1-3. (a) Tɛnlabelɛ boni a ngakula kɔsɔɔti wɔ nu a, na kɛzi ɛbayɛ ɛhye anwo ndonwo ɛ? (Nea mɔlebɛbo nvoninli ne.) (b) Duzu a baboa Kilisiene ngakula wɔ tɛnlabelɛ ɛhye anu a?

FA YE kɛ wɔyɛ ngyehyɛleɛ kɛ ɛkɔ ayia bie mɔɔ anwo hyia la wɔ sua bie mɔɔ wɔ moa la azo. Amaa wɔadwu ɛkɛ la, ɔwɔ kɛ ɛfa kale ɛtu adenle tendenle. Ɛdwule kale agyinlaleɛ ne la ɔzinle ɛ nwo kɛ adendulɛma nee ahale dɔɔnwo ɛhyele zo wɔ ɛkɛ la. Nea kɛzi ɔle kpalɛ kɛ ɛbanwu ɛleka mɔɔ ɛlɛkɔ la na wɔakpondɛ kale mɔɔ ɔbava wɔ yeahɔ ɛkɛ la! Ɛnrɛvo kale gyɛne biala ɔluakɛ ɛze kɛ ɔbava wɔ yeahɔ ɛleka gyɛne.

² Ɛbɛlabɔlɛ le kɛ adendulɛ la, na bɛmɛ ngakula bɛle kɛ menli mɔɔ wɔ kale agyinlaleɛ ne la. Ɔdwu mekɛ ne bie a, nwolɛ adenle nee kpɔkɛzilɛ dɔɔnwo wɔ ɛkɛ ne mɔɔ kola maa bɛyɛ basaa. Noko, saa bɛze ɛleka fɔɔnwo mɔɔ bɛkulo kɛ bɛkɔ la a, ɔnrɛmaa ɔnrɛyɛ se kɛ bɛbazi kpɔkɛ kpalɛ. Nienwu a ɔwɔ kɛ bɛkɔ a?

³ Edwɛkɛ ɛhye bua zɔhane kpuya ne na ɔmaa ngakula anwosesebɛ kɛ bɛva bɛ ɛbɛlabɔlɛ bɛyɛ mɔɔ sɔ Gyihova anye la. Ɛhye kile kɛ bɛbanwu Gyihova wɔ bɛ ɛbɛlabɔlɛ kɔsɔɔti anu ​—nwomazukoalɛ, gyima, abusua nu ɛzonlelilɛ nee mɔɔ bokɛboka nwo la. Ɛhye kile kɛ bɛbapele bɛadwu sunsum nu bodane nwo. Saa ngakula fa bɛ adwenle sie Gyihova ɛzonlenlɛ zo a, bɛbahola bɛalie bɛali kɛ Gyihova bayila bɛ wɔ bɛ ɛbɛlabɔlɛ nu.​—Kenga Mrɛlɛbulɛ 16:3.

4. Duzu a yɛbazuzu nwo wɔ edwɛkɛ ɛhye anu a?

⁴ Nrɛlɛbɛ wɔ nu kɛ ɛbava sunsum nu bodane ngakyile wɔazie ɛ nye zo. Duzu ati ɔ? Yɛbazuzu ninyɛne nsa anwo. Nwiɔ mɔɔ limoa la kile kɛzi ɛdi sunsum nu bodane nzi a, ɔbamaa ɛ nee Gyihova agɔnwolɛvalɛ ne anu amia la; mɔɔ tɔ zo nsa la kilehile nvasoɛ mɔɔ wɔ zo kɛ ɛbava sunsum nu bodane wɔazie ɛ nye zo wɔ wɔ ngakula nu la anu.

5. Debie titili boni ati a yɛfa sunsum nu bodane yɛsie yɛ nye zo a?

⁵ Debie titili mɔɔ ɔti yɛfa sunsum nu bodane yɛsie yɛ nye zo la a le kɛ, yɛfa yɛkile Gyihova ɛlɔlɛ ne nee mɔɔ yeyɛ yemaa yɛ la anwo anyezɔlɛ. Edwɛndolɛnli ne hanle kɛ: “Ɔle kpalɛ kɛ yɛkɛyɛ [Gyihova] mo, . . . Ɔluakɛ, O [Gyihova], wɔ gyima ne ɛmaa me nye ɛlie; ɛ sa anloa gyima ne mɔ maa mefa anyelielɛ meto edwɛne.” (Edw. 92:1, 4) Kɛ kakula la, dwenle mɔɔ Gyihova ɛyɛ ɛmaa wɔ la kɔsɔɔti anwo. Wɔ ngoane, wɔ diedi, Baebolo ne, asafo ne nee wɔ Paladaese anyelazo ne. Saa ɛfa sunsum nu bodane ɛsie ɛ nye zo a, ɛmaa Gyihova nwu ye kɛ ɛ nye sɔ ninyɛne ɛhye mɔ kɔsɔɔti, na ɛhye maa ɛbikye ye kpalɛ.

6. (a) Kɛzi sunsum nu bodane ka yɛ nee Gyihova agɔnwolɛvalɛ ne ɛ? (b) Bodane boni mɔ a ɛbahola wɔava wɔazie ɛ nye zo wɔ wɔ ngakula nu a?

⁶ Mɔɔ tɔ zo nwiɔ mɔɔ ɔti yɛfa sunsum nu bodane yɛsie yɛ nye zo la a le kɛ, saa ɛpele ɛdwu nwo a, ɛnee ɛlɛyɛ gyima kpalɛ wɔamaa Gyihova. Ɛhye bamaa wɔabikye ye kpalɛ. Ɛzoanvolɛ Pɔɔlo bɔle ɛwɔkɛ kɛ: “Nyamenle ɛnle nzisi mɔɔ ɔ rɛle bavi bɛ gyima nee ɛlɔlɛ mɔɔ bɛlale ye ali wɔ ye duma ne anwo” la. (Hib. 6:10) Ɛnle kakula somaa kɛ ɛbava bodane wɔazie ɛ nye zo. Mɔɔ Christine nyianle ɛvolɛ bulu la, yɛɛ ɔvale ɔziele ɔ nye zo kɛ ɔbagenga Alasevolɛ nɔhavoma ɛbɛlabɔlɛ nu edwɛkɛ dahuu a. Toby nyianle ɛvolɛ 12 la, ɔvale ɔyɛle ye bodane kɛ ɔbagenga Baebolo ne amuala kolaa na bɛazɔne ye. Maxim nyianle ɛvolɛ 11 yɛɛ ɔ diema raalɛ Noemi nyianle ɛvolɛ 10 la yɛɛ bɛzɔnenle bɛ a. Bɛvale Bɛtɛle ɛzonlenlɛ bɛziele bɛ nye zo na bɛbɔle mɔdenle kɛ bɛbadwu nwo. Amaa bɛ rɛle anvi bɛ bodane ne la, bɛvale Bɛtɛle ademizalɛ kɛlata bɛbetanle bɛ sua ne anu bane ne anwo. Kɛmɔti a ɛnzuzu bodane mɔɔ hyia wɔ kpalɛ la anwo na ɛmbɔ ɔ bo kɛ ɛbapele wɔadwu nwo ɛ?​—Kenga Felepaema 1:10, 11.

7, 8. (a) Kɛzi bodane mɔɔ yɛfa yɛsie yɛ nye zo la ɛmmaa ɔnyɛ se kɛ yɛbazi kpɔkɛ ɛ? (b) Duzu ati a kakula bie kpale kɛ ɔnrɛhɔ yunivɛsiti ɛ?

⁷ Debie mɔɔ tɔ zo nsa mɔɔ ɔti yɛfa sunsum nu bodane yɛsie yɛ nye zo wɔ yɛ ngakula nu la fale kpɔkɛzilɛ nwo. Ngakula ɛlɛnyi a ɔwɔ kɛ bɛsi nwomazukoalɛ, gyima nee ninyɛne gyɛne nwo kpɔkɛ. Kpɔkɛzilɛ le kɛ adenle kpalɛ mɔɔ ɛbakpa wɔ mekɛ mɔɔ wɔdwu nwɔnda bie azo la. Saa ɛze ɛleka mɔɔ ɛlɛkɔ la a, ɔnyɛ se kɛ ɛbakpa adenle mɔɔ ɛbalua zo la. Zɔhane ala a, saa ɛze wɔ bodane ne mɔ a, ɔnyɛ se kɛ ɛbazi kpɔkɛ kpalɛ a. Mrɛlɛbulɛ 21:5 ka kɛ: “Sonla mɔɔ anye bolo ye gyima nwo la adwenle ngyehyɛlɛ maa ɔnyia aleɛ dɔɔnwo.” Saa ɛyɛ ngyehyɛleɛ ɛfa bodane kpalɛ ɛsie ɛ nye zo ndɛndɛ a, ɔnrɛhyɛ ɔbawie wɔ boɛ. Ɛhye a Damaris yɛle wɔ mekɛ mɔɔ ɛnee ɔwɔ kɛ ɔsi kpɔkɛ mɔɔ anwo hyia kpalɛ wɔ ye ngakula nu la.

⁸ Mɔɔ Damaris wiele mɔlebɛbo sukulu la, ɔbɔle mɔdenle kpalɛ wɔ ye sɔnea ne anu. Anrɛɛ ɔbahola yeanyia nwolɛ adenle yeahɔzukoa mɛla wɔ yunivɛsiti mɔɔ ɔndua ɛhwee,  noko ɔkpale kɛ ɔbayɛ gyima wɔ bange. Duzu ati ɔ? Ɔka kɛ: “Me ngakula nu yɛɛ menzile kpɔkɛ kɛ mebayɛ adekpakyelɛ a. Ɛhye kile kɛ ɔwɔ kɛ mefa mekɛ foa meyɛ gyima. Saa menzukoale mɛla wɔ yunivɛsiti a, anrɛɛ mebahola meanyia ezukoa dɔɔnwo, noko anrɛɛ ɔbayɛ se kɛ mebanyia gyima mɔɔ bɛfa mekɛ foa bɛyɛ la.” Damaris ɛyɛ adekpakyelɛ gyima ne ɛvolɛ 20. Asoo ɔte nganeɛ kɛ ɔvale bodane kpalɛ ɔziele ɔ nye zo na ɔzile kpɔkɛ kpalɛ kɛ kakula la ɔ? “Wɔ bange ɛkɛ ne, menyia adenle me nee lɔyama di adwelie. Bɛyɛ gyima mɔɔ saa menzukoale mɛla a, anrɛɛ mebayɛ la bie. Noko, bɛ nuhua dɔɔnwo anye ɛnlie bɛ gyima nwo. Kpɔkɛ mɔɔ menzile kɛ mebayɛ adekpakyelɛ la ɛboa me ɛmaa meli nwonane afoa nu gyima nwo adwenleadwenle zo, na yemaa menyia anyelielɛ dɔɔnwo wɔ Gyihova ɛzonlenlɛ nu.”

9. Duzu ati a yɛ ngakula ne mɔ fɛta nganvolɛ ɛ?

⁹ Ngakula mɔɔ wɔ asafo mɔɔ wɔ ewiade amuala anu la anu dɔɔnwo fɛta nganvolɛ. Bɛtu bɛ nwo bɛmaa Gyihova na bɛfa bɛ adwenle bɛsie sunsum nu bodane zo. Ngakula zɛhae mɔ anye die kpalɛ yɛɛ mekɛ ko ne ala, bɛsukoa kɛ bɛbali Gyihova adehilelɛ zo kɛ mɔɔ bɛbahola biala la wɔ bɛ ɛbɛlabɔlɛ kɔsɔɔti anu. Nwomazukoalɛ, gyima nee abusua asetɛnla boka nwo. Sɔlɔmɔn hanle kɛ: “Yeye wɔ ahonle nu fa ɛ rɛle wula [Gyihova] anu, mmafa wɔ adwenle ɛsɔ ɛ ngome wɔ nrɛlɛbɛ. Nwu Nyamenle wɔ wɔ ɛbɛlabɔlɛ muala anu, na ɔbamaa wɔ ndenle adenrɛ fɔɔnwo amaa wɔ.” (Mrɛ. 3:5, 6) Ngakula, Gyihova kulo bɛ kpalɛ! Bɛsonle bolɛ bɛmaa ye, na ɔbabɔ bɛ nwo bane, yeahile bɛ adenle na yeayila bɛ.

10. (a) Duzu ati a ɔwɔ kɛ yɛmaa daselɛlilɛ boka ninyɛne mɔɔ hyia yɛ kpalɛ la anwo ɛ? (b) Kɛ ɔkɛyɛ na yɛali daselɛ kpalɛ ɛ?

¹⁰ Saa kakula fa yɛ ye bodane kɛ ɔyɛ Gyihova ɛhulolɛdeɛ wɔ ye ɛbɛlabɔlɛ nu a, ɔmaa ɛzonlenlɛ gyima ne kyia ye kpalɛ. Gyisɛse Kelaese zile zolɛ kɛ, “ɔwɔ kɛ bɛdimoa bɛbɔ edwɛkpa ne nolo.” (Maake 13:10) Kɛmɔ edwɛkɛhanlɛ gyima ne anwo hyia ndɛndɛ la ati, ɔwɔ kɛ yɛmaa ɔboka ninyɛne mɔɔ hyia yɛ kpalɛ la anwo. Ɛbahola wɔava wɔazie ɛ nye zo kɛ ɛbada wɔahɔ daselɛlilɛ ɔ? Ɛbahola wɔayɛ adekpakyelɛ ɔ? Na saa ɛ nye ɛnlie daselɛlilɛ nwo kpalɛ noko ɛ? Kɛzi ɛbahola wɔali daselɛ kpalɛ ɛ? Ninyɛne nwiɔ baboa wɔ: Siezie ɛ nwo kpalɛ, mmatwenlehwenle ɛ bo aze kɛ ɛbaha mɔɔ ɛze ye la anwo edwɛkɛ wɔahile awie mɔ. Saa ɛlɛka edwɛkɛ ne a, kɛzi ɛ nye balie la, bie a ɔbazi ɛ nwo.

11, 12. (a) Duzu a ngakula bahola ayɛ aziezie bɛ nwo ali daselɛ a? (b) Kɛzi kakula ko nyianle adenle lile daselɛ wɔ sukulu ɛ?

¹¹ Ɛbahola wɔabɔ ɔ bo wɔakpondɛ kpuya le kɛ “Duzu ati a ɛdie Nyamenle ɛdi a?” mɔɔ ɛ gɔnwo mɔ sukuluma ta biza la anwo mualɛ. Edwɛkɛ dɔɔnwo wɔ yɛ wɛbsaete, jw.org ne azo mɔɔ baboa ngakula yeamaa bɛabua kpuya zɔhane la. Nea BAEBOLO NGILEHILELƐ > MGBAVOLƐ NEE MBƐLƐRA abo. Ɛbanwu gyimayɛlɛ kɛlata bie mɔɔ ɔ ti ne se “Duzu Ati A Medie Nyamenle Medi A?” wɔ ɛkɛ. Gyimayɛlɛ kɛlata ne baboa wɔ yeamaa wɔaziezie wɔ mualɛ ne. Ɔbamaa wɔ ngɛlɛlera nsa mɔɔ ɛbava wɔahilehile wɔ diedi ne anu la: Hibuluma 3:4, Wulomuma 1:20 nee Edwɛndolɛ 139:14. Gyimayɛlɛ kɛlata ɛhye mɔ baboa wɔ yeamaa wɔabua kpuya ko biala.​—Kenga 1 Pita 3:15.

¹² Saa ɛnyia adenle a, maa wɔ sukuluma ne anwosesebɛ kɛ bɛnlea jw.org ne azo. Ɛhye a Luca yɛle a. Ɛnee ye sukuluma ne mɔ ɛlɛsuzu ɛzonlenlɛ ngakyile nwo, na Luca nwunle kɛ Gyihova Alasevolɛ anwo edwɛkɛ mɔɔ wɔ buluku ne anu la bie mɔ ɛnle nɔhalɛ. Luca hwehwenle ɔ bo aze ɛdeɛ, noko ɔzɛlɛle kilehilevolɛ ne kɛ ɔmaa ɔhilehile  edwɛkɛ ne anu kpalɛ, na ɔliele ɔdole nu. Luca hilehilele ye diedi ne anu, eza ɔvale yɛ wɛbsaete ne ɔhilele sukuluma ne amuala. Kilehilevolɛ ne maanle sukoavo ko biala sua nu gyimalilɛ kɛ ɔhɔnlea nvoninli mɔɔ bɛdolɔ la vidio mɔɔ ati se, Di Nzisi Sonla Nwo Zo Konim la. Luca anye liele kɛ ɔholale ɔlile daselɛ kpalɛ la.

13. Saa yɛyia ngyegyelɛ a, duzu ati a ɔnle kɛ yɛmaa yɛ sa nu to a?

¹³ Saa ɔdwu mekɛ ne bie na adenle ne mɔɔ ɛlua zo la azo le ahuma a, mmamaa wɔ ahonle tu. (2 Tim. 4:2) Saa ɛyia ngyegyelɛ a, mmamaa ɛ rɛle fi wɔ bodane ne. Mɔɔ Katharina nyianle ɛvolɛ 17 la, ɔvale ɔyɛle ye bodane kɛ ɔbali ɔ gɔnwo mɔ gyimayɛvoma ko biala daselɛ. Bɛ nuhua ko bɔle ye aholoba fane dɔɔnwo, noko yeanzulo. Subane kpalɛ mɔɔ ɔlale ye ali wɔ ngyegyelɛ mekɛ nu la maanle gyimayɛvo gyɛne mɔɔ bɛfɛlɛ ye Hans la anye liele kpole. Ɔti ɔgengale yɛ mbuluku ne mɔ, ɔzukoale Baebolo ne na bɛzɔnenle ye. Katharina vile ɛkɛ mɔɔ ɛnee ɔnze ɛhye mɔ biala anwo ɛhwee. Nea kɛzi ɔ nye liele wɔ ɛvolɛ 13 anzi wɔ mekɛ mɔɔ ɛnee ɔ nee ye abusua ne wɔ debiezukoalɛ bo na bɛbɔle Hans duma kɛ ɔdaye a ɔbamaa bagua nu ɛdendɛlɛ ne la! Ɔle kpalɛ kɛ Katharina ammaa ɔ sa nu ando kɛ ɔbali ɔ gɔnwo mɔ gyimayɛvoma daselɛ la!

14, 15. (a) Saa ngakula ɛlɛyia ngyegyelɛ a, duzu a ɔwɔ kɛ bɛkakye a? (b) Kɛzi ngakula bahola agyinla atipɛnema ngyegyelɛ nloa ɛ?

¹⁴ Kɛkala, edwɛkɛ ɛhye ɛmaa wɔ anwosesebɛ kɛ ɛzi kpɔkɛ kɛ ɛbava Gyihova ɛhulolɛdeɛyɛlɛ wɔalimoa wɔ ɛbɛlabɔlɛ nu. Ɛhye kile kɛ ɛbava sunsum nu bodane wɔazie ɛ nye zo wɔ wɔ ɛbɛlabɔlɛ nu. Noko, bie a ngakula dɔɔnwo mɔɔ bɛ nee wɔ sɛ atipɛne la kulo anyelielɛ ninyɛne, na bie a bɛbavɛlɛ wɔ kɛ ɛraboka bɛ nwo. Nzinlii, ɔbahyia kɛ ɛmaa awie mɔ nwu kɛ wɔ bodane ne mɔ mɔɔ ɛdwu nwolɛ la hyia wɔ kpalɛ. Mmamaa ɛ tipɛnema maa ɛ rɛle fi wɔ bodane ne. Saa ɛnea kale nwo ndonwo ne bieko a, asoo anrɛɛ ɛbavo kale biala ɔluakɛ menli mɔɔ de nu la ɛlɛdie bɛ nye la ati ɔ?

¹⁵ Ndenle dɔɔnwo wɔ ɛkɛ mɔɔ ɛbahola  wɔalua zo wɔakpo atipɛnema ngyegyelɛ a. Kɛ neazo la, koati tɛnlabelɛ mɔɔ ɔbazɔ wɔ diedi yeanlea la. (Mrɛ. 22:3) Na kakye ngyegyelɛ mɔɔ saa ɛ nee awie mɔ bɔ ɛbɛlatane a ɔbava yeara ɛ nwo zo la. (Gal. 6:7) Debie bieko mɔɔ baboa la a le kɛ, ɛbalie wɔado nu kɛ ɛhyia folɛdulɛ. Mɛlɛbɛnwoaze bamaa wɔalie wɔ awovolɛ nee mediema mɔɔ bɛnyi wɔ sunsum nu wɔ asafo ne anu la nzuzulɛ wɔado nu.​—Kenga 1 Pita 5:5, 6.

16. Ka anwubielɛ mɔɔ kile nvasoɛ mɔɔ wɔ mɛlɛbɛnwoaze zo la.

¹⁶ Christoph bɛlɛle ɔ nwo aze liele folɛdulɛ kpalɛ dole nu. Mɔɔ bɛzɔnenle ye la anzi, yeangyɛ ɔbɔle ɔ bo kɛ ɔkpundikpundi ye agbɔkɛ nu dahuu wɔ nwɔhoalilɛ ɛleka bie. Ngakula gyɛne mɔɔ wɔ ɛkɛ la zele ye kɛ ɔraboka bɛ nwɔhoalilɛ eku ne anwo. Ɔhanle ɔhilele kpanyinli bie, na kpanyinli ne hanle hilele ye kɛ ɔzuzu kɛzi ɛzulɛ sunsum ne bahola anyia ɔ nwo zo tumi la anwo kolaa na yeazi kpɔkɛ. Christoph hɔbokale eku ne anwo. Noko, nzinlii ɔnwunle kɛ bɛyɛ basabasa na bɔbɔ esiane wɔ nu. Eza ɔ nee mgbanyima dɔɔnwo dendɛle, na bɛ muala bɛgyinlanle Ngɛlɛlera ne azo bɛdule ye folɛ. “Gyihova maanle me folɛtuvolɛma mgbalɛ dɔɔnwo, na mendiele Ye ɔnva nwo kɛ ɔliele mekɛ ekyi la.” Ɛbɛlɛ ɔ nwo aze ɛdie folɛdulɛ kpalɛ ɛto nu ɔ?

17, 18. (a) Duzu a Gyihova kulo kɛ ngakula yɛ ye ɛnɛ a? (b) Kɛ ɔkɛyɛ na wɔannu ɛ nwo wɔ wɔ kpɔkɛzilɛ nwo wɔ mekɛ mɔɔ ɛkɛyɛ kpanyinli la ɛ? Maa neazo.

¹⁷ “Mgbavolɛ nee mbɛlɛra, bɛlie bɛ nye wɔ bɛ ngakula nu. Bɛli fɛlɛko wɔ mekɛ mɔɔ bɛtɛde mgbavolɛ nee mbɛlɛra la.” (Nol. 11:9) Gyihova kulo kɛ ɛ nye die kpalɛ wɔ mekɛ mɔɔ ɛle kakula la. Edwɛkɛ ɛhye ɛhile adenle ko mɔɔ ɛbalua zo wɔayɛ ɛhye la. Fa sunsum nu bodane sie ɛ nye zo na fa Gyihova folɛdulɛ di gyima wɔ wɔ ngyehyɛleɛ nu. Saa ɛyɛ ɛhye ndɛ a, ɔnrɛhyɛ ɛbanwu kɛ Gyihova ɛlɛkile wɔ adenle, ɔlɛbɔ ɛ nwo bane yɛɛ ɔlɛyila wɔ. Dwenle folɛdulɛ mgbalɛ mɔɔ wɔ Nyamenle Edwɛkɛ ne anu la anwo, na kakye folɛdulɛ ɛhye: “Mekɛ mɔɔ bɛle mgbavolɛ nee mbɛlɛra la, bɛhakye bɛ Bɔvolɛ ne.”​—Nol. 12:1.

¹⁸ Awie biala ɛnyɛ kakula dahuu. Ngakula ɛngyɛ na bɛayɛ mgbanyinli. Ɔyɛ alɔbɔlɛ kɛ menli dɔɔnwo nu bɛ nwo nzinlii kɛ bɛanva bodane kpalɛ bɛanzie bɛ nye zo anzɛɛ bɛanva bie fee bɛanzie bɛ nye zo wɔ bɛ ngakula nu la. Noko, ngakula mɔɔ bɛfa sunsum nu bodane bɛsie bɛ nye zo na bɛdwu nwo la akunlu badwo bɛ nwo kpalɛ wɔ mekɛ mɔɔ bɛyɛ mgbanyinli la. Kɛ Mirjana te nganeɛ la ɛne. Mɔɔ ɔle kakula la, ɛnee ɔze nriandi kpalɛ. Bɛzele ye kɛ ɔva ɔ nwo ɔwula ɛyɛlɛ mekɛ nu Olympic nwɔhoalilɛ ne anu, noko ɔkpale kɛ ɔbayɛ dahuu ɛzonlenlɛ gyima ne. Wɔ ɛvolɛ 30 anzi, Mirjana nee ɔ hu tɛyɛ dahuu ɛzonlenlɛ gyima ne. Ɔkilehile nu kɛ: “Dumalielɛ, nidi, tumi nee anwonyia le ɛbɛlabɔlɛ nu bodane mɔɔ ɛngyɛ na apɛ nu. Bodane mɔɔ enililɛ wɔ nu dahuu la a le kɛ ɛbazonle Nyamenle na wɔabɔ mɔdenle kɛ ɛbahilehile awie mɔ Nyamenle anwo debie.”

19. Kɛmɔti a ɔle kpalɛ kɛ yɛbava sunsum nu bodane yɛazie yɛ nye zo wɔ yɛ ngakula nu ɛ?

¹⁹ Nɔhalɛ nu, ɔwɔ kɛ yɛkanvo asafo ne anu ngakula wɔ kɛzi bɛgyinla ngyegyelɛ nloa na bɛfa bɛ adwenle bɛsie Gyihova ɛzonlenlɛ zo la kpalɛ. Bɛfa sunsum nu bodane bɛsie bɛ nye zo, yɛɛ bɛbu edwɛkɛhanlɛ gyima ne kɛ debie mɔɔ anwo hyia kpalɛ wɔ bɛ ɛbɛlabɔlɛ nu. Bieko, bɛmmaa ewiade ne ɛmmaa bɛ rɛle ɛnvi bɛ bodane ne. Ngakula mɔɔ ɛlɛnyi la bahola anyia anwodozo kɛ bɛ gyima ɛsesebɛ ne ɛnrɛyɛ gyɛne. Bɛ mediema mrenyia nee mraalɛ mɔɔ kulo bɛ la gyi bɛ nzi, na saa bɛtu bɛ nwo kɔsɔɔti bɛmaa Gyihova a, bɛ ɛbɛlabɔlɛ bawie bɛ boɛ.