EDWƐKƐ 16
“Ɛ Diema Ne Badwazo”!
“Gyisɛse zele [Maata] kɛ: ‘Ɛ diema ne badwazo.’”—DWƆN 11:23.
EDWƐNE 151 Ɔbavɛlɛ
MƆƆ YƐBAZUKOA a
1. Kɛzi kakula nrenyia bie hilele kɛ ɔlɛ ewudwazo ne anu anyelazo ɛ?
KAKULA nrenyia bie mɔɔ bɛfɛlɛ ye Matthew la anwo dole ye kpole bie na ɛnee ɔwɔ kɛ bɛyɛ ye apelehyɛne ngakyile. Mɔɔ ɔlile ɛvolɛ nsuu la, ɛnee ɔ nee ye abusua ne ɛlɛnea JW Broadcasting® siane gyimalilɛ bie. Mɔɔ gyimalilɛ ne ɛlɛkɔ ye awieleɛ la, bɛnwunle kɛ menli ɛlɛyɛ bɛ alɔvolɛ mɔɔ bɛdwazo bɛ la atuu wɔ edwɛne gyɛne ne anu. b Mɔɔ bɛnleanle bɛwiele la, Matthew zɔle ye mame nee ye papa asa na ɔhanle kɛ: “Bɛnwu ye ɔ? Saa mewu bɔbɔ a, mebadwazo wɔ ewudwazo ne anu. Bɛbahola bɛahendɛ me; ɔbayɛ boɛ.” Mɔɔ awovolɛ ne mɔ nwunle diedi mɔɔ bɛ ra ne lɛ wɔ ewudwazo ne anu la, nea kɛzi bɛ nye balie a.
2-3. Duzu ati a ɔle kpalɛ kɛ yɛbadwenledwenle ewudwazo ne anwo a?
2 Ɔyɛ a ɔle kpalɛ kɛ yɛbadwenledwenle ewudwazo nwo ɛwɔkɛ mɔɔ wɔ Baebolo ne anu la anwo. (Dwɔn 5:28, 29) Duzu ati ɔ? Ɔluakɛ yɛnze kenle mɔɔ yɛ nwo bahola ado yɛ kpole anzɛɛ yɛ kulovolɛ bie bawu a. (Nol. 9:11; Gye. 4:13, 14) Ewudwazo nwo anyelazo ne bahola aboa yɛ yeamaa yɛagyinla ngyegyelɛ ɛhye mɔ anloa. (1 Tɛs. 4:13) Ngɛlɛlera ne maa yɛnyia anwodozo kɛ yɛ anwuma Selɛ ne ze yɛ kpalɛ yɛɛ ɔkulo yɛ. (Luku 12:7) Ɔwɔ kɛ Gyihova Nyamenle nwu yɛ kpalɛ amaa yeava subane mɔɔ yɛlɛ nee ninyɛne mɔɔ wɔ yɛ adwenle nu la yeadwazo yɛ bieko. Gyihova kulo yɛ kpalɛ, na yemaa yɛnyia nwolɛ adenle kɛ yɛbadɛnla aze dahuu, saa yɛwu bɔbɔ na ɔhyia kɛ ɔdwazo yɛ a, ɔbayɛ ye zɔ!
3 Wɔ edwɛkɛ ɛhye anu, yɛbalimoa yɛazuzu deɛmɔti yɛbahola yɛalie ewudwazo nwo ɛwɔkɛ ne yɛali la anwo. Eza yɛbazuzu Baebolo nu edwɛkɛ bie mɔɔ maa diedi nu mia mɔɔ yɛ edwɛkɛtile tɛkese ne, “Ɛ diema ne badwazo,” wɔ nu la anwo. (Dwɔn 11:23) Akee yɛbanwu kɛzi yɛbalie ewudwazo nwo anyelazo ne yɛali kpalɛ la.
DEƐMƆTI YƐBAHOLA YƐALIE EWUDWAZO NWO ƐWƆKƐ NE YƐALI LA
4. Amaa yɛalie ɛwɔkɛ bie yɛali la, duzu a ɔwɔ kɛ yɛnwu ye a? Maa neazo.
4 Amaa yɛalie ɛwɔkɛ bie yɛali la, ɔwɔ kɛ yɛnwu kɛ ahenle mɔɔ bɔle ɛwɔkɛ ne la lɛ ɛhulolɛ ne yɛɛ ɔlɛ tumi anzɛɛ debie mɔɔ ɔbava yeali nwolɛ gyima la. Kɛ neazo la, fa ye kɛ ahumu ɛzɛkye wɔ sua bɔkɔɔ. Ɛ gɔnwo bie rale wɔ ɛkɛ na ɔbɔle wɔ ɛwɔkɛ kɛ, ‘Mebaboa wɔ meamaa wɔazi wɔ sua ne bieko.’ Ɔlɛka nɔhalɛ, yɛɛ ɛze kɛ ɔlɛ ɛhulolɛ kɛ ɔboa wɔ. Saa ɔsi sua yɛɛ ɔlɛ ninyɛne mɔɔ bɛfa bɛsi sua a, ɛnee ɛze kɛ eza ɔbahola gyima ne yɛ. Ɔti ɛbalie ɛwɔkɛ mɔɔ ɔbɔle wɔ la wɔali. Na ewudwazo nwo ɛwɔkɛ mɔɔ Nyamenle ɛbɔ la noko ɛ? Asoo ɔlɛ ɛhulolɛ ne nee tumi mɔɔ ɔbava yeali nwolɛ gyima ɔ?
5-6. Duzu ati a yɛdie yɛdi kɛ Gyihova lɛ ɛhulolɛ kɛ ɔbadwazo mowuamra a?
5 Asoo Gyihova lɛ ɛhulolɛ kɛ ɔbadwazo mowuamra ɔ? Ɛhɛe. Ɔvale ye sunsum ne ɔhanle Baebolo kɛlɛvolɛma ɔmaanle bɛhɛlɛle kenle bie ewudwazo nwo ɛwɔkɛ mɔɔ yebɔ la bɛdole ɛkɛ. (Aye. 26:19; Hozia 13:14; Yek. 20:11-13) Saa Gyihova bɔ ɛwɔkɛ a, dahuu ɔdi zo. (Dwɔh. 23:14) Nɔhalɛ nu, Gyihova lɛ ɛhulolɛ kpole kɛ ɔbadwazo mowuamra. Duzu ati a yɛkola yɛka ye zɔ a?
6 Suzu edwɛkɛ mɔɔ Dwobu hanle la anwo. Ɛnee ɔze kɛ saa ɔwu bɔbɔ a, Gyihova anwo balɔ ye kɛ ɔbanwu ye kɛ ɔde ngoane nu bieko. (Dwobu 14:14, 15) Zɔhane ala a Gyihova te nganeɛ wɔ ye azonvolɛ mɔɔ ɛwu la kɔsɔɔti anwo a. Ɔlɛ ɛhulolɛ kpole kɛ ɔbadwazo bɛ yeara ngoane nu mɔɔ bɛte kpɔkɛ na bɛ nye die a. Na menli mgbe mgbe dɔɔnwo mɔɔ bɛannyia nwolɛ adenle ne bɛanzukoa Gyihova anwo debie na bɛawu la noko ɛ? Yɛ Nyamenle ne mɔɔ lɛ ɛlɔlɛ la kulo kɛ ɔdwazo bɛdabɛ noko. (Gyi. 24:15) Ɔkulo kɛ bɛnyia nwolɛ adenle bɛbayɛ ɔ gɔnwo mɔ na bɛtɛnla aze dahuu. (Dwɔn 3:16) Ɔda ali wienyi kɛ Gyihova lɛ ɛhulolɛ kɛ ɔdwazo mowuamra.
7-8. Duzu ati a yɛbahola yɛalie yɛali kɛ Gyihova lɛ tumi mɔɔ ɔbava yeadwazo mowuamra a?
7 Asoo eza Gyihova lɛ tumi mɔɔ ɔbava yeadwazo mowuamra ɔ? Ɛhɛe! Ɔdaye a ɔle “Tumivolɛ Bedevinli ne” a. (Yek. 1:8) Ɔti ɔlɛ tumi mɔɔ ɔbava yeali kpɔvolɛ biala, bɔbɔ ewule nwo zo konim a. (1 Kɔl. 15:26) Kɛmɔ yɛze ɛhye la ati, ɔmaa yɛ anwosesebɛ na ɔkyekye yɛ rɛle. Suzu Adiema Raalɛ Emma Arnold anwubielɛ ne anwo. Ɔ nee ye abusua ne yiale bɛ diedi ne anwo sɔnea ngakyile wɔ Ewiade Konle II la anu. Amaa Emma akyekye ɔ ra raalɛ ne arɛle wɔ bɛ alɔvolɛ mɔɔ wule wɔ Nazi efiade ɛkɛ ne anwo la, ɔhanle kɛ: “Saa bɛdabɛ mɔɔ bɛwu la ɛnrɛdwazo bieko a, ɔkile kɛ yɛ kpɔvolɛ ewule anwo yɛ se tɛla Nyamenle, ɔnle zɔ ɔ?” Nɔhalɛ nu, debie biala ɛnle ɛkɛ mɔɔ ɔ nwo yɛ se tɛla Gyihova a! Nyamenle tumivolɛ bedevinli ne mɔɔ bɔle ngoane la bahola amaa bɛdabɛ mɔɔ bɛwu la adwazo ara ngoane nu bieko.
8 Debie bieko mɔɔ ɔti yɛdie yɛdi kɛ Nyamenle bahola adwazo mowuamra la a le kɛ ɔ rɛle ɛnvi debie ɛlɛ. Ɔfa ɛwɔlɔra ko biala duma ɔfɛlɛ ye. (Aye. 40:26) Eza ɔkakye bɛdabɛ mɔɔ bɛwu la. (Dwobu 14:13; Luku 20:37, 38) Ɔbahola yeahakye bɛdabɛ mɔɔ ɔbadwazo bɛ la anwo edwɛkɛ biala ndɛndɛ; bie a le kɛzi bɛde nee bɛ subane, anwubielɛ mɔɔ bɛnyia wɔ ɛbɛlabɔlɛ nu nee ninyɛne mɔɔ wɔ bɛ adwenle nu la.
9. Duzu ati a ɛdie kenle bie ewudwazo nwo ɛwɔkɛ mɔɔ Gyihova ɛbɔ la ɛdi a?
9 Nɔhalɛ nu, yɛbahola yɛalie kenle bie ewudwazo nwo ɛwɔkɛ mɔɔ Gyihova ɛbɔ la yɛali ɔluakɛ yɛze kɛ ɔlɛ ɛhulolɛ nee tumi ne mɔɔ ɔbava yeayɛ la. Nea debie bieko mɔɔ ɔti yɛdie Nyamenle ewudwazo nwo ɛwɔkɛ ne yɛdi la: Gyihova ɛyɛ bie ɛlɛ. Wɔ tete ne, Gyihova maanle mrenyia nɔhavoma bie mɔɔ ko a le Gyisɛse la tumi ɔmaanle bɛdwazole menli mɔɔ ɛwu la. Maa yɛzuzu menli ɛhye mɔ mɔɔ Gyisɛse dwazole bɛ la anu ko mɔɔ bɛha nwolɛ edwɛkɛ wɔ Dwɔn tile 11 la anwo.
GYISƐSE AGƆNWO KPALƐ BIE WULE
10. Duzu a zile wɔ mekɛ mɔɔ Gyisɛse ɛlɛka edwɛkɛ ne wɔ Bɛtani mɔɔ wɔ Dwɔdan ne anzi nehane la ɛ, na duzu a ɔyɛle a? (Dwɔn 11:1-3)
10 Kenga Dwɔn 11:1-3. Pɛ mɔɔ hɔle zo wɔ Bɛtani wɔ mekɛ mɔɔ 32 Y.M. ɛlɛkɔ ye awieleɛ la anwo nvoninli. Ɛnee Lazalɛse nee ɔ mediema mraalɛ nwiɔ, Mɛle nee Maata, mɔɔ bɛle Gyisɛse agɔnwo mɔ kpalɛ la de sua ɛhye azo. (Luku 10:38-42) Noko Lazalɛse anwo dole ye, na ɔgyegyele ɔ mediema mraalɛ ne mɔ kpalɛ. Bɛdole Gyisɛse mɔɔ ɛnee ɔwɔ Dwɔdan ne anzi la nrɛlaleɛ; ɔvi Bɛtani mɔɔ kɔ ɛkɛ ne la le kɛyɛ kenle nwiɔ adenle. (Dwɔn 10:40) Mɔɔ yɛ alɔbɔlɛ la a le kɛ, mɔɔ soanvolɛ ne kadwu Gyisɛse anwo ɛkɛ ne la, ɛnee Lazalɛse ɛwu. Ɛnee Gyisɛse ze kɛ ɔ gɔnwo ne ɛwu ɛdeɛ, noko ɔlile kenle nwiɔ bieko wɔ ɛleka mɔɔ ɔwɔ la kolaa na yeadɔ adenle zo yeahɔ Bɛtani. Ɔti Gyisɛse kadwu ɛkɛ ne la ɛnee Lazalɛse ɛwu ɛli kenle nna. Ɛnee Gyisɛse kulo kɛ ɔyɛ debie mɔɔ ɔbaboa ɔ gɔnwo mɔ na yeawula Nyamenle anyunlunyia la.—Dwɔn 11:4, 6, 11, 17.
11. Agɔnwolɛvalɛ nwo debie boni a yɛsukoa yɛfi edwɛkɛ ɛhye anu a?
11 Yɛsukoa agɔnwolɛvalɛ nwo debie wɔ edwɛkɛ ɛhye anu. Wɔmɔ nea o: Mɔɔ Mɛle nee Maata dole Gyisɛse nrɛlaleɛ la, bɛanga bɛangile ye kɛ ɔrɛla Bɛtani. Bɛhanle ye sikalɛ kɛ ɔ gɔnwo kpalɛ ne ɛnde kpɔkɛ. (Dwɔn 11:3) Mɔɔ Lazalɛse wule la, anrɛɛ Gyisɛse bahola adɛnla ɛleka mɔɔ ɔwɔ la na yeadwazo ye. Noko ɔzile kpɔkɛ kɛ ɔbahɔ ɔ gɔnwo mɔ, Maata nee Mɛle anwo ɛkɛ wɔ Bɛtani. Ɛlɛ ɛ gɔnwo bie mɔɔ ɛtɛkanle wɔ edwɛkɛ ɛtɛkile ye bɔbɔ a ɔbaboa wɔ ɔ? Ɔkile kɛ ɛbahola wɔava ɛ nwo wɔado ɔ nwo zo wɔamaa yeaboa wɔ wɔ “anwongyelelɛ mekɛ” nu. (Mrɛ. 17:17) Kɛ mɔɔ Gyisɛse yɛle la, bɛmaa yɛdayɛ noko yɛyɛ agɔnwolɛma zɛhae bie yɛmaa awie mɔ! Akee maa yɛzia yɛhɔ edwɛkɛ ne azo yɛnlea mɔɔ zile bieko la.
12. Duzu ɛwɔkɛ a Gyisɛse bɔle Maata a, na duzu ati a ɔnle ɛwɔkɛ mgbane bie a? (Dwɔn 11:23-26)
12 Kenga Dwɔn 11:23-26. Maata dele kɛ Gyisɛse ɛbikye Bɛtani. Ɔnriandile ɔhɔyiale ye na ɔhanle kɛ: “Awulae, saa ɛwɔ ɛke a anrɛɛ me diema ne anwu.” (Dwɔn 11:21) Ɔle nɔhalɛ, anrɛɛ ɔbahola yeayɛ Lazalɛse ayile. Noko ɛnee Gyisɛse kulo kɛ ɔyɛ debie mɔɔ yɛ nwanwane bɔbɔ la. Ɔbɔle ye ɛwɔkɛ kɛ: “Ɛ diema ne badwazo.” Eza ɔhanle debie mɔɔ Maata bagyinla zo alie ye ɛwɔkɛ ne ali la, ɔse: “Mame a mele ewudwazo ne nee ngoane ne a.” Amgba, Nyamenle ɛmaa Gyisɛse tumi kɛ ɔdwazo mowuamra. Ɛnee yelimoa yedwazo kakula raalɛ bie mɔɔ ɛnee ɔwule la ɛtɛkyɛle la yɛɛ eza ɔdwazole kpavolɛ bie, ɔbayɛ kɛ kenle ko ne ala mɔɔ ɔwule la. (Luku 7:11-15; 8:49-55) Noko asoo ɔbahola yeadwazo awie mɔɔ yewu yeli kenle nna na yebɔ ɔ bo ɔlɛkpɔlɔ la ɔ?
“LAZALƐSE, FINDE BƐLA!”
Gyisɛse akunlu yelɛyelale ye maanle ɔ gɔnwo mɔ mɔɔ ɛnee ɛlɛdi nyane la (Nea ɛdendɛkpunli 13-14)
13. Kɛ mɔɔ Dwɔn 11:32-35 kile la, mɔɔ Gyisɛse nwunle kɛ Mɛle nee awie mɔ ɛlɛsu la, duzu a ɔyɛle a? (Eza nea nvoninli ne.)
13 Kenga Dwɔn 11:32-35. Pɛ mɔɔ zinle bieko la anwo nvoninli. Lazalɛse adiema Mɛle vindele kɛ ɔkayia Gyisɛse. Ɔhanle mɔɔ ɔ diema raalɛ ne hanle la bie: “Awulae, saa ɛwɔ ɛke a anrɛɛ me diema ne anwu.” Ɛnee ɔ nee bɛdabɛ mɔɔ bɛ nee ye lua la ɛlɛdi nyane kpole. Mɔɔ Gyisɛse nwunle bɛ na ɔdele kɛ bɛlɛsu la, ɔlile nyane kpole. Kɛmɔ ɛnee edwɛkɛ ne yɛ ye alɔbɔlɛ la ati, ɔdaye noko ɔzunle. Ɔze kɛzi awie kulovolɛ bie wu a ɔyɛ nyane la. Nɔhalɛ nu, ɔlɛ ɛhulolɛ kɛ ɔbaye debie mɔɔ maa yɛsu la yeavi ɛkɛ!
14. Duzu a mɔɔ Gyisɛse yɛle wɔ Mɛle ɛzunlɛ ne anwo la maa yɛnwu ye wɔ Gyihova anwo a?
14 Mɔɔ Gyisɛse yɛle wɔ Mɛla ɛzunlɛ ne anwo la maa yɛnwu kɛ Gyihova le ahunluyelɛyelalɛ Nyamenle. Duzu ati a yɛkola yɛka ye zɔ a? Kɛ mɔɔ yɛnwunle ye wɔ edwɛkɛ mɔɔ li ɛhye anyunlu la anu la, Gyisɛse da ɔ Ze adwenle nee ye nganeɛdelɛ ne bie ali pɛpɛɛpɛ. (Dwɔn 12:45) Ɔti saa yɛkenga kɛ Gyisɛse akunlu yelɛyelale ye maanle ɔ gɔnwo mɔ mɔɔ ɛnee bɛlɛsu la a, ɔmaa yɛnwu kɛ saa Gyihova nwu kɛ yɛlɛdi nyane a, ɔdaye noko ɔ kunlu yelɛyela ye. (Edw. 56:8) Asoo ɛhye ɛmmaa ɛnnyia ɛhulolɛ kɛ ɛbabikye yɛ ahunluyelɛyelalɛ Nyamenle ne ɔ?
Gyisɛse maanle ɔlale ali kɛ ɔlɛ tumi wɔ ewule nwo zo (Nea ɛdendɛkpunli 15-16)
15. Kɛ mɔɔ Dwɔn 11:41-44 kile la, duzu a zile wɔ Lazalɛse nla ne anwo a? (Eza nea nvoninli ne.)
15 Kenga Dwɔn 11:41-44. Gyisɛse rale Lazalɛse nla ne anwo na ɔhanle kɛ bɛye bolɛ ne mɔɔ bɛva bɛnyi nla ne anloa la. Maata hanle kɛ bɛmmaye ɔluakɛ bie a ɛnee ɔlɛbɔ. Gyisɛse buale ye kɛ: “Meanga meangile wɔ kɛ saa ɛdie ɛdi a ɛbanwu Nyamenle anyunlunyia ne ɔ?” (Dwɔn 11:39, 40) Akee Gyisɛse yɛle asɔne wɔ bagua nu. Ɛnee ɔkulo kɛ ɔfa mɔɔ bazi bieko la anwo nganvolɛ ɔmaa Gyihova. Akee ɔdeanle nu kɛ: “Lazalɛse, finde bɛla!” Na Lazalɛse vi nla ne anu vindele! Gyisɛse yɛle debie mɔɔ ɛnee bɛ nuhua dɔɔnwo suzu kɛ ɔnrɛyɛ boɛ la.—Nea Dwɔn 11:17 study note ne.
16. Kɛzi edwɛkɛ mɔɔ wɔ Dwɔn tile 11 la maa diedi mɔɔ yɛlɛ wɔ ewudwazo nwo anyelazo ne anu la yɛ kpole ɛ?
16 Edwɛkɛ mɔɔ wɔ Dwɔn tile 11 la maa diedi mɔɔ yɛlɛ wɔ ewudwazo nwo anyelazo ne anu la yɛ kpole. Adenle boni azo? Kakye ɛwɔkɛ mɔɔ Gyisɛse bɔle Maata la: “Ɛ diema ne badwazo.” (Dwɔn 11:23) Gyisɛse le kɛ ɔ Ze la, ɔlɛ ɛhulolɛ nee tumi ne mɔɔ ɔbava yeamaa ɛwɔkɛ zɔhane ara nu a. Ye monle ne maa ɔda ali kɛ, ɔ nwo dɔ kɛ ɔbadwazo bɛdabɛ mɔɔ bɛwu la na yeaye nyane mɔɔ ewule fa ba la yeavi ɛkɛ. Na mɔɔ Lazalɛse vi nla ne anu rale la, eza Gyisɛse lale ye ali kɛ ɔlɛ tumi ɔkola ɔfa ɔdwazo bɛdabɛ mɔɔ bɛwu la. Eza dwenle edwɛkɛ mɔɔ Gyisɛse bizale Maata la anwo: “Meanga meangile wɔ kɛ saa ɛdie ɛdi a ɛbanwu Nyamenle anyunlunyia ne ɔ?” (Dwɔn 11:40) Yɛlɛ ninyɛne mɔɔ yɛbahola yɛagyinla zo yɛalie yɛali kɛ ewudwazo nwo ɛwɔkɛ ne mɔɔ Nyamenle ɛbɔ la bara nu a. Noko duzu a yɛbahola yɛayɛ amaa yɛalie anyelazo ɛhye yɛali kpalɛ a?
KƐZI YƐBAHOLA YƐALIE ANYELAZO ƐHYE YƐALI KPALƐ LA
17. Saa yɛkenga ewudwazo nwo edwɛkɛ mɔɔ wɔ Baebolo ne anu la a, duzu a ɔwɔ kɛ yɛmaa ɔtɛnla yɛ adwenle nu a?
17 Kenga menli mɔɔ bɛdwazole bɛ wɔ tete ne la anwo edwɛkɛ na dwenledwenle nwolɛ. Baebolo ne ka menli mɔtwɛ mɔɔ bɛdwazole bɛ wɔ tete ne wɔ azɛlɛ ye azo la anwo edwɛkɛ. c Duzu ati a ɛndɔ alagye ɛngenga nuhua ko biala a? Mekɛ mɔɔ ɛlɛkenga la, kakye kɛ menli ɛhye mɔ le mrenyia, mraalɛ nee ngakula mɔɔ amgba dɛnlanle aze a. Nea mɔɔ ɛbahola wɔazukoa wɔavi nu la. Dwenle kɛzi neazo ko biala da ye ali kɛ Nyamenle lɛ ɛhulolɛ nee tumi mɔɔ ɔbava yeadwazo mowuamra yeara ngoane nu bieko la anwo. Akee dwenledwenle ewudwazo mɔɔ tɛla biala la anwo—Gyisɛse ɛdeɛ ne. Kakye kɛ menli ɛya dɔɔnwo di ye ewudwazo ne anwo daselɛ, na yemɔ le daselɛ kpalɛ mɔɔ yɛ diedi ne gyi zo a.—1 Kɔl. 15:3-6, 20-22.
18. Kɛ ɔkɛyɛ na wɔava yɛ edwɛne ne mɔ mɔɔ fale ewudwazo nwo anyelazo ne anwo la wɔali gyima kpalɛ ɛ? (Eza nea ɔ bo edwɛkɛ ne.)
18 Fa “sunsum nu edwɛne” ne mɔ mɔɔ fale ewudwazo nwo anyelazo ne anwo la di gyima kpalɛ. d (Ɛfɛ. 5:19) Edwɛne ɛhye mɔ maa yɛnwu ye bɔkɔɔ kɛ ewudwazo ne bara nu amgba na ɔmaa diedi mɔɔ yɛlɛ wɔ anyelazo ɛhye anu la anu mia. Bɛbɔ bɛdie, bɛzukoa kɛzi bɛto ye la na bɛzuzu nuhua edwɛkɛ ne anwo wɔ bɛ abusua ɛzonlenlɛ bo. Bɛhye nuhua edwɛkɛ ne bɛgua bɛ ti anu na bɛdwenledwenle nwo bɛhɔ moa. Akee saa yɛyia sɔnea mɔɔ anu yɛ se anzɛɛ yɛ dɔvolɛ bie wu a, Gyihova sunsum ne baboa yɛ yeamaa yɛahakye edwɛne ɛhye mɔ amaa bɛakyekye yɛ rɛle na bɛamaa yɛ anwosesebɛ.
19. Duzu a yɛbahola yɛava yɛ adwenle yɛabu wɔ ewudwazo ne anwo a? (Nea ɛlɛka, “ Kpuya Boni Mɔ A Ɛbabiza Bɛ A?”)
19 Pɛ tɛnlabelɛ ne anwo nvoninli. Gyihova ɛmaa yɛ tumi mɔɔ yɛkola yɛfa yɛpɛ ye nvoninli kɛ yɛwɔ ewiade fofolɛ ne anu a. Adiema raalɛ ko hanle kɛ: “Meva me mekɛ dɔɔnwo mepɛ ye nvoninli kɛ mewɔ ewiade fofolɛ ne anu na ɔmaa ɔyɛ me kɛ mete felawɔse mɔɔ ɛkpukekpuke la evuanlɛ wɔ Paladaese.” Pɛ ye nvoninli kɛ wɔyia mrenyia nee mraalɛ nɔhavoma mɔɔ dɛnlanle aze wɔ tete ne la. Nwane a ɛ nye la kɛ ɛbayia ye a? Kpuya boni mɔ a ɛbabiza ye a? Eza pɛ ye nvoninli kɛ wɔyia wɔ alɔvolɛ mɔɔ wule la bieko. Pɛ mɔɔ ɔbazi la anwo nvoninli—edwɛkɛ mɔɔ bɛbalimoa bɛaha, kɛzi bɛbayɛ bɛ nwo atuu nee kɛzi anyelielɛ ngome bamaa bɛazu la.
20. Duzu a ɔwɔ kɛ yɛbɔ kpɔkɛ kɛ yɛbayɛ a?
20 Yɛyɛ Gyihova mo wɔ ewudwazo nwo ɛwɔkɛ ne anwo! Yɛbahola yɛalie yɛli kɛ ɛwɔkɛ ɛhye bara nu ɔluakɛ Gyihova lɛ ɛhulolɛ nee tumi mɔɔ ɔbava yeayɛ a. Bɛmaa yɛbɔ kpɔkɛ kɛ yɛbahɔ zo yɛamia diedi mɔɔ yɛlɛ wɔ anyelazo kɛnlɛma ɛhye anu la anu. Saa yɛyɛ zɔ a, yɛbabikye Nyamenle ne mɔɔ ɔdaye a yebɔ yɛ nuhua ko biala ɛwɔkɛ ɛhye la, ‘Bɛ alɔvolɛ badwazo!’
EDWƐNE 147 Dahuu Ngoane Ɛwɔkɛ Ne
a Saa wɔ kulovolɛ bie ɛwu a, ye biala anu ewudwazo nwo ɛwɔkɛ ne bakyekye ɛ rɛle kpalɛ. Noko kɛzi ɛbahilehile deɛmɔti ɛdie zɔhane ɛwɔkɛ ne ɛdi la anu wɔahile awie mɔ ɛ? Yɛɛ kɛ ɔkɛyɛ na wɔamia diedi mɔɔ ɛlɛ wɔ ewudwazo nwo anyelazo ne anu la anu ɛ? Edwɛkɛ ɛhye bodane a le kɛ ɔboa yɛ muala yeamaa yɛamia diedi mɔɔ yɛlɛ wɔ ewudwazo nwo anyelazo ne anu la anu.
b Edwɛne gyɛne ne a le Ɔnrɛhyɛ Na Yeara Nu mɔɔ wɔ November 2016 Broadcasting® gyimalilɛ ne anu la.
c Nea ɛlɛka, “Menli Mɔtwɛ Mɔɔ Bɛdwazole Bɛ Wɔ Baebolo Mekɛ Zo La” mɔɔ wɔ August 1, 2015, Ɛzinzalɛ Arane ne m. 4 la.
d Nea edwɛne ɛhye mɔ mɔɔ wɔ ‘Fa Anyelielɛ To Edwɛne’ Maa Gyihova ne anu la: “Pɛ Ewiade Fofolɛ Ne Anwo Nvoninli” (Edwɛne 139), “Fa Ɛ Nye To Ahyɛlɛdeɛ Ne Azo!” (Edwɛne 144), yɛɛ “Ɔbavɛlɛ” (Edwɛne 151). Eza nea edwɛne gyɛne ɛhye mɔ: “Ɔnrɛhyɛ Na Yeara Nu,” “The New World to Come,” yɛɛ “Banlea” mɔɔ wɔ jw.org azo la.
