ASOO ɛkile anyezɔlɛ na ɛyɛ mo wɔ ninyɛne mɔɔ awie mɔ yɛ maa wɔ la anwo? Ɛhye le kpuya mɔɔ ɔwɔ kɛ yɛ nuhua ko biala biza ɔ nwo a. Baebolo ne hanle yɛ mekɛ ye anwo edwɛkɛ dole ɛkɛ ne kɛ, menli dɔɔnwo bayɛ “boniayɛma.” (2 Tim. 3:2) Bie a wɔyia menli bie mɔ mɔɔ bɛte nganeɛ kɛ ɔwɔ kɛ awie mɔ yɛ bɛ kpalɛ la. Bɛte nganeɛ kɛ ɔnle kɛ bɛkile debie biala mɔɔ awie bayɛ amaa bɛ la anwo anyezɔlɛ. Wɔnwu kɛzi menli zɔhane mɔ ɛdɛnlanlɛ yɛ nyane la?

Mɔɔ nee ɛhye le ngakyile la, bɛdu Gyihova azonvolɛ folɛ kɛ: “Bɛhile anyezɔlɛ.” Ɔwɔ kɛ “[yɛyɛ] mo wɔ debie biala anwo.” (Kɔl. 3:15; 1 Tɛs. 5:18) Nɔhalɛ nu, saa yɛsukoa kɛ yɛbahile anyezɔlɛ a, ɔboa yɛ. Deɛmɔti ɔwɔ kɛ yɛyɛ zɔhane la zonle.

Debie titili mɔɔ ɔti ɔwɔ kɛ yɛnyia anyezɔlɛ subane la a le kɛ, ɔmaa yɛ nye die. Sonla mɔɔ awie yɛ debie maa ye a ɔyɛ mo la anye die, na ahenle mɔɔ bɛyɛle ye mo la noko anye die. Duzu ati a ɛhye le zɔ a? Suzu neazo ɛhye anwo: Saa awie lɛ ɛhulolɛ kɛ ɔbayɛ debie yeamaa wɔ a, ɛnee ɔkile kɛ bɛbu wɔ kɛ ɔfɛta kɛ bɛyɛ bɛmaa wɔ. Bɛdwenle ɛ nwo. Saa ɛnwu kɛ bɛdwenle ɛ nwo a, ɔwɔ kɛ ɔmaa ɛ nye die. Ɔda ali kɛ zɔhane a bɛyɛle bɛmaanle Wulutu a. Bowaze lale ahunlunyele ali hilele Wulutu. Ɔbayɛ kɛ ɛhye maanle Wulutu anye liele kpalɛ kɛ awie dwenle ɔ nwo zɔhane la.​—Wut. 2:10-13.

Ɔhyia kpalɛ kɛ yɛbayɛ Nyamenle mo. Kpolerazulɛ biala ɛnle nwolɛ kɛ, ɔyɛ a ɛdwenle sunsum nu nee nwonane afoa nu nyilalɛ ngakyile mɔɔ Nyamenle kɔ zo fa maa la anwo. (Dit. 8:17, 18; Gyi. 14:17) Noko kɛ anrɛɛ ɛbava mekɛ ekyi bie ala wɔadwenle Nyamenle kpalɛyɛlɛ ne anwo la, ɔwɔ kɛ ɛfa mekɛ dɔɔnwo ɛdwenledwenle nyilalɛ ngakyile mɔɔ Nyamenle ɛmaa ɛ nee wɔ alɔvolɛ ɛnyia la anwo. Saa ɛdwenledwenle ahunlunyele mɔɔ wɔ Bɔvolɛ ne ɛla ye ali ɛhile wɔ la anwo a, ɔbamaa anyezɔlɛ mɔɔ ɛlɛ ɛmaa ye la ayɛ kpole na ɔbamaa wɔanwu kɛzi ɔkulo wɔ na ɔ nye sɔ mɔɔ ɛyɛ la.​—1 Dwɔn 4:9.

Saa yɛdwenledwenle Gyihova ahunlunyele nee nyilalɛ mɔɔ yemaa yɛnyia la anwo a ɛnee ɔtɛwiele; ɔwɔ kɛ yɛda ye ase wɔ ye kpalɛyɛlɛ ne anwo. (Edw. 100:4, 5) Bɛta bɛka kɛ, “saa yɛkile anyezɔlɛ anzɛɛ yɛyɛ awie mɔ mo wɔ ninyɛne mgbalɛ mɔɔ bɛyɛ bɛmaa yɛ la anwo a, ɔmaa bɛ nye die.”

Debie bieko mɔɔ ɔti ɔwɔ kɛ yɛkile anyezɔlɛ la a le kɛ ɔmaa agɔnwolɛvalɛ mɔɔ yɛ nee awie mɔ lɛ la anu mia. Saa awie mɔ da anyezɔlɛ ali kile yɛ a, yɛ nye die nwo. Saa awie yɛ debie maa wɔ na ɛfi wɔ ɛhulolɛ nu ɛyɛ ye mo a, ɔmaa bɛ mu nwiɔ bɛbikye bɛ nwo kpalɛ. (Wlo. 16:3, 4) Bieko, menli mɔɔ kile anyezɔlɛ la ta boa awie mɔ. Bɛnwu ahunlunyele mɔɔ awie mɔ da ye ali kile bɛ la, na ɛhye maa bɛdabɛ noko bɛda bie ali bɛkile bɛ. Ɛhɛe, yɛboa awie mɔ a, ɔmaa yɛ nye die. Ɔle kɛ mɔɔ Gyisɛse hanle la: “Anyelielɛ dɔɔnwo wɔ ɛmaanlɛ nu tɛla ɛlielɛ.”​—Gyi. 20:35.

Robert Emmons, mɔɔ ɔle kpanyinli wɔ University of California hanle anyezɔlɛ nwo debie mɔɔ ɔzukoale la anwo edwɛkɛ kɛ: “Amaa yɛahola yɛahile anyezɔlɛ la, ɔwɔ kɛ yɛte ɔ bo kɛ yɛhyia awie mɔ anwo. Ɔyɛ a yɛkyɛ awie mɔ debie yɛɛ bɛdabɛ noko bɛkyɛ yɛ debie.” Nɔhalɛ ne a le kɛ, amaa yɛadɛnla ngoane nu na yɛ nye alie wɔ ɛbɛlabɔlɛ nu la, yɛhyia awie mɔ moalɛ wɔ ndenle dɔɔnwo azo. Kɛ neazo la, bie a bɛbamaa yɛ aleɛ anzɛɛ bɛbanlea yɛ wɔ mekɛ mɔɔ yɛnde kpɔkɛ la. (1 Kɔl. 12:21) Saa awie yɛ debie maa sonla mɔɔ kile anyezɔlɛ la a, ɔyɛ ye mo. Ɛhye ati, wɔva  wɔyɛ wɔ subane kɛ ɛbahile ninyɛne mɔɔ awie mɔ yɛ maa wɔ la anwo anyezɔlɛ ɔ?

Debie bieko mɔɔ ɔti ɔwɔ kɛ yɛkile anyezɔlɛ la a le kɛ ɔmaa yɛfa yɛ adwenle yɛsie ninyɛne mgbalɛ zo yɛtɛla ngyegyelɛ ne. Wɔ adenle bie azo, adwenle ne yɛ gyima kɛ debie mɔɔ bɛfa bɛsonyi ninyɛne zo la. Ɛkola ɛfa wɔ adwenle ɛsie ninyɛne mgbalɛ zo na ɛye ɛfi ninyɛne mɔɔ ɛnle kpalɛ la azo. Ɔmaa yɛnwu ninyɛne mgbalɛ, na ɔmmaa yɛnva yɛ adwenle yɛngɔ ngyegyelɛ zo somaa. Saa ɛta ɛkile anyezɔlɛ kpalɛ a, ɔbamaa wɔanwu ninyɛne mgbalɛ dɔɔnwo wɔ awie mɔ anwo, na ɛhye bamaa wɔ anyezɔlɛ ne ayɛ kpole kpalɛ. Saa ɛfa wɔ adwenle ɛsie ninyɛne mɔɔ ɛbahola wɔala awie mɔ ase wɔ nwolɛ la azo a, ɔbaboa yeamaa wɔayɛ mɔɔ ɛzoanvolɛ Pɔɔlo dule folɛ kɛ yɛyɛ la: “Bɛli fɛlɛko wɔ Awulae anu dahuu.”​—Fel. 4:4.

Anyezɔlɛ subane bamaa wɔaye wɔ adwenle wɔavi ngyegyelɛ zo. Ɔyɛ se kpalɛ kɛ yɛbahile anyezɔlɛ na mekɛ ko ne ala yɛahwe nungule, yɛali nyane anzɛɛ yɛava ɛya. Menli mɔɔ kile anyezɔlɛ la anye ɛmbolo nwonane afoa nu ninyɛne. Bɛ nye sɔ mɔɔ bɛlɛ la yɛɛ bɛmbɔ mɔdenle kɛ bɛkpondɛ ninyɛne dɔɔnwo.​—Fel. 4:12.

Kɛ Kilisienenli la, ɛze kɛ Seetan kulo kɛ ngyegyelɛ mɔɔ ɛyia wɔ awieleɛ mekɛ ye anu la maa ɛ rɛle bɔ na ɛ sa nu to. Saa ɛnyia adwenle mɔɔ ɛndenrɛ yɛɛ adendɛbɛnzoabo subane a ɔyɛ ye fɛ kpole. Subane zɛhae ɛnrɛmaa ɛnrɛbɔ mɔdenle kɛ edwɛkpakavolɛ. Nɔhalɛ nu, saa yɛso Nyamenle sunsum ne ma ne a, yɛbahile anyezɔlɛ, yɛbali fɛlɛko wɔ ninyɛne mgbalɛ mɔɔ Nyamenle ɛmaa yɛnyia la anwo na yɛanyia ye ɛwɔkɛ ne mɔ anu diedi.​—Gal. 5:22, 23.

Kɛ Gyihova sonvolɛ la, ɔda ali kɛ ɛdie anyezɔlɛ nwo edwɛkɛ mɔɔ yɛzuzu nwo la ɛto nu. Noko, bie a wɔnwu kɛ anyezɔlɛ subane yɛɛ ninyɛne nwo adwenle kpalɛ mɔɔ yɛbanyia la ɛmba mgbane. Noko mmamaa ɛ sa nu to. Ɛbahola wɔanyia anyezɔlɛ subane na wɔamaa yeadɛnla ɛkɛ dahuu. Kɛzi? Nyia mekɛ dwenledwenle wɔ ɛbɛlabɔlɛ nu ninyɛne bie mɔ mɔɔ ɛbahola wɔahile nwolɛ anyezɔlɛ la anwo. Saa ɛta ɛyɛ ɛhye dahuu a, ɔbamaa wɔanyia anyezɔlɛ subane kpalɛ. Ɔbamaa ɛ nye alie kpalɛ adɛla bɛdabɛ mɔɔ bɛfa bɛ adwenle bɛsie bɛ ngyegyelɛ zo la. Fa wɔ adwenle sie ninyɛne mgbalɛ mɔɔ Nyamenle nee awie mɔ yɛ maa wɔ mɔɔ maa wɔ anwosesebɛ na ɛ nye die la azo. Ɛbahola wɔahɛlɛ ɛhye mɔ wɔ buluku nu wɔado ɛkɛ. Ɛbahola wɔahɛlɛ ninyɛne nwiɔ anzɛɛ nsa mɔɔ ɛbahola wɔahile nwolɛ anyezɔlɛ wɔ alehyenlɛ ne anu la wɔ nu.

Menli mɔɔ ɛzukoa anyezɔlɛ nwo debie la ka kɛ, “saa yɛta yɛkile ninyɛne nwo anyezɔlɛ a, ɔbahola yeahakyi kɛzi yɛ adwenle ne yɛ gyima la yeamaa yɛada yɛadwenle ninyɛne nwo wɔ adenle kpalɛ zo.” Awie mɔɔ kile anyezɔlɛ la anye die wɔ ɛbɛlabɔlɛ nu. Yemɔti, dwenledwenle ninyɛne mgbalɛ yɛɛ anwubielɛ mgbalɛ mɔɔ wɔnyia la anwo, ɔbamaa wɔahile anyezɔlɛ! Kɛ anrɛɛ yɛbabu yɛ nye yɛagua ninyɛne mgbalɛ mɔɔ yɛnyia azo la, ɔwɔ kɛ “[yɛyɛ] Gyihova mo, ɔluakɛ ɔle kpalɛ.” Ɛhɛe, “bɛyɛ mo wɔ debie biala anwo.”​—1 Ek. 16:34; 1 Tɛs. 5:18.