EDWƐKƐ 8
EDWƐNE 130 Fa Ɛtane Kyɛ
Gyihova Ɛtanefakyɛ Ne—Kɛzi Ɛbahola Wɔazukoa Ɛ?
“Kɛ mɔɔ Gyihova ɛva bɛ ɛtane ɛhyɛ bɛ bɔkɔɔ la, bɛdabɛ noko bɛyɛ ye zɔhane ala.”—KƆL. 3:13.
BODANE
Edwɛkɛ ɛhye bahilehile mɔɔ yɛbahola yɛayɛ amaa yɛava awie mɔɔ ɛvo yɛ la ɛtane yɛahyɛ ye la anu.
1-2. (a) Mekɛ boni a bie a ɔbayɛ se kɛ yɛbava awie ɛtane yɛahyɛ ye a? (b) Kɛzi Denise vale ɛtane hyɛle ɛ?
ƆYƐ se ɔmaa wɔ kɛ ɛbava awie mɔ ɛtane wɔahyɛ bɛ ɔ? Ɔyɛ yɛ nuhua dɔɔnwo se kɛ yɛbava ɛtane yɛahyɛ, titili saa awie ka edwɛkɛ anzɛɛ ɔyɛ debie ɔmaa yɛdi nyane kpole a. Noko akee yɛbahola yɛaye ɛya yɛavi yɛ nu na yɛava ɛtane yɛahyɛ. Kɛ neazo la, suzu adiema raalɛ Denise a mɔɔ vale awie mɔɔ yɛle ye ɛtane kpole la ɛtane ɔhyɛle ye la anwubielɛ ne anwo. Wɔ 2017, Denise nee ye abusua ne hɔnleɛnleanle Gyihova Alasevolɛ Ewiade Amuala Gyima Ne Ati mɔɔ bɛbuke ye fofolɛ la. Mɔɔ bɛlua adenle nu bɛlɛkɔ sua nu la, arɛlevilɛ nu, delava gyɛne vale ye kale ne rabɔle bɛ ɛdeɛ ne anu. Denise anye zo bulule ye wɔ kale esiane ne anu. Mɔɔ ɔ nye zo tetele ye la, ɔdele kɛ ɔ mra ne mɔ ɛboda kpole kpalɛ yɛɛ ɔ hu Brian noko ɛwu. Mɔɔ Denise hakyele mɔɔ zile la, ɔhanle kɛ, “Me nwo bubule me na me adwenle dule fonyianle.” Nzinlii, ɔdele kɛ ɛnee delava ne ɛtɛbole, ɔtɛnonle ayile biala anzɛɛ ɛnee ɔnyɛ debie biala mɔɔ twehwe ye adwenle a, ɔti Denise zɛlɛle Gyihova kɛ ɔboa ye ɔmaa ye adwenle ɛgyinla.
2 Bɛhyele delava ne na bɛbɔle ye somolɛ kɛ yehu sonla. Saa kɔɔto ne bua ye fɔlɛ a, bɛbado ye efiade. Noko awie mɔɔ yɛ gyima wɔ kɔɔto ɛkɛ ne la hanle hilele Denise kɛ edwɛkɛ mɔɔ Denise baha la a ndɛnebuavolɛ ne bagyinla zo abua delava ne ndɛne a. Denise se: “Mendele nganeɛ kɛ asɛɛ awie ɛbuke me hanlɛ nu na yewola ngyenle wolɔba ko yegua me hanlɛ ne anu la, ɔluakɛ ɛnee ɔwɔ kɛ meka tɛnlabelɛ mɔɔ yɛ nyane kpalɛ mɔɔ mengɔle nu wɔ me ɛbɛlabɔlɛ nu la anwo edwɛkɛ.” Dapɛne ekyii anzi, Denise hɔle kɔɔto kɛ ɔkaha ye edwɛkɛ ne wɔ mekɛ mɔɔ nrenyia ne mɔɔ maanle ye abusua ne lile nyane kpole la wɔ ɛkɛ la. Nzɔne edwɛkɛ a ɔhanle a? Denise hanle hilele ndɛnebuavolɛ ne kɛ ɔze nrenyia ne anwunvɔne. b Mɔɔ ɔhanle ye edwɛkɛ ne ɔwiele la, ndɛnebuavolɛ ne bɔle ɔ bo kɛ ɔsu. Ɔhanle kɛ: “Meyɛ ndɛnebuavolɛ ɛvolɛ 25 noko metɛtele edwɛkɛ ɛhye bie wɔ me kɔɔto ɛke ɛlɛ. Metɛtele bie ɛlɛ kɛ abusua ne mɔɔ bɛyɛle bɛ ɛtane la ɛlɛkpa kyɛlɛ amaa ahenle mɔɔ yɛle bɛ ɛtane ne la. Metɛtele ɛlɔlɛ nee ɛtanefakyɛ nwo edwɛkɛ zɛhae bie ɛlɛ.”
3. Duzu a maanle Denise vale ɛtane hyɛle a?
3 Duzu a maanle Denise vale ɛtane hyɛle a? Ɔdwenledwenlenle Gyihova ɛtanefakyɛ ne anwo. (Maeka 7:18) Saa yɛ nye sɔ kɛzi Gyihova fa yɛ ɛtane kyɛ yɛ la a, ɔbaha yɛ yeamaa yɛdayɛ noko yɛava awie mɔ ɛdeɛ yɛahyɛ bɛ.
4. Duzu a Gyihova kulo kɛ yɛyɛ a? (Ɛfɛsɛsema 4:32)
4 Gyihova kulo kɛ yɛfa awie mɔ ɛtane yɛkyɛ bɛ bɔkɔɔ kɛ mɔɔ ɔdaye noko yeva yɛ ɛdeɛ yehyɛ yɛ bɔkɔɔ la. (Kenga Ɛfɛsɛsema 4:32.) Ɔ nye la kɛ yɛbanyia ɛhulolɛ kɛ yɛbava menli mɔɔ fo yɛ la ɛtane yɛahyɛ bɛ. (Edw. 86:5; Luku 17:4) Wɔ edwɛkɛ ɛhye anu, yɛbazuzu ninyɛne nsa mɔɔ baboa yɛ yeamaa yɛava ɛtane yɛahyɛ bɔkɔɔ la anwo.
MMABU Ɛ NYE ƐGUA KƐZI ƐTE NGANEƐ LA AZO
5. Kɛ mɔɔ Mrɛlɛbulɛ 12:18 kile la, saa awie fo yɛ a wɔannea a kɛzi yɛbade nganeɛ ɛ?
5 Bie a edwɛkɛ mɔɔ awie baha anzɛɛ debie mɔɔ ɔbayɛ yeahile yɛ la bayɛ yɛ nyane kpalɛ, titili saa ahenle le yɛ gɔnwo kpalɛ anzɛɛ yɛ busuanli a. (Edw. 55:12-14) Ɔyɛ a kɛzi ninyɛne ɛhye mɔ maa yɛdi nyane la kola yɛ kɛ asɛɛ bɛva dadeɛ bɛwɔ yɛ la. (Kenga Mrɛlɛbulɛ 12:18.) Bie a yɛbabɔ mɔdenle kɛ yɛyɛ yɛ nwo kɛ asɛɛ ɔnyɛ yɛ nyane la. Noko saa yɛyɛ ye zɔ a, ɔbayɛ kɛ bɛva dadeɛ bɛwɔ yɛ na bɛgyakyi dadeɛ ne wɔ hanlɛ ne anu la. Zɔhane ala a saa awie yɛ yɛ debie ɔmaa yɛdi nyane na yɛbu yɛ nye yɛgua kɛzi yemaa yɛde nganeɛ la azo a, ɔnrɛmaa yɛ nwo ɛnrɛdɔ yɛ a.
6. Saa awie fo yɛ a, wɔannea a kɛzi yɛbayɛ yɛ nyɛleɛ ɛ?
6 Saa awie fo yɛ a, bie a mɔɔ yɛbalimoa yɛayɛ la a le kɛ yɛbava ɛya. Baebolo ne ka kɛ ɔyɛ a yɛbava ɛya. Noko ɔbɔ yɛ kɔkɔ kɛ ɔnle kɛ yɛmaa zɔhane nganeɛdelɛ ne fo yɛ nwo zo. (Edw. 4:4; Ɛfɛ. 4:26) Duzu ati ɔ? Ɔluakɛ kɛzi yɛte nganeɛ la a ka yɛ maa yɛda nyɛleɛ bie ali a. Yɛɛ debie kpalɛ ɛnda ɛnvi ɛyavalɛ nu ɛmba. (Gye. 1:20) Kakye kɛ, tɛ dahuu a yɛbahola yɛahomo yɛ nwo zo a, noko saa yɛbahɔ zo yɛava ahenle ne anwo ɛya a, yemɔ ɔle yɛ kpɔkɛzilɛ.
Tɛ dahuu a yɛbahola yɛahomo yɛ nwo zo a, noko saa yɛbahɔ zo yɛava ahenle ne anwo ɛya a, yemɔ ɔle yɛ kpɔkɛzilɛ
7. Saa awie fo yɛ a, nganeɛ gyɛne boni bieko a wɔannea a yɛbade a?
7 Saa bɛ nee yɛ anli ye boɛ a, bie a ɔbamaa yɛali nyane wɔ adenle gyɛne zo. Kɛ neazo la, adiema raalɛ bie mɔɔ bɛfɛlɛ ye Ann la hanle kɛ: “Mɔɔ mele kakula la, me papa gyakyile me mame na ɔgyale bɛlɛra ne mɔɔ ɛnee bɛtua ye kakɛ bɛmaa ɔnea me la. Mendele nganeɛ kɛ yekpo me. Mɔɔ ɔ nee bɛlɛra ne wole la, mendele nganeɛ kɛ me ɛdeɛ ɛwie nuhua. Mɔɔ menyɛle kpanyinli la, mendele nganeɛ kɛ awie ɛngyia me nwo.” Adiema raalɛ bie mɔɔ bɛfɛlɛ ye Georgette la hanle kɛzi ɔdele nganeɛ wɔ mekɛ mɔɔ ɔ hu zɛkyele agyalɛ la anwo edwɛkɛ kɛ: “Yɛle ngakula la amuala ɛnee yɛle agɔnwolɛma. Yɛbɔle nu yɛyɛle adekpakyelɛ gyima ne! Ɔti anrɛɛ debie yɛ me.” Adiema raalɛ Naomi noko hanle kɛ: “Meanla meandwenle nwo ɛlɛ kɛ me hu bayɛ debie yeamaa yeagyegye me. Ɔti kenle ko bie mɔɔ ɔhanle ɔhilele me kɛ ɔfea ɔ nwo ɔnea nlanwonvoninli la, mendele nganeɛ kɛ yebɛlɛbɛla me yɛɛ yeye me yemaa.”
8. (a) Duzu ati a ɔwɔ kɛ yɛfa awie mɔ ɛtane yɛkyɛ bɛ a? (b) Saa yɛfa ɛtane yɛkyɛ a, duzu nvasoɛ a yɛnyia a? (Nea ɛlɛka, “ Na Saa Awie Ɛyɛ Debie Yemaa Yegyegye Wɔ Kpole Ɛ?”)
8 Yɛnrɛhola yɛnrɛhile awie mɔ mɔɔ ɔwɔ kɛ bɛka anzɛɛ bɛyɛ la, noko yɛbahola yɛayɛ mɔɔ yɛbayɛ ye wɔ nwolɛ la anwo debie. Na fane dɔɔnwo ne ala, mɔɔ ɔhyia kɛ yɛyɛ ye wɔ nwolɛ la a le kɛ yɛbava yɛahyɛ bɛ. Duzu ati ɔ? Ɔluakɛ yɛkulo Gyihova yɛɛ ɔkulo kɛ yɛfa ɛtane yɛkyɛ. Saa yɛkɔ zo yɛfa ɛya na yɛanva ɛtane yɛangyɛ a, bie a ɔnrɛmaa yɛnrɛyɛ yɛ ninyɛne nrɛlɛbɛ nu na bie a yɛanwu nwolɛ amaneɛ. (Mrɛ. 14:17, 29, 30) Fa adiema raalɛ bie mɔɔ bɛfɛlɛ ye Christine la kɛ neazo. Ɔhanle kɛ: “Saa awie anwo ɛya tɛbɔ me nu a, menda menzele. Ɔmmaa menli aleɛ kpalɛ. Menlafe kpalɛ yɛɛ ɔyɛ se kpalɛ ɔmaa me kɛ mebahola meahomo me nwo zo, na ɛhye ka kɛzi me nee me hu nee awie mɔ di la.”
9. Duzu ati a ɔnle kɛ yɛfa ɛya yɛsie yɛ nu a?
9 Saa ahenle mɔɔ hanle yɛ ɛya la amkpa yɛ kyɛlɛ ɛlɛ bɔbɔ a, yɛbahola yɛayɛ debie amaa yɛanli nwolɛ nyane kpole. Wɔ adenle boni azo? Georgette mɔɔ yɛhanle ɔ nwo edwɛkɛ la hanle kɛ: “Ɔliele mekɛ ekyii, noko menyele me hu ne mɔɔ me nee ye bɔle ewole la anwo ɛya menvile me nu. Ɛhye ati me nzo nu dwole me kpalɛ.” Saa yɛye ɛya yɛfi yɛ nu a, ɔmaa yɛ nee awie mɔ di ye boɛ. Eza yɛkyɛ yɛ nwo debie—ɔmmaa yɛngɔ zo yɛndwenledwenle edwɛkɛ ne anwo, emomu yɛfa anyelielɛ yɛbɔ yɛ ɛbɛla. (Mrɛ. 11:17) Noko saa ɛnlɛ ɛhulolɛ kɛ ɛbava ɛtane wɔahyɛ a, duzu a ɛbahola wɔayɛ a?
DI KƐZI ƐTE NGANEƐ LA ANWO GYIMA
10. Duzu ati a ɔwɔ kɛ yɛmaa yɛ nwo mekɛ yɛmaa ɛya ne fi yɛ nu a? (Eza nea nvoninli ne mɔ.)
10 Kɛ ɔkɛyɛ na wɔaye ɛya wɔavi wɔ nu ɛ? Adenle ko a le kɛ ɛbamaa ɛ nwo mekɛ wɔamaa ɛya ne avi wɔ nu. Saa awie boda kpole na bɛyɛ ye ayile a, ɔhyia mekɛ na hanlɛ ne ahɔ bɔkɔɔ. Zɔhane ala a bie a ɔbalie mekɛ na yɛahola yɛaye awie mɔɔ yɛle yɛ ɛtane la anwo ɛya yɛavi yɛ nu kolaa na yɛahola yɛavi yɛ ahonle nu yɛava yɛahyɛ ye bɔkɔɔ a.—Nol. 3:3; 1 Pita 1:22.
Kɛ mɔɔ yɛboda a ɔhyia kɛ yɛyɛ ye ayile yɛɛ ɔdie mekɛ na hanlɛ ne ahɔ la, zɔhane ala a ɔdie mekɛ na yɛaye ɛya yɛavi yɛ nu a (Nea ɛdendɛkpunli 10)
11. Kɛzi asɔneyɛlɛ bahola aboa wɔ yeamaa wɔava ɛtane wɔahyɛ ɛ?
11 Yɛ asɔne sɛlɛ Gyihova kɛ ɔboa wɔ ɔmaa ɛva ɛtane ɛhyɛ. c Ann mɔɔ yɛhanle ɔ nwo edwɛkɛ la hilehilele kɛzi asɔneyɛlɛ boale ye la anu. Ɔhanle kɛ: “Menzɛlɛle Gyihova kɛ ɔva ninyɛne mɔɔ abusua ne anu sonla ko biala anli nwolɛ gyima wɔ adenle kpalɛ zo la ɔhyɛ ye. Akee mengɛlɛle me papa nee ɔ ye fofolɛ ne kɛlata kɛ meva bɛ ɛtane mehyɛ bɛ.” Ann liele dole nu kɛ ɛnee ɔnla aze kɛ ɔbayɛ zɔ. Noko ɔhanle kɛ: “Melɛ anyelazo kɛ kɛmɔ melɛbɔ mɔdenle meazukoa Gyihova ɛtanefakyɛ ne la ati, ɔbaha me papa nee ɔ ye ne yeamaa bɛazukoa Gyihova anwo debie.”
12. Duzu ati a ɔwɔ kɛ yɛfa yɛ adwenle yɛsɔ Gyihova na tɛ yɛ nganeɛdelɛ ɛ? (Mrɛlɛbulɛ 3:5, 6)
12 Fa wɔ adwenle sɔ Gyihova na tɛ wɔ nganeɛdelɛ ɔ. (Kenga Mrɛlɛbulɛ 3:5, 6.) Gyihova ze mɔɔ le kpalɛ maa yɛ la dahuu. (Aye. 55:8, 9) Yɛɛ ɔnrɛha kɛ yɛyɛ debie mɔɔ ɔbagyegye yɛ la ɛlɛ. Ɔti saa ɔmaa yɛ anwosesebɛ kɛ yɛva ɛtane yɛhyɛ a, ɛnee yɛdie yɛdi kɛ yɛyɛ zɔ a ɔbaboa yɛ. (Edw. 40:4; Aye. 48:17, 18) Noko saa yɛfa yɛ adwenle yɛsie kɛzi yɛte nganeɛ la azo a, yɛnrɛhola yɛnrɛva ɛtane yɛnrɛhyɛ ɛlɛ. (Mrɛ. 14:12; Gyɛ. 17:9) Naomi mɔɔ yɛhanle ɔ nwo edwɛkɛ la hanle kɛ: “Mɔlebɛbo ne ɛnee medie medi kɛ kɛmɔ me hu nleanle nlanwonvoninli la ati ɔnle kɛ mefa ye ɛtane mekyɛ ye. Ɛnee mesulo kɛ ɔbayɛ me ɛtane bieko anzɛɛ ɔ rɛle bavi kɛzi ye nyɛleɛ ne maanle menlile nyane la. Na menyianle adwenle kɛ Gyihova te kɛzi mete nganeɛ la abo. Noko menwunle kɛ kɛmɔ Gyihova te kɛzi mete nganeɛ la abo la ati, yemɔ ɛngile kɛ ɔdie ɔto nu. Ɔte kɛzi mete nganeɛ la abo yɛɛ ɔze kɛ ɔbalie mekɛ na meaye ɛya ne meavi me nu noko eza ɔkpondɛ kɛ mefa ɛtane mekyɛ.” d
NYIA AHENLE ANWO ADWENLE KPALƐ
13. Duzu a Wulomuma 12:18-21 ka kɛ ɔhyia kɛ yɛyɛ a?
13 Saa yɛfa awie mɔɔ yeyɛ debie yemaa yɛli nyane kpole la ɛtane yɛkyɛ ye a, tɛ mɔɔ ɔwɔ kɛ yɛyɛ la ala a le kɛ yɛnrɛha mɔɔ zile la anwo edwɛkɛ. Saa ahenle mɔɔ vonle yɛ la eza le yɛ diema Kilisienenli a, yɛ bodane a le kɛ yɛ nee ye baziezie yɛ avinli. (Mat. 5:23, 24) Yɛkpa kɛ, kɛ anrɛɛ yɛbava ɛya la, yɛbaze anwunvɔne yɛɛ kɛ anrɛɛ yɛbava ɔ nwo edwɛkɛ yɛazie yɛ nu la, yɛbava yɛahyɛ ye. (Kenga Wulomuma 12:18-21; 1 Pita 3:9) Duzu a baboa yɛ yeamaa yɛayɛ zɔ a?
14. Duzu a ɔwɔ kɛ yɛbɔ mɔdenle yɛyɛ a, na duzu ati ɔ?
14 Ɔwɔ kɛ yɛbɔ mɔdenle yɛnwu ahenle mɔɔ vonle yɛ la kɛ mɔɔ Gyihova nwu ye la. Gyihova kpa kɛ ɔbanlea subane kpalɛ mɔɔ wɔ menli nu la. (2 Ek. 16:9; Edw. 130:3) Subane mɔɔ yɛkulo kɛ yɛnwu ye wɔ menli nu la ala a yɛbanwu ye a—saa yɛkulo kɛ yɛnwu subane kpalɛ a, yɛbanwu ye yɛɛ saa yɛkulo kɛ yɛnwu subane ɛtane a yɛbanwu ye. Saa yɛnea subane kpalɛ mɔɔ awie mɔ lɛ la a, ɔnrɛmaa ɔnrɛyɛ se kɛ yɛbava bɛ ɛtane yɛahyɛ bɛ. Kɛ neazo la, adiema nrenyia bie mɔɔ bɛfɛlɛ ye Jarrod la hanle kɛ, “Saa mefa nvonleɛ mɔɔ adiema bie yɛ me la metoto ninyɛne dɔɔnwo mɔɔ me nye die nwo wɔ ɔ nwo la anwo a, ɔmmaa ɔnyɛ se kɛ mebava ye ɛtane meahyɛ ye.”
15. Duzu ati a ɔbayɛ kpalɛ kɛ ɛbaha wɔahile awie kɛ wɔva ye ɛtane wɔhyɛ ye a?
15 Debie bieko mɔɔ hyia kɛ ɛsuzu nwo kɛ ɛbayɛ la a le kɛ ɛbaha wɔahile ahenle kɛ wɔva ye ɛtane wɔhyɛ ye. Duzu ati ɔ? Nea mɔɔ Naomi mɔɔ yɛlimoale yɛhanle ɔ nwo edwɛkɛ la hanle la: “Me hu bizale me kɛ, ‘Wɔva me ɛtane wɔhyɛ me ɔ?’ Mɔɔ membukele me nloa la, meangola meanga kɛ ‘Meva mehyɛ wɔ.’ Ɔti menwunle kɛ wɔ me ahonle nu, metɛfale metɛkyɛle ye. Mekɛ guale nu la, akee mengolale menganle edwɛkɛ agbɔkɛ nsa zɔhane mɔɔ hyia la, ‘Meva mehyɛ wɔ.’ Ɔzinle me nwo kɛ mɔɔ menganle mengilele me hu kɛ meva ye ɛtane mehyɛ ye la, ɔ nye gyinlegyinlanle monle ɔluakɛ ɔmaanle ɔ nwo dɔle ye yɛɛ medame noko menyianle anzodwolɛ. Ɔvi zɔhane mekɛ ne, menliele ye menli bieko yɛɛ yɛyɛle agɔnwolɛma kpalɛ bieko.”
16. Ɛtanefakyɛ nwo debie boni a wɔzukoa a?
16 Gyihova kulo kɛ yɛfa ɛtane yɛkyɛ. (Kɔl. 3:13) Noko ɔnla aze kɛ yɛbava awie mɔ ɛtane yɛahyɛ bɛ. Noko saa yɛambu yɛ nye yɛangua kɛzi yɛte nganeɛ la azo na yɛbɔ mɔdenle kɛ yɛbayɛ nwolɛ debie a, yɛbahola yɛava ɛtane yɛahyɛ. Akee yɛbahola yɛanyia ahenle anwo adwenle fofolɛ, ɔ nwo adwenle kpalɛ.—Nea ɛlɛka, “ Ninyɛne Nsa Mɔɔ Yɛyɛ Yɛfa Ɛtane Yɛkyɛ La.”
DWENLE NVASOƐ MƆƆ WƆ ƐTANEFAKYƐ ZO LA ANWO
17. Saa yɛfa ɛtane yɛkyɛ a, nvasoɛ boni a yɛnyia a?
17 Deɛmɔti ɔwɔ kɛ yɛfa ɛtane yɛkyɛ la zonle. Suzu bie mɔ anwo. Mɔɔ limoa, ɔmaa yɛsukoa Gyihova, yɛ anwunvɔnezelɛ Selɛ ne, na yɛnyia ɔ nyunlu ɛlolɛ. (Luku 6:36) Mɔɔ tɔ zo nwiɔ, ɔmaa yɛda ye ali kɛ, yɛ nye sɔ kɛzi Gyihova ɛva yɛ ɛtane ɛhyɛ yɛ la. (Mat. 6:12) Yɛɛ mɔɔ tɔ zo nsa, yɛnyia kpɔkɛdelɛ kpalɛ na yɛ nee awie mɔ nyia agɔnwolɛvalɛ kpalɛ dahuu.
18-19. Saa yɛfa ɛtane yɛkyɛ a, duzu a bahola avi nu ara a?
18 Saa yɛfa awie mɔ ɛtane yɛkyɛ bɛ a, bie a yɛbanyia nyilalɛ mɔɔ yɛ nye ɛnla. Kɛ neazo la, yɛ mɔɔ dole Denise mɔɔ yɛhanle ɔ nwo edwɛkɛ la nzonlɛ. Ɛnee ɔnze kɛ delava ne mɔɔ vale ye kale ne rabɔle bɛ ɛdeɛ ne anu la ɛyɛ ye adwenle kɛ bɛbua ndɛne ne bɛwie ala a ɔbahu ɔ nwo. Noko kɛmɔ Denise vale ye ɛtane hyɛle ye la ati, ɔhanle ye ɔmaanle ɔbɔle ɔ bo kɛ ɔ nee Gyihova Alasevolɛ sukoa Baebolo ne.
19 Bie a yɛbade nganeɛ kɛ ninyɛne mɔɔ yɛ se kpalɛ maa yɛ kɛ yɛbayɛ la anu ko a le kɛ yɛbava awie bie ɛtane yɛahyɛ ye—noko eza ɔbahola yeayɛ ninyɛne mɔɔ ɔbamaa yɛanyia nyilalɛ kpole la anu ko. (Mat. 5:7) Ɔti bɛmaa yɛ muala yɛyɛ biala mɔɔ yɛbahola la yɛzukoa Gyihova ɛtanefakyɛ ne.
EDWƐNE 125 “Anyelielɛ A Le Anwunvɔnezelɛma”
a Bɛhakyi aluma bie mɔ.
b Wɔ tɛnlabelɛ zɛhae anu, ɔwɔ kɛ Kilisienenli biala si ɔ ti anwo kpɔkɛ wɔ mɔɔ ɔbayɛ la anwo.
c Nea edwɛne gyɛne “Forgive One Another,” “Fa Ɛtane Kyɛ,” yɛɛ “Yɛbayɛ Agɔnwolɛ Bieko” vidio ne mɔ wɔ jw.org.
d Nlanwonvoninli ɛnleanlɛ le ɛtane yɛɛ ɔmaa awie mɔ di nyane ɛdeɛ, noko kunli anzɛɛ yelɛ ne mɔɔ edwɛkɛ ɛnle ɔ nwo la ɛnrɛhola ɛnrɛha kɛ yemɔ ati ɔgyinla Ngɛlɛlera ne azo yeabɔ ewole.
