Wɔgenga Ɛzinzalɛ Arane mɔɔ ɛra kenlensa ye la kpalɛ ɔ? Nea saa ɛbahola wɔabua kpuya ɛhye mɔ a:

Ɛtane boni a Gyisɛse vale nwolɛ folɛdulɛ maanle wɔ Mateyu 18:15-17 a?

Ɛnee ɔlɛka edwɛkɛ mɔɔ wɔ Kilisienema nwiɔ avinli mɔɔ ɔwɔ kɛ bɛdabɛ mumua ne bɛsiezie la anwo edwɛkɛ. Ɛhye kola yɛ nvonleɛ anzɛɛ ɛtane mɔɔ bɛkola bɛtu awie wɔ nwolɛ a. Ɛtane zɛhae bie a le ndunlumililɛ anzɛɛ dumanzɛkyelɛ.​—w16.05, m. 7.

Kɛ ɔkɛyɛ na yɛanyia Baebolo ɛgengalɛ zo nvasoɛ kpalɛ ɛ?

Ɛbahola wɔayɛ ɛhye mɔ: Fa adwenle kpalɛ kenga, kpondɛ ɛzukoalɛdeɛ mɔɔ ɛbava wɔali gyima; biza ɛ nwo kpuya le kɛ, ‘Kɛ ɔkɛyɛ na meava meaboa awie mɔ ɛ?’; na yɛ mɔɔ ɛbagenga la anwo neɛnleanu.​—w16.05, m. 27-32.

Asoo ɔle nvonleɛ kɛ Kilisienenli kɛzu ɔluakɛ ɔlɛ ewudwazo anyelazo la ati?

Diedi mɔɔ yɛlɛ kɛ mowuamra badwazo la ɛnye nyane mɔɔ ewule fa ba la ɛnvi ɛkɛ. Ebileham zunle Sɛla ewule ne. (Mɔl. 23:2) Mekɛ gua nu a, nyanelilɛ ne baha aze.​—wp16.3, m. 4.

Nrenyia ne mɔɔ ngɛlata kodoku zia ye foa ko nee mrenyia nsia ne mɔɔ bɛlɛ konle ninyɛne wɔ Yizikeɛle tile 9 la gyi ɛkɛ maa nwane mɔ?

Bɛgyi ɛkɛ ne bɛmaa anwuma ɛlɔnema mɔɔ bɛboka nwo a bɛzɛkyele Gyɛlusalɛm na eza bɛbazɛkye Seetan ɛtane ewiade ɛhye wɔ Amagɛdɔn la. Ɛnɛ, Gyisɛse Kelaese le kɛ nrenyia ne mɔɔ ɛnke ne zia ye foa ko la, ɔdaye a ɔlɛyɛ menli mɔɔ bɛbanyia ngoane la nzonlɛ a.​—w16.06, m. 16-17.

Ninyɛne nsa boni a angola anzɛkye Baebolo ne a?

Bɛmɛ a le (1) Ninyɛne mɔɔ kola sɛkye mɔɔ bɛhɛlɛle zo le kɛ aloa nee nane nwoma; (2) dwazotia mɔɔ vi maanyɛlɛma nee ɛzonlenlɛ nu mgbanyima; yɛɛ (3) mɔdenle mɔɔ bie mɔ bɔle kɛ bɛkakyi nuhua edwɛkɛ la.​—wp16.4 m. 4-7.

Ndenle boni a Kilisienenli dua zo tete ninyɛne zo a?

Nwu ninyɛne mɔɔ ɛhyia nwolɛ la, mmafa kakɛ mɔɔ ɔngyia la ɛto ɛ nwo zo. Yɛ wɔ ezukoa nwo ngyehyɛleɛ kpalɛ. Ye ninyɛne mɔɔ ɛngyia nwolɛ la fi ɛ nwo, na tua ɛ nwo kakɛ biala. Te wɔ nwonane afoa nu gyima zo, na yɛ kɛzi ɛbadɛlɛ wɔ ɛzonlenlɛ gyima ne anu la anwo ngyehyɛleɛ.​—w16.07, m. 10.

Duzu a Baebolo ne ka kɛ ɔsonle bolɛ ɔtɛla ezukoa nvutuke anzɛɛ dwɛtɛ fufule a?

Dwobu 28:12, 15 ka kɛ anwuma nrɛlɛbɛ sonle bolɛ tɛla ezukoa nvutuke anzɛɛ dwɛtɛ fufule. Bɔ mɔdenle kɛ ɛbabɛlɛ ɛ nwo aze na wɔamaa ɛ nwo ayɛ se wɔ diedi ne anu wɔ mekɛ mɔɔ ɛlɛkpondɛ la.​—w16.08, m. 18-19.

Asoo ɔle kpalɛ kɛ adiema nrenyia bie kɛzie ɔ kɛsa ɛnɛ?

Wɔ ɛleka bie mɔ, saa awie sie ɔ kɛsa na ɔsiezie ye kɛnlɛma a, bɛdie bɛto nu, yemɔti saa adiema bie sie ɔ kɛsa na ɔkɔ daselɛlilɛ bɔbɔ a, bɛtie ye edwɛkɛ. Noko, bie mɔ ɛzi kpɔkɛ kɛ bɛnrɛzie bɛ kɛsa. (1 Kɔl. 8:9) Wɔ ɛleka bie mɔ noko, bɛnzie bɛ kɛsa yemɔti Kilisiene azonvolɛ ɛnzie bɛ kɛsa.​—w16.09, m. 21.

Kɛmɔti a yɛkola yɛnyia anwodozo wɔ Devidi nee Golayate edwɛkɛ mɔɔ wɔ Baebolo nu la anu a?

Baebolo ne ka kɛ Golayate tendenle “kɛyɛ mita nsa” ala. Ɔle tendenle ɔtɛla awie mɔɔ wale kpalɛ mɔɔ bɛha ɔ nwo edwɛkɛ ɛnɛ la. Tete bolɛ bie mɔɔ bɛhɛlɛ zolɛ “Devidi sua nu” nee edwɛkɛ mɔɔ Gyisɛse hanle la di daselɛ kɛ Devidi le sonla mɔɔ dɛnlanle aze amgba. Ninyɛne mɔɔ bɛyɛ nwolɛ kɛlɛtokɛ la nee nɔhalɛ edwɛkɛ mɔɔ bɛnwu ye la yia.​—wp16.5, p. 13.

Ngakyile boni a wɔ adwenlenubukelɛ, ndelebɛbo nee nrɛlɛbɛ nu a?

Adwenlenubukelɛ maa awie nwu ninyɛne dɔɔnwo. Awie mɔɔ lɛ ndelebɛbo la nwu kɛzi edwɛkɛ bie fale fofolɛ nwo la. Na sonla mɔɔ ze nrɛlɛbɛ la fa adwenlenubukelɛ nee ndelebɛbo bɔ nu yɛ gyima.​—w16.10, m. 18.