?

¹¹ Anwonyia ɛhulolɛ. Saa ezukoa nee ninyɛne mɔɔ yɛlɛ la a hyia yɛ kpalɛ a, ɔbayɛ se kɛ yɛnrɛgyinla afoa biala. Wɔ 1970 anzi, ɛnee ɔwɔ kɛ Alasevolɛ mɔɔ bɛwɔ Malawi la anu dɔɔnwo ninyɛne fi bɛ sa ɔluakɛ bɛanva bɛ nwo bɛanwula maanyɛlɛ ekpunli bie anu la ati. Mɔɔ ɔyɛ alɔbɔlɛ la, ɛnee bie mɔ ɛngulo kɛ bɛ asetɛnla kpalɛ bɔ bɛ. Adiema raalɛ bie mɔɔ bɛfɛlɛ ye Ruth la hanle kɛ, “Yɛ nee bie mɔ a nriandile hɔle a, noko nzinlii bɛhɔbokale maanyɛlɛ eku ne anwo na bɛziale bɛhɔle sua nu ɔluakɛ ɛnee bɛngulo kɛ bɛtɛnla tutanema azokoɛleɛ ɛkɛ.” Noko Nyamenle menli dɔɔnwo ɛnle zɔ. Bɛngyinla afoa biala, saa ɛhye bamaa bɛ ezukoa awie anzɛɛ debie biala avi bɛ sa bɔbɔ a, bɛgyinla nuhua.​—Hibuluma 10:34.

12, 13. (a) Kɛzi Gyihova bu alesama ɛ? (b) Kɛ ɔkɛyɛ na yɛanwu kɛ yɛlɛfa ɛleka mɔɔ yɛvi la yɛammemaa yɛ nwo zo ɛ?

¹² Anwomemaazo. Menli dɔɔnwo fa bɛ aneɛ, bɛ abusua, bɛ amaamuo, bɛ sua zo nee bɛ maanle tu bɛ nloa nu. Noko Gyihova ɛnnwu ye kɛ awie anzɛɛ menli ekpunli bie le kpalɛ tɛla bie mɔ. Ɔnwu ye kɛ yɛ muala yɛsɛ. Asolo kɛzi Gyihova bɔle yɛ nuhua ko biala a, na yɛbahola yɛamaa yɛ nye alie menli ngakyile ɛhye anwo. Ɔmkpondɛ kɛ yɛgyakyi yɛ amaamuo ne. Noko ɔmkpondɛ kɛ yɛdwenle kɛ yɛle kpalɛ yɛtɛla awie mɔ.​—Wulomuma 10:12.

¹³ Ɔnle kɛ yɛfa yɛ maanle yɛtu yɛ nloa anu somaa na yɛdwenle kɛ ɔle kpalɛ ɔtɛla maanle gyɛne. Saa yɛdwenle zɔ a, ɔbamaa yɛayɛ se kɛ yɛnrɛgyinla afoa biala. Ɛhye bie zile wɔ alimoa Kilisienema mekɛ zo. Hibulu mediema ne mɔ nee Giliki ahunlanvolɛ mraalɛ ne mɔ anli ye boɛ. (Gyima ne 6:1) Kɛ ɔkɛyɛ na yɛanwu kɛ yɛlɛnyia anwomemaazo subane zɔhane bie ɛ? Saa adiema bie mɔɔ vi maanle gyɛne zo la maa wɔ nzuzulɛ bie a, asoo ɛka ye ndɛndɛ ɛ ti anu kɛ, ‘Yɛnyɛ ye zɔ wɔ ɛke’ na ɛkpo ye nzuzulɛ ne ɔ? Saa zɔhane a ɔde a, ɛnee kakye folɛdulɛ ɛhye: “Bɛva anwoazehanlɛ bɛbu bɛ gɔnwo mɔ bɛdɛla bɛ nwo bɔbɔ.”​—Felepaema 2:3.

14. Kɛzi asɔneyɛlɛ kola boa yɛ ɛ, na Baebolo nu neazo boni a maa yɛnwu ɛhye a?

¹⁴ Adenle mɔɔ tɔ zo nsa mɔɔ ɔnrɛmaa yɛnrɛgyinla afoa biala la a le kɛ yɛbava yɛ nwo yɛado Gyihova anwo zo. Sɛlɛ sunsum nwuanzanwuanza ne mɔɔ ɔbamaa wɔazi abotane na wɔahomo ɛ nwo zo la. Saa arane ne yɛ debie mɔɔ ɛnle kpalɛ la a, subane ɛhye mɔ baboa wɔ. Sɛlɛ Gyihova  kɛ ɔmaa wɔ nrɛlɛbɛ ɔmaa ɛnwu tɛnlabelɛ mɔɔ bie a ɔbayɛ se kɛ ɛnrɛgyinla afoa biala wɔ nu la. Sɛlɛ ye kɛ ɔboa wɔ ɔmaa ɛyɛ mɔɔ ɔle kpalɛ wɔ zɔhane tɛnlabelɛ ne anu la. (Gyemise 1:5) Bie a nɔhalɛ mɔɔ ɛdi ɛmaa Gyihova la ati bɛbado wɔ efiade anzɛɛ bɛbahwe ɛ nzo wɔ adenle bie azo. Saa ɔba ye zɔ a, sɛlɛ akɛnrasesebɛ amaa wɔahola wɔahilehile deɛmɔti ɛngyinla afoa biala la anu wienyi wɔahile awie mɔ. Nyia diedi kɛ Gyihova baboa wɔ yeamaa wɔagyinla kpundii.​—Kenga Gyima ne 4:27-31.

15. Kɛ ɔkɛyɛ na Baebolo ne aboa wɔ amaa wɔangyinla afoa biala ɛ? ( Eza nea ɛlɛka “Nyamenle Edwɛkɛ Ne Maanle Bɛnyianle Anwodozo.”)

¹⁵ Gyihova ɛva Baebolo ne ɛmaa yɛ kɛ ɔmaa yɛ anwosesebɛ. Dwenledwenle ngyehyɛnu bie mɔ mɔɔ ɔnrɛmaa ɛnrɛgyinla afoa biala la anwo. Bɔ mɔdenle kɛ ɛbazukoa ngyehyɛnu ɛhye mɔ na wɔahakye, ɔluakɛ bɛbaboa wɔ wɔ mekɛ mɔɔ ɛnlɛ Baebolo la. Eza Baebolo ne bamaa anyelazo mɔɔ ɛlɛ wɔ mɔɔ Nyamenle ka wɔ kenle bie nwo la anu amia. Yɛhyia anyelazo ɛhye na yɛahola yɛagyinla ɛkpɔlɛ nloa. (Wulomuma 8:25) Kpa ngyehyɛnu mɔɔ maa ɛnwu ninyɛne mɔ ɛbahulo kɛ ɛbayɛ wɔ ewiade fofolɛ ne anu la na pɛ ye nvoninli kɛ ɛwɔ ɛkɛ ne bie.

16, 17. Kɛzi Nyamenle azonvolɛ mɔɔ bɛangyinla afoa biala la neazo ne baboa yɛ ɛ? (Nea mɔlebɛbo nvoninli ne.)

¹⁶ Debie mɔɔ tɔ zo nna mɔɔ ɔbaboa yɛ amaa yɛangyinla afoa biala la a le kɛ yɛbadwenle Gyihova azonvolɛ mɔɔ lile nɔhalɛ la neazo ne anwo. Menli dɔɔnwo mɔɔ dɛnlanle aze wɔ tete ne la ɛnee lɛ akɛnrasesebɛ yɛɛ bɛzile kpɔkɛ mɔɔ nrɛlɛbɛ wɔ nu la na yemɔ ammaa bɛangyinla afoa biala. Dwenle Hyeedelake, Mihyake, nee Abɛdenɛgo mɔɔ bɛkpole kɛ bɛbazonle ananze ne mɔɔ ɛnee gyi ɛkɛ maa Babelɔn arane ne la neazo ne anwo. (Kenga Daneɛle 3:16-18.) Baebolo nu neazo ɛhye ɛboa Alasevolɛ dɔɔnwo ɛnɛ yemaa bɛva akɛnrasesebɛ bɛkpo kɛ bɛbabiza fɛlɛnra ahye. Gyisɛse anva ɔ nwo  anwula maanyɛlɛ nee edwɛkɛ gyɛne mɔɔ fa mgbakyemgbakyenu ba menli avinli la anu. Ɛnee ɔze kɛ ye neazo kpalɛ ne baboa ye ɛdoavolɛma ne. Ɔhanle kɛ: “Bɛgyinla kpundii. Meli ɛtane ewiade ɛhye anwo zo konim!”​—Dwɔn 16:33.

¹⁷ Alasevolɛ dɔɔnwo mɔɔ wɔ ɛkɛ ɛnɛ la ɛngyinla afoa biala. Bɛhilele bie mɔ nyane, bɛguale bie mɔ efiade, yɛ bɛhu bie mɔ bɔbɔ ɔluakɛ bɛlile nɔhalɛ bɛmaanle Gyihova la ati. Bɛ neazo ne bahola amaa yɛanyia akɛnrasesebɛ. Adiema nrenyia ko mɔɔ vi Turkey la hanle kɛ: “Kɛmɔ adiema kpavolɛ Franz Reiter amboka Hitler sogyama ne anwo la ati, bɛhunle ye. Kɛlata mɔɔ ɔhɛlɛle ye mame wɔ nɔe ne mɔɔ aleɛ kye a bɛbahu ye la kile kɛ ɛnee ɔlɛ diedi nee anwodozo kpole wɔ Gyihova anu, na mekpondɛ kɛ medi ye neazo ne anzi wɔ mekɛ mɔɔ mebayia sɔnea ɛhye bie la.” ^[2]—Nea awieleɛ edwɛkɛ ne.

18, 19. (a) Kɛ ɔkɛyɛ na wɔ asafo ne anu amra aboa wɔ amaa wɔangyinla afoa biala ɛ? (b) Duzu a wɔbɔ kpɔkɛ kɛ ɛbayɛ a?

¹⁸ Mediema mɔɔ wɔ wɔ asafo ne anu la bahola aboa wɔ amaa wɔangyinla afoa biala. Saa ɛwɔ tɛnlabelɛ mɔɔ anu yɛ se la anu a, ka kile mgbanyima ne mɔ. Bɛbamaa wɔ folɛdulɛ kpalɛ mɔɔ gyi Baebolo ne azo la. Eza saa asafo ne anu amra ze tɛnlabelɛ mɔɔ ɛwɔ nu la a, bɛbamaa wɔ anwosesebɛ. Ka kile bɛ kɛ bɛyɛ asɔne bɛmaa wɔ. Eza ɔwɔ kɛ yɛdayɛ noko yɛboa yɛ mediema na yɛyɛ asɔne yɛmaa bɛ. (Mateyu 7:12) Ɛbahola wɔanwu mediema mɔɔ bɛgua bɛ efiade la aluma wɔ edwɛkɛ, “Jehovah’s Witnesses Imprisoned for Their Faith​—By Location,” mɔɔ wɔ jw.org azo la. Kɔ NEWSROOM > LEGAL DEVELOPMENTS abo. Kpa aluma bie mɔ na sɛlɛ Gyihova kɛ ɔboa mediema ɛhye mɔ ɔmaa bɛgyinla kpundii na bɛli nɔhalɛ bɛmaa ye.​—Ɛfɛsɛsema 6:19, 20.

¹⁹ Mekɛ mɔɔ yɛlɛbikye awieleɛ ne kpalɛ la, yɛbahola yɛamaa yɛ nye ala kɛ arane ne mɔ batinlitinli yɛ kɛ yɛgyinla afoa bie. Zɔhane ati a ɔhyia kɛ yɛziezie yɛ nwo kɛkala kɛ yɛnrɛgyinla afoa biala wɔ ewiade ɛhye mɔɔ mgbakyemgbakyenu wɔ nu la anu a!