1-2. Mekɛ mɔɔ yɛlɛkendɛ ewiade fofolɛ ne la, duzu a ɔhyia kɛ yɛyɛ a?

 EWIADE fofolɛ mɔɔ tenleneyɛlɛ wɔ nu mɔɔ Gyihova bava azie ɛtane ewiade ɛhye agyakɛ anu la sonle bolɛ maa yɛ. (2 Pita 3:13) Yɛnze mekɛ mɔɔ zɔhane ewiade ne bara la ɛdeɛ, noko ninyɛne mɔɔ ɛlɛsisi la di daselɛ kɛ ɔnrɛhyɛ.​—Mat. 24:32-34, 36; Gyi. 1:7.

² Ɔti, ɔnva nwo mekɛ tendenle mɔɔ yɛva yɛdɛnla nɔhalɛ ne anu la, ɔhyia kɛ yɛ muala yɛmia diedi mɔɔ yɛlɛ wɔ zɔhane ɛwɔkɛ ne anu la anu. Duzu ati ɔ? Ɔluakɛ diedi mɔɔ anu yɛ se bɔbɔ la kola ka aze. Nɔhalɛ nu, ɛzoanvolɛ Pɔɔlo hanle kɛ yɛnlɛ diedi a, ɔle “ɛtane mɔɔ ɛngyɛ na akyekye yɛ.” (Hib. 12:1) Amaa yɛ diedi ne anga aze la, ɔhyia kɛ yɛta yɛneɛnlea daselɛ mɔɔ kile kɛ ɔnrɛhyɛ na ewiade ɛhye ahɔ awieleɛ la anu.​—Hib. 11:1.

3. Duzu a yɛbazuzu nwo wɔ edwɛkɛ ɛhye anu a?

³ Wɔ edwɛkɛ ɛhye anu, yɛbazuzu ndenle nsa mɔɔ yɛbahola yɛalua zo yɛamia diedi mɔɔ yɛlɛ wɔ Gyihova ɛwɔkɛ mɔɔ fale ewiade fofolɛ ne anwo anu la anwo: (1) yɛbadwenledwenle ɛkpɔnedeɛ ne anwo, (2) yɛbadwenledwenle Gyihova tumi ne anwo, yɛɛ (3) yɛbanyia mekɛ yɛayɛ sunsum nu ninyɛne. Eza yɛbazuzu kɛzi Gyihova edwɛkɛ mɔɔ ɔhanle ɔhilele Habakɛke la maa yɛ diedi nu mia ɛnɛ la anwo. Noko mɔɔ limoa, maa yɛzuzu tɛnlabelɛ bie mɔ mɔɔ bie a yɛbayia ye ɛnɛ mɔɔ bahyia kɛ  yɛnyia ewiade fofolɛ ne mɔɔ bara la anwo ɛwɔkɛ ne anu diedi kpole la anwo.

TƐNLABELƐ NGAKYILE MƆƆ HYIA DIEDI KPOLE

4. Kpɔkɛzilɛ boni mɔ a hyia diedi kpole a?

⁴ Kenle ko biala, yɛsisi kpɔkɛ mɔɔ hyia diedi kpole la. Kɛ neazo la, yɛsisi agɔnwolɛvalɛ, anyelielɛ ninyɛne, nwomazukoalɛ, agyalɛ, ngakula yɛɛ gyimayɛlɛ nwo kpɔkɛ. Ɔle kpalɛ kɛ yɛbabiza yɛ nwo kɛ: ‘Asoo ninyɛne mɔɔ meyɛ la kile kɛ medie medi kɛ ewiade ɛhye ɛnrɛhyɛ na yeapɛ nu na Nyamenle bava ewiade fofolɛ azie ɔ gyakɛ anu ɔ? Anzɛɛ meyɛ ninyɛne mɔɔ bɛdabɛ mɔɔ bɛdie bɛdi kɛ bɛwu a ɛnee yewie la yɛ la bie ɔ?’ (Mat. 6:19, 20; Luku 12:16-21) Saa yɛmia diedi mɔɔ yɛlɛ kɛ ewiade fofolɛ ne ɛbikye la anu a, ɔbamaa yɛasisi kpɔkɛ kpalɛ.

5-6. Duzu ati a ɔhyia kɛ yɛnyia diedi mɔɔ anu yɛ se la wɔ ngyegyelɛ mekɛ nu a? Maa neazo.

⁵ Eza yɛyia sɔnea ngakyile mɔɔ bahyia kɛ yɛnyia diedi kpole a. Bie a bɛbayɛ yɛ kpɔdekpɔde, yɛbanyia ewule mɔɔ bɛyɛ ye ayile a ɔngɔ anzɛɛ ninyɛne gyɛne mɔɔ bahola amaa yɛ sa nu ado a. Bie a mɔlebɛbo ne yɛbade nganeɛ kɛ yɛbahola yɛagyinla yɛ ngyegyelɛ ne mɔ anloa. Noko saa ɔkyɛ​—kɛ mɔɔ sɔnea ngakyile kyɛ la a​—yɛbahyia diedi kpole amaa yɛahɔ zo yɛagyinla kpundii na yɛava anyelielɛ yɛazonle Gyihova.​—Wlo. 12:12; 1 Pita 1:6, 7.

⁶ Saa yɛlɛyia sɔnea bie a, wɔannea a yɛbade nganeɛ kɛ Gyihova ewiade fofolɛ ne ɛnrɛra ɛlɛ. Asoo ɛhye kile kɛ yɛ diedi ne ɛha aze ɔ? Kyɛkyɛ. Maa yɛyɛ neazo bie. Saa ezule ne tɔ kyɛ a, bie a ɛbade nganeɛ kɛ ewia ne ɛnrɛvi. Noko ewia ne fi. Zɔhane ala a saa yɛ sa nu to kpole a, bie a yɛbade nganeɛ kɛ ewiade fofolɛ ne ɛnrɛra ɛlɛ a. Noko saa yɛ diedi nu yɛ se a, yɛbanwu ye kɛ Nyamenle ɛwɔkɛ ne mɔ bara nu. (Edw. 94:3, 14, 15; Hib. 6:17-19) Saa yɛnyia zɔhane anwodozo ne a, yɛbahola yɛahɔ zo yɛava Gyihova ɛzonlenlɛ yɛalimoa yɛ ɛbɛlabɔlɛ nu.

7. Adwenle boni a ɔnle kɛ yɛnyia a?

⁷ Eza yɛhyia diedi kpole amaa yɛahola yɛayɛ edwɛkɛhanlɛ gyima ne. Menli dɔɔnwo mɔɔ yɛka “edwɛkpa” ne yɛkile bɛ la te nganeɛ kɛ Nyamenle ewiade fofolɛ ne mɔɔ ɛlɛba la anwo edwɛkpa ne ɛnle nɔhalɛ. (Mat. 24:14; Yiz. 33:32) Yɛngulo kɛ bɛ adwenle nu keseeyɛlɛ ne nyia yɛ nwo zo tumi ɛlɛ. Amaa ɛhye bie ando yɛ la, ɔwɔ kɛ yɛkɔ zo yɛmia yɛ diedi ne anu. Maa yɛzuzu ndenle nsa mɔɔ yɛbahola yɛalua zo yɛayɛ zɔ la anwo.

DWENLEDWENLE ƐKPƆNEDEƐ NE ANWO

8-9. Saa yɛdwenledwenle ɛkpɔnedeɛ ne anwo a, kɛzi ɔbamaa yɛ diedi nu amia ɛ?

⁸ Adenle ko mɔɔ yɛbahola yɛalua zo yɛamia yɛ diedi ne anu la a le kɛ yɛbadwenledwenle ɛkpɔnedeɛ ne anwo. Ɛkpɔnedeɛ ne maa yɛnyia anwodozo kɛ Nyamenle ɛwɔkɛ ne mɔ bara nu. Saa yɛdwenledwenle deɛmɔti Gyihova vale ɛkpɔnedeɛ ne maanle yɛ nee afɔle mɔɔ ɔbɔle kolaa na yeava yeamaa yɛ la anwo a, ɔbamaa yɛanyia diedi kpole kɛ ɛwɔkɛ mɔɔ Nyamenle ɛbɔ kɛ yɛbadɛnla aze dahuu wɔ ewiade kpalɛ bie anu la bara nu. Duzu ati a yɛkola yɛka ye zɔ a?

⁹ Ɔyɛ, afɔle boni a Gyihova bɔle a? Gyihova maanle ye belamunli Ralɛ ne mɔɔ ɔkulo ye na eza ɔle ɔ gɔnwo kpalɛ la vile anwuma amaa bɛawo ye kɛ sonla mɔɔ di munli la wɔ azɛlɛ ye azo. Gyisɛse gyinlanle ngyegyelɛ ngakyile nloa. Akee ɔnwunle amaneɛ na ɔwule nyane ewule. Gyihova duale kakɛ kpole kpalɛ! Saa yɛ Nyamenle ne mɔɔ lɛ ɛlɔlɛ la kulo kɛ yɛnyia asetɛnla kpalɛ wɔ mekɛ ezinraa bie ala anu a,  anrɛɛ ɔnrɛmaa ɔ Ra ne ɛnrɛnwu amaneɛ na ɔnrɛwu. (Dwɔn 3:16; 1 Pita 1:18, 19) Kɛmɔ Gyihova duale kakɛ kpole la ati, ɔbanlea kɛ yɛbanyia dahuu ngoane wɔ ewiade fofolɛ ne anu.

DWENLEDWENLE GYIHOVA TUMI NE ANWO

10. Kɛ mɔɔ Ɛfɛsɛsema 3:20 kile la, duzu a Gyihova kola yɛ a?

¹⁰ Adenle mɔɔ tɔ zo nwiɔ mɔɔ yɛbahola yɛalua zo yɛamia yɛ diedi ne anu la a le kɛ yɛbadwenledwenle Gyihova tumi ne anwo. Ɔlɛ tumi ɔfa ɔyɛ debie biala mɔɔ yebɔ ɛwɔkɛ kɛ ɔbayɛ la. Nɔhalɛ nu, wɔ alesama anye zo, ɔzɔho kɛ dahuu ngoane mɔɔ yɛbanyia ye wɔ ewiade fofolɛ ne anu la ɛnrɛyɛ boɛ. Noko Gyihova ta bɔ ninyɛne mɔɔ alesama ɛnrɛhola ye yɛ ɛlɛ la anwo ɛwɔkɛ, ɔluakɛ ɔdaye a ɔle Nyamenle Tumivolɛ Bedevinli ne a. (Dwobu 42:2; Maake 10:27) Yemɔti saa ɔbɔ yɛ ninyɛne mɔɔ yɛ nwanwane la anwo ɛwɔkɛ a, ɔnzi yɛ nwo.​—Kenga Ɛfɛsɛsema 3:20.

11. Nyamenle ɛwɔkɛ mɔɔ yɛ nwanwane la anu ko a le boni? (Nea ɛlɛka, “ Ɛwɔkɛ Mɔɔ Yɛ Nwanwane Mɔɔ Ɛra Nu La Bie Mɔ.”)

¹¹ Nea ninyɛne bie mɔ mɔɔ Gyihova vale bɔle ye menli ne ɛwɔkɛ wɔ tete ne mɔɔ ɛnee ɔzɔho kɛ ɔnrɛra nu la bie mɔ. Ɔhanle ɔhilele Ebileham nee Sɛla kɛ bɛbawo ralɛ nrenyia wɔ bɛ mrelera nu. (Gyn. 17:15-17) Eza ɔhanle ɔhilele Ebileham kɛ ɔbava Keena azɛlɛ ne yeamaa ɔ bo zo amra. Wɔ ɛvolɛ dɔɔnwo anu mɔɔ Yizilayɛma mɔɔ le Ebileham abozoamra la le ngɛkɛlɛ wɔ Yigyibiti la, ɛnee ɔzɔho kɛ ɛwɔkɛ zɔhane ɛnrɛra nu ɛlɛ. Noko ɔrale nu. Nzinlii, Gyihova hanle kɛ Ɛlezabɛte mɔɔ ɛyɛ ɛrelera la bawo. Eza ɔhanle ɔhilele Mɛle mɔɔ ɛnee ɔnze nrenyia la kɛ ɔbawo ɔdaye Gyihova mumua ne ɔ Ra ne. Ɛhye bamaa ɛwɔkɛ bie mɔɔ ɔbɔle ye wɔ Yidɛn tola ne anu wɔ ɛvolɛ apenle dɔɔnwo anu la ara nu!​—Gyn. 3:15.

12. Duzu a Dwɔhyua 23:14 nee Ayezaya 55:10, 11 maa yɛnwu ye wɔ Gyihova tumi ne anwo a?

¹² Saa yɛdwenledwenle ɛwɔkɛ ngakyile mɔɔ Gyihova ɛbɔ nee kɛzi ɔmaanle ɔrale nu la anwo a, ɔbamaa diedi mɔɔ yɛlɛ kɛ Gyihova lɛ tumi mɔɔ ɔbamaa ewiade fofolɛ ne ara nu la ayɛ kpole. (Kenga Dwɔhyua 23:14; Ayezaya 55:10, 11.) Ɛhye bamaa yɛahola yɛaboa awie mɔ yɛamaa bɛade ɔ bo kɛ ewiade fofolɛ ne anwo ɛwɔkɛ ne ɛnle ɛlalɛ anzɛɛ nzuzulɛ mgbane bie ala. Gyihova mumua ne ɛha ye wɔ anwuma fofolɛ nee azɛlɛ fofolɛ ne anwo kɛ: “Edwɛkɛ ɛhye le zɔ yɛɛ ɔle nɔhalɛ.”​—Yek. 21:1, 5.

MAA Ɛ NYE ƐBOLO SUNSUM NU NINYƐNE NWO

13. Kɛzi debiezukoalɛ ɛhɔlɛ bahola amaa yɛ diedi nu amia ɛ? Kilehile nu.

¹³ Adenle mɔɔ tɔ zo nsa mɔɔ yɛbahola yɛalua zo yɛamia yɛ diedi ne anu la a le kɛ yɛbanyia mekɛ yɛayɛ sunsum nu ninyɛne. Kɛ neazo la, suzu kɛzi yɛnyia yɛ asafo debiezukoalɛ ne mɔ azo nvasoɛ la anwo. Anna mɔɔ ɛva ɛvolɛ dɔɔnwo ɛyɛ dahuu ɛzonlenlɛ gyima ne foa ngakyile ne mɔ bie la hanle kɛ: “Debiezukoalɛ ne mɔ maa me diedi ne anu yɛ se kpalɛ. Saa tendɛvolɛ ne ɛmbɔ mɔdenle kpalɛ wɔ ngilehilelɛ nu anzɛɛ yeanga debie fofolɛ bie anwo edwɛkɛ bɔbɔ a, dahuu mete edwɛkɛ mɔɔ boa me ɔmaa mete Baebolo nu nɔhalɛ ne abo kpalɛ la, na yemɔ maa me diedi nu mia.” b Eza mualɛ mɔɔ yɛ mediema maa la maa yɛ diedi nu mia na yɛ nye sɔ ye kpalɛ.​—Wlo. 1:11, 12; 10:17.

14. Kɛzi daselɛlilɛ ɛhɔlɛ maa yɛ diedi nu mia ɛ?

¹⁴ Eza saa yɛfa yɛ nwo yɛwula daselɛlilɛ gyima ne anu a, ɔmaa yɛ diedi nu mia. (Hib. 10:23) Barbara mɔɔ yeva ɛvolɛ mɔɔ bo 70 yezonle Gyihova la hanle kɛ: “Mame menwu ye  dahuu kɛ daselɛlilɛ gyima ne maa yɛ diedi nu mia. Mekɛ mɔɔ melɛka Gyihova ɛwɔkɛ ngɛnlɛma ne mɔ anwo edwɛkɛ meahile menli dɔɔnwo la, ɛnee me diedi ne noko anu ɛlɛyɛ se kpalɛ.”

15. Kɛzi bɛtianwo debiezukoalɛ maa yɛ diedi nu mia ɛ? (Eza nea nvoninli ne mɔ.)

¹⁵ Sunsum nu debie bieko mɔɔ maa yɛ diedi nu mia la a le bɛtianwo debiezukoalɛ. Susan ɛnwu kɛ saa ɔyɛ mekɛ mɔɔ ɔfa ɔsukoa debie la anwo ngyehyɛleɛ a, ɔboa ye kpalɛ. Ɔhanle kɛ: “Wɔ Molɛ, mesukoa dapɛne bieko Ɛzinzalɛ Arane ne. Wɔ Kenlenzile nee Dwɛkɛ, mesiezie me nwo memaa dapɛne avinli debiezukoalɛ ne. Mefa kenle mɔɔ ɛha wɔ dapɛne ne anu la meyɛ me ti anwo debiezukoalɛ.” Kɛmɔ ɔdi ngyehyɛleɛ mɔɔ ɔfa ɔsukoa debie la azo dahuu la ati, ɔlɛmaa yeahɔ zo yeamia ye diedi ne anu. Irene mɔɔ ɛva ɛvolɛ dɔɔnwo ɛyɛ gyima wɔ ewiade amuala gyima ne ati la ɛnwu ye kɛ saa ɔsukoa Baebolo nu ngapezo nwo debie a, ɔmaa ye diedi nu mia. Ɔhanle kɛ: “Ɔyɛ me azibɛnwo kɛ Gyihova ngapezo ne mɔ amuala ba nu pɛpɛɛpɛ mɔɔ ekyi bɔbɔ ɛnga nu a.” c

“KƐ ƆDE YE BIALA LA ƆBARA”

16. Duzu ati a edwɛkɛ mɔɔ Gyihova hanle hilele Habakɛke la baboa yɛdayɛ noko ɛnɛ a? (Hibuluma 10:36, 37)

¹⁶ Gyihova azonvolɛ bie mɔ ɛva mekɛ tendenle ɛhendɛ kɛ ewiade ɛhye bahɔ ye awieleɛ. Wɔ sonla nye zo, ɔzɔho kɛ Nyamenle ɛwɔkɛ ne ɛlɛkyɛ somaa. Gyihova ze kɛzi ɛhye gyegye yɛ la, na ɔhanle ɔhilele ngapezonli Habakɛke kɛ: “Ɛnyelɛzodeɛnwunlɛ ne ɛlɛkendɛ ye mekɛ ne, na ɔlɛpele yeara ye awieleɛ, yɛɛ ɔnrɛbɔ adalɛ. Saa ɔkyɛ bɔbɔ a, kɔ zo maa ɛ nye ɛla ye ade! Ɔluakɛ kɛ ɔde ye biala la ɔbara. Ɔnrɛha amozi!” (Hab. 2:3) Asoo Habakɛke angomekye ati a Nyamenle hanle zɔhane edwɛkɛ ne ɔ? Anzɛɛ ye edwɛkɛ ne baboa yɛdayɛ noko ɛnɛ ɔ? Sunsum ne hanle ɛzoanvolɛ  Pɔɔlo maanle ɔhanle kɛ edwɛkɛ zɔhane fale Kilisienema mɔɔ ɛlɛkendɛ ewiade fofolɛ ne la anwo. (Kenga Hibuluma 10:36, 37.) Nɔhalɛ nu, yɛbahola yɛanyia anwodozo kɛ, saa ɔzɔho kɛ yɛ ngoanelielɛ ne ɛlɛkyɛ bɔbɔ a, “kɛ ɔde ye biala la ɔbara. Ɔnrɛha amozi!”

17. Kɛzi adiema raalɛ bie vale folɛ mɔɔ Gyihova dule Habakɛke la lile gyima ɛ?

¹⁷ Gyihova azonvolɛ dɔɔnwo ɛva Gyihova folɛdulɛ mɔɔ se, “kɔ zo maa ɛ nye ɛla ye ade” la ɛli gyima​—bɔbɔ wɔ ɛvolɛ dɔɔnwo anu. Kɛ neazo la, adiema raalɛ Louise bɔle ɔ bo kɛ ɔsonle Gyihova wɔ 1939. Ɔhanle kɛ: “Wɔ mekɛ zɔhane, ɛnee mesuzu kɛ Amagɛdɔn bara kolaa na meawie sukunwiɔ. Noko yeamba ye zɔ. Mɔɔ ɛboa me wɔ ɛvolɛ dɔɔnwo anu la a le menli mɔɔ ɛnee ɔwɔ kɛ bɛkendɛ kɛ Gyihova bali ye ɛwɔkɛ ne mɔ azo la anwo edwɛkɛ mɔɔ mengengale ye wɔ Baebolo ne anu la. Bie mɔ a le Nowa, Ebileham, Dwosefi nee menli gyɛne mɔɔ bɛhendɛle mekɛ tendenle kolaa na bɛ sa aha ahatualɛ mɔɔ Gyihova vale bɔle bɛ ɛwɔkɛ la. Kɛmɔ yɛmaa yɛ nye da ɛwɔkɛ ne mɔ ade la ati, yeboa me nee awie mɔ yemaa yɛnyia anwodozo kɛ ewiade fofolɛ ne ɛbikye.” Gyihova azonvolɛ dɔɔnwo mɔɔ bɛva mekɛ tendenle bɛzonle ye la nee ye yɛ adwenle!

18. Saa yɛnea abɔdeɛ kpalɛ a, kɛzi ɔbamaa diedi mɔɔ yɛlɛ wɔ ewiade fofolɛ ne anu la anu amia ɛ?

¹⁸ Nɔhalɛ nu, ewiade fofolɛ ne ɛtɛbale. Noko yɛ ninyɛne mɔɔ wɔ ɛke la bie mɔ nzonlɛ​—nwɔlɔra, mbaka, nane nane yɛɛ menli. Yɛ nuhua biala ɛnrɛhola ɛnrɛzu kpolera kɛ ninyɛne ɛhye mɔ anu biala ɛnle ɛkɛ, ɔnva nwo kɛ mekɛ bie ɛnee bɛnle ɛkɛ ne la. Bɛwɔ ɛkɛ ne kɛkala ɔluakɛ Gyihova a bɔle bɛ a. (Gyn. 1:1, 26, 27) Eza yɛ Nyamenle ne ɛbɔ ɛwɔkɛ kɛ ɔbayɛ ewiade fofolɛ. Ɔbali zɔhane ɛwɔkɛ ne azo. Wɔ ewiade fofolɛ ne anu, menli banyia kpɔkɛdelɛ mɔɔ di munli na bɛadɛnla aze dahuu. Wɔ Nyamenle mekɛ kpalɛ nu, ewiade fofolɛ ne bara kɛ mɔɔ ninyɛne mɔɔ wɔ aleɛabo ɛnɛ la noko wɔ ɛkɛ ne la.​—Aye. 65:17; Yek. 21:3, 4.

19. Kɛ ɔkɛyɛ na wɔamaa wɔ diedi nu amia ɛ?

¹⁹ Noko kɛkala, fa nwolɛ adenle biala mɔɔ ɛbanyia la mia wɔ diedi ne anu. Kile ɛkpɔnedeɛ ne anwo anyezɔlɛ. Dwenledwenle Gyihova tumi ne anwo. Yɛ sunsum nu ninyɛne dɔɔnwo. Saa ɛyɛ ye zɔ a, ɛbahola wɔaboka “bɛdabɛ mɔɔ bɛdua diedi nee abotane zo bɛnyia ɛwɔkɛ ne mɔ la.”​—Hib. 6:11, 12; Wlo. 5:5.