WƆYƐ ye nzonlɛ kɛ menli dɔɔnwo mɔɔ wɔ ewiade ye la te nganeɛ kɛ ɔwɔ kɛ bɛmaa bɛ nwolɛ adenle titili bie mɔ na bɛ nee bɛ di ye wɔ adenle titili zo bɛtɛla awie mɔ ɔ? Ɔnva nwo nwolɛ adenle biala mɔɔ bɛbanyia la, bɛsuzu kɛ ɔfɛta kɛ bɛnyia dɔɔnwo bɛboka nwo. Menli mɔɔ lɛ adwenle zɛhae la le angomedi yɛɛ bɛngile ninyɛne mɔɔ bɛlɛ la anwo anyezɔlɛ. Subane ɛhye a Baebolo ne hanle kɛ menli bala ye ali wɔ awieleɛ mekɛ ne anu a.—2 Tim. 3:2.

Nɔhalɛ nu, angomedi ɛnle subane fofolɛ. Adam nee Yive kpale kɛ bɛdabɛ mumua ne bɛbazi mɔɔ le kpalɛ nee mɔɔ le ɛtane la anwo kpɔkɛ, na yemɔ ɛva amaneɛnwunlɛ dɔɔnwo ɛra. Ɛvolɛ ɛya dɔɔnwo anzi, Dwuda Belemgbunli Yuzaya nyianle adwenle kɛ ɔlɛ nwolɛ adenle ɔkpu ayilevuanlɛ wɔ ɛzonlenlɛsua ne anu, noko ɛnee yevo kpole. (2 Ek. 26:​18, 19) Zɔhane ala a ɛnee Falasiima nee Sadusiima die di kɛ kɛmɔ bɛle Ebileham abozoamra la ati ɔwɔ kɛ Nyamenle nee bɛ di ye wɔ adenle titili zo a.—Mat. 3:9.

Menli mɔɔ le angomedi na bɛdwenle kɛ bɛle kpalɛ bɛtɛla awie mɔ la ɛbɔ yɛ ɛyia, na bɛ subane ne bahola anyia yɛ nwo zo tumi. (Gal. 5:26) Bie a yɛbabɔ ɔ bo yɛanyia adwenle kɛ ɔfɛta kɛ bɛmaa yɛ nwolɛ adenle bie anzɛɛ ɔwɔ kɛ bɛ nee yɛ di ye wɔ adenle titili bie azo. Kɛ ɔkɛyɛ na yɛakpo adwenle ɛhye ɛ? Mɔɔ limoa, ɔwɔ kɛ yɛnwu adwenle mɔɔ Gyihova lɛ wɔ edwɛkɛ ne anwo la. Baebolo ngyinlazo nwiɔ bie baboa yɛ.

 Gyihova a si mɔɔ ɔwɔ kɛ yɛnyia la anwo kpɔkɛ a. Suzu neazo bie mɔ anwo.

• Wɔ abusua ngyehyɛleɛ ne anu, ɔhyia kɛ kunli te nganeɛ kɛ ɔ ye bu ye, na yelɛ noko te nganeɛ kɛ ɔ hu kulo ye. (Ɛfɛ. 5:33) Ɔwɔ kɛ nla nu ngitanwolilɛ kɔ zo wɔ agyalɛma ne angomekye avinli. (1 Kɔl. 7:3) Eza ɔwɔ kɛ ngakula yɛ tieyɛ maa bɛ awovolɛ, yɛɛ ɔwɔ kɛ awovolɛ noko kulo bɛ mra na bɛboa bɛ.—2 Kɔl. 12:14; Ɛfɛ. 6:2.

• Ɔfɛta kɛ yɛbu mgbanyima mɔɔ bɛyɛ gyima ɛsesebɛ wɔ asafo ne anu la noko. (1 Tɛs. 5:12) Noko bɛnlɛ nwolɛ adenle kɛ bɛbahile bɛ mediema mɔɔ ɔwɔ kɛ bɛyɛ la.—1 Pita 5:​2, 3.

• Nyamenle ɛmaa alesama arane ne mɔ nwolɛ adenle kɛ bɛlie adwule bɛvi bɛ maanlema ne ɛkɛ yɛɛ ɔwɔ kɛ bɛ maanlema ne di bɛ eni.—Wlo. 13:​1, 6, 7.

Gyihova fi ɛlɔlɛ nu maa yɛ mɔɔ yɛhyia nwo la molozo. Kɛmɔ yɛle ɛtanevolɛma la ati, mɔɔ ɔfɛta yɛ la ala a le ewule. (Wlo. 6:23) Noko ɔlua Gyihova ɛlɔlɛ kpundii ne ati, ɔmaa yɛ nyilalɛ dɔɔnwo. (Edw. 103:​10, 11) Nyilalɛ anzɛɛ nwolɛ adenle biala mɔɔ yɛbanyia yɛavi ye ɛkɛ ne la le ye ɛlolɛ kpole ne bie.—Wlo. 12:​6-8; Ɛfɛ. 2:8.

Nea boɛ wɔ ewiade ye subane ne anwo. Bie a yɛbabɔ ɔ bo yɛanyia adwenle kɛ ɔwɔ kɛ yɛnyia nwolɛ adenle dɔɔnwo yɛtɛla awie mɔ mɔɔ yɛnrɛnwu nu a. Gyisɛse luale gyimayɛvoma ne mɔɔ bɛduale bɛ denale ko la ndonwo ne azo hilele kɛzi ɔnyɛ se kɛ yɛbanyia adwenle zɛhae la anu. Gyimayɛvoma ne mɔ bie bɔle ɔ bo nwonlomɔ mangyee ne na bɛgyinlanle ewia ketekete ne anu bɛyɛle gyima alehyenlɛ ne amuala; bie mɔ noko yɛle gyima dɔnehwele ko ala. Ekpunli mɔɔ limoale rale la nyianle adwenle kɛ gyima mɔɔ bɛyɛle la ati ɔwɔ kɛ bɛtua bɛ kakɛ kpole. (Mat. 20:​1-16) Gyisɛse luale ndonwo ɛhye azo hilehilele ye ɛdoavolɛma ne kɛ ɔwɔ kɛ bɛmaa bɛ kunlu dwo debie biala mɔɔ Nyamenle anye die nwo kɛ ɔbava yeamaa bɛ la anwo.

Kile anyezɔlɛ, mmabizebiza ninyɛne ɛfi awie mɔ ɛkɛ. (1 Tɛs. 5:18) Sukoa ɛzoanvolɛ Pɔɔlo mɔɔ yeambizebiza nwonane afoa nu ninyɛne yeanvi mediema mɔɔ wɔ Kɔlente la ɛkɛ ɔnva nwo kɛ ɛnee ɔlɛ nwolɛ adenle ɔyɛ zɔ la. (1 Kɔl. 9:​11-14) Ɔwɔ kɛ  yɛmaa yɛ nye sɔ nyilalɛ biala mɔɔ bɛbanyia la na ɔnle kɛ yɛbizebiza ninyɛne yɛfi awie mɔ ɛkɛ.

Bɛlɛ ɛ nwo aze. Saa awie dwenle kɛ ɔ nwo hyia somaa a, ɔta ɔnyia adwenle kɛ ɔwɔ kɛ ɔnyia ninyɛne dɔɔnwo ɔtɛla mɔɔ ɔlɛ la. Mɛlɛbɛnwoaze a le adwenletane ɛhye anwo ayile a.

Ngapezonli Daneɛle yɛle mɛlɛbɛnwoaze nwo neazo kɛnlɛma. Anrɛɛ abusua mɔɔ ɔvi nu, kɛzi ɔ nwo yɛ fɛ, kɛzi ɔze nwoma nee ninyɛne mɔɔ ɔkola ɔyɛ la bahola amaa yeade nganeɛ kɛ kɛzi bɛ nee ye lile wɔ adenle titili zo nee nwolɛ adenle titili mɔɔ ɔnyianle la fɛta ye. (Dan. 1:​3, 4, 19, 20) Noko Daneɛle hɔle zo bɛlɛle ɔ nwo aze, na subane ɛhye maanle ɔyɛle awie mɔɔ ɔsonle bolɛ ɔmaa Gyihova a.—Dan. 2:30; 10:​11, 12.

Bɛmaa yɛkpo angomedi nee nganeɛ mɔɔ menli dɔɔnwo mɔɔ wɔ ewiade ye la te kɛ bɛ nwo hyia tɛla awie mɔ la. Emomu, bɛmaa yɛhɔ zo yɛmaa yɛ nye ɛlie nyilalɛ mɔɔ Gyihova ɛlolɛ kpole ne ati ɔfa ɔmaa yɛ la anwo.