1. Anwodozo boni a yɛlɛ a?

 YƐLE Gyihova menli, na yɛze kɛ ɔkulo yɛ yɛɛ ɔkulo kɛ yɛnyia ɛbɛlabɔlɛ mɔɔ yɛ anyelielɛ la. (Wlo. 8:35-39) Eza yɛlɛ anwodozo kɛ saa yɛfa Baebolo nu ngyinlazo yɛbɔ yɛ ɛbɛla a, ɔboa yɛ dahuu. (Aye. 48:17, 18) Na saa yɛyia ngyegyelɛ mɔɔ yɛ nye ɛnla la ɛ?

2. Ngyegyelɛ boni mɔ a bie a yɛbayia a, na kpuya boni mɔ a ɔbahola yeamaa yeara yɛ adwenle nu a?

² Gyihova azonvolɛ kɔsɔɔti yia ngyegyelɛ. Kɛ neazo la, bie a yɛ busuanli bie baye yɛ rɛle ado yɛ sa nu wɔ adenle bie azo. Bie a yɛbayia kpɔkɛdelɛ nwo ngyegyelɛ mɔɔ ɔnrɛmaa yɛnrɛhola yɛnrɛyɛ mɔɔ yɛkulo kɛ yɛyɛ wɔ Gyihova ɛzonlenlɛ nu la. Bie noko a yɛbayia esiane mɔɔ anloa yɛ se la. Anzɛɛ bɛbayɛ yɛ kpɔdekpɔde wɔ yɛ diedi ne anwo. Saa yɛyia sɔnea ɛhye mɔ a, bie a yɛbabiza yɛ nwo kɛ: ‘Duzu ati a ɛhye ɛdo me a? Meyɛ nvonleɛ bie ɔ? Asoo ɛhye kile kɛ Gyihova ɛnyila me ɔ?’ Wɔde nganeɛ zɔ ɛlɛ ɔ? Saa bie ɛdo wɔ ɛlɛ a, mmamaa ɛ sa nu to. Gyihova azonvolɛ nɔhavoma dɔɔnwo ɛde nganeɛ zɛhae bie.​—Edw. 22:1, 2; Hab. 1:2, 3.

3. Duzu a yɛbahola yɛazukoa yɛavi edwɛkɛ mɔɔ wɔ Edwɛne 34:19 la anu a?

³ Kenga Edwɛne 34:19. Yɛ ninyɛne titili nwiɔ mɔɔ wɔ edwɛne ɛhye anu la nzonlɛ: (1) Tenlenema yia ngyegyelɛ. (2) Gyihova die yɛ fi yɛ sɔnea ne mɔ anu. Kɛzi Gyihova die yɛ ɛ? Adenle ko a le kɛ ɔboa yɛ ɔmaa yɛte ɛbɛlabɔlɛ wɔ ewiade ɛhye anu abo kpalɛ. Gyihova ɛbɔ yɛ ɛwɔkɛ kɛ ɔbamaa yɛ nye alie wɔ ye ɛzonlenlɛ  nu ɛdeɛ, noko ɔtɛkanle kɛ yɛnrɛyia ngyegyelɛ biala ɛnɛ. (Aye. 66:14) Ɔmaa yɛ anwosesebɛ kɛ yɛva yɛ adwenle yɛzie mɔɔ bara kenle bie​—mekɛ mɔɔ yɛbanyia asetɛnla mɔɔ ɔkulo kɛ yɛnyia ye dahuu la azo. (2 Kɔl. 4:16-18) Kolaa na zɔhane mekɛ ne adwu la, ɔboa yɛ ɔmaa yɛkɔ zo yɛsonle ye kenle ko biala.​—Awo. 3:22-24.

4. Duzu a yɛbazuzu nwo wɔ edwɛkɛ ɛhye anu a?

⁴ Maa yɛzuzu mɔɔ yɛbahola yɛazukoa yɛavi Gyihova azonvolɛ nɔhavoma mɔɔ dɛnlanle aze wɔ tete ne nee yɛ mekɛ ye azo la neazo ne mɔ anu la anwo. Kɛ mɔɔ yɛbanwu ye la, yɛbayia ngyegyelɛ mɔɔ yɛ nye ɛnla la. Noko saa yɛfa yɛ nwo yɛto Gyihova anwo zo a, ɔbaboa yɛ dahuu. (Edw. 55:22) Mekɛ mɔɔ yɛlɛsuzu neazo ɛhye mɔ anwo la, biza ɛ nwo kɛ: ‘Saa tɛnlabelɛ zɔhane bie dole me a, anrɛɛ kɛzi mebayɛ me nyɛleɛ ɛ? Kɛzi neazo ɛhye mɔ maa anwodozo mɔɔ melɛ wɔ Gyihova anu la yɛ kpole ɛ? Ɛzukoalɛdeɛ boni a wɔ nu mɔɔ mebahola meava meabɔ me ɛbɛla a?’

5. Ɔlua Leeban ati, duzu ngyegyelɛ a Gyekɔbo yiale a? (Nea ɔ nyunlu nvoninli ne.)

⁵ Gyihova azonvolɛ mɔɔ dɛnlanle aze wɔ tete ne la yiale ngyegyelɛ mɔɔ ɛnee bɛ nye ɛnla la. Fa Gyekɔbo kɛ neazo. Ye papa hanle hilele ye kɛ ɔhɔgya Leeban mɔɔ le bɛ busuanli mɔɔ sonle Gyihova la amra mraalɛ ne mɔ bie, na ɔmaanle ɔnwunle kɛ Gyihova bayila ye kpole kpalɛ. (Gyn. 28:1-4) Yemɔti Gyekɔbo yɛle mɔɔ le kpalɛ la. Ɔvile Keena azɛlɛ zo na ɔpɛle adenle ɔhɔle Leeban mɔɔ lɛ ɔ mra mraalɛ nwiɔ​—Liya nee Relahyɛle la sua nu. Gyekɔbo hulole Leeban ara raalɛ kakula ne, Relahyɛle, na ɔliele ɔdole nu kɛ ɔbayɛ gyima ɛvolɛ nsuu yeamaa ye papa na yeagya ye. (Gyn. 29:18) Noko ninyɛne angɔ ye kɛ mɔɔ ɛnee Gyekɔbo anye la la. Leeban bɛlɛbɛlale ye na ɔmaanle ɔgyale ɔ ra raalɛ kpanyinli ne, Liya. Leeban hanle kɛ ɔbamaa Gyekɔbo agya Relahyɛle wɔ dapɛne ko anzi, noko kyesɛ ɔyɛ gyima ɛvolɛ nsuu bieko ɔmaa ye. (Gyn. 29:25-27) Eza Leeban nee Gyekɔbo anli ye boɛ wɔ bɛ gyimayɛlɛ ne anu. Leeban sisile Gyekɔbo too ɛvolɛ 20!​—Gyn. 31:41, 42.

6. Ngyegyelɛ gyɛne boni mɔ a Gyekɔbo gyinlanle ɔ nloa a?

⁶ Gyekɔbo gyinlanle ngyegyelɛ gyɛne nloa. Ɔnyianle abusua kpole, noko tɛ mekɛ ne amuala a ɛnee ɔ mra mrenyia ne mɔ anloa sɛ bɛ nwo a. Bɛdɔnenle bɛ diema Dwosefi bɛmaanle ɔhɔle akɛlɛzonlenlɛ nu. Gyekɔbo amra mrenyia nwiɔ, Semɛyɔn nee Livae guale abusua ne anyunlu aze na bɛguale Gyihova duma ne anwo evinli. Eza Gyekɔbo aye mɔɔ ɔkulo ye kpalɛ la, Relahyɛle, wule wɔ mekɛ mɔɔ ɔlɛwo bɛ ra mɔɔ tɔ zo nwiɔ la. Na ɔlua ɛhɔne kpole bie ati, ɛnee ɔwɔ kɛ Gyekɔbo tu fi ɛleka mɔɔ ɔde la ɔkɔ Yigyibiti wɔ mekɛ mɔɔ ɛnee yeyɛ ɛrelera la.​—Gyn. 34:30; 35:16-19; 37:28; 45:9-11, 28.

7. Kɛzi Gyihova maanle Gyekɔbo nwunle kɛ yenyia Ɔ nyunlu ɛlolɛ ɛ?

⁷ Ɔnva nwo ngyegyelɛ ɛhye mɔ amuala, Gyekɔbo hɔle zo nyianle diedi wɔ Gyihova nee Ye ɛwɔkɛ ne mɔ anu. Gyihova noko maanle Gyekɔbo nwunle kɛ yenyia Ɔ nyunlu ɛlolɛ. Kɛ neazo la, Leeban nee Gyekɔbo anli ye boɛ ɛdeɛ, noko Gyihova maanle Gyekɔbo nyianle ɔ nwo. Eza nea kɛzi Gyekɔbo anye zɔle mɔɔ Gyihova yɛle maanle ye wɔ mekɛ mɔɔ ɔnwunle ɔ ra Dwosefi mɔɔ ɛnee ɔsuzu kɛ yewu dɛbadɛba la! Agɔnwolɛvalɛ kpalɛ mɔɔ ɛnee Gyekɔbo nee Gyihova lɛ la boale ye maanle ɔgyinlanle ye sɔnea ne mɔ anloa. (Gyn. 30:43; 32:9, 10; 46:28-30) Saa yɛ nee Gyihova nyia agɔnwolɛvalɛ kpalɛ dahuu a, yɛdayɛ noko yɛbahola yɛagyinla sɔnea mɔɔ yɛ nye ɛnla la anloa.

8. Duzu a ɛnee Belemgbunli Devidi kulo kɛ ɔyɛ a?

 ⁸ Tɛ debie biala mɔɔ ɛnee Belemgbunli Devidi kulo kɛ ɔyɛ ye wɔ ɛbɛlabɔlɛ nu la a ɔholale ɔyɛle a. Kɛ neazo la, ɛnee Devidi lɛ ɛhulolɛ kpole kɛ ɔbazi ɛzonlenlɛsua yeamaa ye Nyamenle ne. Ɔhanle ɛhulolɛ zɔhane mɔɔ ɔlɛ la anwo edwɛkɛ ɔhilele ngapezonli Neetan. Neetan hanle kɛ: “Yɛ debie biala mɔɔ wɔ wɔ ahonle nu la, ɔluakɛ nɔhalɛ Nyamenle ne nee wɔ lua.” (1 Ek. 17:1, 2) Yɛkola yɛnwu kɛ zɔhane edwɛkɛ ne maanle Devidi anwosesebɛ kpalɛ. Bie a ɛkɛ ne ala ɔbɔle ɔ bo kɛ ɔyɛ suazilɛ gyima kpole ɛhye anwo ngyehyɛleɛ.

9. Kɛzi Devidi yɛle ye nyɛleɛ wɔ edwɛkɛ mɔɔ ɛnee ɔ nye ɛnla la anwo ɛ?

⁹ Noko yeangyɛ, Gyihova ngapezonli ne rahanle edwɛkɛ bie mɔɔ ɛnee Devidi anye ɛnla la hilele ye. “Zɔhane nɔe ne,” Gyihova hanle hilele Neetan kɛ tɛ Devidi a bazi ɛzonlenlɛsua ne a; emomu, ɔ mra mrenyia ne mɔ ko a bazi a. (1 Ek. 17:3, 4, 11, 12) Mɔɔ Devidi dele edwɛkɛ ɛhye la, duzu a ɔyɛle a? Ɔhakyile ye bodane ne. Ɔvale ɔziele ɔ nye zo kɛ ɔbakpondɛ ezukoa nee ninyɛne mɔɔ ɔ ra Sɔlɔmɔn bahyia nwo ava ayɛ gyima ne la yeagua ɛkɛ.​—1 Ek. 29:1-5.

10. Kɛzi Gyihova yilale Devidi ɛ?

¹⁰ Mɔɔ Gyihova hanle hilele Devidi kɛ tɛ ɔdaye a ɔbazi ɛzonlenlɛsua ne la, ɛkɛ ne ala ɔ nee ye yɛle ngyekyeleɛ. Gyihova bɔle Devidi ɛwɔkɛ kɛ ɔ bo zo amra ne anu ko bali tumi dahuu. (2 Sa. 7:16) Wɔ ewiade fofolɛ ne anu, saa Devidi nwu ye kɛ Ɛvolɛ Apenle Ko Tumililɛ ne azo Belemgbunli ne, Gyisɛse le ɔ bo zo amra ne anu ko a, ɔ nye balie kpole kpalɛ! Edwɛkɛ ɛhye boa yɛ maa yɛnwu kɛ, saa yɛangola yɛanyɛ mɔɔ ɛnee yɛkulo kɛ yɛyɛ yɛmaa Gyihova la amuala bɔbɔ a, bie a yɛ Nyamenle ne bayila yɛ wɔ adenle mɔɔ ɔtɛbale yɛ adwenle nu ɛlɛ la azo.

11. Kɛzi Gyihova yilale alimoa Kilisienema ɔnva nwo kɛ Belemgbunlililɛ ne amba wɔ mekɛ mɔɔ ɛnee bɛ nye la ye ade la ɛ? (Gyima ne 6:7)

¹¹ Alimoa Kilisienema yiale ngyegyelɛ ngakyile mɔɔ ɛnee bɛ nye ɛnla la. Kɛ neazo la, ɛnee bɛ nye la ye ɛsesebɛ kɛ Nyamenle Belemgbunlililɛ ne bara, noko ɛnee bɛnze mekɛ mɔɔ ɔbara la. (Gyi. 1:6, 7) Ɔti, duzu a bɛyɛle a? Bɛmaanle bɛ nye bolole edwɛkɛhanlɛ gyima ne anwo. Mekɛ mɔɔ edwɛkpa ne ɛlɛtɛlɛ la, bɛnwunle ye wienyi kɛ Gyihova ɛlɛyila bɛ mɔdenlebɔlɛ zo.​—Kenga Gyima ne 6:7.

12. Mɔɔ ɛhɔne kpole bie rale la, duzu a alimoa Kilisienema yɛle a?

¹² Mekɛ bie, ɛhɔne kpole bie rale “azɛlɛ ye azo amuala.” (Gyi. 11:28) Ɛhɔne ne hanle alimoa Kilisienema noko. Ɛnea a amaneɛ boni a mediema ɛhye mɔ banwu ye a? Ye biala anu, mbusua tile badwenle kɛzi bɛbanyia aleɛ bɛamaa bɛ mbusua la anwo. Na mgbavolɛ nee mbɛlɛra mɔɔ ɛnee bɛlɛdwenle nwolɛ kɛ bɛkulo kɛ bɛtɛlɛ bɛ ɛzonlenlɛ gyima ne anu la noko ɛ? Asoo bɛdele nganeɛ kɛ ɔwɔ kɛ bɛkendɛ bɛmaa ɛhɔne ne pɛ nu ɔ? Kɛzi ɛnee Kilisienema ne tɛnlabelɛ ne de biala la, bɛyɛle nzenzaleɛ. Bɛhɔle zo bɛhanle edwɛkɛ ne kɛ mɔɔ bɛbahola la, na bɛvale anyelielɛ bɛ nee bɛ mediema mɔɔ wɔ Dwudiya la hyɛle ninyɛne mɔɔ bɛlɛ la.​—Gyi. 11:29, 30.

13. Nyilalɛ boni mɔ a Kilisienema ne nyianle wɔ ɛhɔne mekɛ ne anu a?

¹³ Nyilalɛ boni mɔ a Kilisienema ne nyianle wɔ ɛhɔne mekɛ ne anu a? Bɛdabɛ mɔɔ bɛvale moalɛ bɛhɔmaanle bɛ la limoale nwunle kɛzi Gyihova ɛlɛboa bɛ la. (Mat. 6:31-33) Bie a ɔmaanle bɛbikyele bɛ mediema diedima mɔɔ boale bɛ la. Yɛɛ bɛdabɛ mɔɔ bɛyele ndoboa anzɛɛ bɛyɛle moalɛ gyima ne afoa bie la nyianle anyelielɛ mɔɔ wɔ ɛmaanlɛ nu la bie. (Gyi. 20:35) Gyihova yilale bɛ muala ɔluakɛ bɛyɛle nzenzaleɛ wɔ tɛnlabelɛ ɛhye mɔ anu.

14. Duzu a dole Baanabase nee ɛzoanvolɛ Pɔɔlo a, na duzu a vi nu rale a? (Gyima ne 14:21, 22)

 ¹⁴ Ɛnee bɛta bɛyɛ alimoa Kilisienema kpɔdekpɔde, ɔyɛ a ɔsi wɔ mekɛ mɔɔ bɛ nye ɛnla la. Nea mɔɔ dole Baanabase nee ɛzoanvolɛ Pɔɔlo wɔ mekɛ mɔɔ bɛlɛyɛ edwɛkɛhanlɛ gyima ne wɔ Lesetela ɛleka bie la. Mɔlebɛbo ne, bɛdabɛ mɔɔ bɛdiele bɛ la liele bɛ kɛnlɛma. Noko nzinlii, dwazotiama ralile “menli ne adwenle,” na bɛdabɛ mɔɔ bɛdiele bɛ la bie mɔ ala zile Pɔɔlo awolɛ bɛmaanle ɔhale ye nee ewule. (Gyi. 14:19) Noko Baanabase nee Pɔɔlo hɔle zo hɔhanle edwɛkɛ ne wɔ ɛleka gyɛne. Duzu a vi nu rale a? “Bɛnyianle ɛdoavolɛma ekyi,” na bɛ edwɛkɛ nee bɛ neazo ne maanle bɛ mediema diedima anwosesebɛ. (Kenga Gyima ne 14:21, 22.) Kɛmɔ Baanabase nee Pɔɔlo ammaa bɛ sa nu ando wɔ mekɛ mɔɔ bɛyiale kpɔdekpɔdeyɛlɛ arɛlevilɛ nu la ati, bɛboale menli dɔɔnwo. Saa yɛangyakyi gyima mɔɔ Gyihova se yɛyɛ la a, ɔbayila yɛ.

15. Duzu a ɛsukoa ɛfi Adiema A. H. Macmillan neazo ne anu a?

¹⁵ Kolaa na 1914 adwu la, ɛnee Gyihova menli anye la kɛ ninyɛne bie mɔ basisi. Fa Adiema A. H. Macmillan kɛ neazo. Ɛnee Adiema Macmillan suzu kɛ ɔnrɛhyɛ ɔbahɔ anwuma, kɛ mɔɔ ɛnee menli dɔɔnwo te nganeɛ wɔ zɔhane mekɛ ne la. Ɔhanle ye wɔ ɛdendɛlɛ bie mɔɔ ɔmaanle ye wɔ September 1914 la anu kɛ: “Bie a ɛhye a le bagua nu ɛdendɛlɛ mɔɔ li awieleɛ mɔɔ mebamaa a.” Noko, tɛ yemɔ a le ɛdendɛlɛ mɔɔ li awieleɛ mɔɔ ɔmaanle a. Nzinlii, Adiema Macmillan hɛlɛle kɛ: “Ɔbayɛ kɛ yɛ nuhua bie mɔ pelele yɛ nwo nyianle adwenle kɛ yɛbahɔ anwuma ɛkɛ ne ala.” Ɔvale ɔzɔle zolɛ kɛ: “Mɔɔ ɛnee ɔwɔ kɛ yɛyɛ la a le kɛ yɛbamaa yɛ nye abolo wɔ Awulae gyima ne anu.” Amgba Adiema Macmillan maanle ɔ nye bolole. Ɔbɔle mɔdenle wɔ ɛzonlenlɛ gyima ne anu. Ɔnyianle nwolɛ adenle ɔmaanle mediema mrenyia dɔɔnwo mɔɔ kɛmɔ bɛngyi afoa biala la ati bɛguale bɛ efiade la anwosesebɛ. Mɔɔ ɔyɛle ɛrelera bɔbɔ la, ɛnee ɔkɔ debiezukoalɛ dahuu. Kɛmɔ Adiema Macmillan vale ye mekɛ lile gyima kpalɛ wɔ mekɛ mɔɔ ɛnee ɔlɛkendɛ ye ahyɛlɛdeɛ ne la ati, kɛzi ɔboale ye ɛ? Mɔɔ ɔka ekyii ɔwu wɔ 1966 la, ɔhɛlɛle kɛ: “Me diedi ne anu tɛyɛ se kɛ mɔɔ ɛnee ɔde wɔ dɛba ne la.” Ɛhye le subane kɛnlɛma mɔɔ ɔwɔ kɛ yɛ muala yɛsukoa a​—titili, saa yɛgyinla sɔnea nloa mekɛ tendenle yɛdɛla kɛzi ɛnee yɛ nye la la a!​—Hib. 13:7.

16. Ngyegyelɛ mɔɔ ɛnee Herbert Jennings nee ɔ ye anye ɛnla la boni a bɛyiale a? (Gyemise 4:14)

¹⁶ Gyihova azonvolɛ dɔɔnwo yia kpɔkɛdelɛ nwo ngyegyelɛ mɔɔ bɛ nye ɛnla la. Kɛ neazo la, Adiema Herbert Jennings b hanle kɛzi ɔ nee ɔ ye anye liele bɛ edwɛkpatɛlɛvolɛ gyima ne mɔɔ bɛyɛle ye wɔ Ghana la anwo la wɔ ye ɛbɛlabɔlɛ nu edwɛkɛ ne anu. Noko nzinlii, bɛnwunle kɛ yenyia adwenle nu ewule bie. Adiema Jennings gyinlanle edwɛkɛ mɔɔ wɔ Gyemise 4:14 la azo vɛlɛle ye tɛnlabelɛ ne “‘ɛhyema’ mɔɔ ɛnee yɛ nye ɛnla” la. (Kenga.) Ɔhɛlɛle kɛ: “Yɛliele tɛnlabelɛ ne yɛdole nu, ɔti ɛnee ɔwɔ kɛ yɛfi Ghana na yɛgyakyi yɛ gɔnwo mɔ amuala ɛkɛ yɛsia yɛkɔ Canada [yɛkɔkpondɛ ayileyɛlɛ].” Gyihova boale Adiema Jennings nee ɔ ye ɔmaanle bɛhɔle zo bɛzonlenle ye wɔ nɔhalɛ nu ɔnva nwo ngyegyelɛ mɔɔ ɛnee bɛgyi ɔ nloa la.

17. Kɛzi Adiema Jennings neazo ne boale ɔ mediema diedima ɛ?

 ¹⁷ Adiema Jennings edwɛkɛ mɔɔ ɔvile ye ahonle nu ɔhanle wɔ ye ɛbɛlabɔlɛ nu edwɛkɛ ne anu la boale menli dɔɔnwo kpalɛ. Adiema raalɛ ko hɛlɛle kɛ: “Debie biala ɛtɛkanle me ahonle zɛhae ɛlɛ kɛ edwɛkɛ ɛhye mɔɔ mengengale la. . . . Mɔɔ mengengale kɛzi Adiema Jennings vale ye gyimalilɛ ne dole ɛkɛ amaa yeayɛ ɔ nwo ayile la, ɔboale me ɔmaanle menyianle me tɛnlabelɛ ɛdeɛ ne anwo adwenle kpalɛ.” Adiema nrenyia bie noko hɛlɛle kɛ: “Menyɛle asafo nu kpanyinli ɛvolɛ bulu, na kɛmɔ menyianle adwenle nu ewule bie la ati, ɛnee ɔwɔ kɛ mefa zɔhane nwolɛ adenle ne meto ɛkɛ. Kɛmɔ ɛnee mete nganeɛ kɛ meyɛ sonlamgbane la ati, ɛnee ɔta ɔmaa me rɛle bɔ mɔɔ mengola mengenga ɛbɛlabɔlɛ nu edwɛkɛ ne mɔ a. . . . Noko kɛmɔ Adiema Jennings ammaa ɔ sa nu ando la ati, ɔmaanle me anwosesebɛ.” Ɛhye maa yɛkakye kɛ, saa yɛgyinla ngyegyelɛ mɔɔ yɛ nye ɛnla la anloa a, ɔmaa yɛkola yɛmaa awie mɔ anwosesebɛ. Saa ninyɛne angɔ ye kɛ mɔɔ yɛ nye la bɔbɔ la a, yɛbahola yɛayɛ diedi nee kpundiigyinlanlɛ nwo neazo yɛamaa awie mɔ.​—1 Pita 5:9.

18. Duzu a ɛsukoa ɛfi kunlavolɛ raalɛ bie mɔɔ wɔ Nigeria la edwɛkɛ ne mɔɔ bɛyɛ nwolɛ nvoninli la anu a?

¹⁸ Esiane ngakyile mɔɔ bie a le COVID-19 ewulenzane ne la ɛha Gyihova menli dɔɔnwo. Kɛ neazo la, ɔhale kunlavolɛ raalɛ bie mɔɔ wɔ Nigeria la aleɛ nee ezukoa ekyi. Kenle ko nwonlomɔ mɔɔ ɔ nee ra raalɛ ne donle bɛ awule kɔpo ko mɔɔ ɛha la, ɔ ra raalɛ ne bizale ye aleɛ bieko mɔɔ bɛbali la. Yɛ diema raalɛ ne hanle hilele ɔ ra ne kɛ bɛnlɛ ezukoa anzɛɛ aleɛ bieko ɛdeɛ, noko ɔwɔ kɛ bɛsukoa kunlavolɛ raalɛ ne mɔɔ ɛnee wɔ Zalefate la​—bɛdi bɛ aleɛ mɔɔ ɛha la na bɛfa bɛ nwo bɛto Gyihova anwo zo bɔkɔɔ. (1 Arl. 17:8-16) Kolaa na bɛadwenle mɔɔ bɛbali wɔ kenle zɔhane ewiazo bɔbɔ anwo la, yɛ mediema diedima vale ninyɛne mɔɔ bɛbahyia nwo la rɛlɛle bɛ. Ɛnee aleɛ mɔɔ bɛbali ye dapɛne mɔɔ bo nwiɔ la boka ninyɛne mɔɔ bɛvale bɛrɛlɛle bɛ la anwo. Adiema raalɛ ne hanle kɛ ɛnee ɔnze kɛ Gyihova ɛlɛtie edwɛkɛ ne mɔɔ ɔhanle ɔhilele ɔ ra ne la kpalɛ. Nɔhalɛ nu, saa yɛfa yɛ nwo yɛto Gyihova anwo zo wɔ  mekɛ mɔɔ yɛbayia ngyegyelɛ mɔɔ yɛ nye ɛnla la a, ɔmaa yɛbikye ye kpalɛ.​—1 Pita 5:6, 7.

19. Kpɔdekpɔdeyɛlɛ boni a Aleksey Yershov gyinlanle ɔ nloa a?

¹⁹ Kenlensa ye, yɛ mediema mrenyia nee mraalɛ dɔɔnwo ɛyia kpɔdekpɔdeyɛlɛ mɔɔ ɛnee bɛ nye ɛnla la. Fa Adiema Aleksey Yershov mɔɔ de Russia la kɛ neazo. Mɔɔ bɛzɔnenle Adiema Yershov wɔ 1994 la, ɛnee Gyihova menli mɔɔ wɔ ɛkɛ ne la lɛ fanwodi ekyi. Noko wɔ ɛvolɛ dɔɔnwo anzi, kɛzi ɛnee tɛnlabelɛ ne de wɔ Russia la hakyile. Wɔ 2020, kpolisima hɔle Adiema Yershov anwo zo wɔ ye sua nu, bɛdule ɛkɛ ne bɛfonyianle na bɛvale ye ninyɛne dɔɔnwo. Wɔ siane dɔɔnwo anzi, arane ne bɔle ye somolɛ kɛ ɔdi ɛtane. Mɔɔ zɛkyele edwɛkɛ ne la a le kɛ, wɔ ɛvolɛ mɔɔ bo ko la anu, awie bie mɔɔ ɔyɛle ɔ nwo kɛ ɔkulo kɛ ɔsukoa Baebolo ne la hyele debie biala mɔɔ bɛyɛle la vidio na yemɔ a bɛgyinlanle zo bɛbɔle ye somolɛ ne a. Ahenle ne anyɛ deɛ fee!

20. Kɛzi Adiema Yershov mianle ɔ nee Gyihova agɔnwolɛvalɛ ne anu ɛ?

²⁰ Asoo debie kpalɛ bie ɛvi Adiema Yershov kpɔdekpɔdeyɛlɛ ne anu ɛra? Ɛhɛe. Ɔ nee Gyihova avinli agɔnwolɛvalɛ ne anu ɛmia. Ɔhanle kɛ: “Me nee me ye ta bɔ nu yɛ asɔne. Menwu ye kɛ saa Gyihova amboa me a, menrɛhola menrɛgyinla tɛnlabelɛ ɛhye anloa.” Ɔvale ɔzɔle zolɛ kɛ: “Me ti anwo debiezukoalɛ boa me maa megyinla bɛsanudolɛ nloa. Medwenledwenle azonvolɛ nɔhavoma mɔɔ dɛnlanle aze wɔ tete ne la neazo ne anwo. Edwɛkɛ dɔɔnwo wɔ Baebolo ne anu mɔɔ maa menwu kɛzi ɔhyia kɛ mesie me nwo dii na menyia Gyihova anu anwodozo la.”

21. Duzu a yɛzukoa wɔ edwɛkɛ ɛhye anu a?

²¹ Duzu a yɛzukoa ye wɔ edwɛkɛ ɛhye anu a? Ɔyɛ a yɛyia ngyegyelɛ mɔɔ yɛ nye ɛnla la wɔ ewiade ɛhye anu. Noko saa Gyihova azonvolɛ fa bɛ nwo to ɔ nwo zo a, dahuu ɔboa bɛ. Kɛ mɔɔ yɛ edwɛkɛtile tɛkese ne kile la, “tenlenenli amaneɛnwunlɛ zonle, noko Gyihova die ye fi ɔ muala anu.” (Edw. 34:19) Bɛmaa yɛhɔ zo yɛva yɛ adwenle yɛzie Gyihova tumi ne mɔɔ ɔfa ɔboa yɛ la azo, na tɛ yɛ ngyegyelɛ ne mɔ azo ɔ. Akee kɛ mɔɔ ɛzoanvolɛ Pɔɔlo hanle la, yɛdayɛ noko yɛbahola yɛaha kɛ: “Melɛ anwosesebɛ wɔ debie biala anu ɔlua ahenle mɔɔ maa me tumi la ati.”​—Fel. 4:13.