Kpondɛ Debie Mɔɔ Sonle Bolɛ Tɛla Ezukoa Nvutuke La
Wɔnyia ezukoa nvutuke ɛlɛ ɔ? Menli ekyi bie ala a ɛnyia bie a. Noko menli mgbe dɔɔnwo ɛnyia debie mɔɔ sonle bolɛ tɛla nvutuke la. Yemɔ a le anwuma nrɛlɛbɛ mɔɔ “bɛnzu ezukoa nvutuke bɛndɔ” la.—Dwobu 28:12, 15.
WƆ NDENLE bie mɔ anu, Baebolo sukoavoma mɔɔ bɛlɛ ahonle kpalɛ la le kɛ menli mɔɔ bɛlɛkpondɛ nvutuke la. Ɔwɔ kɛ Baebolo sukoavoma ɛhye mɔ bɔ mɔdenle sukoa Baebolo ne kpalɛ na bɛahola bɛanyia zɛhae nrɛlɛbɛ ne mɔɔ sonle bolɛ la. Kɛ Baebolo sukoavoma la, duzu a yɛbahola yɛazukoa yɛavi ndenle nsa mɔɔ bɛdua zo bɛkpondɛ nvutuke mɔɔ yɛbazuzu nwo la anu a?
WƆNYIA AGUDEƐ!
Fa ye kɛ ɛlua azule bie anloa, na wɔnwu kɛ ewia ne mɔɔ ɛdɔ bolɛ bie azo la ɛlɛmaa bolɛ ne ada memeamemea. Saa ɛfa na ɛnwu kɛ nvutuke a, ɔmaa ɛ nye die kpalɛ. Ye kpole ɛndwu mandese ti yɛɛ bɛnda bɛnyia ye kɛ daemɔn mɔɔ ye bolɛ yɛ se kpalɛ la. Akee ɛbatoto ɛ nye wɔanlea saa ɛbanyia bieko wɔaboka nwo a.
Bie a ɛkakye kɛ mekɛ bie mɔɔ ɛze ɛhɔ la, Gyihova azonvolɛ ne mɔ ko rale wɔ ɛkɛ, na ɔhanle anyelazo mɔɔ Baebolo ne ka nwolɛ edwɛkɛ la ɔhilele wɔ. Bie a ɛkakye mekɛ mɔɔ ɛnwunle Baebolo nu nɔhalɛ edwɛkɛ bie mɔɔ le kɛ nvutuke la. Bie a ɛhye a le mekɛ mɔɔ limoa mɔɔ ɛnwunle wɔ Baebolo ne anu kɛ Nyamenle duma a le Gyihova la. (Edw. 83:18) Anzɛɛ bie a ɛnwunle kɛ ɛbahola wɔayɛ Gyihova agɔnwo. (Gye. 2:23) Ɛkɛ ne ala, ɛnwunle kɛ wɔnyia debie mɔɔ sonle bolɛ tɛla nvutuke la! Na bie a ɛnyianle ɛhulolɛ kɛ ɛkpondɛ sunsum nu ninyɛne dɔɔnwo.
ƐKPONDƐ DƆƆNWO!
Ɔyɛ a yɛnwu nvutuke ngyikyingyikyi dɔɔnwo wɔ azudenle nu. Ɔyɛ a menli mɔɔ bɛkpondɛ nvutuke la kola nyia bie dɔɔnwo mɔɔ ye bolɛ bayɛ dɔla apenle apenle la.
Mɔɔ ɛbɔle ɔ bo kɛ ɛ nee Gyihova Alasevolɛ sukoa Baebolo ne la, bie a ɛdele nganeɛ kɛ awie mɔɔ ɔlɛkpondɛ nvutuke na yenyia bie dɔɔnwo la. Bie a Baebolo tɛkese ngakyile mɔɔ ɛdwenledwenlenle nwolɛ la maanle ɛnwunle ninyɛne dɔɔnwo, na yemɔ maanle ɛnyianle ɛ nwo wɔ sunsum nu. Mekɛ mɔɔ ɛnee ɛlɛdwenledwenle Baebolo ne anu nɔhalɛ zɔhane mɔ anwo la, ɔmaanle ɛnwunle kɛzi ɛbahola wɔabikye Gyihova na wɔazie ɛ nwo wɔ ye ɛlɔlɛ ne anu amaa wɔanyia dahuu ngoane la.—Gye. 4:8; Dwu. 20, 21.
Kɛ mɔɔ awie mɔɔ ɔlɛkpondɛ nvutuke la bɔ mɔdenle kɛ ɔbanyia bie la, asoo ɛbɔ mɔdenle kɛ ɛbanwu Baebolo nu nɔhalɛ mɔɔ sonle bolɛ la ɔ?
KƆ ZO KPONDƐ!
Awie mɔɔ ɛlɛkpondɛ nvutuke la bahola anyia bie wɔ ezukoa awolɛ nu. Ɔyɛ a nvutuke dɔɔnwo vea awolɛ ɛhye mɔ anu yemɔti bɛti na bɛaye bɛavi nu. Saa ɛnea bolɛ ne ɛkɛ ne ala a, ɛnrɛnwu nvutuke wɔ nu. Duzu ati ɔ? Ɔluakɛ saa ɛfa bolɛ mɔɔ nvutuke wɔ nu kpalɛ kpalɛ bɔbɔ la a, bie a nvutuke ekyi bie a ɛbanyia wɔ nu a! Noko wɔ ahenle mɔɔ ɛlɛkpondɛ nvutuke ne la afoa nu, yemɔ yenyia bie dɔɔnwo.
Saa awie sukoa “Kelaese ɛdoavolɛ nwo ɛzukoalɛdeɛ ne mɔ mɔɔ lumua la” wie bɔbɔ a, ɔwɔ kɛ ɔnyia anyuhɔlɛ. (Hib. 6:1, 2) Ɔwɔ kɛ ɛbɔ mɔdenle kɛ ɛbanyia edwɛkɛ nee ɛzukoalɛdeɛ fofolɛ wɔavi Baebolo ne mɔɔ ɛsukoa la anu. Yemɔti, ɔnva nwo kɛ bie a wɔva ɛvolɛ dɔɔnwo wɔzukoa Baebolo ne la, duzu a ɛbahola wɔayɛ amaa wɔanyia Baebolo ne mɔɔ ɛsukoa la azo nvasoɛ a?
Nyia ɛhulolɛ kɛ ɛbazukoa debie. Yɛ edwɛkɛ titili ne mɔ nzonlɛ. Bɔ mɔdenle na ɛbanyia nrɛlɛbɛ nee adehilelɛ mɔɔ le kɛ agudeɛ mɔɔ sonle bolɛ la wɔ Ngɛlɛlera ne anu. (Wlo. 11:33) Fa neɛnleanu ninyɛne mɔɔ bɛyɛ wɔ wɔ aneɛ nu la yɛ gyima na ɔbamaa wɔanwu Ngɛlɛlera ne anu kpalɛ. To ɛ rɛle aze kpondɛ adehilelɛ mɔɔ ɛhyia nee kpuya mɔɔ kye wɔ adwenle la anwo mualɛ wɔ Baebolo ne anu. Biza awie mɔ maa bɛha ngɛlɛlera nee edwɛkɛ mɔɔ bɛnwu kɛ yeboa bɛ kpalɛ la bɛhile wɔ. Ka ninyɛne mgbalɛ mɔɔ wɔnyia wɔvi Baebolo ne mɔɔ wɔzukoa anu la bie kile awie mɔ.
Nɔhalɛ, tɛ wɔ bodane a le kɛ ɛsukoa na wɔanwu debie ala. Ɛzoanvolɛ Pɔɔlo hanle kɛ “deɛnwunlɛ zɛhae sɛkye bɛ” anzɛɛ ɔmaa bɛmemaa bɛ nwo zo. (1 Kɔl. 8:1) Ɛhye ati, bɛlɛ ɛ nwo aze na maa ɛ nwo ɛyɛ se wɔ diedi ne anu. Abusua ɛzonlenlɛ nee Baebolo ne mɔɔ ɛbazukoa ye dahuu la bamaa wɔava Gyihova ngyinlazo ne mɔ wɔabɔ wɔ ɛbɛla na wɔaboa awie mɔ. Ɛ nye balie ɔluakɛ wɔnyia debie mɔɔ sonle bolɛ tɛla nvutuke la.—Mrɛ. 3:13, 14.