Ɛnee edwɛkɛ ɛhye le edwɛkɛ mɔɔ Gyisɛse agbɔvolɛ lɛ tia Gyisɛse nee ye ɛdoavolɛ ne mɔ la anu ko ala. Mosisi Mɛla ne vale kɛzi saa awie tudu mogya, nide vi awie mrenyianu finde, kokobɛ tila awie anzɛɛ ɔfa ɔ sa ɔka sonla anzɛɛ nane funli a ɔwɔ kɛ ɔte ɔ nwo la anwo mɛla ngakyile maanle. Eza ɔvale kɛzi bɛbamaa bɛ nwo ade la anwo adehilelɛ ɔmaanle. Ɛnee bɛbahola bɛabɔ afɔle, bɛakpo bɛ ninyɛne anzɛɛ bɛakpondekponde nzule bɛava bɛade bɛ nwo.​—Sɛl., tile. 11-15; Ɛdi., tile. 19.

Dwuu kilehilevolɛma ne hilehilele mɛla ɛhye mɔ biala anu hɔle moa kpalɛ. Buluku ko hanle kɛ saa debie maa awie anwo gua evinli a, “bɛfefe kɛzi ɔyɛle mɔɔ deɛ ne guale ahenle anwo evinli la anu kpalɛ, adenle mɔɔ evinli ne bahola alua zo aha awie mɔ, ahyɛnze mɔɔ evinli ne bie bahola aha bɛ yɛɛ mɔɔ bie ɛnrɛhola ɛnrɛha bɛ, akee mɔɔ li awieleɛ la, adenle mɔɔ bɛbalua zo bɛade awie anwo yɛɛ maamule mɔɔ bɛbabu ye wɔ nwolɛ la.”

Gyisɛse dwazotiama ne bizale ye kɛ: “Duzu ati a wɔ ɛdoavolɛma ne mɔ ɛnli ngilehilelɛ ne mɔɔ yɛ nlenya mɔ ɛva ɛgyakyi yɛ la azo na bɛfa bɛ sa anwo evinli bɛdi debie ɛ?” (Maake 7:5) Ɛnee tɛ bɛ sa anwo evinli ne mɔɔ bɛlɛfa bɛali aleɛ ne la anwo edwɛkɛ a bɛlɛka a. Wɔ Dwuu kilehilevolɛma ne afoa nu, ɛnee ɔle amaamuo ɔmaa bɛ kɛ kolaa na awie ali aleɛ la ɔwɔ kɛ bɛwola nzule bɛgua ɔ sa anwo. Buluku ne mɔɔ yɛlimoa yɛha nwolɛ edwɛkɛ la doale zolɛ kɛ: “Ɛnee eza bɛsuzu kyɛnze holɛ mɔɔ ɔwɔ kɛ bɛfa bɛsa nzule ne, nzule mɔɔ fɛta, ahenle mɔɔ ɔwɔ kɛ ɔwola nzule ne ɔgua awie asa anwo yɛɛ ɛleka mɔɔ ɔwɔ kɛ ahenle mɔɔ ɔlɛwowo ɔ sa anwo la wowo kɔdwu la.”

Mɔɔ Gyisɛse yɛle ye wɔ mɛla ɛhye mɔ mɔɔ sonla a lile anwo la le sikalɛ. Ɔzele Dwuu ɛzonlenlɛ nu mgbanyima ne mɔ kɛ: “Ayezaya nwunle bɛ bɔkɔɔ yɛɛ ɔhanle a. Bɛle nabalabama kpalɛ kpalɛ, kɛmɔ ɔhɛlɛle ɔdole ɛkɛ ne la; ɔse, ‘Nyamenle se, Menli ɛhye mɔ fa bɛ nloa babonle mgbane a kanvo me a, na bɛ ahonle ɛdeɛ, ɔmbikye me. Bɛsonle me mgbane, ɔluakɛ bɛkilehile mɔɔ menli ɛhyehyɛ la kɛ asɛɛ me mɛla ɔ!’ Bɛmɛ, bɛva Nyamenle mɛla ne bɛzie ahane na bɛdi bɛ mɔmoane amra ngilehilelɛ ne mɔ azo.”​—Maake 7:6-8.