1, 2. (a) Duzu a Ɛlaefaze nee Beledade hanle ye wɔ ɛzonlenlɛ mɔɔ yɛfa yɛmaa Nyamenle la anwo a? (b) Kɛzi Gyihova lale ye nganeɛdelɛ ali ɛ?

“ASOO sonla nwo le nvasoɛ maa Nyamenle? Sonla mɔɔ ze nrɛlɛbɛ la le nvasoɛ maa ɔdaye ɔ nwo? Saa ɛdi pɛlepɛle a, duzu bolɛ yɛɛ ɛsonle ɛmaa Tumivolɛ ne a, anzɛɛ ɛbɔ wɔ ɛbɛla ne fɔɔnwo a, duzu nvasoɛ a ɔnyia a?” (Dwobu 22:1-3) Asoo wɔbɔ mɔdenle kɛ ɛbanyia kpuya ɛhye mɔ anwo mualɛ ɛlɛ? Mɔɔ Timanli Ɛlaefaze limoale bizale Dwobu kpuya ɛhye mɔ la, ɛnee ɔdie ɔdi kɛ mualɛ ne le kyɛkyɛ. Ɔ gɔnwo Beledade mɔɔ ɔvi Hyua la bɔbɔ hanle kɛ alesama ɛnrɛhola ɛnrɛnyia gyinlabelɛ kpalɛ wɔ Nyamenle anyunlu.—Kenga Dwobu 25:4.

² Adalɛ arɛlekyekyevolɛma ɛhye mɔ hanle kɛ Gyihova ɛngyia mɔdenle mɔɔ yɛbɔ yɛsonle ye nɔhalɛ nu la anwo, na wɔ Nyamenle anye zo yɛle kɛ kɛkɛba, sonlɛ, anzɛɛ sone la. (Dwobu 4:19; 25:6) Saa wɔandwenle nwolɛ kpalɛ a, ɛbaha kɛ Ɛlaefaze nee Beledade lale mɛlɛbɛnwoaze ali. (Dwobu 22:29) Yeanyɛ boɛ fee la, saa ɛgyi boka ti zo anzɛɛ ɛwɔ alopile nu na ɛnea alesama gyimalilɛ a, ɔnzɔho ɛhwee. Noko, saa Gyihova wɔ anwuma lɔ na ɔnea Belemgbunlililɛ ne anwo gyima mɔɔ yɛyɛ ye wɔ ɛke la a, asoo kɛ ɔnwu ye la ɛne? Gyihova maanle yɛnwunle kɛzi ɔte nganeɛ  la, ɔdeanle Ɛlaefaze, Beledade nee Zofaa ɔluakɛ bɛbɔle adalɛ noko ɔ nye liele Dwobu anwo na ɔvɛlɛle ye “me sonvolɛ.” (Dwobu 42:7, 8) Ɛhye maa yɛnwu kɛ amgba “sonla nwo le nvasoɛ maa Nyamenle.”

3. Duzu a Ɛlaehu hanle ye wɔ mɔdenle mɔɔ yɛbɔ yɛsonle Gyihova la anwo a, na duzu a ɛnee ɔlɛkile a?

³ Gyihova andea Ɛlaehu kɛ ɔbizale edwɛkɛ ɛhye la: “Saa ɛle tenlenenli a, duzu a ɛfa ɛmaa ye [Nyamenle], anzɛɛ duzu a ɔnyia ye ɔfi ɛ sa nu a?” (Dwobu 35:7) Asoo ɛnee Ɛlaehu ɛlɛkile kɛ mɔdenle mɔɔ yɛbɔ yɛsonle Nyamenle la azo ɛnlɛ nvasoɛ ɔ? Kyɛkyɛ. Ɛnee ɔlɛka kɛ Gyihova ɛngyia yɛ ɛzonlenlɛ nwo. Gyihova ɛngyia ɛhwee. Yɛnrɛhola yɛnrɛmaa ɔnrɛnyia ɔ nwo anzɛɛ ɔnrɛnyia anwosesebɛ. Emomu, debie kpalɛ biala, ahyɛlɛdeɛ, anzɛɛ anwosesebɛ mɔɔ yɛlɛ la amuala vi Nyamenle, na ɔnea kɛzi yɛfa yɛdi gyima la.

4. Duzu a Gyihova fa yɛ atiakunlukɛnlɛmayɛlɛ toto nwo a?

⁴ Gyihova bu nyɛleɛ kpalɛ mɔɔ yɛfi ɛlɔlɛ nu yɛyɛ yɛmaa ye azonvolɛ la kɛ yɛyɛ yɛmaa ɔdaye mumua ne. Mrɛlɛbulɛ 19:17 ka kɛ: “Sonla mɔɔ se ehyianvolɛma anwunvɔne la bɔ [Gyihova] bosea, na ɔbadua ye kakɛ wɔ ye nyɛleɛ kpalɛ nwo.” Asoo ngɛlɛlera ɛhye kile kɛ Gyihova nwu atiakunlukɛnlɛmayɛlɛ biala mɔɔ yɛda ye ali yɛkile ehyianvolɛma la ɔ? Asoo yɛbahola yɛaha kɛ anwuma nee aze Bɔvolɛ ne bu ɔ nwo kɛ ɔwɔ kɛ ɔfa ɛlolɛ nee nyilalɛ ɔtua anwunvɔnezelɛ mɔɔ alesama da ye ali la anwo kakɛ ɔ? Ɛhɛe, Nyamenle Ara ne zile ɛhye azo.—Kenga Luku 14:13, 14.

5. Kpuya boni mɔ a yɛbazuzu nwo kɛkala a?

⁵ Gyihova maanle ngapezonli Ayezaya dendɛle maanle Ye, ɔlale ɛhulolɛ mɔɔ Ɔlɛ kɛ alesama mɔɔ bɛdi nɔhalɛ la baboa amaa Ye bodane ne mɔ ara nu la ali. (Aye. 6:8-10) Ayezaya vile ye ɛhulolɛ nu liele ɛsalɛdolɛ ne dole nu. Ɛnɛ, menli apenle dɔɔnwo ɛlɛda zɔhane “Mewɔ ɛke! Soa me!” sunsum ne bie ali ɔlua gyima mɔɔ ɔyɛ se mɔɔ bɛlie bɛdo nu wɔ Gyihova ɛzonlenlɛ nu la azo. Noko awie bahola abiza kɛ: ‘Asoo me moalɛ ne anwo hyia amgba? Ɔle nɔhalɛ kɛ Gyihova ɛmaa me adenle kɛ mendu me nwo memaa ɛdeɛ, noko asoo ɔnrɛmaa me sa ɛnrɛha mɔɔ mehyia nwo la amaa mɔɔ yeha la ara nu ɔnva nwo mɔɔ medame mumua ne mekpa kɛ mebayɛ ye wɔ ye ɛzonlenlɛ nu la ɔ?’ Suzu kɛzi edwɛkɛ mɔɔ sisile wɔ Dɛbola nee Balake mekɛ zo la maa yɛnyia kpuya nsa ɛhye mɔ anwo mualɛ la anwo.

6. Ngakyile boni a ɛnee wɔ Yizilayɛma mɔɔ wɔ namunamu ne mɔ azo nee Gyeeben sogyama ne avinli a?

⁶ Ɛnee Keena Belemgbunli Gyeeben ‘ɛhile Yizilayɛma nyane’ too ɛvolɛ 20. Ɛnee menli mɔɔ wɔ namunamu ne mɔ azo la sulo bɔbɔ kɛ bɛbavinde. Wɔ sogyama anye zo, ɛnee Yizilayɛma ɛnlɛ akodeɛ mɔɔ bɛbava bɛabɔ bɛ nwo bane, anzɛɛ bɛ nee bɛ agbɔvolɛma aho a, noko ɛnee bɛ agbɔvolɛma ne lɛ konle mbulalɛ ehwili 900.—Man. 4:1-3, 13; 5:6-8. *

7, 8. (a) Adehilelɛ boni a Gyihova limoale vale maanle Balake a? (b) Kɛzi Yizilayɛma lile Gyeeben ɛlɔnema ne anwo zo konim ɛ? (Nea mɔlebɛbo nvoninli ne.)

⁷ Noko Gyihova luale ngapezonli raalɛ Dɛbola anwo zo hanle ɛhye hilele Balake: “Kɔ kɔboɔboa wɔ ɛlɔnema ne anloa wɔ Teebɔ Boka ne azo. Ye menli apenle bulu fi Nafetalae nee Zɛbulɛn mbusua ekpunli ne  mɔ anu. Na mebamaa Safohyenlema Kpanyinli Sesɛla, mɔɔ nea Gyeeben, ɛlɔnema ne azo la ava ye ɛlɔnema nee ye konle mbulalɛ ehwili ne mɔ arayia wɔ azule Kaehyɔn ne anloa na meamaa wɔali ɔ nwo zo konim.”—Man. 4:4-7.

⁸ Edwɛkɛ tɛlɛ. Menli mɔɔ dule bɛ nwo maanle la yiale nu wɔ Teebɔ Boka ne azo. Balake lile Gyihova adehilelɛ ne azo ɛkɛ ne ala. (Kenga Maanlebuvolɛma 4:14-16.) Mɔɔ konle ne ɛlɛkɔ zo wɔ Teeyanake la, arɛlevilɛ nu ala ezule dɔle kpole maanle ɛkɛ ne yɛle mɛtɛlɛmɛtɛlɛ. Balake nriandile doale Sesɛla ɛlɔnema ne too ɔhɔdwule Halohyɛte—ɔpɛle adenle mayɛlɛ 15 (km 24). Wɔ adenle nu Sesɛla gyakyile ye konle ehwili anwo ɛzulolɛ ne mɔɔ kɛkala nwolɛ ɛnlɛ nvasoɛ la na ɔnriandile ɔhɔle Zeeyananem, mɔɔ ɔbayɛ kɛ ɔbikye Kidɛhye la. Ɔnriandile ɔhɔle Gyeeyɛle mɔɔ le Hibɛ aye la ɛdanlɛsua ne anu, na Gyeeyɛle liele ye kɛnlɛma. Kɛmɔ ɛnee konle ne ɛmaa yevɛ la ati, ɔlafele. Ɔti akɛnrasesebɛ mɔɔ Gyeeyɛle nyianle la maanle ɔhunle Sesɛla. (Man. 4:17-21) Yizilayɛma lile bɛ agbɔvolɛ nwo zo konim! *

9. Edwɛkɛ boni a Maanlebuvolɛma 5:20, 21 maa yɛnwu ye wɔ konle mɔɔ bɛ nee Sesɛla honle la anu a?

⁹ Ɔwɔ kɛ yɛsukoa Maanlebuvolɛma 4 nee 5 yɛbɔ nu, ɔluakɛ tile ko biala ka edwɛkɛ gyɛne. Kɛ neazo la, Maanlebuvolɛma 5:20, 21 ka kɛ: “Anwuma nwɔlɔra honle, bɛlua anwomanyunlu nehane la, ɛnee bɛ nee Sesɛla ɛlɛko. Kaehyɔn azuyilɛ ne pianle bɛ hɔle.” Asoo ɛhye kile kɛ anwumabɔvolɛma boale bɛ anzɛɛ awolɛ vi anwuma tetele guale? Baebolo ne anga. Noko ɔzɔho kɛ Gyihova liele ye menli ne ɔlua ezule kpole mɔɔ ɔmaanle ɔdɔle wɔ zɔhane ɛleka ne nee mekɛ ne anu amaa konle ehwili 900 ne angola andu bɛ bo. Maanlebuvolɛma 4:14, 15 ka ye fane nsa kɛ konimlilɛ ne vi Gyihova. Yizilayɛma 10,000 ne mɔɔ bɛdule bɛ nwo bɛmaanle la biala ɛnrɛhola ɛnrɛha kɛ ɔdaye a ɔboale ɔmaanle bɛlile konim a.

10, 11. “Milɔzo” le duzu, na duzu ati a bɛwale ye amonle a?

¹⁰ Wɔ Dɛbola nee Balake konimlilɛ edwɛne mɔɔ bɛdole bɛyele Gyihova ayɛlɛ la anu, bɛhanle kɛ: ‘Gyihova soanvolɛ ne zele ɔ, Abule ɛbu Milɔzo, abule ɛbu menli mɔɔ wɔ zo, ɔboalekɛ bɛambamboa Gyihova, bɛambamboa Gyihova bɛantia katakyiema.’—Man. 5:23.

¹¹ Bɛwale Milɔzo amonle kpalɛ yemɔti ɔyɛ se kɛ yɛbaha deɛ mɔɔ bɛyɛle la. Asoo ɔle sua mɔɔ zolɛ menli ne anlie ɛsalɛ mɔɔ bɛdole kɛ bɛkpondɛ tunwomaa la azo ɔ? Asoo ɛnee ɔwɔ ɛleka mɔɔ Sesɛla nriandile vale mɔɔ anrɛɛ sua ne azo amra bahola ahye ye noko bɛanyɛ ɔ? Asoo bɛande kɛ Gyihova ɛlɛkpondɛ menli mɔɔ badu bɛ nwo amaa ɔ? Menli apenle bulu mɔɔ vi bɛ maanzinli ne anu la rayiale kɛ bɛkɔ konle ɛhye. Fa ɛ nye bu kɛ Milɔzo amra ɛnwu kɛ sogyanli atisesebɛ ɛhye angome lua awɔdenle ne azo ɛlɛnriandi na yeyɛ basaa a. Anrɛɛ ɛhye bahola ayɛ nwolɛ adenle kpole mɔɔ bɛbanyia bɛaboa Gyihova bamaa ye bodane ara nu na bɛanyia nyilalɛ a. Noko wɔ zɔhane mekɛ ne mɔɔ ɔwɔ kɛ bɛsi kpɔkɛ kɛ bɛbayɛ debie anzɛɛ bɛnrɛyɛ la, asoo bɛyɛle anyetele? Nea kɛzi bɛ nyɛleɛ ne le ngakyile fi mɔɔ Gyeeyɛle vale akɛnrasesebɛ yɛle mɔɔ bɛha nwolɛ edwɛkɛ wɔ ngyehyɛnu mɔɔ doa zo anu la anwo a!—Man. 5:24-27.

12. Subane ngakyile mɔɔ menli lɛ la boni a yɛnwu ye wɔ Maanlebuvolɛma 5:9, 10 a, na kɛzi ɔwɔ kɛ ɛhye ka yɛ ɛnɛ ɛ?

¹² Maanlebuvolɛma 5:9, 10 maa yɛnwu  subane mɔɔ bɛdabɛ mɔɔ bɛ nee Balake hɔle konle ne lale ye ali nee mɔɔ bɛdabɛ mɔɔ bɛanyɛ la noko lale ye ali la. Dɛbola nee Balake hanvole ‘Yizilayɛ safohyenlema, mɔɔ bɛdule bɛ nwo bɛmaanle menli ne’ la. Nea kɛzi ɛnee bɛle ngakyile bɛfi menli “mɔɔ bɛtɛnla asoaso fufule zo” mɔɔ ɛnee bɛmemaa bɛ nwo zo la ati, bɛangɔ konle ne bie nee bɛdabɛ mɔɔ “bɛtɛnla asoaso mbia fondonloo zo,” mɔɔ bɛkulo kɛ bɛ nwo tɔ bɛ avinli la anwo! Bɛdabɛ “mɔɔ bɛdua aze” mɔɔ ɛnee bɛkpondɛ kɛ bɛ nwo tɔ bɛ la anyɛ kɛ bɛdabɛ mɔɔ ɛnee bɛkulo kɛ bɛ nee Balake kɔ konle wɔ Teebɔ awoka ne ndoleɛ nu nee Kaehyɔn mbɔnza ne mɔɔ nuhua le mɛtɛlɛmɛtɛlɛ ngome la anu la! Bɛdule bɛdabɛ mɔɔ bɛkpondɛ kɛ bɛ nwo tɔ bɛ la kɔsɔɔti folɛ kɛ “bɛbɔ nolo” anzɛɛ bɛzuzu nwo! Nɔhalɛ nu, ɛnee ɔwɔ kɛ bɛdwenledwenle nwolɛ adenle mɔɔ ɛbɔ bɛ kɛ bɛkɛboa Gyihova gyima la anwo. Zɔhane ala a ɛnɛ noko, ɔwɔ kɛ awie biala mɔɔ twehwe ɔ bo aze kɛ ɔbazonle Nyamenle la noko yɛ a.

13. Kɛzi subane mɔɔ Wulubɛn, Dan, nee Ahya mbusua ekpunli ne lale ye ali la le ngakyile fi Zɛbulɛn nee Nafetalae ɛdeɛ ne anwo ɛ?

¹³ Menli mɔɔ dule bɛ nwo maanle la nwunle kɛzi Gyihova kpoleyɛlɛ ne de la. Bɛnyianle debie mɔɔ bɛbaha nwolɛ edwɛkɛ wɔ mekɛ mɔɔ ‘bɛlɛka Gyihova konimlilɛ anzɛɛ tenleneyɛlɛ nwo edwɛkɛ’ la. (Man. 5:11) Noko, bɛhanle Wulubɛn, Dan, nee Ahya mbusua ekpunli ne mɔ anwo edwɛkɛ wɔ Maanlebuvolɛma 5:15-17 kɛ ɛnee bɛ adwenle wɔ bɛ nwonane afoa nu ninyɛne mɔɔ bie a le mboane, mbɔnkye, meli, nee meli agyinlaleɛ la azo—bɛtɛla Gyihova gyima ne mɔɔ ɔwɔ kɛ bɛyɛ la. Noko Zɛbulɛn nee Nafetalae “vale bɛ ngoane dole nzeleba” boale Dɛbola nee Balake. (Man. 5:18) Yɛnyia ɛzukoalɛdeɛ mɔɔ anwo hyia la wɔ tunwomaa subane mɔɔ menli ne lale ye ali la anu.

14. Duzu a yɛyɛ yɛboa Gyihova tumililɛ ne ɛnɛ a?

¹⁴ Ɛnɛ, bɛtɛfɛlɛle yɛ kɛ yɛhɔ konle, noko yɛnyia nwolɛ adenle kɛ yɛbava  akɛnrasesebɛ nee mɔdenlebɔlɛ yɛaha edwɛkɛ ne. Bɛhyia menli mɔɔ badu bɛ nwo amaa la dɔɔnwo wɔ Gyihova ahyehyɛdeɛ ne anu ɛnɛ bɛtɛla mekɛ biala. Mediema mgbe dɔɔnwo ɛlɛyɛ dahuu ɛzonlenlɛ gyima ne bie kɛ Adekpakyelɛma, Bɛtɛlema, Belemgbunlililɛ Asalo ɛsisilɛma, yɛɛ maangyebakyi nee maanzinli nyianu boavolɛma. Eza dwenle asafo mgbanyima mɔɔ bɛlɛ ɛzonlelilɛ mgbole kɛ Asopiti Ngitanwolilɛ Kɔmatii nee bɛdabɛ mɔɔ bɛyɛ maangyeba nyianu nwo ngyehyɛleɛ la anwo nea. Nyia anwodozo kɛ Gyihova anye sɔ wɔ tunwomaa sunsum ne kpole na ɔ rɛle ɛnrɛvi.—Hib. 6:10.

15. Kɛ ɔkɛyɛ na yɛanwu kɛ yɛtɛtole yɛ adwenle nu wɔ Gyihova gyima ne anwo ɛ?

¹⁵ Ɔwɔ kɛ yɛ nuhua ko biala biza ɔ nwo kɛ: ‘Asoo me kunlu dwo nwo kɛ mebamaa awie mɔ ayɛ gyima ne dɔɔnwo ɔ? Asoo melɛma nwonane afoa nu ninyɛne azi me tunwomaa sunsum ne adenle ɔ? Kɛ mɔɔ Balake, Dɛbola, Gyeeyɛle nee tunwomaa 10,000 ne yɛle la, asoo melɛ diedi nee akɛnrasesebɛ mɔɔ mebava meayɛ gyima mɔɔ Gyihova ɛva ɛwula me sa la ɔ? Saa melɛsuzu nwo kɛ metu meahɔ suakpole anzɛɛ maanle gyɛne zo ɔlua ezukoa ti a, asoo meva asɔneyɛlɛ mezuzu kɛzi ɛhye baha me abusua ne nee asafo ne la anwo ɔ?’ *

16. Duzu a yɛbahola yɛava yɛamaa Gyihova mɔɔ ɔnlɛ ye dɛba a?

¹⁶ Gyihova ɛli yɛ eni ɔlua nwolɛ adenle mɔɔ yemaa yɛnyia kɛ yɛbaboa ye tumililɛ ne la azo. Kɛmɔ Abɔnsam nyianle alesama mɔɔ bɛlimoa la ɔmaanle bɛrale ye tumililɛ ne afoa la ati, saa ɛgyinla Gyihova tumililɛ ne anzi a, ɔka edwɛkɛ mɔɔ nuhua la ɛkɛ kpalɛ la ɔkile Seetan. Gyihova anye die diedi nee nɔhalɛlilɛ mɔɔ maa ɛda tunwomaa sunsum ali la anwo. (Mrɛ. 23:15, 16) Ɔbalua moalɛ mɔɔ ɛfa ɛmaa la azo yeabua Seetan ɛzonledolɛ ne. (Mrɛ. 27:11) Ɛhye ati, ɔlua wɔ tieyɛ zo, ɛbamaa Gyihova anyia debie mɔɔ sonle bolɛ maa ye na ɔ nye die nwo la.

17. Duzu a Maanlebuvolɛma 5:31 maa yɛnwu kɛ ɔbazi kenle bie a?

¹⁷ Ɔnrɛhyɛ bɛdabɛ mɔɔ bɛ nye die Gyihova tumililɛ ne anwo la bayi azɛlɛ ne tɛkɛɛ. Nea kɛzi yɛ nye la kɛ zɔhane kenle ne bara a! Yɛ nee Dɛbola nee Balake bɔ nu to edwɛne kɛ: ‘O Gyihova maa menli mɔɔ kpɔ wɔ la abo zo ɛbɔ, na maa bɛdabɛ mɔɔ bɛkulo wɔ la ɛda wienyi kɛ mangyee sɛnzɛne.’ (Man. 5:31) Bɛbabua nzɛlɛlɛ ɛhye wɔ mekɛ mɔɔ Gyihova bava Seetan ɛtane ewiade ɛhye ara awieleɛ la! Saa Amagɛdɔn konle ne bɔ ɔ bo a, bɛnrɛhyia menli mɔɔ badu bɛ nwo amaa la anwo amaa bɛaho bɛatia agbɔvolɛ ne mɔ. Mekɛ zɔhane, edwɛkɛ ɛhye bara nu: “Bɛmmatu bɛ bo, na bɛnlea kɛ [Gyihova] bazi aho bɛ ti ali konim la.” (2 Ek. 20:17) Noko kɛkala, nwolɛ adenle dɔɔnwo wɔ ɛkɛ maa yɛ kɛ yɛbava akɛnrazilɛ nee mɔdenlebɔlɛ yɛaboa Gyihova gyima ne.

18. Kɛzi wɔ tunwomaa ɛzonlenlɛ ne baha menli mɔɔ nyia zolɛ nvasoɛ la ɛ?

¹⁸ ‘Bɛye Gyihova ayɛlɛ! Menli ne yeyele bɛ kunlu.’ Ɔti, Dɛbola nee Balake bɔle ɔ bo yele Anwuma Anwumanli ne ayɛlɛ, tɛ abɔdeɛ biala ɔ. (Man. 5:1, 2) Ɛnɛ noko, bɛmaa bɛ tunwomaa sunsum ne ɛha awie biala mɔɔ nyia zolɛ nvasoɛ la bɛmaa ‘ɔye Gyihova ayɛlɛ!’