1. Duzu a Gyihova kpondɛ avi yɛ ɛkɛ a?

 NINYƐNE mɔɔ maa agyalɛma anye die kpalɛ la anu ko a le mekɛ mɔɔ bɛbawo bɛ ra la. Awovolɛ ne mɔ anye die bɛ ra ne anwo ɛdeɛ, noko bɛngulo kɛ dahuu ɔbayɛ kakula. Nɔhalɛ nu, saa bɛ ra ne angola nyi a, ɔbagyegye bɛ kpalɛ. Zɔhane ala a saa yɛtudu agyakɛ mɔɔ limoa la kɛ yɛdi Gyisɛse anzi a, ɔmaa Gyihova anye die a, noko ɔngulo kɛ yɛka ɛkɛ ne ala. (1 Kɔl. 3:1) Emomu, ɔse yɛyɛ Kilisienema mɔɔ yɛyɛ “mgbanyinli.”—1 Kɔl. 14:20.

2. Duzu a yɛbazuzu nwo wɔ edwɛkɛ ɛhye anu a?

² Saa bɛka kɛ ɛyɛ Kilisienenli mɔɔ wɔyɛ kpanyinli a, duzu a ɔkile a? Duzu a yɛyɛ a ɔmaa yɛyɛ Kilisienema mɔɔ yɛnyi sunsum nu a? Kɛzi sunsum nu aleɛ mɔɔ anu yɛ ɛlomboɛ la boa yɛ wɔ yɛ ɛnyinlɛ ne anu ɛ? Yɛɛ duzu ati a ɔnle kɛ yɛdie yɛ nwo yɛdi somaa a? Yɛbazuzu kpuya ɛhye mɔ anwo mualɛ ne anwo wɔ edwɛkɛ ɛhye anu.

BƐKA KƐ ƐYƐ KILISIENENLI MƆƆ WƆNYI SUNSUM NU A, ƆKILE DUZU?

3. Saa bɛka kɛ ɛyɛ Kilisienenli mɔɔ wɔyɛ kpanyinli a, duzu a ɔkile a?

³ Wɔ Baebolo ne anu, Giliki edwɛkɛkpɔkɛ mɔɔ bɛhile ɔ bo “mgbanyinli” la eza kola kile “bɛnyi sunsum nu,” “bɛdi munli” yɛɛ “bɛwie nyi.” a (1 Kɔl. 2:6) Saa yɛanyɛ ngakula wɔ sunsum nu na yɛyɛ mrenyia nee mraalɛ mɔɔ yɛnyi sunsum nu a, ɛnee yɛle Kilisienema mɔɔ yɛyɛ mgbanyinli. Saa yɛdwu zɔhane bodane ne anwo bɔbɔ a, ɔnle kɛ yɛgyakyi kɛ yɛbanyia anyuhɔlɛ wɔ sunsum  nu. (1 Tim. 4:15) Yɛ muala, mɔɔ ngakula boka nwo la bahola anyi sunsum nu. Noko duzu a kile kɛ Kilisienenli bie ɛnyi sunsum nu a?

4. Duzu a maa yɛnwu kɛ Kilisienenli bie ɛnyi sunsum nu a?

⁴ Kilisienenli mɔɔ ɛnyi sunsum nu la fa Nyamenle ngyinlazo ne mɔ amuala bɔ ye ɛbɛla, ɔmkpa nu ɔnyeye nuhua ne mɔɔ ɔkulo kɛ ɔfa ɔbɔ ye ɛbɛla la. Kɛmɔ ɔnli munli la ati, ɔbayɛ nvonleɛ. Noko ɔdua kɛzi ɔbɔ ye ɛbɛla alehyenlɛ biala la azo ɔkile kɛ kɛzi ɔdwenle nee kɛzi ɔyɛ yɛ nyɛleɛ la nee Nyamenle ɛhulolɛdeɛ yia. Yeva subane fofolɛ ne yewula yɛɛ dahuu ɔbɔ mɔdenle kɛ ɔbamaa ye nzuzulɛ nee adwenle mɔɔ Nyamenle lɛ la ayia. (Ɛfɛ. 4:​22-24) Yetete ɔ nwo kɛ ɔbagyinla Gyihova mɛla nee ye ngyinlazo ne mɔ azo yeasisi kpɔkɛ kpalɛ, ɔti ɔngyia kɛ ɔbanyia debie biala mɔɔ ɔwɔ kɛ ɔyɛ la anwo mɛla. Saa ɔsi kpɔkɛ a, ɔbɔ mɔdenle kɛ ɔbali ye kpɔkɛzilɛ ne anwo gyima.—1 Kɔl. 9:​26, 27.

5. Ngyegyelɛ boni mɔ a Kilisienenli mɔɔ ɔtɛnyinle sunsum nu la yia a? (Ɛfɛsɛsema 4:​14, 15)

⁵ Noko bɛkola bɛfa “mɛlɛbɛla,” nee ‘agyibadolɛ’ bɛbɛlɛbɛla Kilisienenli mɔɔ ɔtɛnyinle sunsum nu la, yɛɛ ɔdie bɛdabɛ mɔɔ bɛdua TV, riledio nee amaneɛbɔlɛ ninyɛne gyɛne zo bɛka adalɛ edwɛkɛ yɛɛ kpɔkyevolɛma edwɛkɛ ɔdi. b (Kenga Ɛfɛsɛsema 4:​14, 15.) Bie a ɔta ɔtwe nungule, ɔtwehwe butule ɔba, ɔfa ɛya anzɛɛ ɔyia sɔnea a ɔngola ɔ nloa gyinla.—1 Kɔl. 3:3.

6. Yɛ kɛzi awie kola nyi sunsum nu la anwo neazo? (Eza nea nvoninli ne.)

⁶ Kɛ mɔɔ yɛlimoale yɛhanle la, Ngɛlɛlera ne fa sunsum nu ɛnyinlɛ toto kakula mɔɔ ɛlɛnyi la anwo. Kakula ne ɛnze ninyɛne dɔɔnwo ɔti ɔhyia kpanyinli mɔɔ babɔ ɔ nwo bane na yeahile ye adenle la. Kɛ ndonwo la, saa ɛrɛladane bie nee ɔ ra raalɛ kakula ɛlɛpɛ kale adenle a, ɔbaha yeahile ye kɛ ɔzɔ ɔ sa. Saa kakula raalɛ ne ɛlɛnyi a, bie a ye mame bamaa ye adenle yeamaa yeapɛ kale adenle ne, noko ɔbamaa yeanwu ye kɛ ɔwɔ kɛ ɔnea ye bɛne zo nee ye fema zo kolaa na yeapɛ nu. Saa kakula ne nyi a, ɔdaye mumua ne ɔnwu esiane ne mɔ na ɔtwe ɔ nwo ɔfi nwo. Kɛ mɔɔ ngakula hyia adehilelɛ fi mgbanyinli ɛkɛ amaa bɛahwe bɛ nwo bɛavi esiane nwo la, fane dɔɔnwo ne ala, Kilisienema mɔɔ bɛtɛnyinle sunsum nu la hyia moalɛ fi Kilisienema mɔɔ bɛnyi sunsum nu la ɛkɛ amaa bɛandɔ sunsum nu esiane nu na bɛasisi kpɔkɛ kpalɛ. Noko  bɛbayɛ Kilisienema mɔɔ bɛnyi sunsum nu la a, saa ɔwɔ kɛ bɛsi kpɔkɛ bie a, bɛsuzu Baebolo ngyinlazo nwo bɛnwu adwenle mɔɔ Gyihova lɛ wɔ edwɛkɛ ne anwo la na bɛagyinla yemɔ azo bɛazi bɛ kpɔkɛ ne.

7. Asoo Kilisienema mɔɔ bɛnyi sunsum nu la hyia awie mɔ moalɛ ɔ?

⁷ Asoo ɛhye kile kɛ Kilisienenli mɔɔ ɛnyi sunsum nu la ɛnrɛhyia awie moalɛ ɛlɛ ɔ? Kyɛkyɛ. Ɔyɛ a ɔwɔ kɛ menli mɔɔ bɛnyi sunsum nu la kpondɛ moalɛ fi awie mɔ ɛkɛ. Noko bie a awie mɔɔ ɔtɛnyinle sunsum nu la anye la kɛ awie mɔ baha mɔɔ ɔwɔ kɛ ɔyɛ la ahile ye anzɛɛ bazi kpɔkɛ mɔɔ ɔwɔ kɛ ɔdaye a ɔsi la amaa ye. Noko Kilisienenli mɔɔ ɛnyi sunsum nu la bamaa awie mɔ ava bɛ nrɛlɛbɛ nee bɛ anwubielɛ aboa ye, noko ɔmmaa ɔ rɛle ɛnvi kɛ Gyihova kulo kɛ ‘awie biala ɔdaye ɔsoa ye adesoa.’—Gal. 6:5.

8. Adenle boni azo a Kilisienema mɔɔ bɛnyi sunsum nu la anu biala le ngakyile a?

⁸ Kɛmɔ asolo kɛzi kpanyinli biala de la, zɔhane ala a Kilisienema mɔɔ ɛnyi sunsum nu la lɛ subane ngakyile le kɛ nrɛlɛbɛ, akɛnrasesebɛ, ahunlunyele yɛɛ anwunvɔnezelɛ a. Eza saa Kilisienema nwiɔ mɔɔ bɛnyi sunsum nu la yia tɛnlabelɛ ko ne ala a, bɛ nuhua biala bagyinla Ngɛlɛlera ne azo asisi kpɔkɛ, noko bie a biala kpɔkɛzilɛ ɛdeɛ bayɛ ngakyile. Titili saa ɔwɔ kɛ bɛgyinla bɛ adwenle ne mɔɔ bɛva Baebolo ne bɛtete ye la azo bɛsi kpɔkɛ a. Ɔlua ɛhye ati, saa bɛ nee awie mɔ kpɔkɛzilɛ ɛnle ko bɔbɔ a, bɛmbua bɛ ndɛne. Emomu, bɛfa bɛ adwenle bɛsie koyɛlɛ mɔɔ ɔwɔ kɛ ɔtɛnla bɛ avinli la azo.—Wlo. 14:10; 1 Kɔl. 1:10.

DUZU A YƐYƐ A ƆBAMAA YƐANYI SUNSUM NU A?

9. Asoo kɛ ɔde ye biala la yɛbanyi sunsum nu ɔ? Kilehile nu.

⁹ Saa bɛwo yɛ a, mekɛ ɛlɛkɔ la, ye biala anu yɛbanyi yɛayɛ mgbanyinli, noko sunsum nu ɛnyinlɛ ɛnle zɔ. Kɛ neazo la, mediema mɔɔ wɔ Kɔlente la liele edwɛkpa ne lile, bɛzɔnenle bɛ, bɛnyianle sunsum nwuanzanwuanza ne yɛɛ bɛnyianle adehilelɛ mɔɔ ɛzoanvolɛ Pɔɔlo vale maanle bɛ la azo nvasoɛ. (Gyi. 18:​8-11) Noko ɛnee bɛ nuhua dɔɔnwo ɛtɛnyinle sunsum nu ɔnva nwo kɛ bɛzɔnenle bɛ ɛhyɛ la. (1 Kɔl. 3:2) Kɛ ɔkɛyɛ na ɛhye bie ando yɛ ɛ?

10. Kɛ ɔkɛyɛ na yɛanyi sunsum nu ɛ? (Dwuudu 20)

¹⁰ Amaa yɛanyi sunsum nu la, ɔwɔ kɛ yɛnyia ɛhulolɛ kɛ yɛbanyi. Bɛdabɛ mɔɔ “bɛkulo kɛ bɛdua ye kɛ menli mɔɔ ɛnlɛ anwubielɛ,” kile kɛ, bɛkulo kɛ bɛyɛ ngakula wɔ sunsum nu dahuu la ɛnrɛnyia anyuhɔlɛ ɛlɛ. (Mrɛ. 1:22) Yɛngulo kɛ yɛbayɛ kɛ bɛdabɛ mɔɔ bɛyɛ mgbanyinli noko bɛmaa bɛ awovolɛ si kpɔkɛ maa bɛ la. Emomu, yɛkulo kɛ yɛdi yɛ ɛzonlelilɛ nwo gyima na yɛyɛ biala mɔɔ yɛbahola la amaa yɛ nee Gyihova anyia agɔnwolɛvalɛ kpalɛ dahuu. (Kenga Dwuudu 20.) Saa ɛlɛbɔ mɔdenle amaa wɔanyi sunsum nu a, sɛlɛ Gyihova kɛ ɔmaa ɛnyia “ɛhulolɛ ne yɛɛ anwosesebɛ ne” amaa wɔahola wɔayɛ zɔ.—Fel. 2:13.

11. Duzu a Gyihova yɛ fa boa yɛ amaa yɛanyi sunsum nu a? (Ɛfɛsɛsema 4:​11-13)

¹¹ Gyihova ɛngulo kɛ yɛ ngomekye yɛbɔ mɔdenle kɛ yɛnyi sunsum nu. Mediema mɔɔ sonle kɛ neavolɛma nee kilehilevolɛma wɔ Kilisiene asafo ne anu la ɛziezie bɛ nwo kɛ bɛbaboa yɛ bɛamaa yeanyi sunsum nu na yɛ nee Gyihova anyia agɔnwolɛvalɛ kpalɛ, yɛayɛ “kɛ sonla mɔɔ ɛwie nyi na yeli munli kɛ mɔɔ Kelaese de la.” (Kenga Ɛfɛsɛsema 4:​11-13.) Eza Gyihova fa ye sunsum nwuanzanwuanza ne maa yɛ amaa yɛanyia “Kelaese adwenle.” (1 Kɔl. 2:​14-16) Bieko, Nyamenle maanle bɛhɛlɛle Edwɛkpa nna ne amaa yɛanwu kɛzi Gyisɛse hilehilele, ɔdendɛle nee kɛzi ɔyɛle ye nyɛleɛ wɔ mekɛ mɔɔ ɔlɛyɛ ye ɛzonlenlɛ gyima ne wɔ azɛlɛ ye azo la. Saa ɛsukoa kɛzi Gyisɛse dwenle na ɔyɛ ye ninyɛne la a, ɛbahola wɔadwu bodane mɔɔ gyi ɛ nye zo kɛ ɛnyi sunsum nu la anwo.

 KƐZI SUNSUM NU ALEƐ MƆƆ ANU YƐ ƐLOMBOƐ LA BOA YƐ LA

12. Duzu a le “Kelaese anwo mɔlebɛbo ngilehilelɛ ne”?

¹² Amaa yɛanyi sunsum nu la, eza ɔwɔ kɛ yɛsukoa dɔɔnwo yɛtɛla “Kelaese anwo mɔlebɛbo ngilehilelɛ ne,” mɔɔ yemɔ a le Kilisiene mɔlebɛbo Baebolo nu ngilehilelɛ ne la. Bie mɔ a le anlubɛnwo, diedi, ɛzɔnenlɛ yɛɛ ewudwazo ne. (Hib. 6:​1, 2) Ɛhye mɔ le mɔlebɛbo ngilehilelɛ mɔɔ Kilisienema kɔsɔɔti die di la anu bie. Ɔti mɔɔ ɛzoanvolɛ Pita tendɛ ahile menli ekpunli ne wɔ Pɛntekɔso kenle ne la, ɔhanle ninyɛne ɛhye mɔ bie anwo edwɛkɛ. (Gyi. 2:​32-35, 38) Ɔwɔ kɛ yɛdie mɔlebɛbo ngilehilelɛ ɛhye mɔ yɛto nu amaa yɛayɛ Kelaese ɛdoavolɛma. Kɛ neazo la, Pɔɔlo bɔle yɛ kɔkɔ kɛ, awie biala mɔɔ yeanlie ewudwazo nwo ngilehilelɛ ne yeanli la, ɛnrɛhola ɛnrɛyɛ nɔhalɛ Kilisienenli. (1 Kɔl. 15:​12-14) Noko ɔnle kɛ yɛmaa yɛ kunlu dwo nɔhalɛ ne anwo edwɛkɛ ekyi mɔɔ yɛze la ala anwo.

13. Duzu a ɔwɔ kɛ yɛyɛ amaa yɛanyia sunsum nu aleɛ mɔɔ anu yɛ ɛlomboɛ mɔɔ bɛha ye wɔ Hibuluma 5:14 la azo nvasoɛ a? (Eza nea nvoninli ne.)

¹³ Sunsum nu aleɛ mɔɔ anu yɛ ɛlomboɛ la ɛnle kɛ mɔlebɛbo ngilehilelɛ ne la; emomu, ɔfale Gyihova mɛla nee ye ngyinlazo ne mɔ mɔɔ boa yɛ maa yɛnwu Gyihova adwenle la anwo. Amaa yɛanyia aleɛ zɛhae azo nvasoɛ la, ɔwɔ kɛ yɛsukoa Nyamenle Edwɛkɛ ne, yɛdwenledwenle nwo na yɛfa yɛbɔ yɛ ɛbɛla. Mekɛ mɔɔ yɛlɛyɛ zɔ la, ɛnee yɛlɛtete yɛ nwo amaa yɛahola yɛasisi kpɔkɛ mɔɔ Gyihova anye die nwo la. c—Kenga Hibuluma 5:14.

14. Kɛzi Pɔɔlo boale Kɔlentema maanle bɛnyinle sunsum nu ɛ?

¹⁴ Saa Kilisienema mɔɔ bɛtɛnyinle sunsum nu la kɔ tɛnlabelɛ ngakyile mɔɔ nwolɛ mɛla fɔɔnwo ɛnle Baebolo ne anu la anu a, ɔyɛ se ɔmaa bɛ kɛ bɛbasisi kpɔkɛ kpalɛ. Saa ɔba ye zɛhae a, bie mɔ te nganeɛ kɛ bɛbahola bɛayɛ biala mɔɔ bɛkulo la. Bie mɔ noko annyia nwolɛ mɛla a, bɛkpondɛ kɛ awie kile bɛ mɔɔ ɔwɔ kɛ bɛyɛ la. Kɛ neazo la, ɔzɔho kɛ ɛnee Kɔlente Kilisienema ne kpondɛ kɛ Pɔɔlo maa bɛnwu kɛ saa bɛbahola bɛali aleɛ mɔɔ bɛva bɛbɔ afɔle bɛmaa awozonle anzɛɛ bɛnrɛhola bɛnrɛli a. Kɛ anrɛɛ Pɔɔlo bahile bɛ mɔɔ ɔwɔ kɛ bɛyɛ la, ɔmaanle bɛnwunle kɛ ɔwɔ kɛ bɛgyinla bɛ adwenle ne nee “nwolɛ adenle mɔɔ bɛlɛ bɛkpa  mɔɔ bɛkulo la” azo bɛsi kpɔkɛ. Ɔhilehilele ngyinlazo bie mɔ mɔɔ ɔbaboa awie biala amaa ye adwenle ambua ye fɔlɛ na mekɛ ko ne ala yeandenda awie mɔ agyakɛ anu la anu. (1 Kɔl. 8:​4, 7-9) Ɛnee Pɔɔlo ɛlɛboa Kɔlentema ne yeamaa bɛanyi sunsum nu amaa bɛahola bɛava bɛ adwenle bɛali gyima na bɛanva bɛ adwenle bɛanzɔ awie mɔ anzɛɛ bɛ nye anla kɛ bɛbali mɛla bɛamaa bɛ.

15. Kɛzi Pɔɔlo boale Hibulu Kilisienema ne maanle bɛnyianle anyuhɔlɛ wɔ sunsum nu ɛ?

¹⁵ Yɛnyia ɛzukoalɛdeɛ bie mɔɔ hyia la wɔ edwɛkɛ mɔɔ Pɔɔlo hɛlɛle hɔmaanle Hibulu Kilisienema ne la anu. Bie mɔ andoa zo annyia anyuhɔlɛ wɔ sunsum nu; ɛnee “bɛzia bɛyɛ kɛ menli mɔɔ hyia nyɛfonzule na tɛ [sunsum nu] aleɛ mɔɔ anu yɛ ɛlomboɛ la.” (Hib. 5:12) Bɛanzukoa nɔhalɛ ne anwo ninyɛne fofolɛ mɔɔ ɛnee Gyihova ɛlɛdua asafo ne azo ahilehile bɛ ngyikyingyikyi la na bɛalie bɛado nu. (Mrɛ. 4:18) Kɛ neazo la, ɛnee diedima mɔɔ le Dwuuma la anu dɔɔnwo tɛmaa menli anwosesebɛ kɛ bɛli Mosisi Mɛla ne azo wɔ mekɛ mɔɔ ɛnee Kelaese afɔlebɔlɛ ne ɛva Mɛla ne ɛra awieleɛ wɔ kɛyɛ ɛvolɛ 30 mɔɔ pɛle nu anu la. (Wlo. 10:4; Tae. 1:10) Nɔhalɛ nu, wɔ ɛvolɛ 30 zɔhane anu, ɛnee ɔwɔ kɛ Dwuu Kilisienema ne te ɔ bo kɛ ɔngyia kɛ bɛdi Mɛla ne azo bieko! Awie biala mɔɔ ɛgenga Pɔɔlo kɛlata ne mɔɔ sunsum ne maanle ɔhɛlɛle ɔhɔmaanle Hibuluma ne la bahola aha ye wienyi kɛ, sunsum nu aleɛ mɔɔ anu yɛ ɛlomboɛ la a wɔ buluku zɔhane anu a. Ɛnee yemɔ a zɔhane Kilisienema ne hyia nwo amaa bɛamia diedi mɔɔ bɛlɛ kɛ, Kilisiene ɛzonlenlɛ nwo ngyehyɛleɛ ne kpogya tɛla Mɛla ne la anu a. Eza ɔbamaa bɛanyia akɛnrasesebɛ bɛahɔ zo bɛaha edwɛkɛ ne ɔnva nwo dwazotia.—Hib. 10:​19-23.

MMADIE Ɛ NWO ƐDI SOMAA

16. Saa ɛye mɔdenle mɔɔ yɛbɔ yɛanyi sunsum nu la ɛsie ahane a, duzu bieko a ɔwɔ kɛ yɛyɛ a?

¹⁶ Ɔnle kɛ yɛbɔ mɔdenle yɛnyi sunsum nu ala, emomu, eza ɔwɔ kɛ yɛsɔ mɔɔ yɛnyia la anu boɛ. Yɛbahola yɛayɛ ye zɔ a, ɔnle kɛ yɛdie yɛ nwo yɛdi somaa. (1 Kɔl. 10:12) Ɔwɔ kɛ ‘yɛkɔ zo yɛsɔ yɛ nwo yɛnea’ amaa yɛanwu kɛ saa yɛlɛkɔ zo yɛanyia anyuhɔlɛ a.—2 Kɔl. 13:5.

17. Kɛzi Pɔɔlo kɛlata ne mɔɔ ɔhɛlɛle ɔhɔmaanle Kɔlɔsaema ne la maa yɛnwu kɛzi ɔhyia kɛ yɛnyi sunsum nu dahuu ɛ?

¹⁷ Wɔ Pɔɔlo kɛlata ne mɔɔ ɔhɛlɛle ɔhɔmaanle Kɔlɔsaema ne la anu, eza ɔzile kɛzi ɔhyia kɛ  yɛyɛ menli mɔɔ yɛnyi sunsum nu dahuu la azo. Ɛnee bɛrayɛ Kilisienema mɔɔ bɛnyi sunsum nu bɔbɔ ɛdeɛ, noko Pɔɔlo bɔle bɛ kɔkɔ kɛ bɛnlea boɛ na awie anva ewiade nzuzulɛ anyɛ bɛ ngɛkɛlɛ. (Kɔl. 2:​6-10) Na Ɛpafelase, mɔɔ ɛnee ze bɛdabɛ mɔɔ bɛwɔ asafo ne anu kpalɛ la yɛle asɔne dahuu kɛ ‘bɛbagyinla kpundii kɛ menli mɔɔ ɛnyi sunsum nu la.’ (Kɔl. 4:12) Duzu a yɛsukoa yɛfi ɛhye anu a? Pɔɔlo nee Ɛpafelase edwɛkɛ ne maa yɛte ɔ bo kɛ, saa yɛbayɛ menli mɔɔ yɛnyi sunsum nu dahuu a, yɛhyia Nyamenle moalɛ, noko ɔwɔ kɛ yɛdayɛ noko yɛbɔ yɛ nwo mɔdenle yɛmia yɛ nee ye agɔnwolɛvalɛ ne anu. Ɛnee bɛkulo kɛ Kɔlɔsaema ne yɛ Kilisienema mɔɔ bɛnyi sunsum nu dahuu ɔnva nwo ngyegyelɛ biala mɔɔ bɛlɛyia la.

18. Duzu a bahola ado Kilisienenli mɔɔ ɛnyi sunsum nu la ɛ? (Eza nea nvoninli ne.)

¹⁸ Pɔɔlo bɔle Hibuluma ne kɔkɔ kɛ, saa Kilisienenli mɔɔ ɛnyi sunsum nu la annea boɛ a, ɔbahola yeaminli Nyamenle anyunlu ɛlolɛ mɔɔ ɔnrɛnyia ye bieko ɛlɛ a. Kilisienenli bie ahonle bahola asolo kpole kpalɛ mɔɔ ɔngola ɔnnu ɔ nwo na Nyamenle ava ahyɛ ye a. Mɔɔ yɛ anyelielɛ la a le kɛ, ɛnee Hibuluma ne tɛnlabelɛ ne ɛtɛdwule zɔ. (Hib. 6:​4-9) Na bɛdabɛ mɔɔ bɛwɔ ɛkɛ ɛnɛ, mɔɔ bɛgyakyi debiezukoalɛ nee daselɛlilɛ ɛhɔlɛ anzɛɛ bɛtu bɛ noko nzinlii bɛnu bɛ nwo la ɛ? Kɛmɔ bɛbɛlɛ bɛ nwo aze na bɛnu bɛ nwo la ati, bɛle ngakyile bɛfi bɛdabɛ mɔɔ Pɔɔlo hanle bɛ nwo edwɛkɛ la anwo. Noko saa bɛsia bɛba Gyihova ɛkɛ a, bɛbahyia ye moalɛ. (Yiz. 34:​15, 16) Bie a asafo nu mgbanyima ne mɔ bayɛ ngyehyɛleɛ amaa adiema bie mɔɔ ɛnyi sunsum nu la aboa bɛ yeamaa bɛagyinla bɛ gyakɛ azo wɔ sunsum nu bieko.

19. Duzu ɔwɔ kɛ yɛfa yɛyɛ yɛ bodane a?

¹⁹ Saa ɛlɛbɔ mɔdenle kɛ ɛbayɛ Kilisienenli mɔɔ wɔnyi sunsum nu a, ɛbahola wɔadwu wɔ bodane ne anwo! Kɔ zo di sunsum nu aleɛ mɔɔ anu yɛ ɛlomboɛ la na maa wɔ nzuzulɛ nee adwenle mɔɔ Gyihova lɛ wɔ ninyɛne nwo la ɛyɛ ko. Na saa ɛle Kilisienenli mɔɔ wɔnyi sunsum nu dɛba a, ɛnee kɔ zo sɔ mɔɔ wɔnyia la anu boɛ dahuu.