1. Ɔba ye wɔ menli mɔɔ yɛ nee bɛ tendɛ wɔ daselɛlilɛ nu la anwo a, kɛzi bie mɔ te nganeɛ wɔ nwo ɛ? (Eza nea nvoninli ne.)

 YƐLE Gyihova menli, ɔti yɛka edwɛkpa ne yɛkile awie mɔ ɔluakɛ yɛkulo yɛ anwuma Selɛ ne yɛɛ yɛkulo kɛ yɛboa awie mɔ yɛmaa bɛbanwu ye. Nolobɔlɛma dɔɔnwo anye die edwɛkɛhanlɛ gyima ne anwo kpalɛ. Noko ɔyɛ se ɔmaa bie mɔ kɛ bɛ nye balie nwo. Duzu ati ɔ? Bie mɔ se nyiane kpalɛ yɛɛ bɛnlie bɛnli kɛ bɛbahola kilehile. Bie mɔ noko anye ɛnlie nwo kɛ bɛbahɔ awie mɔ sua nu wɔ mekɛ mɔɔ bɛtɛfɛlɛ bɛ wɔ ɛkɛ ne la. Bie mɔ noko sulo kɛ bie a menli bava bɛ nwo ɛya. Bɛtetele bie mɔ noko kɛ ɔnle kɛ bɛmaa awie biala nee bɛ nyia edwɛkɛ. Mediema ɛhye mɔ kulo Gyihova kpalɛ ɛdeɛ, noko ɔnla aze ɔmmaa bɛ kɛ bɛbaha edwɛkɛ ne bɛahile menli mɔɔ bɛnze bɛ la. Noko bɛze kɛzi gyima ɛhye anwo hyia la na bɛfa bɛ nwo bɛwula nu dahuu. Nea kɛzi bɛmaa Gyihova anye die a!

2. Saa ɔyɛ se ɔmaa wɔ kɛ ɛ nye balie daselɛlilɛ nwo a, duzu ati a ɔnle kɛ ɛmaa ɛ sa nu to a?

² Asoo ninyɛne zɛhae mɔ bie maa ɔyɛ se kɛ ɛ nye balie daselɛlilɛ nwo ɔ? Saa zɔhane ɔde a, mmamaa ɛ sa nu to. Bie a anwodozo zɔhane mɔɔ ɛnlɛ la kile kɛ ɛbɛlɛ ɛ nwo aze na ɛngulo kɛ ɛtwe menli adwenle ɛba ɛ nwo zo, yɛɛ ɛngulo kɛ ɛ nee awie biala su kpolera. Awie biala noko ɛngulo kɛ awie mɔ bava ɔ nwo ɛya, titili wɔ mekɛ mɔɔ ɔlɛbɔ mɔdenle kɛ ɔyɛ bɛ boɛ la. Wɔ anwuma Selɛ ne ze ngyegyelɛ mɔɔ ɛlɛyia la kpalɛ na ɔkulo kɛ ɔfa moalɛ mɔɔ ɛhyia la ɔmaa wɔ. (Aye. 41:13) Wɔ edwɛkɛ ɛhye anu, yɛbazuzu ninyɛne nnu mɔɔ yɛbahola yɛayɛ amaa yɛagyinla ngyegyelɛ ɛhye mɔ  anloa nee kɛzi yɛ nye balie daselɛlilɛ nu la anwo.

MAA NYAMENLE EDWƐKƐ NE ƐMAA WƆ ANWOSESEBƐ

3. Duzu a boale ngapezonli Gyɛlɛmaya maanle ɔbɔle edwɛkɛ ne nolo ɔhilele awie mɔ a?

³ Ɔvi tete, edwɛkɛ mɔɔ Nyamenle ka kile ye azonvolɛ la maa bɛ anwosesebɛ wɔ mekɛ mɔɔ bɛbanyia gyimalilɛ bie mɔɔ yɛ se la. Fa ngapezonli Gyɛlɛmaya kɛ neazo. Mɔɔ Gyihova hanle kɛ ɔhɔbɔ edwɛkɛ ne nolo la, ye ahonle dule. Ɔhanle kɛ: “Menze tendɛ, ɔluakɛ mele kakula.” (Gyɛ. 1:6) Duzu a boale ye maanle ɔnyianle akɛnrasesebɛ ɔhɔhanle edwɛkɛ ne a? Edwɛkɛ mɔɔ Nyamenle hanle la a maanle ye anwosesebɛ a. Gyɛlɛmaya hanle kɛ: “Ɔyɛle . . . kɛ senle mɔɔ ɛlɛsɔ na bɛva bɛwula me mbowule nu la, na menvɛle.” (Gyɛ. 20:​8, 9) Ɛnee menli mɔɔ Gyɛlɛmaya kaha edwɛkɛ ne ahile bɛ la le anyetele ɛdeɛ, noko edwɛkɛ mɔɔ bɛvale bɛzoanle ye la maanle ye anwosesebɛ maanle ɔyɛle gyima ne.

4. Saa yɛkenga Nyamenle Edwɛkɛ ne na yɛdwenledwenle nwo a, duzu a si a? (Kɔlɔsaema 1:​9, 10)

⁴ Kilisienema nyia anwosesebɛ fi Nyamenle Edwɛkɛ ne anu. Ɛzoanvolɛ Pɔɔlo hanle ye wɔ kɛlata mɔɔ ɔhɛlɛle ɔhɔmaanle Kɔlɔsae asafo ne la anu kɛ saa ɔ mediema ne mɔ nyia nɔhalɛ ndelebɛbo a, ɔbamaa “bɛalua bɛamaa yeafɛta Gyihova” wɔ mekɛ mɔɔ “bɛlɛkɔ zo bɛazo ma wɔ gyima kpalɛ biala anu” la. (Kenga Kɔlɔsaema 1:​9, 10.) Gyima kpalɛ zɔhane bie a le edwɛkpa ne nolobɔlɛ. Ɔti saa yɛkenga Nyamenle Edwɛkɛ ne na yɛdwenledwenle nwo a, diedi mɔɔ yɛlɛ wɔ Gyihova anu la yɛ kpole na yɛte kɛzi ɔhyia kɛ yɛbɔ Belemgbunlililɛ edwɛkɛ ne nolo la abo kpalɛ.

5. Kɛ ɔkɛyɛ na yɛanyia yɛ Baebolo ɛgengalɛ nee ye ɛzukoalɛ zo nvasoɛ kpalɛ ɛ?

⁵ Amaa yɛanyia Nyamenle Edwɛkɛ ne azo nvasoɛ kpalɛ la, ɔnle kɛ yɛlɛkenga, yɛlɛsukoa anzɛɛ yɛlɛdwenledwenle nwo a, yɛfa yɛnriandi anzɛɛ yɛpele yɛ nwo. To ɛ rɛle aze. Saa ɛnwu tɛkese bie mɔɔ ɔyɛ se kɛ ɛbade ɔ bo a, mmawulu zo ɛkɔ. Emomu, dua Watch Tower Publications Index anzɛɛ Gyihova Alasevolɛ Neɛnleanu Buluku ne azo kpondɛ mɔɔ ɔkile la. Saa ɛtɔ alagye ɛsukoa a, ɛbamia anwodozo mɔɔ ɛlɛ kɛ Nyamenle Edwɛkɛ ne le nɔhalɛ la anu. (1 Tɛs. 5:21) Saa ɛnyia anwodozo kpole zɛhae a, ɔbamaa ɛ nye alie nwo kpalɛ kɛ ɛbaha mɔɔ wɔzukoa la anwo edwɛkɛ wɔahile awie mɔ.

 SIEZIE Ɛ NWO KPALƐ MAA DASELƐLILƐ

6. Duzu ati a ɔwɔ kɛ yɛsiezie yɛ nwo kpalɛ yɛmaa daselɛlilɛ a?

⁶ Saa ɛsiezie ɛ nwo kpalɛ ɛmaa daselɛlilɛ a, ɔnrɛmaa wɔ ahonle ɛnrɛdu kpole wɔ mekɛ mɔɔ ɛ nee awie mɔ ɛlɛtendɛ la. Kolaa na Gyisɛse amaa ye ɛdoavolɛma ne ahɔ kɛ bɛkabɔ edwɛkpa ne nolo la, ɔboale bɛ ɔmaanle bɛzieziele bɛ nwo. (Luku 10:​1-11) Kɛmɔ ɛdoavolɛma ne vale mɔɔ Gyisɛse hilehilele bɛ la lile gyima la ati, bɛ nye liele mɔɔ bɛholale bɛyɛle la anwo.—Luku 10:17.

7. Duzu a yɛbayɛ yɛava yɛaziezie yɛ nwo yɛamaa daselɛlilɛ a? (Eza nea nvoninli ne.)

⁷ Duzu a yɛbayɛ yɛava yɛaziezie yɛ nwo yɛamaa daselɛlilɛ a? Ɔwɔ kɛ yɛdwenle kɛzi yɛbava yɛdayɛ mumua ne yɛ edwɛkɛ yɛahilehile nɔhalɛ ne anu kpalɛ la anwo. Eza ɔbayɛ kpalɛ kɛ yɛbazuzu nyɛleɛ nwiɔ anzɛɛ nsa bie mɔɔ menli dɔɔnwo mɔɔ wɔ azɛlɛsinli ne anu la da ye ali nee mɔɔ yɛbayɛ ye wɔ nyɛleɛ zɔhane mɔ anu biala anwo la anwo. Akee saa ɔwɔ kɛ yɛ nee awie mɔ tendɛ a, yɛbahola yɛazie yɛ nwo dii, yɛade yɛ nyunlu na yɛ nee bɛ abɔ adawu kɛ agɔnwolɛma.

8. Kɛzi Kilisienema le kɛ mbuakɛ ne mɔɔ wɔ ɛzoanvolɛ Pɔɔlo ndonwo ne anu la ɛ?

⁸ Ɛzoanvolɛ Pɔɔlo hanle mɔɔ yɛyɛ wɔ edwɛkɛhanlɛ gyima ne anu la anwo edwɛkɛ kɛ: “Yɛlɛ anwonyia ɛhye wɔ mbuakɛ nu.” (2 Kɔl. 4:7) Duzu a le anwonyia ɛhye? Yemɔ a le Belemgbunlililɛ ne anwo edwɛkɛhanlɛ gyima ne mɔɔ die ngoane la. (2 Kɔl. 4:1) Duzu a le mbuakɛ ne? Bɛgyi ɛkɛ ne bɛmaa Nyamenle azonvolɛ mɔɔ bɛbɔ edwɛkpa ne nolo bɛkile awie mɔ la. Wɔ Pɔɔlo mekɛ zo, ɛnee gualilɛma fa ninyɛne mɔɔ sonle bolɛ, mɔɔ bie a le aleɛ, nwanye nee ezukoa la gua ndɛtɛlɛ mbuakɛ nu tu adenle. Zɔhane ala a Gyihova ɛva edwɛkpa ne mɔɔ sonle bolɛ la ɛwula yɛ sa a. Kɛmɔ Gyihova gyi yɛ nzi la ati, yɛbahola yɛanyia anwosesebɛ mɔɔ yɛhyia la amaa yɛahɔ zo yɛaha edwɛkɛ ne.

YƐ ASƆNE SƐLƐ AKƐNRASESEBƐ

9. Kɛ ɔkɛyɛ na yɛali sonla nwo ɛzulolɛ anzɛɛ ɛzulolɛ mɔɔ yɛlɛ kɛ bɛnrɛdie yɛ la azo ɛ? (Eza nea nvoninli ne.)

⁹ Ɔdwu mekɛ ne bie a, sonla nwo ɛzulolɛ baha yɛ anzɛɛ yɛbade nganeɛ kɛ bɛnrɛdie yɛ edwɛkɛ ne. Kɛ ɔkɛyɛ na yɛali ngyegyelɛ zɔhane azo ɛ? Suzu asɔne mɔɔ ɛzoanvolɛma ne  yɛle wɔ mekɛ mɔɔ bɛduale bɛ kɛ bɛmmabɔ edwɛkpa ne nolo la anwo. Kɛ anrɛɛ bɛbamaa ɛzulolɛ agua bɛ ɛbɔ nu la, bɛzɛlɛle Gyihova kɛ ɔboa bɛ ɔmaa ‘bɛva akɛnrazilɛ bɛha Nyamenle edwɛkɛ ne.’ Gyihova buale bɛ asɔneyɛlɛ ne ɛkɛ ne ala. (Gyi. 4:​18, 29, 31) Saa ɔyɛ na sonla nwo ɛzulolɛ ka yɛ a, yɛdayɛ noko yɛbahola yɛazɛlɛ Gyihova kɛ ɔboa yɛ. Ka kile Gyihova kɛ ɔboa wɔ ɔmaa ɛva menli nwo ɛlɔlɛ mɔɔ ɛlɛ la ɛli sonla nwo ɛzulolɛ zo.

10. Kɛzi Gyihova boa yɛ maa yɛyɛ ye Alasevolɛ ɛ? (Ayezaya 43:​10-12)

¹⁰ Gyihova ɛkpa yɛ kɛ yɛyɛ ye Alasevolɛ, na yebɔ yɛ ɛwɔkɛ kɛ ɔbaboa yɛ yeamaa yɛala akɛnrasesebɛ ali. (Kenga Ayezaya 43:​10-12.) Suzu ndenle nna mɔɔ ɔdua zo ɔyɛ zɔ la anwo. Mɔɔ limoa, mekɛ biala mɔɔ yɛlɛbɔ edwɛkpa ne nolo la, Gyisɛse nee yɛ lua. (Mat. 28:​18-20) Mɔɔ tɔ zo nwiɔ, Gyihova ɛkpa anwumabɔvolɛma bie mɔ kɛ bɛboa yɛ. (Yek. 14:6) Mɔɔ tɔ zo nsa, Gyihova ɛva ye sunsum nwuanzanwuanza ne ɛmaa yɛ kɛ ɔboa yɛ amaa yɛahakye ninyɛne mɔɔ yɛzukoa la. (Dwɔn 14:​25, 26) Mɔɔ tɔ zo nna, Gyihova ɛmaa yɛ mediema mrenyia nee mraalɛ mɔɔ bɛ nee yɛ bahɔ a. Kɛmɔ Gyihova gyi yɛ nzi na yɛ mediema mɔɔ lɛ ɛlɔlɛ la boa yɛ la ati, yɛlɛ debie biala mɔɔ yɛhyia nwo amaa yɛahola yɛayɛ yɛ gyima ne la.

ANRƐƐ YƐ NZENZALEƐ NA NYIA ADWENLE KPALƐ

11. Kɛ ɔkɛyɛ na wɔanyia menli dɔɔnwo wɔ daselɛlilɛ nu ɛ? (Eza nea nvoninli ne.)

¹¹ Saa ɛkɔ daselɛlilɛ na wɔannyia menli dɔɔnwo a, ɔmaa ɛ rɛle bɔ ɔ? Ɛnee biza ɛ nwo kɛ: ‘Nienwu a menli mɔɔ wɔ me azɛlɛsinli ne anu la ɛhɔ ye kɛkala a?’ (Gyi. 16:13) ‘Bɛhɔ gyima anzɛɛ bɛhɔ gua nu?’ Saa zɔhane a ɔde a, ɛdi daselɛ wɔ awɔdenle ne mɔ azo a ɛbanyia menli dɔɔnwo ɔ? Adiema bie mɔɔ bɛfɛlɛ ye Joshua la hanle kɛ, “Menyia nwolɛ adenle ngakyile meli menli daselɛ wɔ ɛleka mɔɔ sotɔɔ mgbole wɔ nee ɛleka mɔɔ menli dɔɔnwo fa bɛ ahale siezie la.” Ɔ nee ɔ ye Bridget noko kɔto menli dɔɔnwo wɔ bɛ azua nu wɔ mekɛ mɔɔ bɛlɛdi daselɛ wɔ alewɔzo nee Molɛ ewiazo la.—Ɛfɛ. 5:​15, 16.

12. Saa awie mɔ angile edwɛkɛ ne anwo anyelielɛ kpole a, duzu a yɛbahola yɛayɛ a?

¹² Saa awie mɔ angile edwɛkɛ ne anwo  anyelielɛ kpole a, bɔ mɔdenle kɛ ɛbanwu mɔɔ bɛdie bɛdi anzɛɛ mɔɔ bɛdwenle nwolɛ la. Joshua nee Bridget fa kpuya mɔɔ wɔ trate bie azo la bɔ bɛ adawubɔlɛ bo. Kɛ neazo la, saa bɛlɛfa Kɛzi Ɛbu Baebolo Ne Ɛ? trate ne bɛali gyima a, bɛka kɛ: “Bie mɔ bu Baebolo ne kɛ ɔle buluku mɔɔ vi Nyamenle ɛkɛ, noko bie mɔ ɛmbu ye zɔ. Boni a ɛbaha ye wɔ nwo a?” Ɛhye maa bɛta bɛ nee awie mɔ bɔ adawu.

13. Saa awie mɔ andie yɛ edwɛkɛ ne bɔbɔ a, duzu ati a yɛbahola yɛaha kɛ yɛdwule yɛ bodane nwo a? (Mrɛlɛbulɛ 27:11)

¹³ Saa bɛandie yɛ edwɛkɛ ne a, yemɔ ɛngile kɛ yɛandwu yɛ bodane nwo. Duzu ati ɔ? Ɔluakɛ yɛyɛ mɔɔ Gyihova nee ɔ Ra ne kulo kɛ yɛyɛ la—yɛli menli daselɛ. (Gyi. 10:42) Saa yɛannyia awie yɛ nee ye andendɛ anzɛɛ bɛandie yɛ edwɛkɛ ne bɔbɔ a, yɛbahola yɛamaa yɛ nye alie ɔluakɛ yɛze kɛ yɛlɛyɛ mɔɔ sɔ yɛ anwuma Selɛ ne anye la.—Kenga Mrɛlɛbulɛ 27:11.

14. Saa nolobɔlɛnli gyɛne nyia awie mɔɔ ɔ nye die nɔhalɛ ne anwo la a, duzu ati a yɛ nye bahola alie a?

¹⁴ Eza saa nolobɔlɛnli gyɛne nyia awie mɔɔ ɔ nye die nɔhalɛ ne anwo la wɔ azɛlɛsinli ne anu a, yɛ nye bahola alie. Ɛzinzalɛ Arane ne ɛva yɛ gyima ne ɛtoto kakula bie mɔɔ ɛminli mɔɔ yɛlɛkpondɛ ye la anwo. Menli dɔɔnwo a ɛlɛkpondɛ ye a, bie mɔ ɛva fema zo yɛɛ bie noko ɛva bɛne zo. Saa bɛnwu kakula ne a, tɛ ahenle mɔɔ nwunle ye la angome a anye die a, emomu awie biala anye die. Zɔhane ala a awie biala mɔɔ wɔ asafo ne anu la boa maa yɛyɛ menli Gyisɛse ɛdoavolɛma a. Yɛ muala a yɛlɛyɛ gyima wɔ azɛlɛsinli ne anu a, ɔti saa awie bɔ ɔ bo kɛ ɔba debiezukoalɛ a, yɛ muala yɛ nye die.

FA WƆ ADWENLE SIE ƐLƆLƐ MƆƆ ƐLƐ ƐMAA GYIHOVA NEE MENLI LA AZO

15. Saa yɛfa Mateyu 22:​37-39 yɛdi gyima a, kɛzi ɔbahola yeaboa yeamaa yɛ nye alie daselɛlilɛ nu kpalɛ ɛ? (Eza nea nvoninli ne.)

¹⁵ Saa yɛfa yɛ adwenle yɛsie ɛlɔlɛ mɔɔ yɛlɛ yɛmaa Gyihova nee awie mɔ la azo a, ɔbamaa yɛ nye alie edwɛkɛhanlɛ gyima ne anwo kpalɛ. (Kenga Mateyu 22:​37-39.) Wɔmɔ pɛ kɛzi Gyihova nwu kɛ yɛlɛyɛ gyima ne a ɔ nye die nee kɛzi menli bɔ ɔ bo kɛ bɛsukoa Baebolo ne a bɛ nye balie la anwo nvoninli! Eza kakye kɛ bɛdabɛ mɔɔ bɛtie yɛ edwɛkɛ ne na  bɛdi zo la banyia dahuu ngoane.—Dwɔn 6:40; 1 Tim. 4:16.

16. Kɛ ɔkɛyɛ na yɛ nye alie edwɛkɛhanlɛ gyima ne anwo wɔ mekɛ mɔɔ yɛha sua nu la ɛ? Maa neazo.

¹⁶ Debie bie ati wɔha sua nu ɔ? Ɔle zɔ a, ɛnee fa wɔ adwenle sie mɔɔ ɛbahola wɔayɛ wɔahile kɛ ɛkulo Gyihova nee menli la azo. Wɔ COVID-19 ewulenzane mekɛ ne anu, Samuel nee ɔ ye Dania hale sua nu. Wɔ tɛnlabelɛ ɛsesebɛ zɔhane anu, ɛnee bɛta bɛdi daselɛ wɔ fonu zo, bɛkɛlɛ ngɛlata na bɛdua Zoom zo bɛyɛ Baebolo ɛzukoalɛ. Samuel ɛnyianle kansa, ɔti ɛnee bɛlɛyɛ ye ayile wɔ asopiti bie anu, na mekɛ biala mɔɔ ɔbahɔ asopiti ɛkɛ ne la, ɔdi bɛdabɛ mɔɔ ɔyia bɛ la daselɛ. Ɔhanle kɛ: “Tɛnlabelɛ mɔɔ anu yɛ se la maa adwenleadwenle tɔ yɛ nwo, ɛvɛlɛ ka yɛ na yɛ diedi ka aze. Ɔwɔ kɛ yɛnyia anyelielɛ wɔ Gyihova ɛzonlenlɛ nu.” Wɔ mekɛ ɛhye ala anu, adiema raalɛ Dania dɔle aze na ɔhale ɛkpa zo too siane nsa. Akee ɔdɛnlanle abuburama ebia nu too siane nsia. Ɔhanle kɛ: “Membɔle mɔdenle kɛ mebayɛ mɔɔ me tɛnlabelɛ ne bamaa me adenle yeamaa meayɛ la amuala. Mengolale menlile nɛɛse ne mɔɔ banea me la daselɛ yɛɛ me nee menli mɔɔ fa ninyɛne mɔɔ yɛkɛla la bɛlɛ yɛ wɔ sua nu la tendɛ. Eza me nee raalɛ bie mɔɔ yɛ gyima wɔ ayileyɛlɛ kɔmpɛlɛ bie anu la bɔle adawu wɔ fonu zo.” Samuel nee Dania tɛnlabelɛ ne ammaa bɛangola ninyɛne dɔɔnwo yɛ, noko bɛyɛle biala mɔɔ bɛbahola la na yemɔ maanle bɛ nye liele.

17. Kɛ ɔkɛyɛ na wɔanyia nzuzulɛ mɔɔ wɔ edwɛkɛ ɛhye anu la azo nvasoɛ kpalɛ ɛ?

¹⁷ Saa yɛbanyia nzuzulɛ mɔɔ wɔ edwɛkɛ ɛhye anu la azo nvasoɛ kpalɛ a, kyesɛ yɛyɛ ɔ muala. Nzuzulɛ ko biala le kɛ ninyɛne mɔɔ yɛfa yɛado aleɛ bie la anu ko. Saa yɛka ninyɛne ne amuala yɛbɔ nu yɛto aleɛ ne a, ɔmaa ɔyɛ fɛ kpalɛ. Saa yɛfa nzuzulɛ ɛhye mɔ amuala yɛdi gyima a, ɔbamaa yɛanyia anwosesebɛ yɛaho yɛatia adwenle mɔɔ ɛndenrɛ na yɛanyia anyelielɛ kpole wɔ daselɛlilɛ nu.