Ɛnee Kateleke asɔne ne ɛli me awovolɛ ati kpalɛ. Noko mɔɔ bɛnwunle ye wɔ Baebolo ne anu kɛ Nyamenle duma a le Gyihova la, bɛ mu nwiɔ bɛrayɛle Gyihova Alasevolɛ mɔɔ bɔ mɔdenle a. Me papa gyakyile kɛ ɔbaze Gyisɛse ananze. Emomu, kɛmɔ ɔle kapentanli la ati, ɔzieziele yɛ ɛbolɔnsam ne abo sua ne anu ɔyɛle ye Belemgbunlililɛ Asalo mɔɔ limoa wɔ San Juan del Monte la, ɔwɔ Philippines suakpole Manila azo.

Mɔɔ bɛwole me wɔ 1952 la, me awovolɛ vale sunsum nu ninyɛne mgbalɛ mɔɔ ɛnee bɛlɛkilehile me mediema mrenyia mgbanyinli nna ne nee me mediema mraalɛ nsa ne la bie hilehilele medame noko. Mɔɔ melɛnyi la, me papa maanle me anwosesebɛ kɛ mengenga Baebolo ne tile ko kenle ko biala yɛɛ ɔ nee me zukoale yɛ mbuluku me mɔ dɔɔnwo. Ɔyɛ a me awovolɛ maa neavolɛ adenduvoma nee Bɛtɛle agyakɛnugyinlavolɛma basokoɛ yɛ sua nu ɛkɛ. Mediema ɛhye mɔ anwubielɛ maanle yɛ nye liele na yɛ nwo yɛle se, na yemɔ hanle yɛ muala ɔmaanle yɛvale ɛzonlenlɛ gyima ne yɛlimoale yɛ ɛbɛlabɔlɛ nu.

Me awovolɛ yɛle diedi nwo neazo kpalɛ maanle me. Mɔɔ anwodolɛ bie hunle me mame la anzi, me nee me papa bɔle dahuu adekpakyelɛ gyima ne abo wɔ 1971. Noko wɔ 1973 mɔɔ ɛnee meli ɛvolɛ 20 la, me papa wule. Me awovolɛ mɔɔ bɛwule la maanle mendele nganeɛ kɛ me ɛdeɛ ɛwie nuhua yɛɛ yeha me ngome. Noko Baebolo ne anu anyelazo ne mɔɔ “ɔgyi ye pi yɛɛ ɔgyi ye kpundii” la boale me maanle mengyinlanle kpundii, menyianle ninyɛne nwo adwenle kpalɛ na membikyele Gyihova. (Hib. 6:19) Mɔɔ me papa wule la, yeangyɛ bɛhanle kɛ mengɔnyɛ adekpakyelɛ titili wɔ Coron, bɔra bie mɔɔ ɛde ɔ nwo mɔɔ wɔ Palawan maanzinli nu la azo, na menliele mendole nu kɛ mebahɔ.

Mɔɔ mengɔndwule Coron la, ɛnee meli ɛvolɛ 21. Kɛmɔ suakpole zo ala a medɛnla ɔvi me ngakula nu la ati, mɔɔ menwunle kɛ menli dɔɔnwo ɛnlɛ laete wɔ bɔra ne azo, bɛnlɛ paepe yɛɛ ahale dɔɔnwo ɛnle ɛkɛ  la, ɔzinle me nwo. Ɛnee mediema ekyi wɔ ɛkɛ ɛdeɛ, noko ɛnee adekpakyelɛnli biala ɛnle ɛkɛ mɔɔ mebahola me nee ye ahɔ daselɛlilɛ dahuu a, ɔti ɛnee ɔyɛ a me ngomekye a mekɔ daselɛlilɛ a. Wɔ siane mɔɔ limoa la anu, me nwo lɔle me abusua ne nee me gɔnwo mɔ kpalɛ. Ɔdwu nɔɔzo a menea nwɔlɔra ne mɔ na mesu. Ɔrale me nu kɛ mengyakyi gyima ne na menzia mengɔ me sua zo.

Wɔ mekɛ ɛhye mɔ amuala anu, ɛnee meka me ahonle nu edwɛkɛ mekile Gyihova. Ɛnee mekakye edwɛkɛ bie mɔ mɔɔ maa anwosesebɛ mɔɔ mengengale ye wɔ Baebolo ne nee yɛ mbuluku ne mɔ anu la. Ɛnee meta mekakye Edwɛne 19:14. Menwunle kɛ saa medwenledwenle ninyɛne mɔɔ sɔ ɔ nye mɔɔ le kɛ ye gyima ngakyile nee ye subane ne mɔ anwo a, ɔbayɛ “me Bodane nee me Dievolɛ.” Watchtower ne anu edwɛkɛ bie mɔɔ ɔ ti se “You Are Never Alone” a la boale me kpalɛ. Mengengale ye fane dɔɔnwo. Wɔ adenle bie azo, ɔka me nee Gyihova angomekye wɔ mekɛ zɛhae mɔ anu, na yemɔ maanle menyianle nwolɛ adenle dɔɔnwo menyɛle asɔne, menzukoale debie na mendwenledwenlenle ninyɛne nwo.

Mɔɔ mendwule Coron la, yeangyɛ biala bɛkpale me kɛ asafo nu kpanyinli. Kɛmɔ ɛnee me ngomekye a mele asafo nu kpanyinli la ati, membɔle ɔ bo kɛ menea dapɛne ne anu Teokelase Ɛzonlenlɛ Sukulu, Ɛzonlenlɛ Nyianu, Asafo Buluku Ɛzukoalɛ nee Ɛzinzalɛ Arane Debiezukoalɛ ne azo. Ɛnee eza memaa bagua nu ɛdendɛlɛ dapɛne biala. Ɔlua gyima ɛhye mɔ amuala ati, ɛnee mennyia mekɛ bɔbɔ na meade nganeɛ kɛ yeha me ngome!

Daselɛlilɛ gyima ne zole ma kpalɛ wɔ Coron, ɔti ɔmaanle me nye liele—awieleɛ bɔkɔɔ ne bɛzɔnenle me Baebolo sukoavoma bie mɔ. Noko menyiale ngyegyelɛ bie mɔ. Ɛnee ɔdwu mekɛ bie mɔ a, metia nwonlomɔ too ɔkɔdwu ewiazo na meadwu azɛlɛsinli ne anu, yɛɛ menze ɛleka mɔɔ mekɔdwu ɛkɛ ne bɔbɔ a mebala la. Ɛnee mbɔra ngyikyi dɔɔnwo noko wɔ yɛ asafo ne azɛlɛsinli ne anu. Ɛnee meta mefa ɛlɛne mɔɔ milahyinli bɔ nwolɛ la mepɛ nyevile mɔɔ ɛlɛbu azɛlɛkye mgbole la kolaa na meahɔdwu bɛ nehane, ɔnva nwo kɛ ɛnee menze azule weɛ la! Gyihova bɔle me nwo bane na ɔboale me wɔ ngyegyelɛ ɛhye mɔ amuala anu. Nzinlii, membanwunle kɛ amuanrɛɛ ɛnee Gyihova ɛlɛsiezie me amaa ngyegyelɛ mgbole mɔɔ mebayia bɛ wɔ me gyimalilɛ bieko anu la.

Wɔ 1978, bɛmaanle me gyimalilɛ fofolɛ wɔ Papua New Guinea mɔɔ wɔ Australia sɔlɔ la. Papua New Guinea le maanle mɔɔ awoka dɔɔnwo wɔ nu na asɛɛ ye kpole nee Spain sɛ. Mɔɔ menwunle kɛ menli mɔɔ bɛle kɛyɛ mgbe nsa la ka aneɛ mɔɔ bo 800 la, ɔzinle me nwo. Noko anyelielɛ edwɛkɛ ne a le kɛ, ɛnee bɛ nuhua dɔɔnwo kola ka Melanesian Pidgin aneɛ ne, mɔɔ bɛta bɛfɛlɛ ye Tok Pisin la.

Bɛmaanle mengɔle Nrelenza asafo ne mɔɔ wɔ bɛ suakpole Port Moresby azo la anu ekyii. Noko mengɔle asafo mɔɔ bɛka Tok Pisin la anu, na menyɛle ngyehyɛleɛ mɔɔ mefa mesukoa aneɛ ne la. Menvale mɔɔ ɛnee melɛsukoa la menlile gyima wɔ daselɛlilɛ nu. Ɛhye boale me ɔmaanle menzukoale aneɛ ne ndɛndɛ. Yeangyɛ, ɛnee mekola mefa Tok Pisin memaa bagua nu ɛdendɛlɛ. Nea kɛzi ɔzinle me nwo kɛ mɔɔ mendwule Papua New Guinea la anzi, yeandwu ɛvolɛ ko bɔbɔ yɛɛ bɛmaanle mengɔnyɛle maangyebakyi zo neavolɛ wɔ asafo mɔɔ bɛka Tok Pisin wɔ maanle ne anu ɛleka dɔɔnwo la.

Kɛmɔ ɛnee asafo ne mɔ avinli twehwe kpalɛ la ati, ɛnee ɔwɔ kɛ meyɛ maangyebakyi nyianu dɔɔnwo anwo ngyehyɛleɛ na metudu adenle dɔɔnwo.  Wɔ mɔlebɛbo ne, kɛmɔ ɛnee mehɔ maanle fofolɛ nu, bɛka aneɛ ngakyile yɛɛ bɛ amaamuo le ngakyile la ati, me nwo yɛle me koonwu. Kɛmɔ awoka dɔɔnwo wɔ ɛkɛ yɛɛ bɛ ndenle ne mɔ noko ɛnle kpalɛ la ati, ɛnee mengola menlua aze mengɔmkpɔla asafo ne mɔ. Ɔti, ɛnee asɛɛ dapɛne biala mefa alopile metu adenle. Ɔyɛ a me ngomekye a mede alopile ɛtane bie anu melɛtu adenle ne a. Ɛnee adendulɛ ɛhye mɔ anwo adwenleadwenle le kɛ ɛlɛne mɔɔ ɛnee mefa metu adenle la ala la!

Ɛnee menli ekyi bie a lɛ telefonu a, ɔti ɛnee medua ngɛlata ɛhɛlɛlɛ zo a me nee asafo ne mɔ di ngitanwo a. Fane dɔɔnwo ne ala, mekɔdwu sua ne azo kolaa na me ngɛlata ne mɔ adwu ɛkɛ, na ɛnee ɔwɔ kɛ mebizebiza na meanwu mediema ne mɔ. Noko mekɛ biala mɔɔ mebanwu mediema ne mɔ la, bɛdie me kɛnlɛma kpalɛ na yemɔ maa mekakye deɛmɔti ɛnee melɛbɔ zɔhane afɔle ne mɔ la. Menwunle kɛ Gyihova boale me wɔ ndenle dɔɔnwo azo, na ɔmaanle me nee ye agɔnwolɛvalɛ ne anu mianle kpole kpalɛ.

Mekɛ mɔɔ limoa mɔɔ mengɔle debiezukoalɛ wɔ bɔra bie mɔɔ bɛfɛlɛ ye Bougainville azo la, agyalɛma bie mɔɔ bɛ nloa anwo le ɛzelekɛ ngome la rale me nwo ɛkɛ na bɛbizale me kɛ, “Ɛkakye yɛ ɔ?” Ɛnee mekakye kɛ menlile agyalɛma ɛhye daselɛ wɔ mekɛ mɔɔ limoa mɔɔ mengɔndwule Port Moresby la. Me nee bɛ bɔle Baebolo ɛzukoalɛ bo yɛɛ akee menvale bɛ memaanle adiema nrenyia bie mɔɔ wɔ sua ne azo la kɛ ɔ nee bɛ ɛdoa zo. Kɛkala bɛzɔne bɛ mu nwiɔ! Nyilalɛ dɔɔnwo mɔɔ menyianle ye wɔ ɛvolɛ nsa mɔɔ menlile ye wɔ Papua New Guinea la anu ko ɛne.

Kolaa na meavi Coron wɔ 1978 la, ɛnee menwu adiema raalɛ kɛnlɛma bie mɔɔ lɛ tunwomaa sunsum mɔɔ bɛfɛlɛ ye Adel la. Ɛnee ɔlɛtete ɔ mra nwiɔ, Samuel nee Shirley yɛɛ ɔle adekpakyelɛnli. Mekɛ ko ne ala, ɛnee eza ɔlɛnea ye mame mɔɔ yeyɛ kpanyinli la. Wɔ May 1981, menziale mengɔle Philippines mengɔngyale Adel. Mɔɔ yɛgyale yɛwiele la, yɛbɔle nu yɛyɛle adekpakyelɛ gyima ne na yɛnleanle abusua ne.

Ɔnva nwo kɛ ɛnee yɛlɛ abusua la, wɔ 1983, bɛkpale me bieko kɛ adekpakyelɛ titili na bɛmaanle mengɔle Linapacan bɔra ne mɔɔ wɔ Palawan maanzinli nu la azo. Abusua ne amuala dule hɔle ɛleka ɛhye mɔɔ ɛde ɔ nwo mɔɔ Alasevolɛ ɛnle ɛkɛ la. Kɛyɛ ɛvolɛ ko anzi, Adel mame wule. Noko akee, yɛyɛle dɔɔnwo wɔ ɛzonlenlɛ gyima ne anu, na yemɔ boale yɛ ɔmaanle yɛgyinlanle yɛ nyanelilɛ ne anloa. Yɛbɔle Baebolo ɛzukoalɛ dɔɔnwo abo wɔ Linapacan na ɛnee bɛlɛnyia anyuhɔlɛ, ɔti ɛnee yɛhyia Belemgbunlililɛ Asalo ekyi ko anwo. Ɔti yɛdayɛ mumua ne yɛzile bie. Mɔɔ yɛdwule ɛkɛ ne la, ye ɛvolɛ nsa anzi pɛpɛɛpɛ, yɛ nye liele kɛ yɛnwunle kɛ menli 110 rale Ngakyelɛlilɛ ne bie la, na mɔɔ yɛvile ɛkɛ ne la, bɛ nuhua dɔɔnwo nyianle anyuhɔlɛ na bɛzɔnenle bɛ.

Wɔ 1986, bɛmaanle mengɔle Culion, bɔra bie mɔɔ kokobɛvolɛma azokoɛleɛ wɔ zo la azo. Ɛhye anzi, bɛkpale Adel noko kɛ adekpakyelɛ titili. Mɔlebɛbo ne, ɛnee yɛsulo kɛ yɛbali kokobɛvolɛma mɔɔ wɔ ɛkɛ la daselɛ. Noko mediema mɔɔ wɔ ɛkɛ ne la hanle hilele yɛ kɛ bɛmaa kokobɛvolɛma ne ayile ɔti bɛnrɛhola bɛnrɛva bɛnrɛzane yɛ. Kokobɛvolɛma ɛhye mɔ bie rale debiezukoalɛ wɔ adiema raalɛ bie sua nu. Yeangyɛ, ɛnee yɛlɛka edwɛkɛ ne yɛahile bɛ a yɛnzulo, na ɛnee ɔyɛ anyelielɛ kɛ yɛbaha Baebolo ne anu anyelazo ne yɛahile menli mɔɔ ɛnee bɛte nganeɛ kɛ Nyamenle nee menli ɛkpo bɛ la. Ɛnee ɔyɛ anyelielɛ kɛ ɛbanwu menli mɔɔ bɛnde kpɔkɛ fee la kɛ bɛnyia  anyelazo kɛ kenle bie bɛbanyia kpɔkɛdelɛ kpalɛ na yemɔ maa bɛ nye die la.—Luku 5:​12, 13.

Kɛzi Culion ɛbɛlabɔlɛ ne hanle yɛ mra ne mɔ ɛ? Me nee Adel dole ɛsalɛ vɛlɛle mediema mbɛlɛra nwiɔ mɔɔ bɛvi Coron la yɛmaanle bɛrabokale yɛ nwo wɔ Culion amaa bɛanyia agɔnwolɛma kpalɛ bɛ nee bɛ adu. Samuel, Shirley yɛɛ mediema mbɛlɛra nwiɔ ɛhye anye liele daselɛlilɛ gyima ne anwo, bɛ nee ngakula dɔɔnwo zukoale debie yɛɛ me nee Adel noko nee ngakula ne mɔ awovolɛ zukoale debie. Nɔhalɛ nu, ɔkadwu mekɛ bie la ɛnee yɛ nee mbusua 11 a sukoa debie a. Yeangyɛ, ɛnee yɛyɛ Baebolo ɛzukoalɛ mɔɔ ɛlɛnyia anyuhɔlɛ la dɔɔnwo, ɔti yɛholale yɛdele asafo fofolɛ!

Mekɛ zɔhane ɛnee me ngomekye a mele asafo nu kpanyinli wɔ ɛkɛ a. Ɔti Bɛtɛle hanle kɛ menyɛ dapɛne avinli debiezukoalɛ ne memaa nolobɔlɛma mɔtwɛ mɔɔ bɛwɔ Culion la na eza menyɛ bie memaa nolobɔlɛma ngɔnla mɔɔ bɛwɔ namule bie mɔɔ bɛfɛlɛ ye Marily, mɔɔ ɛfa ɛlɛne ɛpɛ adenle dɔnehwele nsa na wɔadwu ɛkɛ la azo la. Saa yɛkɔyɛ debiezukoalɛ ne wɔ ɛkɛ yɛwie a, kɛ abusua la, yɛtia yɛpɛ adenle dɔnehwele dɔɔnwo wɔ awoka ne mɔ azo yɛkɔyɛ Baebolo ɛzukoalɛ wɔ namule bie mɔɔ bɛfɛlɛ ye Halsey la azo.

Awieleɛ bɔkɔɔ ne, menli dɔɔnwo mɔɔ bɛvi Marily nee Halsey la rale nɔhalɛ ne anu, ɔti yɛsisile Belemgbunlililɛ Asalo wɔ ɛleka nwiɔ ɛhye mɔ. Kɛ mɔɔ mediema mɔɔ wɔ Linapacan la yɛle la, zɔhane ala a mediema ne mɔ nee anyelielɛma ne vale suazilɛ ne anwo ninyɛne dɔɔnwo rale a yɛɛ bɛboale bɛmaanle bɛsisile azua ne mɔ. Ɛnee Marily sua ɛdeɛ ne kola fa menli 200 yɛɛ bɛkola bɛbuke nu, ɔti ɔmaanle yɛholale yɛyɛle nyianu wɔ ɛkɛ.

Wɔ 1993 mɔɔ ɛnee ngakula ne mɔ ɛyɛ mgbanyinli la, me nee Adel bɔle maangyebakyi zo neavolɛ gyima ne abo wɔ Philippines. Akee wɔ ɛvolɛ 2000 ne anu, mengɔle Azonvolɛ Ndetelɛ Sukulu amaa bɛahilehile me bɛamaa meayɛ zɔhane sukulu ne kilehilevolɛ. Mendele nganeɛ kɛ menfɛta kɛ mebayɛ zɔhane sukulu ne kilehilevolɛ, noko ɛnee Adel maa me anwosesebɛ dahuu. Ɔhakyele me kɛ Gyihova bamaa me anwosesebɛ mɔɔ mehyia la amaa meahola meayɛ me gyimalilɛ fofolɛ ne. (Fel. 4:13) Ɛnee Adel ze kɛ mɔɔ ɔlɛka la le nɔhalɛ, ɔluakɛ ɛnee ɔkola ɔyɛ ye ɛzonlenlɛ gyima ne ɔnva nwo kɛ ɛnee ye kpɔkɛdelɛ ɛnle kpalɛ la.

 Wɔ 2006 mɔɔ ɛnee melɛkile debie wɔ sukulu ko anu la, bɛnwunle kɛ Adel ɛnyia ewule bie mɔɔ bɛfɛlɛ ye Parkinson la. Ɔzinle yɛ nwo! Mɔɔ menganle mengilele Adel kɛ mekulo kɛ yɛgyakyi yɛ gyimalilɛ ne la, ɔhanle kɛ, “Mesɛlɛ wɔ, kpondɛ dɔketa mɔɔ ɔbahola yeayɛ me ayile la na meze kɛ Gyihova baboa yɛ yeamaa yɛahɔ zo yɛayɛ gyima ne.” Wɔ ɛvolɛ nsia anu, Adel hɔle zo yɛle Gyihova ɛzonlenlɛ gyima ne mɔɔ yeambɔ nwolɛ ɛdahonlɛ a. Mekɛ mɔɔ ɛnee akee ɔngola tia la, ɛnee ɔtɛnla ye abuburama ehwili ne anu ɔdi daselɛ. Mɔɔ ɛnee ɔngola tendɛ la, saa ɔka edwɛkɛ kpɔkɛ ko anzɛɛ agbɔkɛ nwiɔ bie wɔ debiezukoalɛ bo a, ɛnee yewie. Ɛnee mediema ne mɔ ta kɛlɛ kɛzi bɛ nye die Adel kpundiigyinlanlɛ nwo neazo kɛnlɛma ne anwo la wɔ mɛsegye nu nwa ye. Ɛhye hɔle zolɛ too ɔhɔdwule 2013 mɔɔ ɔwule la. Me nee yelɛ nɔhavo mɔɔ lɛ ɛlɔlɛ la dɛnlanle too ɛvolɛ mɔɔ bo 30, noko kɛkala, eza alɔbɔlɛlilɛ nee anwokoonwuyɛlɛ ɛvo me nwo zo bieko.

Ɛnee Adel kulo kɛ metoa me gyimalilɛ ne azo, ɔti menyɛle ye zɔ. Menyɛle ninyɛne dɔɔnwo na yemɔ boale me maanle mengyinlanle me anwokoonwuyɛlɛ ne anloa. Ɔvi 2014 kɔdwu 2017, bɛmaanle mengɔkpɔlale asafo ngakyile mɔɔ bɛka Tagalog mɔɔ bɛwɔ maanle ngakyile mɔɔ bɛmmaa yɛnyɛ yɛ ɛzonlenlɛ gyima ne wɔ ɛkɛ la. Ɛhye anzi, mengɔmkpɔlale asafo mɔɔ bɛka Tagalog mɔɔ bɛwɔ Taiwan, United States nee Canada la. Wɔ 2019, mengilele debie wɔ Belemgbunlililɛ Edwɛkpakavolɛma Sukulu mɔɔ bɛyɛle ye Nrelenza nu wɔ India nee Thailand la anu. Gyimalilɛ ɛhye mɔ amuala maa me nye die kpalɛ. Saa melɛyɛ gyimalilɛ bie wɔ Gyihova ɛzonlenlɛ nu a, me nye die bo zo.

Wɔ gyimalilɛ fofolɛ biala mɔɔ mebanyia la anu, ɛlɔlɛ mɔɔ menyia memaa mediema ne mɔ la yɛ kpole kpalɛ, ɔti saa megyakyi bɛ meahɔ ɛleka fofolɛ a ɔnla aze fee ɔmmaa me. Wɔ mekɛ zɔhane ne mɔ anu, menzukoale kɛ mebava me nwo meado Gyihova anwo zo bɔkɔɔ. Menwu kɛ Gyihova ɛboa me fane dɔɔnwo, na ɛhye noko boale me maanle menvile me ahonle nu menliele nzenzaleɛ ngakyile mɔɔ rale la mendole nu. Ɛnɛ mele adekpakyelɛ titili wɔ Philippines. Me nye ɛlie me asafo fofolɛ ne anu kpalɛ, bɛrayɛ me abusua mɔɔ bɛboa me na bɛkile kɛ bɛdwenle me nwo la. Saa menwu Samuel nee Shirley kɛ bɛlɛda bɛ mame diedi ne bie ali a ɔmaa medi fɛlɛko kpole.—3 Dwɔn 4.

Ɛhɛe, meyia ngyegyelɛ dɔɔnwo wɔ me ɛbɛlabɔlɛ nu, bie a le kɛ ɛnee me nye gyi me ye mɔɔ mekulo ye kpalɛ la anwo wɔ mekɛ mɔɔ ewule ɛzulolɛ bie ɛlɛmaa yeanwu amaneɛ na yeawu la. Ɛnee eza ɔwɔ kɛ megyinla tɛnlabelɛ ngakyile nloa. Noko menwu kɛ Gyihova “nee yɛ nuhua ko biala avinli anwa.” (Gyi. 17:27) Gyihova asa “ɛnle ezinra somaa” kɛ ɔbaboa ye azonvolɛ mɔɔ bɛwɔ azɛlɛsinli mɔɔ ɛde ɔ nwo la anu na yeamaa bɛ anwosesebɛ. (Aye. 59:1) Gyihova mɔɔ le me Bodane la nee me ɛlua wɔ me ɛbɛlabɔlɛ kɔsɔɔti anu, ɔti meyɛ ye mo somaa. Yeanga me ngomekye ɛlɛ.