1, 2. (a) Adwenle ngakyile boni a menli lɛ ye wɔ fanwodi ahyɛlɛdeɛ ne anwo a? (b) Duzu a Baebolo ne ka ye wɔ ahyɛlɛdeɛ ɛhye anwo a, na kpuya boni mɔ a yɛbazuzu nwo a?

MEKƐ mɔɔ raalɛ bie si ye kpɔkɛ la, ɔzele ɔ gɔnwo bie kɛ: “Mmamaa medwenle; wɔmɔ ka mɔɔ menyɛ la kile me. Yemɔ le sikalɛ.” Kɛ anrɛɛ raalɛ ne bava ahyɛlɛdeɛ bie mɔɔ sonle bolɛ, fanwodi ahyɛlɛdeɛ ne mɔɔ Bɔvolɛ ne ɛva ɛmaa ye yeayɛ gyima la, ɔhulole kɛ bɛkɛhile ye mɔɔ ɔwɔ kɛ ɔyɛ la. Na ɛdawɔ noko ɛ? Asoo ɛdawɔ mumua ne a ɛsi wɔ kpɔkɛ a, anzɛɛ ɛmaa awie mɔ a si maa wɔ a? Kɛzi ɛbu fanwodi ahyɛlɛdeɛ ne ɛ?

² Menli ɛzu ɛhye anwo kpolera wɔ ɛvoya dɔɔnwo anu. Bie mɔ ka kɛ adenle mɔɔ yɛlɛ yɛkpa mɔɔ yɛkulo anzɛɛ fanwodi ahyɛlɛdeɛ ɛnle ɛkɛ—Nyamenle ɛhyehyɛ debie biala mɔɔ yɛbayɛ la ɛdo ɛkɛ. Bie mɔ noko ka kɛ saa yɛlɛ fanwodi bɔkɔɔ a, yɛɛ yɛbahola yɛakpa mɔɔ yɛkulo a. Noko, amaa yɛade ɛhye abo kpalɛ la, ɔwɔ kɛ yɛnwu mɔɔ Nyamenle Edwɛkɛ, Baebolo ne ka la. Duzu ati ɔ? Ɔka kɛ Gyihova vale fanwodi ahyɛlɛdeɛ bɔle yɛ; ɛhye kile, tumi nee adenle mɔɔ yɛlɛ yɛsi kpɔkɛ mɔɔ nrɛlɛbɛ wɔ nu la. (Kenga Dwɔhyua 24:15.) Baebolo ne bua kpuya ɛhye mɔ noko: Kɛzi ɔwɔ kɛ yɛfa yɛ fanwodi ahyɛlɛdeɛ ne yɛsi kpɔkɛ ɛ? Asoo ɔlɛ ɛweɛne? Kɛzi yɛdua yɛ fanwodi  ahyɛlɛdeɛ ne azo yɛda ɛlɔlɛ kpole mɔɔ yɛlɛ yɛmaa Gyihova la ali ɛ? Kɛ ɔkɛyɛ na yɛahile ɛbulɛ yɛamaa awie mɔ kpɔkɛzilɛ ɛ?

3. Neazo boni a Gyihova yɛ wɔ kɛzi ɔfa ye fanwodi ne ɔdi gyima la anu a?

³ Gyihova angomekye a lɛ fanwodi bɔkɔɔ a, noko kɛzi ɔfa ɔdi gyima la le neazo maa yɛ. Kɛ neazo la, ɔkpale Yizilayɛ maanle ne “kɛ ye menli” mɔɔ ye duma la bɛ nwo zo. (Mɛla 7:6-8) Tɛ mgbane ne ala a ɔkpale bɛ a. Ɛnee Gyihova ɛlɛdi ɛwɔkɛ mɔɔ ɔbɔle ɔ gɔnwo Ebileham wɔ ɛvolɛ dɔɔnwo mɔɔ ɛpɛ nu la azo. (Mɔl. 22:15-18) Bieko, saa Gyihova ɛlɛfa ye fanwodi ne ali gyima a, ɔmaa ɔ nee ye ɛlɔlɛ nee ye pɛlepɛlelilɛ ne yia. Ɛhye da ali wɔ kɛzi ɔdeanle Yizilayɛma, mɔɔ bɛkpole nɔhalɛ ɛzonlenlɛ fane dɔɔnwo la anu. Mekɛ mɔɔ bɛnlunle bɛ nwo nɔhalɛ nu la, Gyihova hulole bɛ na ɔzele bɛ anwunvɔne, ɔhanle kɛ: “Mebava me menli ne mɔɔ ɛnli nɔhalɛ la anwo edwɛkɛ meahyɛ bɛ. Mebava me ahonle muala meahulo bɛ.” (Hozia 14:4) Kɛzi Gyihova fa ye fanwodi ne di gyima boa awie mɔ la le neazo kɛnlɛma maa yɛ.

4, 5. (a) Nwane a limoale nyianle Nyamenle ahyɛlɛdeɛ ɛhye a, na kɛzi ɔvale ɔlile gyima ɛ? (b) Kpuya boni a ɔwɔ kɛ yɛ nuhua ko biala biza ɔ nwo a?

⁴ Gyihova vale fanwodi ahyɛlɛdeɛ bɔle anwumabɔvolɛma nee alesama. Awie mɔɔ limoale nyianle ahyɛlɛdeɛ ɛhye la a le ye belamunli Ralɛ ne, “Nyamenle ne mɔɔ ɛnyelɛ ɛnnwu ye la sɔhovolɛ” ne. (Kɔl. 1:15) Kolaa na Gyisɛse ara azɛlɛ ye azo la, ɔlile nɔhalɛ ɔmaanle ɔ Ze, yeamboka Seetan anwo wɔ atuadelɛ ne anu. Nzinlii, mɔɔ Gyisɛse wɔ azɛlɛ ye azo la, ɔluale ye fanwodi ahyɛlɛdeɛ ne azo ɔkpole sɔnea ne mɔɔ Kpɔvolɛ kpole ne vale rale ɔ nwo zo la. (Mat. 4:10) Nɔe ne mɔɔ aleɛ kye a Gyisɛse bawu la, ɔluale asɔneyɛlɛ zo ɔhilele kɛ ɔbayɛ Nyamenle ɛhulolɛdeɛ. Ɔhanle kɛ: “Egya, saa ɔyɛ wɔ ɛhulolɛ a, ye nyanenwunlɛ dwora ɛhye fi me nloa; tɛ me ɛhulolɛdeɛ ɔ, na wɔ ɛhulolɛdeɛ ɛyɛ ɛkɛ.” (Luku 22:42) Bɛmaa yɛzukoa Gyisɛse yɛva yɛ ahyɛlɛdeɛ ne yɛli Gyihova eni na yɛyɛ ye ɛhulolɛdeɛ! Asoo yɛbahola?

⁵ Ɛhɛe, yɛbahola yɛazukoa Gyisɛse neazo ne, ɔluakɛ Nyamenle subane ne bie a ɔvale ɔbɔle yɛ a. (Mɔl. 1:26) Noko, tɛ debie biala a yɛkola yɛyɛ a. Yɛnlɛ fanwodi bɔkɔɔ ne mɔɔ Gyihova lɛ la. Gyihova Nyamenle Edwɛkɛ ne maa yɛnwu kɛ yɛ fanwodi ne lɛ ye ɛweɛne na ɔnle kɛ yɛtɛla. Bieko, ɔwɔ kɛ yelɛma bɛlɛ bɛ nwo aze maa bɛ hu mɔ na ngakula yɛ zɔ maa bɛ awovolɛ. (Ɛfɛ. 5:22; 6:1) Kɛzi ɛweɛne ɛhye mɔ ka yɛ fanwodi ahyɛlɛdeɛ ne ɛ? Kpuya ɛhye anwo mualɛ bahile mɔɔ yɛbanyia ye kenle bie la.

6. Kile deɛmɔti ɔle kpalɛ kɛ yɛ fanwodi ne lɛ ye ɛweɛne la.

⁶ Asoo fanwodi mɔɔ lɛ ɛweɛne la le fanwodi kpalɛ? Ɛhɛe, ɔle zɔ! Duzu ati a yɛka ye zɔ a? Ɛweɛne mɔɔ wɔ yɛ fanwodi nwo la kola bɔ yɛ nwo bane. Kɛ neazo la, yɛkola yɛtu adenle yɛkɔ sua mɔɔ wɔ moamoa la azo. Noko, asoo esiane ɛnle nu kɛ yɛkɛha kale wɔ ɛleka mɔɔ kale ɛhanlɛ nwo mɛla biala ɛnle na awie biala yɛ mɔɔ ɔkulo wɔ adenle ne azo la ɔ? Kyɛkyɛ. Fanwodi nwo ɛweɛne boa maa yɛnyia nyilalɛ dɔɔnwo. Bɛmaa yɛzuzu Baebolo nu neazo bie mɔ anwo yɛva yɛhile nrɛlɛbɛ mɔɔ wɔ nu kɛ Gyihova ɛmaa yɛ ɛweɛne wɔ yɛ fanwodi nwo la anu.

7. (a) Kɛzi ahyɛlɛdeɛ ne maanle Adam yɛle ngakyile vile nane mɔɔ ɛnee wɔ Yidɛn ɛkɛ la anwo ɛ? (b) Ka adenle ko mɔɔ Adam vale ye fanwodi ne lile gyima la.

 ⁷ Mɔɔ Nyamenle bɔ sonla mɔɔ limoa, Adam la, ɔmaanle ye ahyɛlɛdeɛ ɛhye mɔɔ ɔvale ɔmaanle ye anwuma abɔdeɛ mɔɔ bɛze nrɛlɛbɛ la bie. Ɛhye maanle Adam yɛle ngakyile vile nyɛmoa ne mɔ mɔɔ bɛfa nganeɛdelɛ a bɛyɛ debie la anwo. Maa yɛzuzu neazo ko mɔɔ kile kɛ Adam vale ye ahyɛlɛdeɛ ne lile gyima kpalɛ la anwo. Bɛbɔle nane kolaa na bɛabɔ sonla. Noko Adam a Gyihova maanle ɔtotole zɔhane abɔdeɛ ne mɔ aluma a. Nyamenle ‘vale bɛ rɛlɛle sonla kɛ ɔtoto bɛ aluma.’ Mɔɔ Adam nleanle nane ko biala na ɔmaanle ye duma mɔɔ fɛta ye la, Gyihova liele mɔɔ Adam yɛle la dole nu. Yemɔti, “duma biala mɔɔ sonla vale donle abɔdeɛ ko biala la, yemɔ a bɛvale bɛvɛlɛle ye a.”—Mɔl. 2:19.

8. Kɛzi Adam anva ye fanwodi ne anli gyima kpalɛ ɛ, na duzu a ɛvi nu ɛra a?

⁸ Adam akunlu andwo paladaese azɛlɛ ne mɔɔ Nyamenle se ɔnlea zo la anwo. Ɔ nye anzɔ nwolɛ adenle kpole ɛhye mɔɔ Nyamenle vale maanle ye la: “Bɛlɔ, bɛyɛ mɔnwo mɔnwo, bɛyi azɛlɛ ye na bɛzie azɛlɛ ye. Eza bɛzie azule nee nyevile nu fɛlɛ, anwomanyunlu nloma nee azɛlɛ ye azo abɔdeɛ biala mɔɔ die ɛnwomenle la.” (Mɔl. 1:28) Emomu, ɔdɛlale ɛweɛne ne mɔɔ Nyamenle vale maanle ye la na ɔlile bakama ne. Adam fanwodi ne mɔɔ yeanva yeanli gyima kpalɛ la ɛmaa ɔ bo zo amra ɛnwu amaneɛ na bɛli nyane mekɛ tendenle. (Wlo. 5:12) Ngyegyelɛ mɔɔ vi Adam kpɔkɛzilɛ ne anu ɛra la ɔwɔ kɛ ka yɛ maa yɛfa yɛ fanwodi ne yɛdi gyima kpalɛ wɔ adenle mɔɔ Gyihova ɛhile yɛ la azo.

9. Nwolɛ adenle boni a Gyihova vale maanle ye menli Yizilayɛma a, na duzu a bɛhanle a?

⁹ Adam nee Yive abo zo amra nyianle sinlidɔlɛ nee ewule vile bɛ awovolɛ mɔɔ yɛle anzosesebɛ la ɛkɛ. Noko, bɛanlie yɛ fanwodi ahyɛlɛdeɛ ne. Yɛnwu ɛhye wɔ kɛzi Nyamenle nee Yizilayɛ maanle ne lile la anu. Gyihova luale ye sonvolɛ Mosisi anwo zo, maanle bɛ adenle kɛ bɛkola bɛkpa kɛ bɛbayɛ Ye ɛdeɛ anzɛɛ bɛnrɛyɛ. (Ade. 19:3-6) Duzu a bɛhanle a? Bɛvile bɛ ɛhulolɛ nu bɛkpale kɛ bɛbayɛ menli mɔɔ Nyamenle duma la bɛ nwo zo la, na bɛ muala bɛhanle kɛ: ‘Debie biala mɔɔ Gyihova ɛha la, yɛbayɛ.’ (Ade. 19:8) Ɔyɛ nyane kɛ, yeangyɛ biala maanle ne vale ye fanwodi ne lile gyima wɔ adenle ɛtane zo zɛkyele ɛwɔkɛ ne la. Yemɔti, bɛmaa yɛbeta Gyihova dahuu na yɛli ye tenlene ngyinlazo ne mɔ azo yɛva yɛhile kɛ yɛbu yɛ fanwodi ahyɛlɛdeɛ ne kɛ ɔsonle bolɛ.—1 Kɔl. 10:11.

10. Neazo boni mɔ a kile kɛ alesama mɔɔ ɛnli munli la kola fa bɛ ahyɛlɛdeɛ ne di Nyamenle eni a? (Nea mɔlebɛbo nvoninli ne.)

¹⁰ Wɔ Hibuluma tile 11, yɛnwu Nyamenle azonvolɛ 16 mɔɔ bɛvale bɛ fanwodi ne bɛlile gyima kɛ mɔɔ Gyihova hanle la aluma. Ɔlua zo, bɛnyianle nyilalɛ dɔɔnwo nee anyelazo kpalɛ. Kɛ neazo la, Nowa lale diedi kpole ali na ɔkpale kɛ ɔbali Nyamenle adehilelɛ zo yeabobɔ ɛlɛka yeava yealie ye abusua ne nee alesama mɔɔ bara kenle bie la ngoane. (Hib. 11:7) Ebileham nee Sɛla lile Nyamenle adehilelɛ zo hɔle ɛwɔkɛ azɛlɛ ne azo. Mɔɔ bɛdule adenle tendenle ɛhye bɔbɔ la, ‘anrɛɛ bɛbahola bɛazia bɛara’ Yule mɔɔ le sua mɔɔ gyi boɛ la azo. Noko bɛvale bɛ nye bɛdole “ɛwɔkɛ ne mɔ mɔɔ Nyamenle bɔle bɛ la” azo; ɛnee ‘bɛ nwo ɛlɛdɔ ɛleka kpalɛ ne.’ (Hib. 11:8, 13, 15, 16) Mosisi kpole Yigyibiti anwonyia, “ɔhulole kɛ ɔ nee Nyamenle menli ne kɛli nyane tɛla kɛ ɔ nye kɛlie ɛtane nwo mekɛ ekyi bie a.” (Hib. 11:24-26) Bɛmaa  yɛzukoa tete amra ɛhye mɔ diedi ne yɛbu yɛ fanwodi ahyɛlɛdeɛ ne kɛ ɔsonle bolɛ yɛva yɛyɛ Nyamenle ɛhulolɛdeɛ.

11. (a) Yɛ ahyɛlɛdeɛ ne anwo nyilalɛ kpole ko a le duzu? (b) Duzu a ka wɔ maa ɛfa wɔ ahyɛlɛdeɛ ne ɛdi gyima kpalɛ a?

¹¹ Ɔnyɛ se kɛ yɛbamaa awie azi kpɔkɛ amaa yɛ ɛdeɛ, noko saa yɛyɛ zɔ a ɔbamaa nyilalɛ mgbole mɔɔ ahyɛlɛdeɛ ɛhye bamaa yɛanyia la anu ko abɔ yɛ. Yɛnwu nyilalɛ ɛhye wɔ Mɛla ne 30:19, 20. (Kenga.) Ngyɛnu 19 ne ka kpɔkɛzilɛ nwo adenle mɔɔ Nyamenle vale maanle Yizilayɛma la. Wɔ ngyɛnu 20 ne, Gyihova maanle bɛhilele ye mɔɔ wɔ bɛ ahonle nu la. Yɛdayɛ noko yɛkola yɛkpa kɛ yɛbazonle Gyihova. Ɔle nwolɛ adenle kpole kɛ yɛbalua Nyamenle ahyɛlɛdeɛ ɛhye azo yɛahile kɛ yɛkulo ye, yɛali ye eni, na yɛawula ye anyunlunyia!

12. Duzu a ɔnle kɛ yɛfa yɛ ahyɛlɛdeɛ ne yɛyɛ ye fee a?

¹² Fa ye kɛ wɔva ahyɛlɛdeɛ mɔɔ sonle bolɛ la wɔmaa ɛ gɔnwo bie. Nea kɛzi ɔbayɛ wɔ nyane kɛ ɛbanwu kɛ yeva ahyɛlɛdeɛ ne yedo bɔla nu anzɛɛ yeva yeboda awie a! Akee nea kɛzi Gyihova bade nganeɛ saa ɔnwu kɛ menli dɔɔnwo fa bɛ ahyɛlɛdeɛ ne di gyima wɔ adenle ɛtane zo si kpɔkɛ mɔɔ gyegye awie mɔ a. Ɛhɛe, kɛ mɔɔ Baebolo ne hanle la, wɔ “awieleɛ mekɛ ne anu” menli bayɛ boniayɛ. (2 Tem. 3:1, 2) Bɛmmamaa yɛsɛkye yɛ ahyɛlɛdeɛ ne mɔɔ vi Gyihova la anzɛɛ yɛtoto ye aze. Ɛnee kɛ ɔkɛyɛ na yɛanva yɛ ahyɛlɛdeɛ ɛhye yɛanli gyima wɔ adenle ɛtane zo ɛ?

13. Adenle ko mɔɔ yɛdua zo yɛfa yɛ Kilisiene fanwodi ne yɛdi gyima kpalɛ la a le boni?

¹³ Yɛ muala yɛlɛ adenle yɛkpa agɔnwolɛ, adɛladeɛ, anwoziezielɛ, nee anyelielɛ ninyɛne. Noko, saa yɛyɛ akɛlɛ yɛmaa yɛ nwonane ne atiakunluwɔzo na yɛdie anyiemgba ɛbɛla anzɛɛ ewiade nyɛleɛ bie yɛto nu a, ɛnee yɛlɛfa yɛ fanwodi ne ‘yɛaheda ɛtane zo.’ (Kenga 1 Pita 2:16.) Kɛ anrɛɛ yɛbava yɛ fanwodi ne yɛali ‘nwonane nu atiakunluwɔzo nzi la,’ yɛkulo kɛ yɛsi kpɔkɛ mɔɔ bamaa yɛali folɛdulɛ ɛhye azo la: ‘Debie biala mɔɔ bɛyɛ la, bɛyɛ bɛde Nyamenle anyunlu.’—Gal. 5:13; 1 Kɔl. 10:31.

14. Kɛzi anwodozo mɔɔ yɛlɛ ye wɔ Gyihova anu la fale yɛ ahyɛlɛdeɛ ne anwo ɛ?

 ¹⁴ Adenle bieko mɔɔ yɛdua zo yɛbɔ yɛ ahyɛlɛdeɛ ne anwo bane la a le kɛ yɛbanyia anwodozo wɔ Gyihova anu na yɛamaa yeahile yɛ adenle. Ɔ ngomekye ala a ‘ɔkilehile yɛ ɔmaa yɛyɛ kpalɛ, na ɔdi yɛ nyunlu ɔkilehile yɛ adenle mɔɔ ɔwɔ kɛ yɛdua nu a.’ (Aye. 48:17) Ɔwɔ kɛ yɛfi mɛlɛbɛnwoaze nu yɛdie nɔhalɛ edwɛkɛ ɛhye yɛto nu: “Sonla ɔdaye ɔnlɛ ɔ nwo; Sonla ɔdaye ɔnlɛ ye ngoane zo tumi.” (Gyɛ. 10:23) Bɛmmamaa yɛfa yɛ nwo yɛto yɛ ndelebɛbo zo kɛ mɔɔ Adam nee Yizilayɛma mɔɔ dele atua la yɛle la. Emomu, bɛmaa ‘yɛyeye yɛ ahonle nu yɛva yɛ rɛle yɛwula Gyihova anu.’—Mrɛ. 3:5.

15. Duzu a yɛsukoa yɛfi ngyinlazo mɔɔ wɔ Galeehyeama 6:5 la anu a?

¹⁵ Ɛweɛne mɔɔ wɔ yɛ fanwodi ne anwo la anu ko a le kɛ yɛbalie adenle mɔɔ awie mɔ lɛ si bɛ kpɔkɛ la yɛado nu. Duzu ati ɔ? Kɛmɔ awie biala kola kpa mɔɔ ɔkulo la ati, Kilisienema nwiɔ kpɔkɛzilɛ ɛnrɛyɛ ko dahuu. Ɛhye le nɔhalɛ wɔ yɛ ɛbɛlabɔlɛ nee yɛ ɛzonlenlɛ nu bɔbɔ. Kakye ngyinlazo mɔɔ wɔ Galeehyeama 6:5. (Kenga.) Saa yɛnwu kɛ Kilisienenli ko biala ‘bazoa ɔdaye ye adesoa a,’ ɔbamaa yɛalie adenle mɔɔ awie mɔ lɛ fa bɛ fanwodi ahyɛlɛdeɛ ne di gyima la yɛado nu.

16, 17. (a) Kɛzi fanwodi nwo rale edwɛkɛ wɔ Kɔlente ɛ? (b) Kɛzi Pɔɔlo zieziele edwɛkɛ ne ɛ, na duzu a ɛhye maa yɛnwu ye wɔ awie mɔ fanwodi nwo a?

¹⁶ Suzu Baebolo nu neazo ko mɔɔ maa yɛnwu kɛ ɔwɔ kɛ yɛdie adenle mɔɔ yɛ mediema lɛ si bɛ kpɔkɛ yɛto nu la anwo. Mgbakyemgbakyenu rale Kilisienema mɔɔ ɛnee wɔ Kɔlente la anu wɔ nane mɔɔ bɛvale bɛbɔle afɔle bɛmaanle awozonle na nzinlii bɛdɔnenle ye wɔ gua nu la ɛlilɛ nwo. Bie mɔ dwenlenle kɛ: ‘Kɛmɔ awozonle ɛnle ɛhwee la ati, bɛkola bɛdi nane ne mɔɔ bɛ adwenle ɛngyegye bɛ a.’ Noko, bɛdabɛ mɔɔ ɛnee bɛsonle awozonle la nwunle kɛ saa bɛdi nane ne a ɛnee bɛlɛsonle awozonle. (1 Kɔl. 8:4, 7) Ɛnee edwɛkɛ ɛhye gyegye adwenle, na ɔvale mgbakyemgbakyenu ɔrale asafo ne anu. Kɛzi Pɔɔlo maanle Kɔlente Kilisienema ne nwunle Nyamenle adwenle wɔ edwɛkɛ ne anwo ɛ?

¹⁷ Mɔɔ limoa, Pɔɔlo hakyele afoa nwiɔ ne ɔmaanle bɛnwunle kɛ aleɛ ɛnrɛva yɛ ɛnrɛdwu Nyamenle anyunlu. (1 Kɔl. 8:8) Akee ɔdule bɛ folɛ kɛ bɛnlea boɛ na “bɛ fanwodi” ne ammaa “bɛdabɛ mɔɔ bɛ diedi ɛtɛtinle la andu koti.” (1 Kɔl. 8:9) Amozii, ɔzele bɛdabɛ mɔɔ bɛ adwenle gyegye bɛ la kɛ bɛmmabua bɛdabɛ mɔɔ bɛdi nane zɛhae la fɔlɛ. (1 Kɔl. 10:25, 29, 30) Yemɔti, wɔ ɛzonlenlɛ nwo edwɛkɛ zɛhae mɔɔ anwo hyia la anu, ɔwɔ kɛ Kilisienenli biala si ye kpɔkɛ. Ɔti, asoo ɔnle kɛ yɛdayɛ noko yɛdie adenle mɔɔ yɛ mediema lɛ si kpɔkɛ wɔ ninyɛne mɔɔ anwo ɛngyia dɔɔnwo anwo la yɛto nu ɔ?—1 Kɔl. 10:32, 33.

18. Kɛzi ɛbahile kɛ ɛ nye sɔ wɔ ahyɛlɛdeɛ ne ɛ?

¹⁸ Gyihova ɛmaa yɛ adenle mɔɔ yɛkola yɛkpa mɔɔ yɛkulo la, na ɛhye le nɔhalɛ fanwodi. (2 Kɔl. 3:17) Yɛ nye sɔ ahyɛlɛdeɛ ɛhye ɔluakɛ ɔmaa yɛsi kpɔkɛ mɔɔ maa Gyihova nwu kɛzi yɛkulo ye la. Bɛmaa yɛhɔ zo yɛhile kɛ yɛ nye sɔ ahyɛlɛdeɛ kɛnlɛma ɛhye ɔlua Nyamenle mɔɔ yɛbava yɛali ye eni nee adenle mɔɔ awie mɔ lɛ fa bɛ ɛdeɛ ne di gyima mɔɔ yɛbalie yɛado nu la azo.