1-2. (a) Kolaa na Kilisiene mbelazinli adu la, duzu a ɔwɔ kɛ bɛdimoa bɛsuzu nwo a? (b) Saa yɛka kɛ awie mɔ “ɛlɛtu” a, duzu a ɔkile a? (Nea “Edwɛkɛ Mɔɔ Bɛhilehile Nu.”)

 ƐKULO kɛ ɛgya ɔ? Ɔngyia kɛ awie gya na ɔ nye alie ɛdeɛ, noko mbelazinli dɔɔnwo, mgbavolɛ nee mbɛlɛra nee mgbanyinli anye la kɛ bɛbanyia bɛ hu anzɛɛ bɛ ye. Noko kolaa na ɛ nee awie adu kɛ bɛgya la, ɔwɔ kɛ wɔ ezukoa nee wɔ sunsum nu gyinlabelɛ yɛ kpalɛ na ɛnwu kɛ wɔziezie ɛ nwo kpalɛ wɔmaa agyalɛ. a (1 Kɔl. 7:36) Saa ɔle zɔ a, yemɔ ɛbahola wɔanyia agyalɛ mɔɔ anyelielɛ wɔ nu.

² Noko tɛ dahuu a ɔla aze kɛ ɛbanyia awie mɔɔ ɛkulo kɛ ɛgya ye la. (Mrɛ. 31:10) Yɛɛ saa ɛnwu awie na ɛkulo kɛ ɛnwu ye kpalɛ bɔbɔ a, bie a ɔbayɛ se kɛ ɛ nee ye babɔ ɔ bo kɛ bɛtu. b Wɔ edwɛkɛ ɛhye anu, yɛbazuzu mɔɔ baboa Kilisiene mbelazinli yeamaa bɛanyia awie kpalɛ mɔɔ bɛbagya ye nee kɛzi bɛbabɔ ɔ bo kɛ bɛtu la anwo. Eza yɛbanwu kɛzi mediema mɔɔ wɔ asafo ne anu la bahola aboa bɛdabɛ mɔɔ bɛkulo kɛ bɛgya la.

KƐZI ƐBANYIA AWIE KPALƐ WƆAGYA YE LA

3. Saa Kilisienenli bie ɛlɛkpondɛ awie mɔɔ ɔbagya ye la a, duzu a ɔwɔ kɛ ɔsuzu nwo a?

³ Saa ɛkulo kɛ ɛgya a, ɔle kpalɛ bɔkɔɔ kɛ ɛbanwu mɔɔ ɛkpondɛ  ye wɔ yelɛ anzɛɛ kunli nwo la kolaa na ɛ nee awie abɔ ɔ bo kɛ bɛtu. Saa wɔanyɛ ye zɔ a, bie a awie mɔɔ ɛgya ye a ɔbaboa wɔ la wɔ ɛkɛ noko ɛnrɛnwu ye anzɛɛ ɛ nee awie mɔɔ ɔnrɛboa wɔ la babɔ ɔ bo kɛ bɛtu. Noko ɔwɔ kɛ awie mɔɔ ɛkulo kɛ ɛgya ye la yɛ Kilisienenli mɔɔ bɛzɔne ye. (1 Kɔl. 7:39) Noko tɛ awie biala mɔɔ bɛzɔne ye la a ɛgya ye a ɔbaboa wɔ a. Ɔti ɛbahola wɔabiza ɛ nwo kɛ: ‘Bodane boni mɔ a gyi me nye zo wɔ ɛbɛlabɔlɛ nu a? Subane boni mɔ a menwu kɛ ɔhyia kɛ kunli anzɛɛ yelɛ nyia a? Asoo ndelebɛbo wɔ mɔɔ mekpondɛ meavi nrenyia anzɛɛ raalɛ bie ɛkɛ la anu ɔ?’

4. Duzu a menli bie mɔ ɛyɛ nwolɛ asɔne a?

⁴ Saa ɛkulo kɛ ɛgya a, bie a wɔyɛ nwolɛ asɔne. (Fel. 4:6) Nɔhalɛ nu, Gyihova ɛtɛbɔle ɛwɔkɛ kɛ ɔbamaa wɔ awie yeamaa wɔagya ye. Noko ɔdwenle wɔ ngyianlɛ nee wɔ nganeɛdelɛ nwo, na saa ɛkpondɛ awie wɔagya ye a ɔbahola yeaboa wɔ. Ɔti kɔ zo ka mɔɔ ɛkpondɛ nee kɛzi ɛte nganeɛ la kile ye. (Edw. 62:8) Sɛlɛ abotane nee nrɛlɛbɛ. (Gye. 1:5) John, c adiema kpavolɛ bie mɔɔ ɔtɛgyale mɔɔ wɔ United States la hanle ninyɛne mɔɔ ɔyɛ nwolɛ asɔne la anwo edwɛkɛ kɛ: “Meka subane mɔɔ mekpondɛ ye wɔ awie mɔɔ mebagya ye la anwo la anwo edwɛkɛ mekile Gyihova. Meyɛ asɔne kɛ saa meyia awie mɔɔ mebahola meagya ye la a, ɔmaa menwu ye. Eza mesɛlɛ Gyihova kɛ ɔboa me ɔmaa menyia subane mɔɔ bamaa meayɛ kunli kpalɛ la.” Adiema raalɛ Tanya mɔɔ ɔvi Sri Lanka la hanle kɛ: “Mekɛ mɔɔ melɛkpondɛ awie mɔɔ mebagya ye la, eza mesɛlɛ Gyihova kɛ ɔboa me ɔmaa mengɔ zo menli nɔhalɛ, menyia adwenle kpalɛ na me nye ɛlie.” Saa ɔwɔ kɛ ɛkendɛ mekɛ tendenle kolaa na wɔanyia awie mɔɔ ɛbahola wɔagya ye la a,  Gyihova ɛbɔ ɛwɔkɛ kɛ ɔbanlea wɔ na yeahile kɛ ɔdwenle ɛ nwo.—Edw. 55:22.

5. Mekɛ boni mɔ anu a Kilisiene mbelazinli bahola ayia menli mɔɔ bɛkulo Gyihova la ɛ? (1 Kɔlentema 15:58) (Eza nea nvoninli ne.)

⁵ Baebolo ne maa yɛ anwosesebɛ kɛ yɛyɛ “dɔɔnwo wɔ Awulae gyima ne anu.” (Kenga 1 Kɔlentema 15:58.) Mekɛ mɔɔ ɛlɛyɛ dɔɔnwo wɔ Gyihova ɛzonlenlɛ nu na ɛ nee mediema mrenyia nee mraalɛ ngakyile ɛlɛtu la, ɛ nee bɛ banyia agɔnwolɛvalɛ kpalɛ na eza wɔanyia nwolɛ adenle wɔayia mbelazinli gyɛne mɔɔ bɛle kɛ ɛdawɔ mɔɔ bɛva Gyihova ɛzonlenlɛ bɛzie bɛ nye zo la. Na mekɛ mɔɔ ɛlɛyɛ biala mɔɔ ɛbahola la kɛ ɛsɔ Gyihova anye la, ɛ nye balie kpalɛ.

6. Duzu a ɔwɔ kɛ Kilisiene mbelazinli mɔɔ bɛlɛkpondɛ awie bɛagya ye la kakye a?

⁶ Noko yɛ ɛhye nzonlɛ: Mmamaa awie mɔɔ ɛkpondɛ ye wɔagya ye la di wɔ adwenle somaa. (Fel. 1:10) Ɔluakɛ saa ɛgya anzɛɛ wɔangya a, tɛ yemɔ a bamaa ɛ nye alie kpalɛ a, emomu agɔnwolɛvalɛ kpalɛ mɔɔ ɛ nee Gyihova lɛ la a bamaa ɛ nye alie kpalɛ a. (Mat. 5:3) Yɛɛ mekɛ mɔɔ ɛtɛgyale la, bie a ɛbanyia fanwodi dɔɔnwo wɔadɛlɛ wɔ ɛzonlenlɛ gyima ne anu. (1 Kɔl. 7:​32, 33) Fa mekɛ ɛhye di gyima kpalɛ. Adiema raalɛ Jessica mɔɔ vi United States mɔɔ bɛgyale ye la ɛnee asɛɛ yeli ɛvolɛ 40 la hanle kɛ, “Kolaa na bɛagya me la, menyɛle dɔɔnwo wɔ ɛzonlenlɛ gyima ne anu na yemɔ boale me ɔmaanle me kunlu dwole me nwo ɔnva nwo kɛ ɛnee mekulo kɛ megya la.”

NYIA MEKƐ NEA YE KPALƐ

7. Duzu ati a ɔwɔ kɛ ɛgua ɛ nye aze ɛnea awie mɔɔ ɛkulo kɛ ɛgya ye la ekyii kolaa na wɔaha wɔahile ye a? (Mrɛlɛbulɛ 13:16)

⁷ Na saa ɛnwu kɛ ɛgya awie bie a ɔbaboa wɔ noko ɛ? Asoo ɔwɔ kɛ ɛka ɛkile ye ɛkɛ ne ala kɛ ɛ nye die ɔ nwo ɔ? Baebolo ne ka kɛ sonla mɔɔ anye gyi ɔ ti anwo la kpondɛ debie bie anwo nrɛlɛbɛ kolaa na yeayɛ. (Kenga Mrɛlɛbulɛ 13:16.) Ɔti nrɛlɛbɛ wɔ nu kɛ ɛbanyia abotane wɔagua ɛ nye aze wɔanlea awie ekyii kolaa na wɔaha wɔahile ye kɛ ɛ nye die ɔ nwo. Adiema nrenyia Aschwin mɔɔ vi Netherlands la hanle kɛ: “Yɛkola yɛnyia awie anwo ɛhulolɛ ndɛndɛ yɛɛ eza ɔkola ɔfi ɛkɛ ndɛndɛ. Ɔti saa ɛtɔ alagye ɛgua ɛ nye aze ɛnea awie a, ɔnrɛmaa ɛnrɛgyinla wɔ nganeɛdelɛ zo kɛ ɛ nee ye tu na wɔagya ye.” Eza saa ɛgua ɛ nye aze ɛnea awie a, bie a ɛbanwu kɛ ɛgya ye a ɔnrɛboa wɔ.

8. Kɛzi belazinli bie bahola agua ɔ nye aze anlea awie mɔɔ ɔkulo kɛ ɔgya ye la ɛ? (Eza nea nvoninli ne.)

⁸ Saa ɛkulo kɛ ɛgua ɛ nye aze ɛnea awie a, kɛzi ɛbahola wɔayɛ ye ɛ? Wɔ debiezukoalɛ bo anzɛɛ saa bɛyia kɛ bɛdielie bɛ nye a, bie a ɛbanwu ahenle ne sunsum nu gyinlabelɛ, ye subane nee kɛzi ɔyɛ ye nyɛleɛ la. Nwane mɔ a le ɔ gɔnwo mɔ a, na duzu a ɔka nwolɛ edwɛkɛ a? (Luku 6:45) Bodane mɔɔ ɛlɛ la bie a ɔdaye noko ɔlɛ ɔ? Ɛbahola wɔabiza ye asafo nu mgbanyima anzɛɛ Kilisienema mɔɔ bɛnyi sunsum nu mɔɔ bɛze ye kpalɛ la ɔ nwo edwɛkɛ. (Mrɛ. 20:18) Ɛbahola wɔabiza bɛ subane mɔɔ ɔlɛ la. (Wut. 2:11) Mekɛ mɔɔ ɛlɛgua ɛ nye aze wɔanlea ahenle ne la, anrɛɛ mmamaa ɔ nwo kyele ye. Te ye nganeɛdelɛ bo, mmayɛ ye mɔɔ ɔlɛkɔ ɛleka biala a ɛdoa ye yɛɛ ɛkulo kɛ ɛnwu debie biala mɔɔ ɔlɛyɛ la anu.

9. Kolaa na ɛ nee awie mɔɔ ɛkulo kɛ ɛgya ye la adendɛ la, adwenle boni a ɔnle kɛ ɛnyia a?

⁹ Ɔwɔ kɛ ɔdi mekɛ tendenle nyɛ kolaa na wɔaha wɔahile awie kɛ ɛ nye die ɔ nwo? Saa ɛka ɛkile awie ndɛndɛ kɛ ɛ nye die ɔ nwo a, bie a ɔbabu wɔ kɛ ɛpele ɛ nwo. (Mrɛ. 29:20) Noko eza saa ɛkyɛ nwolɛ somaa a, ɔbabu wɔ  kɛ ɛngola ɛnzi kpɔkɛ, titili saa ahenle ne ɛlimoa ɛnwu kɛ ɛ nye die ɔ nwo a. (Nol. 11:4) Kakye kɛ, kolaa na wɔaha wɔahile awie kɛ ɛ nye die ɔ nwo la, ɔnle kɛ ɛnyia adwenle kɛ ye biala anu ɛbagya ahenle. Noko ɔwɔ kɛ ɛnwu kɛ wɔdwu agyalɛ ɛhɔlɛ na bie a ɛgya ahenle ne a ɔbaboa wɔ.

10. Saa ɛnwu kɛ awie anye die ɛ nwo noko ɛngulo kɛ ɛ nee ye tu kɛ bɛbagya a, duzu a ɔwɔ kɛ ɛyɛ a?

¹⁰ Noko saa ɛnwu kɛ awie anye die ɛ nwo a, duzu a ɔwɔ kɛ ɛyɛ a? Saa ɛ nye ɛnlie nwo kɛ ɛ nee ye badu a, maa ɔnwu ye wienyi wɔ wɔ nyɛleɛ nu. Ɔnle kpalɛ kɛ ɛbamaa ahenle anyia adwenle kɛ ɛ nye die ɔ nwo noko amuanrɛɛ ɔnle wɔ adwenle nu zɔ.—1 Kɔl. 10:24; Ɛfɛ. 4:25.

11. Wɔ maanle mɔɔ awie mɔ a yɛ menli mɔɔ ɔwɔ kɛ bɛtu kɛ bɛgya anzɛɛ agyalɛ nwo ngyehyɛleɛ la anu, duzu a ɔwɔ kɛ bɛkakye a?

¹¹ Wɔ maanle bie mɔ anu, bie a awovolɛ anzɛɛ mgbanyinli gyɛne a kpa awie maa bɛ busuanli mɔɔ le belazinli la a. Wɔ maanle gyɛne nu, mbusua anzɛɛ agɔnwolɛma kpondɛ awie mɔɔ belazinli bie bahola agya ye la na akee bɛayɛ ngyehyɛleɛ bɛamaa nrenyia ne nee raalɛ ne ayia na bɛanlea saa bɛbahola bɛadu na bɛagya a. Saa bɛka bɛkile wɔ kɛ ɛnlea saa menli nwiɔ bie bahola adu anzɛɛ agya a, suzu mɔɔ bɛ nuhua ko biala kulo nee mɔɔ ɔhyia nwo la anwo. Saa ɛnwu awie mɔɔ wɔ busuanli anzɛɛ ɛ gɔnwo bie bahola agya ye la a, bɔ mɔdenle kɛ ɛbanwu ye subane nee ye nyɛleɛ, yɛɛ mɔɔ tɛla biala la, ye sunsum nu gyinlabelɛ nwo edwɛkɛ dɔɔnwo. Agɔnwolɛvalɛ kpalɛ mɔɔ awie nee Gyihova lɛ la hyia kpalɛ tɛla ezukoa, nwoma anzɛɛ dibilɛ mɔɔ awie lɛ la. Noko kakye kɛ, mbelazinli ne mɔ a ɔwɔ kɛ bɛsi kpɔkɛ bɔkɔɔ kɛ bɛbagya anzɛɛ bɛnrɛgya a.—Gal. 6:5.

KƐZI ƐBABƆ Ɔ BO KƐ Ɛ NEE AWIE TU LA

12. Saa ɛkulo kɛ ɛ nee awie tu a, kɛ ɔkɛyɛ na wɔamaa ahenle anwu ye ɛ?

¹² Saa ɛkulo kɛ ɛ nee awie tu a, kɛ ɔkɛyɛ na wɔamaa ahenle anwu ye ɛ? d Ɛbahola wɔayɛ ngyehyɛleɛ ɛ nee ye ayia wɔ ɛleka mɔɔ menli dɔɔnwo wɔ la amaa bɛabɔ adawu anzɛɛ ɛbavɛlɛ ye wɔ fonu zo. Maa ahenle ɛnwu adwenle mɔɔ ɛlɛ la wienyi. (1 Kɔl. 14:9) Saa nwolɛ bahyia a, maa ahenle mekɛ maa ɔva ɔdwenle  mualɛ mɔɔ ɔbava yeamaa wɔ la anwo. (Mrɛ. 15:28) Yɛɛ saa ahenle anye ɛnlie nwo kɛ ɔ nee wɔ badu a, te ye edwɛkɛ bo.

13. Saa awie ka kile wɔ kɛ ɔkulo wɔ a, duzu a ɛbahola wɔayɛ a? (Kɔlɔsaema 4:6)

¹³ Na saa awie ka kile wɔ kɛ ɔkulo wɔ ɛ? Bie a ɛnee ɔhyia akɛnrasesebɛ kpalɛ na ahenle ahola aha ahile wɔ, ɔti da ɛbulɛ ali kile ye. (Kenga Kɔlɔsaema 4:6.) Saa ɛhyia mekɛ mɔɔ ɛfa wɔazuzu nwo wɔanlea kɛ ɛ nee ye badu anzɛɛ ɛ nee ye ɛnrɛdu a, ka kile ye. Noko bɔ mɔdenle kɛ ɛnrɛmaa mualɛ ne ɛnrɛhyɛ. (Mrɛ. 13:12) Saa ɛ nye ɛnlie ɔ nwo a, ka ye wienyi kile ye. Nea mɔɔ adiema bie mɔɔ bɛfɛlɛ ye Hans, mɔɔ vi Austria la yɛle wɔ mekɛ mɔɔ adiema raalɛ bie hanle kɛ ɔ nye die ɔ nwo la: “Menluale nrɛlɛbɛ adenle zo menganle me kpɔkɛzilɛ ne wienyi mengilele ye. Meangyinlegyinla nwolɛ ɔluakɛ ɛnee mengulo kɛ ɔnyia adwenle kɛ me nye wɔ nu noko amuanrɛɛ ɔnle zɔ. Eza menleanle boɛ kɛ menrɛha anzɛɛ menrɛyɛ debie mɔɔ ɔbamaa yeanyia adwenle kɛ mebahakyi me adwenle la.” Noko saa ɛkulo kɛ ɛ nee ahenle tu a, ɛ nee ye ɛzuzu kɛzi ɛte nganeɛ nee mɔɔ ɛ nye la ye ade wɔ bɛ ɛdulɛ ne anu la anwo. Bie a ɔlua wɔ amaamuo anzɛɛ ninyɛne gyɛne bie mɔ ati, mɔɔ ɛ nye la ye ade la bayɛ ngakyile avi mɔɔ ahenle anye la ye ade la anwo.

KƐ ƆKƐYƐ NA AWIE MƆ ABOA KILISIENE MBELAZINLI Ɛ?

14. Kɛ ɔkɛyɛ na yɛalua yɛ edwɛkɛhanlɛ zo yɛaboa Kilisiene mbelazinli ɛ?

¹⁴ Kɛ ɔkɛyɛ na yɛ muala yɛahola yɛaboa Kilisienema mɔɔ bɛkpondɛ kɛ bɛgya la ɛ? Adenle ko a le kɛ yɛbanlea boɛ wɔ edwɛkɛ mɔɔ yɛka la anwo. (Ɛfɛ. 4:29) Yɛbahola yɛabiza yɛ nwo kɛ: ‘Asoo megolo menli mɔɔ bɛkulo kɛ bɛgya la anwo ɔ? Saa menwu kɛ adiema nrenyia bie nee raalɛ bie mɔɔ bɛtɛgyale la ɛlɛbɔ adawu a, asoo menyia adwenle kɛ bɛ nye die bɛ nwo ɔ?’ (1 Tim. 5:13) Bieko, ɔnle kɛ yɛmaa Kilisienema mɔɔ bɛtɛgyale la te nganeɛ kɛ, kɛmɔ bɛtɛgyale la ati bɛnle kulukulu. Hans mɔɔ yɛhanle ɔ nwo edwɛkɛ la hanle kɛ: “Mediema bie mɔ ka kɛ, ‘Duzu ati a ɛtɛgyale a? Ɛnle kakula bieko.’ Edwɛkɛ zɛhae mɔ maa menli mɔɔ bɛtɛgyale la te nganeɛ kɛ bɛ nye ɛnzɔ mɔɔ bɛlɛyɛ la na ɔmaa bɛ nwo pele bɛ kɛ bɛbagya.” Saa yɛkpondɛ nwolɛ adenle yɛkanvo mediema mɔɔ bɛtɛgyale la a, nea kɛzi ɔbaboa bɛ la!—1 Tɛs. 5:11.

15. (a) Kɛ mɔɔ ngyinlazo mɔɔ wɔ Wulomuma 15:2 kile la, kolaa na yɛaboa awie yɛamaa yɛanyia awie mɔɔ ɔbagya ye la, duzu a ɔwɔ kɛ yɛsuzu nwo a? (Eza nea nvoninli ne.) (b) Ɛzukoalɛdeɛ boni a ɛnyianle ye wɔ vidio ne anu a?

 ¹⁵ Na saa yɛsuzu kɛ adiema nrenyia bie nee adiema raalɛ bie fɛta bɛ nwo na ɔwɔ kɛ bɛgya noko ɛ? Baebolo ne ka kile yɛ kɛ yɛdwenle awie mɔ nganeɛdelɛ nwo. (Kenga Wulomuma 15:2.) Menli dɔɔnwo mɔɔ bɛtɛgyale la anye ɛnlie nwolɛ kɛ bɛbava awie mɔɔ bɛsuzu kɛ bɛgya ye a ɔbaboa la bɛahile bɛ, na ɔwɔ kɛ yɛdie bɛ edwɛkɛ ne yɛto nu. (2 Tɛs. 3:11) Bie a awie mɔ bahulo kɛ yɛbaboa bɛ, noko saa bɛtɛkanle bɛtɛkilele yɛ a ɔnle kɛ yɛfa yɛ nloa yɛwulowula bɛ edwɛkɛ nu. e (Mrɛ. 3:27) Menli mɔɔ bɛtɛgyale la bie mɔ anye ɛnlie nwo kɛ yɛbava awie mɔ yɛahile bɛ. Lydia, adiema raalɛ bie mɔɔ ɔtɛgyale mɔɔ vi Germany la hanle kɛ: “Ɛbahola wɔado ɛ sa wɔavɛlɛ adiema nrenyia ne nee adiema raalɛ ne yɛɛ awie mɔ gyɛne. Yɛ debie mɔɔ ɔbamaa bɛanyia nwolɛ adenle bɛabɔ adawu la na gyakyi mɔɔ ɛha la maa bɛ.”

16. Duzu a ɔwɔ kɛ Kilisienema mɔɔ bɛtɛgyale la kakye a?

¹⁶ Yɛ muala—yɛtɛgyale o anzɛɛ yɛgya o—yɛbahola yɛanyia asetɛnla mɔɔ yɛ anyelielɛ. (Edw. 128:1) Ɔti saa ɛkpondɛ kɛ ɛgya noko ɛtɛnyianle awie mɔɔ ɛbagya ye la a, kɔ zo fa wɔ adwenle sie Gyihova mɔɔ ɛsonle ye la azo. Adiema raalɛ bie mɔɔ vi Macao mɔɔ bɛfɛlɛ ye Sin Yi la hanle kɛ: “Saa ɛfa mekɛ mɔɔ ɛbahola ɛ nee ɛ hu anzɛɛ ɛ ye adɛnla aze wɔ Paladaese la ɛtoto mekɛ mɔɔ ɛlɛfa wɔali belazinli la anwo a, belazinlililɛ mekɛ ne anwa fee. Maa ɛ nye ɛlie wɔ zɔhane mekɛ ne anu na fa mekɛ ne di gyima kpalɛ.” Noko saa wɔnyia awie mɔɔ ɛkulo kɛ ɛgya ye la ati bɛbɔ ɔ bo bɛlɛtu noko ɛ? Wɔ edwɛkɛ bieko anu, yɛbazuzu kɛzi bɛ ɛdulɛ ne bahola ahɔ boɛ la anwo.