1-2. Kɛzi alesama tɛnlabelɛ ne le kɛ kpavolɛ ne mɔɔ bɛha ɔ nwo edwɛkɛ wɔ ɛdendɛkpunli 1 ne anu la ɛ?

 PƐ KPAVOLƐ bie mɔɔ ye awovolɛ ɛnyia bɛ nwo kpole la anwo nvoninli. Kenle ko bie, esiane dole ye; ye awovolɛ wule. Ɔlile alɔbɔlɛ kpole. Noko tɛ ye amaneɛnwunlɛ ne amuala ɛne. Ɔranwunle kɛ ye awovolɛ lile abusua ne ezukoa ne amuala na ɛnee eza bɛtua kakɛ kpole bie. Kɛ anrɛɛ bɛbagyakyi ye agyapadeɛ la, kakɛ a bɛvale bɛgyakyile ye a yɛɛ menli mɔɔ bɛtua bɛ kakɛ la noko gyi kpavolɛ ne akɔme zo kɛ bɛdie bɛ ezukoa ne. Ɔnrɛhola kakɛ ɛhye mɔ amuala tua ɛlɛ.

² Wɔ ndenle bie mɔ azo, yɛ tɛnlabelɛ ne le kɛ kpavolɛ ɛhye ɛdeɛ ne la. Ɛnee yɛ awovolɛ mɔɔ bɛlimoa, Adam nee Yive di munli yɛɛ ɛnee bɛde paladaese kɛnlɛma bie anu. (Gyn. 1:27; 2:​7-9) Ɛnee bɛlɛ nwolɛ adenle kɛ bɛbadɛnla aze dahuu na bɛ nye alie. Noko debie biala hakyile. Bɛ Paladaese asetɛnla ne nee nwolɛ adenle mɔɔ ɛnee bɛlɛ kɛ bɛbadɛnla aze dahuu la bɔle bɛ. Agyapadeɛ boni a bɛbahola bɛava bɛagyakyi bɛ mra mɔɔ bɛbawo bɛ kenle bie la ɛ? Baebolo ne ka kile yɛ kɛ: “Kɛ mɔɔ ɔlua sonla ko [Adam] anwo zo ɛtane rale ewiade na ewule luale ɛtane nwo zo rale la, yɛɛ ewule dɛlɛle hanle menli kɔsɔɔti a, ɔluakɛ bɛ muala bɛyɛ ɛtane.” (Wlo. 5:12) Agyapadeɛ mɔɔ Adam vale gyakyile yɛ la a le ɛtane, na yemɔ a maa yɛwu a. Ɛtane mɔɔ bɛva bɛgyakyi yɛ la le kɛ kakɛ kpole bie mɔɔ yɛ nuhua biala ɛnrɛhola ye tua ɛlɛ la.—Edw. 49:8.

 3. Duzu ati a yɛbahola yɛava yɛ ɛtane ne mɔ yɛatoto “kakɛ” nwo a?

 ³ Gyisɛse vale ɛtane totole “kakɛ” nwo. (Mat. 6:12; Luku 11:4) Saa yɛyɛ ɛtane a, ɔle kɛ asɛɛ yɛtua Gyihova kakɛ la. Ɔwɔ kɛ yɛtua ɛtane mɔɔ yɛyɛ la anwo kakɛ. Saa yɛandua kakɛ ɛhye a, kyesɛ yɛwu na bɛapɛ nu.—Wlo. 6:​7, 23.

 4. (a) Saa ɛtanevolɛma amuala annyia moalɛ a, duzu a bado bɛ a? (Edwɛne 49:​7-9) (b) Wɔ Baebolo ne anu, duzu a edwɛkɛkpɔkɛ “ɛtane” kile a? (Nea ɛlɛka, “ Ɛtane.”)

⁴ Asoo yɛ sa bahola aha ninyɛne kɔsɔɔti mɔɔ vile Adam nee Yive asa la bieko? Yɛ ngomekye yɛnrɛhola yɛnrɛyɛ. (Kenga Edwɛne 49:​7-9.) Saa yɛannyia moalɛ a, yɛnrɛnyia kenle bie asetɛnla anzɛɛ ewudwazo nwo anyelazo. Nɔhalɛ nu, anrɛɛ yɛwu a yɛbayɛ kɛ nane ne mɔ ala la.—Nol. 3:19; 2 Pita 2:12.

 5. Kɛzi yɛ ɛlɔlɛ Selɛ ne ɛboa yɛ amaa yɛadua yɛ ɛtane ne anwo kakɛ ɛ? (Nea nvoninli ne.)

⁵ Kakye kpavolɛ ne mɔɔ yɛhanle ɔ nwo edwɛkɛ la, saa sukoavolɛ bie ka kɛ ɔbadua ye kakɛ ne amuala yeamaa ye a, ɛnea a kɛzi ɔbade nganeɛ ɛ? Nɔhalɛ nu, kpavolɛ ne anye balie edwɛkɛ ɛhye anwo kpalɛ na yealie zɔhane ahyɛlɛdeɛ kɛnlɛma ne. Zɔhane ala a Gyihova, yɛ ɛlɔlɛ Selɛ ne ɛmaa yɛ ahyɛlɛdeɛ bie mɔɔ tua ɛtane nwo kakɛ ne mɔɔ Adam vale gyakyile yɛ la a. Gyisɛse hilehilele nu zɛhae: “Nyamenle hulole ewiade ne kpole kpalɛ yemɔti ɔvale ɔ Ra kokye ne ɔmaanle, amaa awie biala mɔɔ kɛla ye ali kɛ ɔlɛ diedi wɔ ye nu la bɛanzɛkye ye na yeanyia dahuu ngoane.” (Dwɔn 3:16) Eza ahyɛlɛdeɛ ko ne ala maa yɛkola yɛ nee Gyihova nyia agɔnwolɛvalɛ kpalɛ.

 6. Baebolo ne anu edwɛkɛ boni mɔ a yɛbazuzu nwo wɔ edwɛkɛ ɛhye anu a, na duzu ati ɔ?

⁶ Kɛ ɔkɛyɛ na yɛanyia ahyɛlɛdeɛ kɛnlɛma ɛhye azo nvasoɛ na yeamaa bɛava yɛ ɛtane anzɛɛ yɛ “kakɛ” ne mɔ bɛahyɛ yɛ ɛ? Yɛbanwu kpuya ɛhye anwo mualɛ wɔ kɛzi Baebolo ne fa edwɛkɛ ɛhye mɔ, yɛziezie yɛ avinli, mgbɔdalɛ, ɛkpɔnedeɛ, ɛlielɛ nee bɛbua ye benle di gyima la anu. Wɔ edwɛkɛ ɛhye anu, yɛbazuzu mɔɔ edwɛkɛ ɛhye mɔ biala abo kile la anwo. Mekɛ mɔɔ yɛlɛdwenledwenle ngilenu ɛhye mɔ anwo la, ɔbamaa yɛahile mɔɔ Gyihova yɛle amaa yeava yɛ ɛtane yeahyɛ yɛ la anwo anyezɔlɛ kpole.

BODANE NE: ƆSIEZIE YƐ NEE YE AVINLI

 7. (a) Duzu bieko a vile Adam nee Yive asa a? (b) Kɛ Adam nee Yive abozoamra la, duzu a yɛhyia nwolɛ ɛsesebɛ a? (Wulomuma 5:​10, 11)

⁷ Saa ɛye dahuu ngoane nwo adenle mɔɔ vile Adam nee Yive asa la ɛsie ahane a, eza bɛ nee bɛ Ze Gyihova agɔnwolɛvalɛ ne mɔɔ sonle bolɛ la zɛkyele. Kolaa na Adam nee Yive ayɛ ɛtane la, ɛnee bɛboka Nyamenle abusua ne  anwo. (Luku 3:38) Noko mɔɔ bɛyɛle Gyihova anwo anzosesebɛ la, bɛyele bɛ bɛvile abusua ɛhye anu kolaa na bɛabɔ ɔ bo kɛ bɛwo mralɛ. (Gyn. 3:​23, 24; 4:1) Kɛ mɔɔ yɛle bɛ bo zo amra la ati, ɔwɔ kɛ bɛsiezie yɛ nee Gyihova avinli. (Kenga Wulomuma 5:​10, 11.) Wɔ adenle fofolɛ zo, ɔwɔ kɛ yɛ nee ye nyia agɔnwolɛvalɛ kpalɛ. Buluku bie hanle kɛ, Giliki edwɛkɛkpɔkɛ mɔɔ bɛhile ɔ bo “bɛziezie yɛ avinli” la kola kile kɛ “ɛ nee kpɔvolɛ bie fa agɔnwolɛ.” Mɔɔ ɔyɛ nwanwane la a le kɛ, Gyihova a limoale dudule nwolɛ agyakɛ kɛ ɔyɛ ɛhye a. Kɛzi ɔyɛle ye ɛ?

NGYEHYƐLEƐ NE: MGBƆDALƐ

 8. Duzu a le mgbɔdalɛ?

⁸ Mgbɔdalɛ a le ngyehyɛleɛ mɔɔ Gyihova yɛle amaa ɔ nee alesama mɔɔ ɛyɛ ɛtane la anyia agɔnwolɛvalɛ kpalɛ bieko la. Ɔyɛle ngyehyɛleɛ amaa yɛ sa aha mɔɔ Adam minlinle ye la bieko. Na debie mɔɔ ɔvale ɔduale nwolɛ kakɛ la noko bolɛ le kɛ mɔɔ vile Adam asa la pɛpɛɛpɛ. Kilisiene Giliki Ngɛlɛlera ne noko ka kɛzi Gyihova maanle ɔyɛle boɛ kɛ awie bahola ɔ nee ye anyia agɔnwolɛvalɛ kpalɛ la anwo edwɛkɛ.—Wlo. 3:25.

 9. Mekɛ ezinraa nu ngyehyɛleɛ boni a Gyihova yɛle amaa bɛahola bɛava Yizilayɛma ɛtane bɛahyɛ bɛ a?

⁹ Amaa Yizilayɛma nee Gyihova anyia agɔnwolɛvalɛ kpalɛ la, Gyihova yɛle mekɛ ezinraa nu ngyehyɛleɛ bie mɔɔ bamaa bɛava bɛ ɛtane bɛahyɛ bɛ la. Wɔ Yizilayɛ, ɛnee bɛdi Mgbɔdalɛ Kenle ne ɛvolɛ biala. Wɔ zɔhane kenle ne, ɛsɔfo kpanyinli ne fa nane bɔ afɔle maa menli ne. Nɔhalɛ nu, nane afɔlebɔlɛ ne angola amkpɔda awie biala ɛtane bɔkɔɔ ɔluakɛ nane nee sonla ɛnzɛ. Noko saa Yizilayɛma mɔɔ bɛnlu bɛ nwo la bɔ afɔle mɔɔ Gyihova hilele kɛ bɛbɔ la a, ɔmaa ɔnyia ɛhulolɛ kɛ ɔbava bɛ ɛtane yeahyɛ bɛ. (Hib. 10:​1-4) Eza ngyehyɛleɛ zɔhane nee Yizilayɛma ɛtane nwo afɔle mɔɔ bɛbɔ ye dahuu la maanle bɛnwunle kɛ bɛle ɛtanevolɛma na bɛhyia debie mɔɔ baye bɛ ɛtane ne mɔ avi ɛkɛ bɔkɔɔ la.

10. Ngyehyɛleɛ mɔɔ bamaa bɛaye alesama ɛtane bɛavi ɛkɛ bɔkɔɔ la boni a Gyihova yɛle a?

¹⁰ Ɛnee Gyihova ze ngyehyɛleɛ mɔɔ ɔbayɛ yeamaa bɛaye alesama ɛtane bɛavi ɛkɛ bɔkɔɔ la. Ɔyɛle ngyehyɛleɛ ɔmaanle bɛvale ye kulovolɛ Ralɛ ne “bɛbɔle afɔle kokye kɛ ɔzoa menli dɔɔnwo ɛtane.” (Hib. 9:28) Gyisɛse rale amaa “yeava ye ngoane yeayɛ ɛkpɔnedeɛ yealie menli dɔɔnwo.” (Mat. 20:28) Duzu a le ɛkpɔnedeɛ?

MƆƆ ƆVALE ƆMAANLE LA: ƐKPƆNEDEƐ NE

11. (a) Kɛ mɔɔ Baebolo ne kile la, duzu a le ɛkpɔnedeɛ? (b) Duzu a bɛbahola bɛava bɛadua ɛkpɔnedeɛ ɛhye a?

¹¹ Kɛ mɔɔ Baebolo ne kile la, ɛkpɔnedeɛ le debie mɔɔ bɛfa bɛmaa awie amaa bɛava bɛakpɔda ye anzɛɛ bɛalua zo bɛ nee ye aziezie bɛ avinli la. a Wɔ Gyihova afoa nu, yemɔ a ɔbagyinla zo yeamaa yɛanyia mɔɔ vile yɛ sa la bieko a. Adenle boni azo? Kakye kɛ ngoane mɔɔ di munli nee nwolɛ adenle mɔɔ ɛnee Adam nee Yive lɛ kɛ bɛbadɛnla aze dahuu la vile bɛ sa. Ɔti ɔwɔ kɛ ɛkpɔnedeɛ ne nee mɔɔ vile bɛ sa la bolɛ sɛ. (1 Tim. 2:6) Kyesɛ nrenyia mɔɔ ɛyɛ kpanyinli mɔɔ (1) ɔdi munli; (2) ɔbahola yeadɛnla azɛlɛ ye azo dahuu; yɛɛ (3) ɔlɛ ɛhulolɛ kɛ ɔbava zɔhane ngoane ne yeamaa anzɛɛ yeabɔ afɔle yeamaa yɛ la angomekye na yeahola yeadua. Adenle zɛhae angomekye azo a ahenle ne bahola ava ye ngoane azie ngoane mɔɔ minlinle la abo zo anzɛɛ ava akpɔda a.

12. Duzu ati a Gyisɛse holale duale ɛkpɔnedeɛ mɔɔ yɛhyia nwo la a?

¹² Suzu ninyɛne nsa mɔɔ ɔti Gyisɛse holale  duale zɔhane ɛkpɔnedeɛ ne la anwo. (1) Ɛnee ɔdi munli—“yeanyɛ ɛtane biala.” (1 Pita 2:22) (2) Ɔlua ɛhye ati, ɛnee ɔbahola yeadɛnla aze dahuu wɔ azɛlɛ ye azo. (3) Ɛnee ɔlɛ ɛhulolɛ kɛ ɔbawu na yeava zɔhane ngoane ne yeabɔ afɔle yeamaa yɛ. (Hib. 10:​9, 10) Kɛmɔ Gyisɛse di munli la ati, kolaa na nrenyia mɔɔ limoa, Adam ayɛ ɛtane la, ɛnee ɔ nee ye sɛ. (1 Kɔl. 15:45) Ɔti Gyisɛse luale ye ewule ne azo kpɔdale Adam ɛtane ne, mɔɔ kile kɛ ɔvale ye ɛdeɛ ne ɔziele mɔɔ vile Adam asa la abo zo. (Wlo. 5:19) Ɔti Gyisɛse rayɛle “Adam ne mɔɔ li amozi la.” Ɔngyia kɛ awie bieko mɔɔ ɔdi munli la ba na ɔbatua mɔɔ vile Adam asa la. Gyisɛse wule “kokye.”—Hib. 7:27; 10:12.

13. Ngakyile boni a wɔ mgbɔdalɛ ngyehyɛleɛ ne nee ɛkpɔnedeɛ ne anu a?

¹³ Ɛnee akee ngakyile boni a wɔ mgbɔdalɛ ngyehyɛleɛ ne nee ɛkpɔnedeɛ ne anu a? Mgbɔdalɛ ngyehyɛleɛ ne a le mɔɔ Nyamenle yɛle amaa yealua zo yeava alesama ɛtane yeahyɛ bɛ na ɔ nee yɛ anyia agɔnwolɛvalɛ kpalɛ bieko la. Noko amaa ngyehyɛleɛ ɛhye ayɛ gyima la, ɔwɔ kɛ bɛtua ɛkpɔnedeɛ. Ɛkpɔnedeɛ ne a le debie mɔɔ ɔvale ɔmaanle amaa bɛahola bɛakpɔda alesama ɛtane ne la. Na mɔɔ Gyisɛse hwinle ye mogya ne mɔɔ sonle bolɛ la guale maanle yɛ la, yɛɛ ɔduale ɛkpɔnedeɛ ɛhye a.—Ɛfɛ. 1:7; Hib. 9:14.

MƆƆ VI NU RALE LA: BƐLIE YƐ NA BƐBU YƐ TENLENEMA

14. Duzu a yɛbazuzu nwo kɛkala a, na duzu ati ɔ?

¹⁴ Duzu a vi mgbɔdalɛ nwo ngyehyɛleɛ ne anu rale a? Baebolo ne fa edwɛkɛ ngakyile kilehile nvasoɛ mɔɔ yɛnyia yɛfi nu la anu. Edwɛkɛ agbɔkɛ ɛhye mɔ ndelebɛbo ne zɔho bɛ nwo ɛdeɛ, noko edwɛkɛkpɔkɛ ko biala ka mgbɔdalɛ nwo ngyehyɛleɛ ne foa bie mɔɔ maa yɛnyia ɛtanefakyɛ yɛfi Gyihova ɛkɛ la anwo edwɛkɛ. Mekɛ mɔɔ yɛlɛsuzu edwɛkɛ agbɔkɛ ɛhye mɔ anwo la, yɛbanwu kɛzi bɛfale yɛdayɛ mumua ne yɛ nwo la.

15-16. (a) Wɔ Baebolo ne anu, duzu a edwɛkɛkpɔkɛ “ɛlielɛ” kile a? (b) Kɛzi ɛhye fale yɛ nwo ɛ?

¹⁵ Wɔ Baebolo ne anu, ɛlielɛ kile fanwodi mɔɔ yɛnyia anzɛɛ yɛ ti mɔɔ yɛnyia ɔlua ɛkpɔnedeɛ ne mɔɔ bɛdua la ati. Ɛzoanvolɛ Pita hanle nwolɛ edwɛkɛ zɛhae: “Bɛze kɛ tɛ ninyɛne mɔɔ sɛkye, mɔɔ le kɛ dwɛtɛ fufule anzɛɛ nvutuke la a bɛvale bɛliele [Giliki aneɛ nu, “bɛkpɔnenle”] bɛ bɛvile bɛ ɛbɛlabɔlɛ mgbane ne mɔɔ bɛ nenyia mɔ vale gyakyile bɛ la anu a. Emomu, ɔlua mogya mɔɔ sonle bolɛ kɛ boaneralɛ mɔɔ dɛne nee ngehanleɛ ɛnle ɔ nwo, Kelaese ɛdeɛ ne la azo.”—1 Pita 1:​18, 19; ɔbdw.

¹⁶ Ɔlua ɛkpɔnelɛ afɔlebɔlɛ ne ati, yɛbahola yɛanyia yɛ ti yɛavi ɛtane nee ewule tumi ne mɔɔ maa yɛnwu amaneɛ la abo. (Wlo. 5:21) Yɛ nye sɔ mɔɔ Gyihova nee Gyisɛse ɛyɛ ɛmaa yɛ la kpalɛ, kɛ bɛlua Gyisɛse mogya ne mɔɔ sonle bolɛ anzɛɛ ye ngoane ne azo bɛlie yɛ la.—1 Kɔl. 15:22.

17-18. (a) Bɛka kɛ bɛbu yɛ tenlenema a, ɔkile duzu? (b) Kɛzi ɔboa yɛ ɛ?

¹⁷ Bɛbu yɛ tenlenema kile kɛ bɛva yɛ nwo edwɛkɛ biala bɛhyɛ yɛ anzɛɛ bɛkyikyi ye bɔkɔɔ. Saa Gyihova yɛ ɛhye a ɔngile kɛ ɔnva ye pɛlepɛlelilɛ ngyinlazo ne mɔ ɔnli gyima. Tɛ yɛ mɔdenlebɔlɛ a maa ɔbu yɛ tenlenema a; yɛɛ ɔnsosɔ yɛ ɛtane ne mɔ azo. Noko kɛmɔ yɛdie mgbɔdalɛ ngyehyɛleɛ ne nee ɛkpɔnedeɛ ne mɔɔ ɔvale ɔmaanle la yɛdi la ati, Gyihova lɛ debie mɔɔ ɔbagyinla zo yeava yɛ ɛtane ne mɔ yeahyɛ yɛ a.—Wlo. 3:24; Gal. 2:16.

¹⁸ Kɛzi ɛhye fale yɛ nuhua ko biala anwo ɛ? Bɛbu bɛdabɛ mɔɔ bɛkpa bɛ kɛ bɛ nee Gyisɛse ɛhɔli tumi wɔ anwuma la tenlenema dɛba kɛ Nyamenle amra. (Tae. 3:7; 1 Dwɔn 3:1) Bɛva bɛ ɛtane ne mɔ bɛhyɛ bɛ. Saa yɛbaha a, ɔle kɛ  asɛɛ bɛtɛyɛle ɛtane biala, ɔti bɛkola bɛkɔ Belemgbunlililɛ ne anu. (Wlo. 8:​1, 2, 30) Bɛbu bɛdabɛ mɔɔ bɛlɛ anyelazo kɛ bɛbadɛnla azɛlɛ ye azo la tenlenema kɛ Nyamenle agɔnwo mɔ, na bɛva bɛ ɛtane bɛhyɛ bɛ. (Gye. 2:​21-23) Menli ekpunli kpole ne mɔɔ bapɛ Amagɛdɔn la lɛ anyelazo kɛ bɛnrɛwu ɛlɛ. (Dwɔn 11:26) Bɛbadwazo “tenlenema” nee “bɛdabɛ mɔɔ bɛnle tenlenema” mɔɔ bɛwu la. (Gyi. 24:15; Dwɔn 5:​28, 29) Akee Gyihova azonvolɛ kɔsɔɔti mɔɔ bɛwɔ azɛlɛ ye azo mɔɔ bɛyɛ tieyɛ la banyia “anyunlunyia fanwodi ne mɔɔ Nyamenle amra lɛ la bie.” (Wlo. 8:21) Nea nyilalɛ kɛnlɛma mɔɔ mgbɔdalɛ nwo ngyehyɛleɛ ne—mɔɔ maa bɛsiezie yɛ nee yɛ Ze Gyihova avinli bɔkɔɔ la bamaa yɛanyia a!

19. Kɛzi yɛ tɛnlabelɛ ne ɛyɛ kpalɛ ɛ? (Eza nea ɛlɛka, “ Kɛzi Ɔfale Yɛ Nwo La.”)

¹⁹ Nɔhalɛ nu, ɛnee yɛ tɛnlabelɛ ne le kɛ kpavolɛ ne mɔɔ yɛlimoale yɛhanle ɔ nwo edwɛkɛ mɔɔ debie biala vile ɔ sa noko ye awovolɛ gyakyile ye kakɛ kpole mɔɔ ɔnrɛhola ɔnrɛdua ye ɛlɛ la. Noko yɛyɛ Gyihova mo kɛ yeboa yɛ la. Mgbɔdalɛ nwo ngyehyɛleɛ ne nee ɛkpɔnedeɛ ne mɔɔ yedua la ɛmaa tɛnlabelɛ mɔɔ yɛhɔle nu la ɛyɛ kpalɛ. Diedi mɔɔ yɛlɛ wɔ Gyisɛse Kelaese anu la maa yɛnyia nwolɛ adenle kɛ bɛbalie yɛ anzɛɛ yɛbanyia yɛ ti yɛavi ɛtane nee ewule nu. Eza bɛkola bɛfa yɛ ɛtane ne mɔ bɛkyɛ yɛ, na ɔyɛ kɛ asɛɛ yɛtɛyɛle ɛtane ɛlɛ. Noko mɔɔ hyia kpalɛ la a le kɛ, kɛkala yɛbahola yɛ nee Gyihova, yɛ anwuma Selɛ ne mɔɔ lɛ ɛlɔlɛ la anyia agɔnwolɛvalɛ kpalɛ.

20. Duzu a yɛbazuzu nwo wɔ edwɛkɛ bieko anu a?

²⁰ Saa yɛdwenledwenle mɔɔ Gyihova nee Gyisɛse ɛyɛ ɛmaa yɛ la anwo a, ɔmaa yɛkile nwolɛ anyezɔlɛ kpole. (2 Kɔl. 5:15) Saa bɛnle nu a, anrɛɛ yɛnlɛ anyelazo biala! Noko kɛzi Gyihova ɛtanefakyɛ ne baboa yɛ nuhua ko biala ɛ? Yemɔ a yɛbazuzu nwo wɔ edwɛkɛ bieko anu a.