EDWƐKƐ 7
EDWƐNE 15 Bɛhanvo Ralɛ Ne!
Gyihova Ɛtanefakyɛ Ne—Kɛzi Ɔbaboa Wɔ La
“Wɔ ɛkɛ ne a nɔhalɛ ɛtanefakyɛ wɔ a.”—EDW. 130:4.
BODANE
Yɛbazuzu ndonwo bie mɔ mɔɔ wɔ Baebolo ne anu la anwo amaa yɛahile kɛzi Gyihova maa yɛ nuhua ko biala nyia nɔhalɛ ɛtanefakyɛ la anwo anyezɔlɛ kpole.
1. Duzu ati a ɔnla aze kɛ ɛbade kɛzi alesama fa ɛtane kyɛ la abo kpalɛ a?
“MEVA WƆ ƐTANE MEHYƐ WƆ.” Saa awie ka edwɛkɛ zɛhae bie kile wɔ a nea kɛzi ɔmaa ɛ nye die a, titili saa ɛze kɛ wɔha edwɛkɛ anzɛɛ wɔyɛ debie wɔmaa yegyegye awie a! Noko duzu a edwɛkɛ “Meva wɔ ɛtane mehyɛ wɔ” kile bɔbɔ a? Asoo ahenle mɔɔ ɛyɛle ye ɛtane ne la ɛlɛka ahile wɔ kɛ bɛbayɛ agɔnwolɛma bieko kɛ dɛba ne la ɔ? Anzɛɛ kɛmɔ ɔngulo kɛ ɔka mɔɔ zile la anwo edwɛkɛ bieko la ati a ɔlɛka ye zɔ ɔ? Ɔnla aze kɛ ɛbade kɛzi alesama fa ɛtane kyɛ la abo kpalɛ.
2. Kɛzi bɛha Gyihova ɛtanefakyɛ ne anwo edwɛkɛ wɔ Ngɛlɛlera ne anu ɛ? (Eza nea ɔbodwɛkɛ ne.)
2 Kɛzi Gyihova fa alesama mɔɔ yɛnli munli la ɛtane kyɛ yɛ la le ngakyile fi kɛzi yɛfa ɛtane yɛkyɛ yɛ nwo ngoko la anwo. Awie biala ɛnrɛhola ɛnrɛva ɛtane ɛnrɛhyɛ kɛ Gyihova la ɛlɛ. Edwɛndolɛnli ne hanle ye wɔ Gyihova anwo kɛ: “Wɔ ɛkɛ ne a nɔhalɛ ɛtanefakyɛ wɔ a, amaa menli azulo wɔ.” a (Edw. 130:4) Amgba, Gyihova ɛtanefakyɛ ne le “nɔhalɛ ɛtanefakyɛ.” Ɔdaye a ɔle awie mɔɔ ɔwɔ kɛ ɔkile yɛ mɔɔ ɛtanefakyɛ abo kile bɔkɔɔ la a. Ɔdwu mekɛ ne bie a Baebolo kɛlɛvoma fa Hibulu edwɛkɛkpɔkɛ bie di gyima kile kɛzi Gyihova fa ɛtane kyɛ la anu, noko bɛnva bɛnli gyima bɛngile kɛzi alesama fa ɛtane kyɛ la anu ɛlɛ.
3. Kɛzi Gyihova ɛtanefakyɛ ne le ngakyile fi yɛ ɛdeɛ ne anwo ɛ? (Ayezaya 55:6, 7)
3 Saa Gyihova fa awie ɛtane kyɛ ye a, ɔkyikyi ahenle zɔhane ɛtane ne bɔkɔɔ. Ɔ nee ahenle agɔnwolɛvalɛ ne mɔɔ zɛkyele la eza yɛ kpalɛ bieko kɛ ye dɛba ne la. Gyihova fa ɛtane kyɛ bɔkɔɔ yɛɛ ɔyɛ ye zɔ fane dɔɔnwo.—Kenga Ayezaya 55:6, 7.
4. Kɛzi Gyihova boa yɛ maa yɛte mɔɔ ɛtanefakyɛ kile amgba la abo ɛ?
4 Saa Gyihova ɛtanefakyɛ ne le ngakyile fi yɛ ɛdeɛ ne anwo a, ɛnee kɛ ɔkɛyɛ na yɛdayɛ alesama mɔɔ yɛnli munli la ahola ade mɔɔ ɛtanefakyɛ kile amgba la abo ɛ? Gyihova dua ndonwo zo boa yɛ maa yɛte ye ɛtanefakyɛ ne abo. Yɛbazuzu bie mɔ anwo wɔ edwɛkɛ ɛhye anu. Bɛbamaa yɛanwu kɛzi Gyihova ye awie ɛtane fi ɛkɛ na mekɛ ko ne ala ɔ nee ahenle fa agɔnwolɛ bieko ɔnva nwo kɛ ɛtane ne zɛkyele bɛ agɔnwolɛvalɛ ne mekɛ bie la. Mekɛ mɔɔ yɛlɛsuzu ndonwo ɛhye mɔ anwo la, ɔbamaa ɛlɔlɛ nee anyezɔlɛ mɔɔ yɛlɛ yɛmaa yɛ anwunvɔnezelɛ Selɛ ne mɔɔ fa ɛtane kyɛ wɔ ndenle dɔɔnwo azo la ayɛ kpole.
GYIHOVA YE ƐTANE FI ƐKƐ
5. Saa Gyihova fa yɛ ɛtane kyɛ yɛ a, duzu a si a?
5 Baebolo ne ta fa ɛtane toto adesoa ɛlomboɛ nwo. Belemgbunli Devidi hanle ɔdaye mumua ne ye ɛtane ne anwo edwɛkɛ kɛ: “Me nvonleɛ ɛbo me nwo zo; bɛle kɛ adesoa ɛlomboɛ la, mengola ye soa.” (Edw. 38:4) Noko Gyihova fa ɛtanevolɛma mɔɔ bɛnlu bɛ nwo la ɛtane ne mɔ kyɛ bɛ. (Edw. 25:18; 32:5) Hibulu edwɛkɛkpɔkɛ mɔɔ bɛhile ɔ bo ‘fa kyɛ’ la abo kile “maa ye zo” anzɛɛ “soa.” Yɛbahola yɛava ye kɛ Gyihova le kɛ awie mɔɔ ɔ nwo ye se mɔɔ yemaa yɛ ɛtane ne mɔɔ anu yɛ ɛlomboɛ la zo yevi yɛ bati na yezoa ɔlɛkɔ la.
‘Ɛvale ɛhyɛle’ (Edw. 32:5)
6. Nienwu a Gyihova soa yɛ ɛtane ne mɔ kɔ a?
6 Baebolo ne fa ndonwo bieko di gyima maa yɛnwu kɛ Gyihova soa yɛ ɛtane ne mɔ kɔ moa. Edwɛne 103:12 ka kɛ: “Kɛ mɔɔ aduduleɛ nee adɔleɛ avinli twe la, zɔhane ala a yemaa yɛ nee yɛ mɛladonlɛ ne mɔ avinli ɛhwe a.” Aduduleɛ nee adɔleɛ avinli wale kpalɛ. Bɛnrɛyia ɛlɛ. Ɛhye kile kɛ Gyihova baye yɛ ɛtane ne mɔ ahɔ moamoa adɛla kɛzi yɛbazuzu bɔbɔ la. Ɛhye maa yɛnyia anwodozo kɛ Gyihova fa yɛ ɛtane ne mɔ kyɛ yɛ bɔkɔɔ!
“Kɛ mɔɔ aduduleɛ nee adɔleɛ avinli twe la” (Edw. 103:12)
7. Duzu a Baebolo ne ka ye wɔ mɔɔ Gyihova yɛ ye wɔ yɛ ɛtane ne mɔ anwo la anwo a? (Maeka 7:18, 19)
7 Wɔ sɛkɛlɛneɛ adenle zo, Gyihova ye yɛ ɛtane ne mɔ kɔ moa ɛdeɛ, noko asoo ɔkɔ zo ɔsɔ nuhua a? Kyɛkyɛ. Belemgbunli Hɛzikaya hanle ye wɔ Gyihova anwo kɛ: “Wɔvuandi me ɛtane ne mɔ kɔsɔɔti wɔgua ɛ nzi.” Anzɛɛ kɛ mɔɔ ɔbodwɛkɛ ne ka la, “wɔye me ɛtane ne mɔ kɔsɔɔti wɔvi ɛ nyunlu.” (Aye. 38:9, 17; ɔbdw.) Ndonwo ɛhye kile kɛ Gyihova ye menli mɔɔ ɛnlu bɛ nwo la ɛtane ne mɔ fi ɛkɛ na ɔfuandi ɔgua ɛleka mɔɔ ɔnnwu bɛ la. Eza yɛbahola yɛaha edwɛkɛ ɛhye wɔ adenle zɛhae azo: “Wɔyɛ [me ɛtane ne mɔ] kɛ asɛɛ metɛyɛle ɛhwee la.” Baebolo ne eza si adwenle ɛhye azo wɔ ndonwo bieko anu, ɔwɔ Maeka 7:18, 19. (Kenga.) Ɔhanle ye wɔ ɛkɛ ne kɛ Gyihova fuandi yɛ ɛtane ne mɔ gua nyevile ne akunlu nehane. Wɔ tete ne, saa bɛfuandi debie bɛto nyevile ne akunlu nehane a, awie ɛnrɛnwu ye ɛlɛ na yeava yeara.
“Wɔvuandi me ɛtane ne mɔ kɔsɔɔti wɔgua ɛ nzi” (Aye. 38:17)
“Ɛbavuandi bɛ ɛtane ne mɔ kɔsɔɔti wɔagua nyevile ne akunlu nehane” (Maeka 7:19)
8. Badwu ɛke, duzu a yɛzukoa a?
8 Ndonwo ɛhye mɔ ɛmaa yɛnwu kɛ saa Gyihova fa yɛ ɛtane ne mɔ kyɛ yɛ a, ɔmaa yɛdie yɛ nwo yɛfi yɛ ɛtane ne mɔ mɔɔ ɛyɛ kɛ adesoa ɛlomboɛ la abo. Nɔhalɛ nu, kɛ mɔɔ Devidi hanle la, “anyelielɛ a le bɛdabɛ mɔɔ bɛva bɛ mɛladonlɛ bɛhyɛ bɛ na bɛheda bɛ ɛtane ne mɔ azo la; anyelielɛ a le sonla ne mɔɔ Gyihova ɛnrɛbu ye ɛtane nwo mgbonda la.” (Wlo. 4:6-8) Yemɔ le nɔhalɛ ɛtanefakyɛ!
GYIHOVA KYIKYI ƐTANE
9. Ndonwo boni mɔ a Gyihova vale lile gyima hilehilele kɛzi ɔfa ɛtane ɔkyɛ la anu a?
9 Eza Gyihova dua ndonwo gyɛne zo boa yɛ maa yɛnwu kɛzi ɔdua ɛkpɔnelɛ afɔlebɔlɛ ne azo ɔkyikyi ɛtanevolɛma mɔɔ bɛnu bɛ nwo la ɛtane la. Bɛha Gyihova anwo edwɛkɛ wɔ sɛkɛlɛneɛ adenle zo kɛ ɔbia yɛ na ɔwowo yɛ ɛtane ɛhye mɔ. Ɛhye maa ɛtanevolɛ ne anwo te. (Edw. 51:7; Aye. 4:4; Gyɛ. 33:8) Gyihova mumua ne hanle kɛ saa ɔyɛ ye zɔ a mɔɔ bavi nu ara la ɛne: “Bɛ ɛtane ne mɔ le kɔkɔlɛ weɔɔnwo bɔbɔ ɛdeɛ, noko bɛbayɛ fufule kɛ ezukɔtweaba; bɛle kɛ ebo bɔbɔ ɛdeɛ, noko bɛbayɛ nwohyee kɛ boane enrinli la.” (Aye. 1:18) Saa debie mɔɔ le weɔɔnwo anzɛɛ ɔle kɛ ebo la ka wɔ tɛladeɛ nu a, ye ɛkyikyilɛ ɛnla aze fee. Noko Gyihova ɛlɛdua ndonwo ɛhye azo yeamaa yɛanyia anwodozo kɛ ɔbahola yeakyikyi yɛ ɛtane ne mɔ bɔkɔɔ mɔɔ yɛnrɛnwu bɛ bieko a.
“Bɛ ɛtane ne mɔ le kɔkɔlɛ weɔɔnwo bɔbɔ ɛdeɛ, noko bɛbayɛ fufule kɛ ezukɔtweaba” (Aye. 1:18)
10. Ndonwo gyɛne boni a Gyihova fa kilehile kɛzi ye ɛtanefakyɛ ne kpole de la anu a?
10 Kɛ mɔɔ bɛhanle ye wɔ edwɛkɛ mɔɔ li ɛhye anyunlu la anu la, eza bɛfa ɛtane bɛtoto “kakɛ” nwo. (Mat. 6:12; Luku 11:4) Ɔti mekɛ biala mɔɔ yɛbayɛ ɛtane yɛatia Gyihova la, ɔle kɛ asɛɛ yɛ kakɛ ne ɔ nyunlu ala a ɔkɔ a. Yɛtua ye kakɛ kpole kpalɛ! Noko saa Gyihova fa yɛ ɛtane kyɛ a, ɔle kɛ asɛɛ yepɛ yɛ kakɛ ne mɔɔ yɛtua ye la anu. Ɔ nye ɛnla kɛ yɛbadua ɛtane mɔɔ yeva yehyɛ yɛ la anwo kakɛ. Ɛhye le ndonwo kɛnlɛma mɔɔ maa yɛnwu kɛzi yɛ nwo tɔ yɛ wɔ mekɛ mɔɔ Gyihova bava yɛ ɛtane ahyɛ yɛ la!
“Fa yɛ kakɛ kyɛ yɛ” (Mat. 6:12)
11. Saa Baebolo ne ka kɛ ‘bɛkyikyi yɛ ɛtane ne mɔ’ a, duzu a ɔkile a? (Gyima ne 3:19)
11 Gyihova ɛmpɛ yɛ kakɛ anzɛɛ yɛ ɛtane ne mɔ anu ala, emomu ɔkyikyi ɔfi ɛkɛ. (Kenga Gyima ne 3:19.) Saa bɛka kɛ bɛpɛ kakɛ bie anu a, bie a mɔɔ ba yɛ adwenle nu la a le kɛ bɛva pɛne bɛpɛ nuhua. Noko saa ɛnea a, ɛbahola wɔanwu ezukoa dodo mɔɔ bɛpɛ nu la. Noko akee debie mɔɔ bɛkyikyi la le ngakyile. Amaa yɛade ndonwo ɛhye abo la, ɔwɔ kɛ yɛkakye kɛ ɛnee ɔnyɛ se kɛ awie bava nzule akyikyi ɛnke mɔɔ ɛnee menli fa kɛlɛ debie wɔ tete ne la. Ahenle bahola ava emiane abɔ nzule nu na yeava yeakyikyi deɛ ne mɔɔ bɛhɛlɛ la yeavi ɛkɛ. Ɔti saa ‘bɛkyikyi’ kakɛ bie a, ɔkile kɛ ɔ bo zo ɛminli bɔkɔɔ. Saa awie nea a, ɔnrɛnwu ɔ bo zo ne bɔbɔ. Ɔle kɛ asɛɛ bɛangɛlɛ ɛhwee wɔ ɛkɛ ne bɔbɔ. Kɛmɔ yɛze kɛ Gyihova ɛmpɛ yɛ ɛtane ne mɔ anu ala, emomu eza ɔkyikyi ɔfi ɛkɛ ne bɔkɔɔ la ati, nea kɛzi ɔmaa yɛ nye die a!—Edw. 51:9.
“Amaa bɛakyikyi bɛ ɛtane” (Gyi. 3:19)
12. Duzu a yɛsukoa yɛfi amungu kisii nwo ndonwo ne anu a?
12 Gyihova fa ndonwo gyɛne di gyima kilehile kɛzi ɔkyikyi ɛtane la anu. Ɔse: “Mebakyikyi wɔ mɛladonlɛ ne mɔ kɛ asɛɛ meva amungu meheda zo la na meakyikyi wɔ ɛtane ne mɔ kɛ asɛɛ meva amungu kisii meheda zo la.” (Aye. 44:22) Saa Gyihova fa yɛ ɛtane kyɛ yɛ a, ɔle kɛ asɛɛ yeva amungu kisii yeheda yɛ mɛladonlɛ ne mɔ azo amaa awie biala annwu bɛ.
“Mebakyikyi wɔ mɛladonlɛ ne mɔ kɛ asɛɛ meva amungu meheda zo la” (Aye. 44:22)
13. Saa Gyihova fa yɛ ɛtane ne mɔ kyɛ yɛ a, kɛzi ɔka yɛ ɛ?
13 Duzu a yɛsukoa yɛfi nu a? Saa Gyihova fa yɛ ɛtane ne mɔ kyɛ yɛ a, ɔnle kɛ yɛnyia adwenle kɛ yɛbabu zɔhane ɛtane ne mɔ anwo mgbonda wɔ yɛ ngoane mekɛ mɔɔ ɛha la kɔsɔɔti anu. Ɔlua Gyisɛse Kelaese afɔlebɔlɛ ne ati, bɛpɛ yɛ kakɛ ne mɔ anu bɔkɔɔ. Ɔle kɛ asɛɛ yɛanyɛ ɛtane zɔhane mɔ bɔbɔ. Saa yɛnu yɛ nwo a, kɛ nɔhalɛ ɛtanefakyɛ ne mɔɔ yɛnyia yɛfi Gyihova ɛkɛ ne la de la ɛne.
GYIHOVA NEE YƐ NYIA AGƆNWOLƐVALƐ KPALƐ BIEKO
Yɛ anwuma Selɛ ne ɛtanefakyɛ ne maa yɛnyia nwolɛ adenle yɛ nee ye nyia agɔnwolɛvalɛ kpalɛ bieko (Nea ɛdendɛkpunli 14)
14. Duzu ati a yɛbahola yɛalie yɛali kɛ Gyihova fa ɛtane kyɛ bɔkɔɔ a? (Eza nea nvoninli ne mɔ.)
14 Gyihova nɔhalɛ ɛtanefakyɛ ne maa yɛnyia adenle yɛ nee ye nyia agɔnwolɛvalɛ kpalɛ bieko. Ɔmmaa yɛ adwenle ɛmbua yɛ fɔlɛ dahuu. Ɔnle kɛ yɛ ahonle tu kɛ bie a yɛ nwo ɛya tɛbɔ Gyihova anu na ɔlɛkpondɛ adenle bie yealua zo yeahwe yɛ nzo. Ɔnrɛyɛ zɔ ɛlɛ. Saa Gyihova ka kɛ yeva yɛ ɛtane yehyɛ yɛ a, kɛ ɔkɛyɛ na yɛalie ye yɛali ɛ? Ngapezonli Gyɛlɛmaya hwenle adwenle hɔle edwɛkɛ bie mɔɔ Gyihova hanle la azo, ɔse: “Mebava bɛ nvonleɛ meahyɛ bɛ, na menrɛhakye bɛ ɛtane ne bieko.” (Gyɛ. 31:34) Mɔɔ ɛzoanvolɛ Pɔɔlo ka edwɛkɛ ɛhye anwo bie la, ɔdaye noko ɔhanle ye zɛhae: “Menrɛhakye bɛ ɛtane ne mɔ bieko.” (Hib. 8:12) Noko duzu a ɛhye abo kile amgba a?
“Menrɛhakye bɛ ɛtane ne bieko” (Gyɛ. 31:34)
15. Saa bɛka kɛ Gyihova ɛngakye yɛ ɛtane ne mɔ bieko a, ɔkile duzu?
15 Wɔ Baebolo ne anu, tɛ dahuu a edwɛkɛ “kakye” kile awie mɔɔ ɔlɛkakye anzɛɛ ɔlɛdwenledwenle mɔɔ zile la anwo a. Emomu, ɔkola ɔkile awie mɔɔ ɔlɛyɛ debie la. Ɛtanevolɛ ne mɔɔ ɛnee henda baka ne azo wɔ Gyisɛse anwo ɛkɛ ne la hanle kɛ: “Gyisɛse, ɛba wɔ Belemgbunlililɛ ne anu a kakye me.” (Luku 23:42, 43) Ɛnee ɔlɛka yeahile Gyisɛse kɛ ɔyɛ debie ɔmaa ye wɔ zɔhane mekɛ ne. Mɔɔ Gyisɛse hanle la kile kɛ ɔbadwazo ɛtanevolɛ ɛhye. Ɔti saa Gyihova ka kɛ ɔnrɛhakye yɛ ɛtane ne mɔ bieko a, ɔkile kɛ ɔnrɛmaa yɛnrɛbu nwolɛ mgbonda. Ɔnrɛhwe yɛ nzo kenle bie wɔ ɛtane mɔɔ yeva yehyɛ yɛ la anwo.
16. Duzu a Baebolo ne ka ye wɔ fanwodi mɔɔ nɔhalɛ ɛtanefakyɛ maa yɛnyia la anwo a?
16 Baebolo ne fa ndonwo bieko di gyima maa yɛte fanwodi mɔɔ nɔhalɛ ɛtanefakyɛ maa yɛnyia la abo. Kɛmɔ yɛnli munli na yɛtɔ sinli la ati, ɔka kɛ ‘yɛle ngɛkɛlɛ yɛmaa ɛtane.’ Noko ɔlua Gyihova ɛtanefakyɛ ne ati, yɛle kɛ ngɛkɛlɛ mɔɔ ‘bɛlie yɛ bɛvi yɛ ɛtane nu.’ (Wlo. 6:17, 18; Yek. 1:5) Ɛhɛe, Gyihova ɛtanefakyɛ ne maa yɛ nye die kɛ ngɛkɛlɛ mɔɔ bɛnyia fanwodi la.
“Bɛliele bɛ bɛvile ɛtane nu” (Wlo. 6:18)
17. Kɛzi ɛtanefakyɛ maa yɛnyia ayileyɛlɛ ɛ? (Ayezaya 53:5)
17 Kenga Ayezaya 53:5. Ndonwo mɔɔ li awieleɛ mɔɔ yɛbazuzu nwo la fa yɛ toto menli mɔɔ bɛnyia ewule ɛzulolɛ bie la anwo. Kɛmɔ Gyihova ɛva ɔ Ra ne ɛbɔ ɛkpɔnelɛ afɔle la ati, yeyɛ yɛ ayile wɔ sɛkɛlɛneɛ adenle zo. (1 Pita 2:24) Ɛkpɔnedeɛ ne maa agɔnwolɛvalɛ mɔɔ yɛ nee Gyihova lɛ mɔɔ ɛtane maanle ɔzɛkyele la yɛ boɛ bieko. Kɛ mɔɔ bɛyɛ awie mɔɔ ɛnyia ewule ɛzulolɛ bie la ayile a ɔ nye die kpole la, zɔhane ala a saa bɛyɛ yɛ ayile wɔ sunsum nu na yɛnyia Gyihova anyunlu ɛlolɛ bieko ɔlua ye ɛtanefakyɛ ne ati a, yɛ nye die kpole a.
“Ye nganlɛ ne mɔ ati, bɛyɛle yɛ ayile” (Aye. 53:5)
KƐZI GYIHOVA ƐTANEFAKYƐ NE KA YƐ LA
18. Duzu a yɛzukoa yɛvi Gyihova ɛtanefakyɛ nwo ndonwo ne mɔ mɔɔ wɔ Baebolo ne anu la anu a? (Eza nea ɛlɛka, “Kɛzi Gyihova Fa Yɛ Ɛtane Kyɛ Yɛ La.”)
18 Duzu a yɛzukoa yɛvi Gyihova ɛtanefakyɛ nwo ndonwo ne mɔ mɔɔ wɔ Baebolo ne anu la anu a? Saa ɔfa ɛtane ɔkyɛ a, ɛnee yeva yehyɛ bɔkɔɔ na ɔnrɛmaa yɛnrɛbu nwolɛ mgbonda kenle bie. Ɛhye maa yɛ nee yɛ anwuma Selɛ ne nyia agɔnwolɛvalɛ kpalɛ. Noko akee yɛkakye kɛ nɔhalɛ ɛtanefakyɛ le ahyɛlɛdeɛ. Ɔle Gyihova ɛlɔlɛ nee ye ɛlolɛ kpole ne mɔɔ ɔda ye ali ɔkile alesama la bie. Ɔnle nwolɛ adenle mɔɔ ɔwɔ kɛ alesama biza ye die a.—Wlo. 3:24.
19. (a) Duzu a ɔwɔ kɛ ɔmaa yɛ nye die kpole a? (Wulomuma 4:8) (b) Duzu a yɛbazuzu nwo wɔ edwɛkɛ bieko anu a?
19 Kenga Wulomuma 4:8. Nea kɛzi ɔwɔ kɛ yɛ nuhua ko biala anye die kpole kɛ Gyihova le “nɔhalɛ ɛtanefakyɛ” Nyamenle a! (Edw. 130:4) Noko saa Gyihova bava yɛ ɛtane ahyɛ yɛ a ɔgyi debie titili bie azo. Gyisɛse hanle ye zɛhae: “Saa bɛanva awie mɔ nvonleɛ bɛangyɛ bɛ a, bɛ Ze ne noko ɛnrɛva bɛ nvonleɛ ɛnrɛhyɛ bɛ.” (Mat. 6:14, 15) Ɔti ɔhyia kɛ yɛsukoa Gyihova ɛtanefakyɛ ne. Noko kɛ ɔkɛyɛ na yɛayɛ zɔ ɛ? Edwɛkɛ bieko bamaa yɛanwu kɛzi yɛbayɛ ye la.
EDWƐNE 46 Gyihova, Yɛyɛ Wɔ Mo
a Alimoa Hibulu ngɛlɛlera ne vale edwɛkɛ, “ɛtanefakyɛ ne” a lile gyima a, ɔkile kɛ ɛhye ala a le nɔhalɛ ɛtanefakyɛ a ɔnva nwo kɛ bɛlɛ ɛtanefakyɛ ngakyile wɔ ɛkɛ la. Edwɛkɛ ɛhye mɔɔ hyia la ɛnle Edwɛne 130:4 wɔ Baebolo ngilebɛbo dɔɔnwo anu, noko ɔwɔ Ngɛlɛlera Nwuanzanwuanza—Ewiade Fofolɛ Ngilebɛbo ne anu, na yemɔ maa ɔyɛ ngakyile.
