Ɛbahola wɔabua kpuya ɛhye mɔ mɔɔ gyi 2019 Ɛzinzalɛ Arane ne azo la ɔ?

Duzu a Nyamenle ɛwɔkɛ ɛhye: “Akodeɛ biala mɔɔ bɛyɛ bɛatia wɔ la ɛnrɛyɛ kpalɛ ɛlɛ” abo kile a? (Aye. 54:17)

Yɛbahola yɛanyia anwodozo kɛ Nyamenle babɔ yɛ nwo bane avi “atisesebɛma ɛtetalɛ” mɔɔ le kɛ ahumu kpole la anwo. (Aye. 25:4, 5) Yɛ agbɔvolɛ ɛnrɛhola ɛnrɛzɛkye yɛ bɔkɔɔ.​—w19.01, m. 6-7.

Kɛzi adenle mɔɔ Nyamenle luale zo ɔ nee Keenama yɛɛ Yizilayɛma mɔɔ dele atua lile la lale ye pɛlepɛlelilɛ ali ɛ?

Nyamenle vale ndɛnebualɛ rale menli mɔɔ bɔ nla nu ɛbɛlatane ngakyile anzɛɛ yɛ mraalɛ nee ngakula basabasa la anwo zo. Ɔyilale menli mɔɔ diele ye na bɛ nee awie mɔ lile ye wɔ pɛlepɛlelilɛ adenle zo la.​—w19.02, m. 22-23.

Saa awie mɔɔ ɛnle diedinli la ɛlɛyɛ asɔne na yɛwɔ ɛkɛ a, duzu a ɔwɔ kɛ yɛyɛ a?

Yɛbahola yɛayɛ koonwu yɛava yɛahile ɛbulɛ, noko yɛnrɛha “amen” anzɛɛ yɛnrɛmaa awie mɔ ɛnrɛzɔ yɛ sa wɔ mekɛ mɔɔ bɛlɛyɛ asɔne ne la. Bie a yɛbahola yɛayɛ asɔne wɔ yɛ ti anu.​—w19.03, m. 31.

Kɛzi kakula mɔɔ bɛyɛ ye basabasa la le ɛtane kpole ɛ?

Kakula mɔɔ bɛyɛ ye basabasa la le ɛtane mɔɔ tia kakula ne, asafo ne, maanle mgbanyima yɛɛ Nyamenle. Wɔ ɛleka mɔɔ bɛli mɛla kɛ bɛbɔ kpolisima amaneɛ wɔ edwɛkɛ zɛhae bie anwo la, mgbanyima bɔ mɔdenle kɛ bɛbali zo.​—w19.05, m. 9-10.

Kɛzi ɛbahakyi tumi ne mɔɔ kile wɔ adwenle ne adenle la ɛ?

Ninyɛne mɔɔ ɔhyia kɛ ɛyɛ la: Tendɛ kile Gyihova wɔ asɔneyɛlɛ nu. Dwenledwenle ninyɛne nwo fa neɛnlea wɔ nu. Kpa agɔnwolɛma kpalɛ.​—w19.06, m. 11.

Kɛzi yɛbaziezie yɛ nwo kɛkala yɛamaa ɛkpɔlɛ ɛ?

Ɔwɔ kɛ yɛmia agɔnwolɛvalɛ mɔɔ yɛ nee Gyihova lɛ la anu. Nyia anwodozo kɛ ɔkulo yɛ na ɔnrɛkpo yɛ ɛlɛ. Kenga Baebolo ne na yɛ asɔne dahuu. Nyia anwodozo kɛ Belemgbunlililɛ nyilalɛ ne mɔ bara nu. Kye ngɛlɛlera nee Belemgbunlililɛ edwɛne mɔɔ ɛ nye die nwo la gua ɛ ti anu.​—w19.07, m. 2-4.

Duzu a yɛbahola yɛayɛ yɛaboa yɛ mbusuafoɔ amaa bɛanyia ngoane a?

Ɔhyia kɛ yɛda anwunvɔnezelɛ, abotane nee nrɛlɛbɛ ali na yɛmaa yɛ subane kpalɛ ne yɛ daselɛlilɛ kpalɛ maa bɛ.​—w19.08, m. 15-17.

Kɛ mɔɔ Gyisɛse ɛwɔkɛ mɔɔ wɔ Mateyu 11:28 kile la, kɛzi yɛ nwo tɔ yɛ ɛ?

Yɛlɛ Kilisiene neavolɛma mɔɔ bɛlɛ ɛlɔlɛ, agɔnwolɛma kpalɛ yɛɛ gyima kpalɛ.​—w19.09, m. 23.

Kɛzi Nyamenle bamaa yɛanyia ɛhulolɛ ne yɛɛ anwosesebɛ yɛayɛ gyima ɛ? (Fel. 2:13)

Mekɛ mɔɔ yɛlɛkenga Nyamenle Edwɛkɛ ne na yɛadwenledwenle nwolɛ la, Nyamenle bamaa yɛanyia ɛhulolɛ ne yɛɛ anwosesebɛ yɛayɛ gyima. Ye sunsum ne kola boa yɛ maa yɛfa yɛ ɛlolɛ ahyɛlɛdeɛ yɛyɛ gyima.​—w19.10, m. 21.

Kolaa na yɛazi kpɔkɛ mɔɔ anwo hyia la, duzu a nrɛlɛbɛ wɔ nu kɛ yɛbayɛ a?

Ninyɛne nnu mɔɔ ɔwɔ kɛ yɛyɛ la ɛne: Yɛ neɛnleanu kpalɛ. Sɛlɛ nrɛlɛbɛ. Suzu adwenle mɔɔ ɛlɛ la anwo. Fa bodane titili bie mɔ sie ɛ nye zo. Nyia adwenle kpalɛ.​—w19.11, m. 27-29.

Asoo ɛkɛla mɔɔ ɛnwu ɛlɛ ngilehilelɛ ne abo vi edwɛkɛ mɔɔ Seetan hanle hilele Yive la anu ɔ?

Kyɛkyɛ. Abɔnsam zele Yive kɛ saa ɔdi baka ne ma ne bie a ɔnrɛwu, yeanga kɛ ɔbawu noko debie wɔ ye nu mɔɔ ɔbahɔ zo yeadɛnla aze wɔ ɛleka bie a. Adalɛ ɛzonlenlɛ ngilehilelɛ kɔsɔɔti vile ɛkɛ wɔ Nowa mekɛ zo Azuyilɛ ne anu. Ɔkɛyɛ kɛ ɛkɛla mɔɔ ɛnwu ɛlɛ ngilehilelɛ ne bɔle ɔ bo kolaa na Nyamenle amaa menli mɔɔ wɔ Babɛle la aneɛ ayɛ ngakyile ngakyile na bɛabɔ asande.​—w19.12, m. 15.