ASOO wɔyia ngyegyelɛ mɔɔ ɛnee ɛnlɛ awie mɔɔ ɔbaboa wɔ la ɛlɛ ɔ? Yɛde “mekɛ mɔɔ anu yɛ se” la anu na ɛhye bahola amaa yɛ sa nu ado na yɛ nwo ayɛ yɛ koonwu. (2 Tim. 3:1) Noko akee, saa yɛlɛyia ngyegyelɛ a, awie mɔ wɔ ɛkɛ mɔɔ bɛbahola bɛaboa yɛ a. Baebolo ne ka kɛzi agɔnwolɛma kpalɛ nwo hyia wɔ “anwongyelelɛ mekɛ” nu la anwo edwɛkɛ.—Mrɛ. 17:17.

Ɛzoanvolɛ Pɔɔlo nyianle agɔnwolɛma mɔɔ ɔ nee bɛ dudule adenle la azo nvasoɛ dɔɔnwo. (Kɔl. 4:​7-11) Mɔɔ bɛdole Pɔɔlo efiade wɔ Wulomu la, ɔ gɔnwo mɔ yɛle ninyɛne mɔɔ ɔdaye mumua ne ɔnrɛhola ɔnrɛyɛ la boale ye. Kɛ neazo la, Ɛpafulodaetɛse liele nwanle mɔɔ ɛnee Pɔɔlo hyia nwo la vile mediema mɔɔ wɔ Felepae la ɛkɛ rɛlɛle ye. (Fel. 4:18) Tekekɛse noko vale Pɔɔlo ngɛlata ne mɔ hɔmaanle asafo ngakyile ne mɔ. (Kɔl. 4:7) Ɔnva nwo kɛ ɛnee arane ne ɛmmaa Pɔɔlo ɛnvinde anzɛɛ ɔla efiade la, ɔholale ɔyɛle ye ɛzonlenlɛ gyima ne ɔlua ɔ gɔnwo mɔ moalɛ zo. Kɛ ɔkɛyɛ na wɔayɛ agɔnwolɛ kpalɛ ɛnɛ ɛ?

Ɛnɛ mekɛ ye neazo bie mɔ maa yɛnwu nvasoɛ mɔɔ wɔ agɔnwolɛ kpalɛ zo la. Suzu adiema raalɛ bie mɔɔ yɛle agɔnwolɛ kpalɛ maanle Elisabet mɔɔ le adekpakyelɛnli mɔɔ wɔ Spain la neazo ne anwo. Mɔɔ bɛnwunle kɛ Elisabet mame ɛnyia kansa la, adiema raalɛ ne hɛlɛle Baebolo nu edwɛkɛ wɔ text mesɛgye nu nwanle ye vale maanle ye anwosesebɛ. Elisabet hanle kɛ, “Edwɛkɛ ɛhye mɔ maanle menyianle anwosesebɛ mengyinlanle ngyegyelɛ ne anloa mɔɔ meande nganeɛ kɛ yeha me ngome a.”—Mrɛ. 18:24.

Saa yɛboa yɛ mediema diedima yɛmaa bɛkɔ debiezukoalɛ anzɛɛ daselɛlilɛ a, ɔbamaa yɛ nee bɛ agɔnwolɛvalɛ ne anu amia. Kɛ neazo la, ɛbahola wɔava kale wɔahɔva bɛdabɛ mɔɔ bɛyɛ mgbanyinli la wɔamaa bɛahɔ debiezukoalɛ anzɛɛ daselɛlilɛ ɔ? Saa ɛyɛ zɔ a, ɛbamaa bɛ anwosesebɛ na bɛdabɛ noko bɛamaa wɔ anwosesebɛ. (Wlo. 1:12) Noko akee, mediema bie mɔ ɛha sua nu. Kɛ ɔkɛyɛ na yɛayɛ agɔnwolɛ kpalɛ yɛamaa bɛ ɛ?

Mediema diedima bie mɔ lɛ kpɔkɛdelɛ nwo ngyegyelɛ anzɛɛ bɛwɔ tɛnlabelɛ bie mɔ mɔɔ ɔmmaa bɛngola bɛngɔ debiezukoalɛ wɔ Belemgbunlililɛ Asalo la. Yɛva David mɔɔ yenyia kansa la kɛ neazo. Wɔ siane mɔɔ bo nsia la anu, ɛnee bɛgua ye ayileyɛlɛ zo. Wɔ mekɛ zɔhane amuala anu, ɛnee David nee ɔ ye Lidia dua videoconference zo a tie debiezukoalɛ ne bie a.

Duzu moalɛ a bɛ gɔnwo mɔ mɔɔ wɔ asafo ne anu la vale maanle bɛ a? Saa bɛkpɔne debiezukoalɛ biala a, mediema mɔɔ wɔ Belemgbunlililɛ  Asalo ɛkɛ ne la dua videoconference zo nee David nee Lidia tendɛ. Bieko, saa David nee Lidia maa mualɛ a, bɛ mediema diedima ne kɛlɛ edwɛkɛ mɔɔ maa anwosesebɛ la nwa bɛ. Duzu a ɛvi nu ɛra a? David nee Lidia ande nganeɛ kɛ yeha bɛ ngome.

Yɛbahola yɛ nee mediema mɔɔ ɛha sua nu la ayɛ daselɛlilɛ gyima ne ɔ? Saa yɛyɛ nzenzaleɛ ekyi na yɛ nee bɛ yɛ daselɛlilɛ gyima ne a, yɛmaa ɔda ali kɛ yɛ rɛle ɛtɛfile bɛ. (Mrɛ. 3:27) Duzu ati a ɛnyɛ ngyehyɛleɛ na ɛ nee mediema ɛhye mɔ ɛmbɔ nu ɛngɛlɛ kɛlata anzɛɛ ɛnli daselɛ wɔ telefonu zo a? Mediema mɔɔ ɛha sua nu la bahola alua videoconference zo adie daselɛlilɛ ayia ne bie. David nee Lidia anye liele ngyehyɛleɛ ɛhye mɔɔ bɛyɛle bɛmaanle bɛ la anwo. David hanle kɛ, “Saa yɛ nee yɛ daselɛlilɛ ekpunli ne bɔ nu di adwelie ekyi na yɛbɔ nu yɛyɛ asɔne a, ɔmaa yɛ nwo yɛ se kpalɛ.” Bieko, saa wɔ tɛnlabelɛ ne bamaa wɔ adenle yeamaa ɛ nee wɔ Baebolo sukoavo bie ahɔzukoa debie wɔ mediema mɔɔ ɛha sua nu la bie sua nu a, duzu ati a ɔyɛ a ɛnyɛ ye zɔ a?

Saa yɛ nee yɛ mediema mrenyia nee mraalɛ mɔɔ ɛha sua nu la bɔ nu yɛ gyima a, ɔmaa yɛnwu bɛ subane ngɛnlɛma ne mɔ, na ɛhye twe yɛ bikye bɛ. Kɛ neazo la, saa ɛ nee nolobɔlɛma ɛhye mɔ bie ɛlɛyɛ daselɛlilɛ gyima ne na ɛnwu kɛzi bɛkola bɛfa Nyamenle Edwɛkɛ ne bɛkilehile bɛmaa ɔka awie mɔ ahonle la a, ɔmaa ɛbikye bɛ kpalɛ. Saa ɛboa mediema diedima wɔ sunsum nu a, ɛbanyia agɔnwolɛma dɔɔnwo.—2 Kɔl. 6:13.

Mɔɔ Pɔɔlo agɔnwo Taetɛse rakpɔlale ye la ɔmaanle ɔ rɛle kyekyele. (2 Kɔl. 7:​5-7) Edwɛkɛ ɛhye kakye yɛ kɛ tɛ edwɛkɛ mɔɔ yɛbaha yɛahile bɛdabɛ mɔɔ bɛwɔ ngyianlɛ nu la ala a bakyekye bɛ rɛle a, emomu ɔwɔ kɛ yɛkɔkpɔla bɛ na yɛyɛ ninyɛne yɛboa bɛ.—1 Dwɔn 3:18.

Yɛ mediema mrenyia nee mraalɛ mɔɔ wɔ Russia la ɛyɛ kɛzi yɛboa yɛ nwo ngoko la anwo neazo kɛnlɛma. Suzu Sergey nee ɔ ye Tatyana anwubielɛ ne anwo. Mɔɔ kpolisima hɔnleɛnleanle bɛ sua nu wiele la, bɛvale bɛ bɛhɔle kɛ bɛkabizebiza bɛ edwɛkɛ. Bɛlimoale bɛgyakyile Tatyana bɛmaanle ɔhɔle sua nu. Sergey hanle kɛ: “Mɔɔ [Tatyana] dwule sua nu ala la, adiema raalɛ ko mɔɔ lɛ akɛnrasesebɛ la rale ye ɛkɛ. Agɔnwolɛma dɔɔnwo noko rale ɛkɛ na bɛboale yɛ bɛmaanle yɛzieziele yɛ sua nu ɛkɛ ne.”

Sergey doale zo kɛ: “Me nye die Mrɛlɛbulɛ 17:17 anwo kpalɛ, ɔka kɛ: ‘Agɔnwolɛ kpalɛ da ɛlɔlɛ ali mekɛ biala yɛɛ ɔle adiema mɔɔ bɛwo ye bɛmaa anwongyelelɛ mekɛ.’ Wɔ kpɔdekpɔdeyɛlɛ mekɛ ɛhye anu, ɛnee mehyia me gɔnwo mɔ anwo kpalɛ, na kɛkala menwu kɛ edwɛkɛ mɔɔ wɔ tɛkese zɔhane anu la le nɔhalɛ. Gyihova ɛmaa me agɔnwolɛma mɔɔ lɛ akɛnrasesebɛ la yemaa bɛboa me.” a

Ɛnɛ, yɛlɛyia ngyegyelɛ dɔɔnwo, ɔti yɛhyia yɛ gɔnwo mɔ moalɛ. Yɛbahyia bɛ nwo kpole kpalɛ bɔbɔ wɔ anwongyelelɛ kpole ne anu. Ɔti ɛnɛ a le mekɛ mɔɔ ɔwɔ kɛ yɛyɛ biala mɔɔ yɛbahola la yɛmaa ɔda ali kɛ yɛle agɔnwolɛma kpalɛ a!—1 Pita 4:​7, 8.