ƐZINZALƐ ARANE—DEBIEZUKOALƐ ƐDEƐ August 2017
Edwɛkɛ mɔɔ yɛbazukoa ye wɔ September 25 kɔdwu October 22, 2017.
Ɛlɛ Ɛhulolɛ Kɛ Ɛbazi Abotane Wɔahendɛ Ɔ?
Gyihova tete nɔhalɛ azonvolɛ bizale kɛ kenlenzu a bɛ sɔnea ne mɔ bara awieleɛ a, noko Nyamenle andea bɛ kɛ bɛbizale la.
“Nyamenle Anzodwolɛ Ne. . . Bo Ndelebɛbo Muala Azo”
Asoo wɔbiza kɛ duzu ati a Nyamenle maa sɔnea mɔɔ ɛ nye ɛnla la to wɔ wɔ ɛbɛlabɔlɛ nu ɔ? Saa ɔle zɔ a, duzu a bamaa wɔanyia anwodozo wɔ Gyihova anu na wɔagyinla wɔ munlililɛ nu a?
ƐBƐLABƆLƐ NU EDWƐKƐ
Yɛgyinla Kpundii Wɔ Sɔnea Nu A Ɔmaa Yɛnyia Nyilalɛ
Duzu ati a ɛnee menli mɔɔ bɛhye bɛ bɛhɔ Siberia la biza ɛnlankɛ bo zo, wɔ mekɛ mɔɔ bɛlɛkpondɛ mboane la ɛ? Mualɛ ne wɔ Pavel nee Maria Sivulsky ɛbɛlabɔlɛ nu edwɛkɛ ne anu.
Kɛzi Yɛye Subane Dɛba Ne Yɛgua Bɔkɔɔ La
Saa yɛye subane dɛba ne yɛgua a, ɔnle kɛ yɛwula ye bieko. Kɛ ɔkɛyɛ na yɛahola yɛayɛ ɔ mu nwiɔ ɔnva nwo kɛzi zɔhane subane ɛtane ne ɛha yɛ nwo la ɛ?
Kɛzi Yɛwula Subane Fofolɛ Ne Dahuu La
Ɔlua Gyihova moalɛ ti, ɛbahola wɔayɛ sonla mɔɔ ɔkpondɛ kɛ ɛyɛ la. Suzu nwo, kɛ neazo la, kɛzi ɛbahola wɔala anwunvɔnezelɛ, atiakunlukɛnlɛma nee mɛlɛbɛnwoaze ali la.
Ɛlɔlɛ—Subane Mɔɔ Sonle Bolɛ
Ngɛlɛlera ne maa ɔda ali kɛ Gyihova sunsum nwuanzanwuanza ne a maa yɛda ɛlɔlɛ ali a. Ɛlɔlɛ a le duzu? Kɛ ɔkɛyɛ na wɔanyia ye ɛ? Kɛ ɔkɛyɛ na wɔala ye ali dahuu ɛ?
YƐ TETEDWƐKƐ
“Mekɛ Boni A Yɛbahɔ Nyianu Bieko A?”
Duzu a maa nyianu mɔɔ bɛyɛle ye wɔ Mexico City, wɔ 1932 mɔɔ menli kɛyɛ 150 pɛ hɔle la yɛ titili a?
Kpuya Mɔɔ Vi Kengavolɛma Ɛkɛ
Duzu ati a Mateyu nee Luku kɛlɛtokɛ ne mɔɔ fale Gyisɛse ngakula nu anwo la le ngakyile a?
