Duzu ati a kolaa na Gyisɛse awu la ɔhanle Devidi edwɛkɛ mɔɔ wɔ Edwɛne 22:1 la bie a?

Edwɛkɛ mɔɔ Gyisɛse hanle kolaa na yeawu la bie a wɔ Mateyu 27:46 la. Ɔse: “Me Nyamenle, me Nyamenle, duzu ati a wɔkpo me a?” Mɔɔ Gyisɛse hanle ɛhye la, ɔmaanle edwɛndolɛnli Devidi edwɛkɛ mɔɔ wɔ Edwɛne 22:1 la rale nu. (Maake 15:34) Saa yɛnyia adwenle kɛ edwɛkɛ ɛhye mɔɔ Gyisɛse hanle la kile kɛ ɛnee ɔ sa nu ɛdo anzɛɛ ye diedi ɛlɛka aze a, ɛnee yɛvo. Ɛnee Gyisɛse te deɛmɔti ɔhyia kɛ ɔwu la abo bɔkɔɔ na ɛnee ɔlɛ ɛhulolɛ kɛ ɔbayɛ zɔ. (Mat. 16:21; 20:28) Ɛnee eza ɔze kɛ wɔ ye ewule nu, ɔwɔ kɛ Gyihova ye “bane” biala mɔɔ yelie wɔ ɔ nwo la. (Dwobu 1:10, ɔbdw.) Gyihova maanle Gyisɛse nyianle adenle lale ye ali bɔkɔɔ kɛ ɔbahɔ zo yeali nɔhalɛ ɔnva nwo kɛzi ɔbawu la.—Maake 14:35, 36.

Ɛnee duzu ati a Gyisɛse hanle edwɛkɛ ɛhye a? Ɔwɔ nuhua kɛ yɛnrɛhola yɛnrɛzi ye pi ɛdeɛ, noko maa yɛzuzu deɛmɔti ɔbahola yeara ye kɛ ɔhanle ye zɔ la bie mɔ anwo. *

Mɔɔ Gyisɛse hanle edwɛkɛ ɛhye la, bie a ɛnee ɔlɛsi so kɛ Gyihova ɛnrɛzi ye ewule ne adenle. Ɛnee ɔwɔ kɛ Gyisɛse tua ɛkpɔnedeɛ ne mɔɔ Gyihova ɛmboa ye a. Ɛnee Gyisɛse le sonla bɔkɔɔ na ɛnee ɔhyia kɛ ɔwu amaa “yeazɔ ewule yeanlea yeamaa menli kɔsɔɔti.”—Hib. 2:9.

 Mɔɔ Gyisɛse hanle edwɛkɛ ɛhye la, bie a ɛnee ɔlɛtwe adwenle yeahɔ edwɛne zɔhane amuala azo. Ɛnee Dwuuma ta kye edwɛne ne mɔ dɔɔnwo gua bɛ ti anu wɔ zɔhane mekɛ ne. Saa bɛte edwɛne bie ngyɛnu ko a, ɔmaa bɛkakye edwɛne zɔhane amuala. Saa ɛnee ɛhye a wɔ Gyisɛse adwenle nu a, ɛnee ɔboale Dwuuma mɔɔ le ye ɛdoavolɛma la ɔmaanle bɛhakyele ngapezo dɔɔnwo mɔɔ fale ye ewule ne anwo mɔɔ wɔ edwɛne ɛhye anu la. (Edw. 22:7, 8, 15, 16, 18, 24) Eza ngyehyɛnu mɔɔ wɔ edwɛne zɔhane awieleɛ la ye Gyihova ayɛlɛ na ɔda ye ali kɛ ɔle azɛlɛ ye azo amuala belemgbunli.—Edw. 22:27-31.

Mɔɔ Gyisɛse hanle edwɛkɛ ɛhye la, bie a ɛnee ɔlɛkile kɛ ɔnli fɔlɛ. Kolaa na bɛahu Gyisɛse la, bɛanlua mɛla adenle zo bɛanli ye edwɛkɛ yɛɛ bɛbuale ye fɔlɛ kɛ yeha munzule edwɛkɛ. (Mat. 26:65, 66) Sanhedelin ne yiale nu ndɛndɛ wɔ nɔɔzo lile edwɛkɛ ne na bɛanlua mɛla adenle zo. (Mat. 26:59; Maake 14:56-59) Mɔɔ Gyisɛse bizale kɛ, “Me Nyamenle, me Nyamenle, duzu ati a wɔkpo me a?” la, bie a ɛnee ɔlɛkile kɛ ɔtɛyɛle ɛtane biala mɔɔ ɔwɔ kɛ bɛku ye a.

Bie a ɛnee eza Gyisɛse ɛlɛkakye awie mɔ kɛ, Devidi mɔɔ hɛlɛle edwɛne ɛhye la nwunle amaneɛ ɛdeɛ noko yemɔ ɛngile kɛ ɛnee Gyihova ɛnlie ye ɛndo nu bieko. Ɛnee Devidi kpuya ne ɛngile kɛ ɔnlɛ diedi. Mɔɔ ɔbizale kpuya zɔhane ɔwiele la, ɔlale ye ali kɛ ɔlɛ anwodozo kɛ Gyihova balie ye menli ne na Gyihova hɔle zo yilale ye. (Edw. 22:23, 24, 27) Zɔhane ala a ɛnee Gyisɛse, “Devidi Ara ne,” ɛlɛnwu amaneɛ wɔ baka ne azo a, noko ɛnee ɔngile kɛ Gyihova ɛnlie ye ɛndo nu bieko.—Mat. 21:9.

Bie a ɛnee Gyisɛse ɛlɛda ye ali kɛ ɔlɛdi nyane kɛ ɔwɔ kɛ Gyihova gyakyi kɛ Ɔbabɔ ɔ nwo bane amaa yeahola yeahile kɛ ɔdi nɔhalɛ bɔkɔɔ la. Ɛnee ɔnle Gyihova bodane kɛ ɔbamaa ɔ Ra ne anwu amaneɛ na yeawu. Mekɛ mɔɔ Adam nee Yive dele atua la yɛɛ ɔyɛle ye zɔ a. Gyisɛse anyɛ ɛtane biala, noko ɛnee ɔhyia kɛ ɔnwu amaneɛ na ɔwu amaa yeabua Seetan ɛzonledolɛ ne na yeadua ɛkpɔnedeɛ ne amaa yealie alesama. (Maake 8:31; 1 Pita 2:21-24) Amaa Gyisɛse ahola ayɛ azɔ la, ɛnee ɔwɔ kɛ Gyihova gyakyi kɛ ɔbabɔ ɔ nwo bane wɔ mekɛ ekyi bie anu, na ɛhye a le mekɛ mɔɔ limoa mɔɔ Gyihova yɛle zɔ a.

Bie a ɛnee Gyisɛse ɛlɛbɔ mɔdenle kɛ ɔboa ye ɛdoavolɛma yeamaa bɛava bɛ adwenle bɛazie deɛmɔti Gyihova maanle ɔwule wɔ adenle zɛhae azo la azo. * Ɛnee Gyisɛse ze kɛ saa ɔwu kɛ ɛtanevolɛ wɔ baka ne azo a, ɔbayɛ azedolɛ bolɛ yeamaa menli dɔɔnwo. (1 Kɔl. 1:23) Saa ye ɛdoavolɛma fa bɛ adwenle sie deɛmɔti ɔwule la azo a, bɛbade deɛmɔti ɔhyia kpalɛ la abo. (Gal. 3:13, 14) Ɔbamaa bɛanwu kɛ ɔle ngoanedievolɛ na ɔnle ɛtanevolɛ.

Ɔnva nwo adwenle biala mɔɔ ɛnee Gyisɛse lɛ mɔɔ ɔti ɔhanle zɔhane edwɛkɛ ne la, ɛnee ɔze kɛ ye ewule ne le Gyihova ɛhulolɛdeɛ. Gyisɛse bizale kpuya zɔhane la, yeangyɛ biala ɔhanle kɛ: “Yewie!” (Dwɔn 19:30; Luku 22:37) Nɔhalɛ nu, kɛmɔ Gyihova ambɔ Gyisɛse anwo bane wɔ mekɛ ekyi anu la ati, ɔmaanle ɔholale ɔyɛle debie biala mɔɔ ɔti ɔrale azɛlɛ ye azo la. Eza ɔmaanle “ninyɛne mɔɔ bɛhɛlɛ ye wɔ Mosisi Mɛla ne nee Ngapezoma ne yɛɛ Edwɛne ne anu” la kɔsɔɔti mɔɔ fale ɔ nwo la rale nu.—Luku 24:44.