1, 2. Duzu ati a Gyihova Alasevolɛ anye die Wulomuma 5:12 ne anwo a?

ƐKULO kɛ ɛkɛlɛhɛlɛ Baebolo tɛkese mɔɔ Gyihova Alasevolɛ ze ye kpalɛ na bɛta bɛfa bɛdi gyima la. Ɛbalimoa wɔahɛlɛ Wulomuma 5:12 ɔ? Dwenle fane dodo mɔɔ wɔva ɛkɛ ne edwɛkɛ ne wɔli gyima la anwo nea: “Kɛmɔ ɛtane luale sonla ko anwo zo a rale ewiade, na sonla ko ne ɛtane ne vale ewule rale la, yɛɛ ewule dele kpondenle aleɛabo amra anwo zo a, ɔluakɛ menli kɔsɔɔti ɛyɛ ɛtane.”

² Bɛva ngyɛnu zɔhane bɛli gyima fane dɔɔnwo wɔ Duzu A Baebolo Ne Kola Kilehile Yɛ A? buluku ne anu. Bie a saa ɛ nee ɛ mra anzɛɛ awie mɔ ɛlɛsukoa buluku ɛhye a, ɛbagenga Wulomuma 5:12 wɔ mekɛ mɔɔ bɛlɛsuzu bodane mɔɔ Nyamenle lɛ maa azɛlɛ ne, ɛkpɔnedeɛ ne, nee mowuamra gyinlabelɛ nwo wɔ adile 3, 5, nee 6 ne mɔ la. Noko fane nyɛ a ɛsuzu Wulomuma 5:12 ne anwo wɔ gyinlabelɛ mɔɔ ɛlɛ ye wɔ Gyihova anyunlu, wɔ nyɛleɛ, nee wɔ kenle bie anyelazo nwo a?

3. Ɛtane nwo nɔhalɛ edwɛkɛ boni a ɔwɔ kɛ yɛnwu ye a?

³ Ɔwɔ kɛ yɛ kɔsɔɔti yɛnwu kɛ yɛle ɛtanevolɛma. Yɛfo alehyenlɛ biala. Noko yɛze ye wienyi kɛ Nyamenle kakye kɛ yɛle  ndɛtɛlɛ, na ɔkulo kɛ ɔse yɛ anwunvɔne. (Edw. 103:13, 14) Gyisɛse zɛlɛle Nyamenle wɔ ye asɔneyɛlɛ nwo neazo ne anu kɛ: “Fa yɛ ɛtane kyɛ yɛ.” (Luku 11:2-4) Ɔti, ɔngyia kɛ yɛbagyegye yɛ nwo wɔ nvonleɛ mɔɔ Nyamenle ɛva ɛhyɛ yɛ la anwo. Noko saa yɛsuzu kɛzi ɔkola ɔfa yɛ ɛtane ɔkyɛ yɛ la anwo a ɔbaboa yɛ.

4, 5. (a) Duzu a maa yɛte Wulomuma 5:12 ne abo kpalɛ a? (b) Duzu a le “ɛlolɛ” ne mɔɔ bɛha nwolɛ edwɛkɛ wɔ Wulomuma 3:24 la?

⁴ Yɛnwu edwɛkɛ mɔɔ hyia la wɔ ɛzoanvolɛ Pɔɔlo edwɛkɛ mɔɔ wɔ Wulomuma 5:12 anwo ɛkɛ la anu, titili tile 6 ne. Ɛhye bamaa yɛade kɛzi Gyihova kola fa yɛ ɛtane kyɛ yɛ la abo. Yɛkenga ye wɔ tile 3 ne kɛ: “Menli kɔsɔɔti ɛyɛ ɛtane . . . , ɔlua mgbɔdalɛ mɔɔ Gyisɛse Kelaese ɛva ɔ nwo ɛli la azo, Nyamenle ɛlolɛ ne mɔɔ ɔfa ɔkyɛ mgbane la maa menli muala sɔ ɔ nye.” (Wlo. 3:23, 24) Mɔɔ Pɔɔlo bɔle “ɛlolɛ” duma la, ɛnee duzu a ɔlɛkile a? Neɛnleanu buluku bie kile nu kɛ, Giliki edwɛkɛkpɔkɛ ne kile “ɛlolɛ mɔɔ bɛnyia ye mgbane anzɛɛ bɛndua nwolɛ ɛhwee la.” Tɛ yɛ gyimayɛlɛ a maa yɛnyia anzɛɛ yɛfɛta ɛlolɛ ɛhye a.

⁵ Abɔlɔba John Parkhurst hanle kɛ: “Saa bɛlɛfa bɛaha Nyamenle anzɛɛ Kelaese anwo edwɛkɛ a, [Giliki edwɛkɛkpɔkɛ zɔhane] ta fale bɛ ɛkpɔnenlɛ nee ngoanelielɛ ne mɔɔ bɛfi ɛlolɛ anzɛɛ atiakunlukɛnlɛma nu bɛfa bɛmaa menli mgbane la anwo.” Ɛhye ati, ɔfɛta kɛ bɛhilele ɔ bo “ɛlolɛ” wɔ New World Translation ne anu la. Noko kɛzi Nyamenle lale ɛlolɛ ɛhye ali ɛ? Na kɛzi ɔfale wɔ anyelazo nee agɔnwolɛvalɛ mɔɔ ɛ nee ye lɛ la anwo ɛ? Bɛmaa yɛnlea.

6. Nvasoɛ boni a yɛbahola yɛalua Nyamenle ɛlolɛ ne azo yɛanyia a?

⁶ Adam a le “sonla ko” ne mɔɔ ɛtane nee ewule luale ɔ nwo zo “rale ewiade” la. Yemɔti “ɔlua sonla ko ne ɛtane ti ewule . . . lile belemgbunli.” Pɔɔlo eza hanle kɛ “bɛbalua sonla ko ne, mɔɔ le Gyisɛse Kelaese” anwo zo “bɛanyia [Nyamenle] ɛlolɛ ne molozo.” (Wlo. 5:12, 15, 17) Na zɔhane ɛlolɛ ne ɛboa alesama kɔsɔɔti. “Ɔlua sonla ko [Gyisɛse] anzomɛlɛkɛ zo menli somaa bazɔ Nyamenle anye.” Nɔhalɛ nu, Nyamenle ɛlolɛ ne kola maa bɛdua ‘Gyisɛse Kelaese anwo zo bɛnyia ngoane mɔɔ ɛnlɛ awieleɛ.’​—Wlo. 5:19, 21.

7. Duzu ati a Nyamenle ɛkpɔnedeɛ nziezielɛ ne le atiakunlukɛnlɛmayɛlɛ na eza yɛnfɛta ɛ?

⁷ Ɛnee ɔnle kyengye kɛ Gyihova bamaa ɔ Ra ne ara azɛlɛ ye azo arakpɔne yɛ. Bieko, ɛnee alesama mɔɔ bɛnli munli na bɛle ɛtanevolɛma la ɛnfɛta mɔɔ Nyamenle nee Gyisɛse yɛle vale ɛkpɔnedeɛ ne mɔɔ ɔlua zo a bɛbanyia ɛtanefakyɛ maanle la. Yemɔti, ɛtanefakyɛ ne nee dahuu ngoane anyelazo ne amgba le atiakunlukɛnlɛmayɛlɛ mɔɔ yɛnfɛta a. Ɔwɔ kɛ yɛbu Nyamenle ɛlolɛ ahyɛlɛdeɛ ne kpalɛ, na yɛnea nwo yɛbɔ yɛ ɛbɛla.

8. Adwenle mɔɔ ɛndenrɛ la boni a bie mɔ bahola anyia ye wɔ bɛ ɛtane nwo a?

⁸ Kɛmɔ yɛle Adam abo zo amra mɔɔ yɛnli munli la ati, yɛfo, yɛyɛ mɔɔ ɛnle kpalɛ la, yɛyɛ ɛtane. Noko, ɔbayɛ nvonleɛ kpole kɛ yɛbanyia adwenle kɛ Nyamenle ɛlolɛ ne ati ‘saa meyɛ debie mɔɔ ɛnle kpalɛ bɔbɔ​—debie mɔɔ Nyamenle bu ye kɛ ɔle ɛtane la a​—ɔnle kɛ memaa ɔgyegye me. Gyihova bava ahyɛ me.’ Ɔyɛ alɔbɔlɛ kɛ Kilisienema bie mɔ dele nganeɛ zɔhane la, bɔbɔ wɔ ɛzoanvolɛ ne  mɔ mekɛ zo. (Kenga Dwuudu 4.) Bie a edwɛkɛ zɛhae ɛnrɛvinde yɛ nloa ɛdeɛ; noko adwenle ɛtane zɛhae bahola ala ali wɔ yɛ nyɛleɛ nu.

9, 10. Kɛzi bɛliele Pɔɔlo nee awie mɔ bɛvile ɛtane nee ewule nu ɛ?

⁹ Pɔɔlo hanle kɛ yɛkpo nzuzulɛ ɛhye bɔkɔɔ: ‘Oo, Nyamenle te ɔ bo. Ɔbabu ɔ nye yeagua me nyɛleɛ ɛtane ne azo.’ Duzu ati ɔ? Ɔluakɛ, kɛ mɔɔ Pɔɔlo hɛlɛle la, Kilisienema ‘ɛwu ɛmaa ɛtane.’ (Kenga Wulomuma 6:1, 2.) Kɛzi bɛkola bɛka kɛ ‘bɛwu bɛmaa ɛtane’ wɔ mekɛ mɔɔ bɛtɛbɔ azɛlɛ ye azo la ɛ?

¹⁰ Nyamenle maanle Pɔɔlo nee ye mekɛ zo amra bie mɔ nyianle ɛkpɔnedeɛ ne azo nvasoɛ. Ɔti, Gyihova vale bɛ ɛtane hyɛle bɛ, ɔvale sunsum nwuanzanwuanza ɔkpokpale bɛ, na ɔvɛlɛle bɛ kɛ ye sunsum nu mralɛ. Akee bɛnyianle anwuma anyelazo. Saa bɛlile nɔhalɛ a, bɛbahɔ anwuma na bɛ nee Kelaese ali tumi. Noko mekɛ mɔɔ ɛnee bɛwɔ azɛlɛ ye azo na bɛlɛsonle Nyamenle la, Pɔɔlo holale hanle kɛ ‘bɛwu bɛmaa ɛtane.’ Ɔvale Gyisɛse mɔɔ ɔwule kɛ dasanli na bɛdwazole ye bɛhɔle anwuma kɛ awie mɔɔ ɔnrɛwu ɛlɛ la ɔyɛle neazo. Ɛnee ewule ɛnlɛ Gyisɛse anwo zo tumi bieko. Zɔhane ala noko a ɛnee ɔde wɔ Kilisienema mɔɔ bɛkpokpa bɛ mɔɔ bɛkola bɛbu bɛ nwo kɛ ‘bɛwu bɛmaa ɛtane na ɔlua Kelaese Gyisɛse ati bɛde aze bɛmaa Nyamenle’ la afoa nu a. (Wlo. 6:9, 11) Bɛambɔ bɛ ɛbɛla kɛ mɔɔ mekɛ bie ɛnee ɔde la. Bɛanli bɛ nganeɛdelɛ ɛtane ne anzi bieko. Bɛwule bɛmaanle zɔhane ɛbɛlabɔlɛ dɛba ne.

11. Kɛzi yɛdayɛ mɔɔ yɛ nye la kɛ yɛbadɛnla aze dahuu wɔ Paladaese la ‘ɛwu ɛmaa ɛtane’ ɛ?

¹¹ Na yɛdayɛ noko ɛ? Kolaa na yɛarayɛ Kilisienema la, ɛnee yɛta yɛfo, mɔɔ bie a yɛnnwu ye kɛ wɔ Nyamenle anyunlu ɔle ɛtane a. Yɛyɛle ‘ahanra yɛmaanle ɛtane nee amumuyɛ.’ Bɛkola bɛka kɛ ɛnee yɛle “ɛtane ahanra.” (Wlo. 6:19, 20) Akee yɛnwunle Baebolo ne anu nɔhalɛ ne, yɛyɛle nzenzaleɛ wɔ yɛ ɛbɛlabɔlɛ nu, yɛyilale yɛ nwo zo yɛmaanle Nyamenle na bɛzɔnenle yɛ. Ɔvi zɔhane mekɛ ne, yɛkulo kɛ ‘yɛfa yɛ ahonle muala yɛyɛ tieyɛ’ yɛdi Nyamenle ngilehilelɛ nee ye ngyinlazo ne mɔ azo. Saa bɔbɔ yɛanga nwolɛ edwɛkɛ wɔ zɔhane adenle ne azo a, ‘bɛliele yɛ bɛvile ɛtane nu’ na ‘yɛrayɛle ahanra yɛmaanle tenleneyɛlɛ.’ (Wlo. 6:17, 18) Yemɔti yɛdayɛ noko yɛbahola yɛaha kɛ ‘yɛwu yɛmaa ɛtane.’

12. Kpɔkɛ boni a ɔwɔ kɛ yɛ nuhua ko biala si a?

¹² Fa ye kɛ ɛdawɔ a Pɔɔlo ɛlɛka edwɛkɛ ɛhye ahile wɔ a: “Ɔnle kɛ ɛtane nyia yɛ nwo zo tumi bieko na ɔmaa bɛdi ye atiakunluwɔzo nzi.” (Wlo. 6:12) Saa yɛyɛ mɔɔ yɛ sonlabaka ne mɔɔ ɛnli munli la kɛze yɛ la amuala a, yɛbahola ‘yɛamaa ɛtane ahɔ zo anyia yɛ nwo zo tumi.’ Kɛmɔ yɛkola ‘yɛmaa’ ɛtane nyia yɛ nwo zo tumi anzɛɛ yɛkola yɛsi ye adenle la ati, kpuya ne a le kɛ, Duzu a yɛ nye die nwo wɔ yɛ ahonle nu a? Biza ɛ nwo kɛ: ‘Ɔyɛ a memaa me sonlabaka ne nee me adwenle ne mɔɔ ɛnli munli la twe me kɔ ɛtane zo na medi ɔ nzi ɔ? Anzɛɛ mewu memaa ɛtane? Ɔlua Kelaese Gyisɛse anwo zo, mede aze memaa Nyamenle ɔ?’ Ɔ muala gyi kɛzi yɛ nye sɔ Nyamenle ɛlolɛ ne mɔɔ ɔlua zo yɛnyia ɛtanefakyɛ la azo.

13. Daselɛ boni a maa yɛnyia anwodozo kɛ yɛkola yɛgyakyi ɛtaneyɛlɛ a?

¹³ Gyihova menli ɛgyakyi “ninyɛne mɔɔ bɛyɛle” kolaa na bɛanwu, bɛahulo, na bɛazonle Nyamenle la. Bie a bɛbɔle ɛbɛla mɔɔ “ɛnɛ bɛse nwolɛ nyiane” mɔɔ  anrɛɛ ɔbamaa bɛawu la. (Wlo. 6:21) Akee bɛhakyile. Ɛnee ɛhye le nɔhalɛ wɔ Kɔlentema dɔɔnwo afoa nu. Pɔɔlo hɛlɛle kɛ ɛnee bie mɔ le awozonle ɛzonlenlɛma, agyalɛ ɛzɛkyelɛma, mrenyia mɔɔ fa bɛ gɔnwo mɔ mrenyia, nwule, nzama ne mɔɔ bokɛboka nwo la. Noko “bɛbia bɛ; bɛde bɛ nwo bɛvi ɛtane nwo.” (1 Kɔl. 6:9-11) Ɔbayɛ kɛ ɛnee Wulomu asafo ne anu amra bie mɔ noko le zɔ. Sunsum ne maanle Pɔɔlo hɛlɛle bɛ kɛ: “Ɔnle kɛ bɛtu bɛ sonlabaka ne ɛleka biala bɛmaa ɛtane kɛ bɛva bɛyɛ ninyɛndane biala. Bɛva bɛ nwo bɛmaa Nyamenle kɛ menli mɔɔ bɛye bɛ bɛvi ewule nu bɛra ngoane nu, na bɛdu bɛ nwo ɛleka biala bɛmaa Nyamenle kɛ ɔva ɔyɛ gyima mɔɔ sɔ ɔ nye la.” (Wlo. 6:13) Ɛnee Pɔɔlo ze kɛ bɛkola bɛmaa bɛ nwo te wɔ sunsum nu amaa bɛanyia Nyamenle ɛlolɛ ne azo nvasoɛ dahuu.

14, 15. ‘Yɛ ahonle muala mɔɔ yɛbava yɛayɛ tieyɛ la,’ anwo kpuya boni a ɔwɔ kɛ yɛbiza a?

¹⁴ Ɛnɛ noko zɔhane ala a ɔde a. Ɔbayɛ kɛ mekɛ bie ɛnee mediema bie mɔ le kɛ Kɔlentema ne la. Noko bɛhakyile. Bɛgyakyile bɛ ɛbɛla ɛtane ne na bɛmaanle ‘bɛbiale bɛ.’ Kɛzi ɛnee ɔde ye biala la, kɛkala kɛzi wɔ tɛnlabelɛ ne de wɔ Nyamenle anyunlu ɛ? Kɛkala mɔɔ Nyamenle ɛlolɛ ne nee ɛtanefakyɛ nwo adenle ɛbuke la, asoo wɔbɔ kpɔkɛ kɛ ‘ɛnrɛdu wɔ sonlabaka ne ɛnrɛmaa ɛtane’ ɔ? Emomu, asoo ‘ɛbava ɛ nwo wɔamaa Nyamenle kɛ bɛye wɔ bɛvi ewule nu’ ɔ?

¹⁵ Yɛbahola yɛayɛ zɔ a, ɔwɔ kɛ yɛkpo ɛtane mgbole mɔɔ Kɔlentema bie mɔ yɛle mɔɔ yɛbayɛ bie la. Ɛhye anwo hyia saa yɛka kɛ yɛlie Nyamenle ɛlolɛ ne yɛdo nu na ‘ɛtane ɛnle yɛ menle bieko’ a. Noko, asoo yɛbɔ kpɔkɛ kɛ ‘yɛbavi yɛ ahonle nu yɛayɛ tieyɛ’ ɔlua ɛtane mɔɔ bie mɔ bu ye kɛ anyebolo ɛnle nu mɔɔ yɛbabɔ mɔdenle yɛakpo la azo ɔ?​—Wlo. 6:14, 17.

16. Duzu a maa yɛnwu kɛ saa yɛle Kilisienema a, tɛ ɛtane mgbole angome a ɔwɔ kɛ yɛkoati ɛ?

¹⁶ Suzu ɛzoanvolɛ Pɔɔlo anwo. Yɛbahola yɛalie yɛali kɛ yeanyɛ ɛtane mgbole mɔɔ bɛha nwolɛ edwɛkɛ wɔ 1 Kɔlentema 6:9-11 la bie. Noko, ɔhanle kɛ yeyɛ ɛtane. Ɔhɛlɛle kɛ: “Mele nwonane nu debie mɔɔ bɛdɔne me kɛ kanranli bɛmaa ɛtane a. Debie mɔɔ meyɛ la mende ɔ bo, ɔluakɛ mɔɔ mekpondɛ kɛ meyɛ la, mengola menyɛ, na meyɛ deɛ ko ne ala mɔɔ mengulo kɛ meyɛ la.” (Wlo. 7:14, 15) Ɛhye kile kɛ ɛnee ninyɛne gyɛne noko wɔ ɛkɛ mɔɔ Pɔɔlo bule bɛ kɛ bɛle ɛtane a, na ɛnee ɔlɛko yeatia ninyɛndane zɔhane. (Kenga Wulomuma 7:21-23.) Bɛmaa yɛdayɛ noko yɛyɛ zɔhane ala wɔ mekɛ mɔɔ yɛlɛbɔ mɔdenle ‘yɛavi yɛ ahonle nu yɛayɛ tieyɛ’ la.

17. Duzu ati a ɛkulo kɛ ɛdi nɔhalɛ a?

¹⁷ Fa nɔhalɛ mɔɔ ɔwɔ kɛ yɛdi la kɛ neazo. Ɔwɔ kɛ Kilisienenli biala di nɔhalɛ. (Kenga Mrɛlɛbulɛ 14:5; Ɛfɛsɛsema 4:25.) Seetan le “adalɛ kɔsɔɔti bɛ ze.” Ananayase nee ɔ ye wule ɔluakɛ bɛbɔle adalɛ. Yɛngulo kɛ yɛsukoa menli ɛhye mɔ​—yɛmbɔ adalɛ. (Dwɔn 8:44; Gyi. 5:1-11) Asoo ɛke ala a ɔwɔ kɛ yɛ nɔhalɛlilɛ ne kɔdwu a? Ɔwɔ kɛ yɛ nɔhalɛlilɛ ne maa yɛkile Nyamenle ɛlolɛ ne anwo anyezɔlɛ kpole.

18, 19. Kɛzi nɔhalɛlilɛ kɔ moa tɛla adalɛ mɔɔ yɛnrɛbɔ la ɛ?

¹⁸ Adalɛbɔlɛ a le kɛ ɛbaha edwɛkɛ mɔɔ ɔnle nɔhalɛ la. Noko, tɛ adalɛ angome a Gyihova ɛmkpondɛ kɛ ye menli bɔ a. Ɔzele tete Yizilayɛma kɛ: ‘Ɔwɔ kɛ bɛmaa bɛ nwo te, ɔluakɛ Medame, Gyihova bɛ Nyamenle ne, mele nwuanzanwuanza.’ Akee ɔhanle mɔɔ bɛyɛ a ɔkile kɛ bɛlɛmaa bɛ nwo ade la. Nyamenle hanle kɛ: “Bɛmmawua, bɛmmabɛlɛbɛla awie, yɛɛ bɛmmabɔ adalɛ bɛkile bɛ gɔnwo.”  (Sɛl. 19:2, 11, NW) Ɔyɛ nyane kɛ, awie mɔɔ ɛbɔ kpɔkɛ kɛ ɔnrɛbɔ adalɛ ɛlɛ la bahola abɛlɛbɛla awie mɔ anzɛɛ yeali bɛ ndunlumi la.

¹⁹ Kɛ neazo la, awie bahola aha ahile ye gyima menle anzɛɛ ɔ gɔnwo mɔ gyimayɛvoma kɛ aleɛ kye a ɔnrɛra gyima ɔluakɛ ɔbahɔ “asopiti.” Noko ye “asopiti” ɛhɔlɛ ne a le ayile mɔɔ ɔbahɔ yeadɔ anzɛɛ ezukoa mɔɔ ɔbahɔ yeadua yeamaa dɔketa la. Deɛmɔti ɔmkpondɛ kɛ ɔkɔ gyima la a le kɛ yemɔ bamaa yeadu adenle anzɛɛ ɔ nee ye abusua ne ahɔlie bɛ nye wɔ ɛnwea zo. Bie a nɔhalɛ ekyi wɔ “asopiti” mɔɔ ɔse ɔbahɔ la anu, noko asoo ɛbaha kɛ ɔlile nɔhalɛ? Anzɛɛ ɔle mɛlɛbɛla? Bie a ɛze edwɛkɛ mɔɔ le kɛ ɛhye mɔɔ menli ka bɛlɛbɛla awie mɔ la. Bie a bɛyɛ ɛhye amaa bɛandea bɛ anzɛɛ bɛanyia awie mɔ anwo zo nvasoɛ. Saa yɛambɔ adalɛ bɔbɔ a, Nyamenle mɛla ne mɔɔ se: “Bɛmmabɛlɛbɛla awie” la noko ɛ? Dwenle Wulomuma 6:19 mɔɔ se ‘bɛyɛ bɛ nwo ahanra bɔkɔɔ bɛmaa tenleneyɛlɛ, amaa bɛ nwo ade nwuanzaanwu’ la noko anwo.

20, 21. Duzu a ɔwɔ kɛ Nyamenle ɛlolɛ ne ka yɛ maa yɛyɛ a?

²⁰ Yɛnwu kɛ saa yɛkile Nyamenle ɛlolɛ ne anwo anyezɔlɛ a, tɛ ɛtane le kɛ agyalɛ ɛzɛkyelɛ, nzabolɛ nee ɛtane gyɛne mɔɔ Kɔlentema bie mɔ yɛle la ala a ɔwɔ kɛ yɛkpo a. Saa yɛdie Nyamenle ɛlolɛ ne yɛto nu a, tɛ nla nu ɛbɛlatane ala a yɛbakpo a, emomu yɛbaho yɛatia anyelielɛ ninyɛne biala mɔɔ nla nwo ɛbɛlatane wɔ nu la. Ahanra mɔɔ yɛyɛ yɛamaa tenleneyɛlɛ la ɛnrɛmaa yɛnrɛhoati nzabolɛ ala, emomu yɛnrɛnlo nza dedee mɔɔ asɛɛ yɛbo a. Ɔhyia mɔdenlebɔlɛ na yɛahola yɛagyakyi ɛtane ɛhye mɔ; noko ɔle konle mɔɔ yɛbahola yɛali konim.

²¹ Yɛ bodane a le kɛ yɛkoati ɛtane mgbole nee mɔɔ menli ɛnnwu ye kɛ ɔle ɛtane mɔɔ anyebolo wɔ nu la. Yɛnrɛhola yɛnrɛgyakyi ye bɔkɔɔ. Noko, ɔwɔ kɛ yɛbɔ mɔdenle kɛ yɛbayɛ zɔ, kɛ mɔɔ Pɔɔlo yɛle la. Ɔzele ɔ mediema ne mɔ kɛ: “Ɔnle kɛ ɛtane nyia yɛ nwo zo tumi bieko na ɔmaa bɛdi ye atiakunluwɔzo nzi.” (Wlo. 6:12; 7:18-20) Saa yɛko yɛtia ɛtane ngakyile kɔsɔɔti a, ɛnee yɛlɛkile kɛ yɛ nye sɔ Nyamenle ɛlolɛ ne mɔɔ yelua Kelaese anwo zo yela ye ali la.

22. Duzu a menli mɔɔ kile Nyamenle ɛlolɛ ne anwo anyezɔlɛ la banyia a?

²² Nyamenle ɛlua ye ɛlolɛ ne azo yeva yɛ ɛtane yehyɛ yɛ na ɔbahɔ zo yeava yeahyɛ yɛ. Ɔwɔ kɛ yɛda anyezɔlɛ ali na yɛkoati ɛtane mɔɔ bie mɔ babu ye kɛ anyebolo ɛnle nu la. Pɔɔlo hilele ahatualɛ mɔɔ yɛbanyia la: “Kɛkala, bɛye bɛ bɛvi ɛtane nu na bɛrayɛ Nyamenle ahanra, bɛ nvasoɛ a le bɛ ɛbɛla mɔɔ bɛte nwolɛ na bɛadu bɛ nwo bɔkɔɔ bɛamaa ye, na ɔlua zo bɛanyia ngoane mɔɔ ɛnlɛ awieleɛ la.”​—Wlo. 6:22.