1. Ndenle boni mɔ a yɛbahola yɛalua zo yɛ nee Gyihova ayɛ gyima ɛ?

GYIHOVA bɔle alesama wiele la, ɛnee ɔkulo kɛ bɛyɛ ɔ gɔnwo mɔ gyimayɛvoma. Alesama ɛnli munli, noko menli mɔɔ di nɔhalɛ la nee Gyihova bahola ayɛ gyima dahuu. Kɛ neazo la, yɛdua Belemgbunlililɛ edwɛkpa ne nolobɔlɛ nee ɛdoavolɛyɛlɛ gyima ne azo yɛyɛ “Nyamenle agɔnwo mɔ gyimayɛvoma.” (1 Kɔl. 3:5-9) Ɔle enililɛ kpole kɛ anwuma nee aze Bɔvolɛ ne ɛkpa yɛ kɛ yɛyɛ gyima mɔɔ anwo hyia kpalɛ la! Noko, tɛ edwɛkɛhanlɛ nee ɛdoavolɛyɛlɛ gyima ne ala a le ndenle mɔɔ yɛdua zo yɛ nee Gyihova yɛ gyima a. Edwɛkɛ ɛhye bahile ndenle gyɛne mɔɔ yɛbahola yɛalua zo yɛayɛ zɔ la​—yɛ abusua ne nee yɛ mediema azonvolɛ mɔɔ yɛbaboa bɛ, ɛyɛvolɛyɛlɛ yɛɛ yɛ nwo mɔɔ yɛbadu yɛamaa na yɛadɛlɛ yɛ ɛzonlenlɛ gyima ne anu la.​—Kɔl. 3:23.

2. Duzu ati a ɔnle kɛ yɛfa mɔɔ yɛkola yɛyɛ yɛmaa Gyihova la yɛtoto awie mɔ ɛdeɛ nwo ɛ?

² Saa yɛlɛsuzu edwɛkɛ ɛhye anwo a, mmafa mɔɔ ɛkola ɛyɛ ɛmaa Gyihova la ɛtoto mɔɔ awie mɔ kola yɛ la anwo. Kakye kɛ asolo awie biala ɛvolɛ mɔɔ yeli, ye kpɔkɛdelɛ, tɛnlabelɛ nee mɔɔ ɔbahola yeayɛ la. Sunsum ne maanle ɛzoanvolɛ Pɔɔlo hɛlɛle kɛ: “Bɛmaa awie biala ɛnleɛnlea ɔdaye ye nyɛleɛ nu, na  yeanyia debie yeava yeadu ɔ nwo, na ɔmmafa ɔ nwo ɔtoto awie mɔ anwo.”​—Gal. 6:4.

3. Duzu ati a yɛkola yɛka kɛ awie biala mɔɔ nea ye abusua la nee Nyamenle ɛlɛbɔ nu ayɛ gyima ɛ?

³ Gyihova anye la kɛ ye azonvolɛ banlea bɛ mbusua. Kɛ neazo la, ɔwɔ kɛ ɛyɛ gyima, amaa wɔanyia ezukoa wɔanlea wɔ alɔvolɛ. Ninlima dɔɔnwo tɛnla sua nu nea bɛ mra ngyikyi. Na bie a ɔwɔ kɛ ngakula mɔɔ bɛnyi la nea bɛ awovolɛ mɔɔ bɛnde kpɔkɛ la. Ninyɛne ɛhye mɔ anwo hyia. Nyamenle Edwɛkɛ ne ka kɛ: “Saa awie ɛnnea ɔdaye ye menli, titili ye sua nu amra a, ɛnee yekpo diedi ne na ɔle ɛtanevolɛ ɔtɛla sonla mɔɔ ɛnlɛ diedi la.” (1 Tim. 5:8) Saa ɛlɛ ɛzonlelilɛ zɛhae mɔ a, bie a ɛnrɛnyia mekɛ dɔɔnwo ɛnrɛli teokelase ninyɛne bie mɔ anwo gyima kɛ mɔɔ anrɛɛ ɛbahulo kɛ ɛyɛ la. Noko mmamaa ɛ sa nu to! Saa ɛnea wɔ abusua ne a, Gyihova anye die nwo.​—1 Kɔl. 10:31.

4. Kɛ ɔkɛyɛ na awovolɛ ava Belemgbunlililɛ ne alimoa ɛ, na nvasoɛ boni a bavi nu ara a?

⁴ Saa Kilisiene awovolɛ maa bɛ mra fa teokelase bodane sie bɛ nye zo a, ɛnee bɛ nee Gyihova ɛlɛyɛ gyima. Awovolɛ dɔɔnwo mɔɔ ɛhola ɛyɛ ɛhye la amra ne mɔ nzinlii hɔyɛle dahuu ɛzonlenlɛ gyima ne wɔ ɛleka gyɛne. Bie mɔ le edwɛkpatɛlɛvolɛma; bie mɔ ɛlɛyɛ adekpakyelɛ wɔ ɛleka mɔɔ bɛhyia nolobɔlɛma dɔɔnwo la; yɛɛ bie mɔ ɛlɛsonle wɔ Bɛtɛle. Saa ngakula ne mɔ kɔ moa a, ɔmmaa awovolɛ nee ngakula ne mɔ ɛnnyia mekɛ dɔɔnwo ɛmmaa bɛ nwo kɛ mɔɔ anrɛɛ bɛbahulo la. Noko awovolɛ mɔɔ fa ninyɛne bɔ afɔle la maa bɛkɔ zo bɛyɛ bɛ gyimalilɛ ne. Duzu ati ɔ? Bɛ nye die yɛɛ bɛ kunlu dwo kɛ bɛ mra ne mɔ ɛva Belemgbunlililɛ ne ɛlimoa la. (3 Dwɔn 4) Bie a, awovolɛ ɛhye mɔ dɔɔnwo te nganeɛ kɛ Hana mɔɔ hanle kɛ ‘yedu ɔ ra Samoɛle yemaa’ Gyihova la. Awovolɛ ɛhye mɔ te nganeɛ kɛ ɔle enililɛ kpole kɛ bɛ nee Gyihova bayɛ gyima wɔ adenle ɛhye azo.​—1 Sa. 1:28.

5. Kɛzi ɛbahola wɔaboa wɔ asafo ne anu amra ɛ? (Nea mɔlebɛbo nvoninli ne.)

⁵ Saa ɛnlɛ abusua nu ɛzonlelilɛ mɔɔ hyia ndɛndɛ a, ɛbahola wɔaboa ɛ mediema azonvolɛ mɔɔ bɛlɛnea wuliravolɛma, mgbanyima anzɛɛ menli mɔɔ hyia moalɛ la ɔ? Duzu ati a ɛnnea wɔ asafo ne anu amaa wɔanwu bɛdabɛ mɔɔ bɛhyia moalɛ la ɛ? Bie a ɛbahola wɔahɔboa adiema raalɛ bie mɔɔ ɛlɛnea ye awovolɛ mɔɔ bɛyɛ mgbanyinli la amaa yeanyia mekɛ yeayɛ ninyɛne gyɛne. Anzɛɛ bie a ɛbahola wɔadu ɛ nwo wɔamaa wɔaboa bɛdabɛ mɔɔ bɛhyia moalɛ na bɛahɔ debiezukoalɛ, wɔali gua wɔamaa bɛ, wɔayɛ ninyɛne bie mɔ wɔamaa bɛ anzɛɛ wɔahɔkpɔla awie mɔɔ la asopiti la. Ɛyɛ ɛhye a, bie a ɛnee ɛlɛboa wɔamaa Gyihova abua awie asɔneyɛlɛ.​—Kenga 1 Kɔlentema 10:24.

6. Kɛzi yɛbahola yɛalie nyɛvolɛ ɛ?

⁶ Bɛze Nyamenle agɔnwo mɔ gyimayɛvoma kɛ bɛdie nyɛvolɛ. (Hib. 13:2) Edwɛkɛ ngakyile mɔɔ maa yɛnwu kɛzi yɛbala ɛlɔlɛ zɛhae ali la wɔ Nyamenle Edwɛkɛ ne anu. (Mɔl. 18:1-5) Yɛbahola yɛɛ ɔwɔ kɛ yɛkpondɛ ndenle yɛdua zo yɛboa awie mɔ dahuu saa “yɛ nee bɛ lɛ diedi ko” anzɛɛ ɔnle zɔ bɔbɔ a.​—Gal. 6:10.

7. Duzu ati a ɔwɔ kɛ ɛsuzu mekɛ kɔsɔɔti azonvolɛ mɔɔ ɛbalie bɛ ɛyɛvolɛ la anwo a?

⁷ Ɛbahola ɛ nee Nyamenle ayɛ gyima ɔlua mekɛ kɔsɔɔti azonvolɛ mɔɔ bɛkpondɛ ɛleka bɛadɛnla mɔɔ ɛbaboa bɛ la azo. (Kenga 3 Dwɔn 5, 8.) Mekɛ ɛhye mɔ maa yɛnyia adenle ‘yɛmaa yɛ nwo anwosesebɛ.’  (Wlo. 1:11, 12) Suzu Olaf anwubielɛ ne anwo. Ɔka kɛ, wɔ ɛvolɛ dɔɔnwo mɔɔ ɛpɛ nu la, ɛnee awie biala ɛngola ɛmmaa maangyebakyi zo neavolɛ ne mɔɔ ɛtɛgyale la dabelɛ. Kpavolɛ Olaf bizale ye awovolɛ mɔɔ bɛnle Alasevolɛ la saa maangyebakyi zo neavolɛ ne bahola azokoɛ bɛ a. Bɛliele bɛdole nu, noko bɛhanle bɛhile Olaf kɛ, kyesɛ ɔda ebia bie mɔɔ wɔ ɛkɛ la azo. Olaf yɛle ye zɔ, na yeanlu ɔ nwo. “Dapɛne mɔɔ yɛ anyelielɛ la boni ɛ!” Olaf ka kɛ, “Me nee maangyebakyi zo neavolɛ ne dwazo ndɛ na yɛsuzu edwɛkɛ dɔɔnwo mɔɔ yɛ anyelielɛ la anwo wɔ mekɛ mɔɔ yɛlɛdi debie la. Anwosesebɛmaanlɛ mɔɔ menyianle la maanle menyianle ɛhulolɛ kɛ mebayɛ dahuu ɛzonlenlɛ gyima ne bie.” Ɛvolɛ 40 mɔɔ ɛpɛ nu la, Olaf ɛzonle kɛ edwɛkpatɛlɛvolɛ wɔ maanle gyɛne zo.

8. Duzu ati a ɔwɔ kɛ yɛda atiakunlukɛnlɛma ali saa bɔbɔ ɔzɔho kɛ mɔlebɛbo ne bɛangile nwolɛ anyezɔlɛ a? Maa neazo.

⁸ Yɛbahola yɛalie nyɛvolɛ wɔ ndenle dɔɔnwo azo saa bɔbɔ bɛangile nwolɛ anyezɔlɛ wɔ mɔlebɛbo ne a. Kɛ neazo la, adiema raalɛ bie mɔɔ vi Spain nee Yesica mɔɔ vi Ecuador la zukoale Baebolo ne. Kenle ko bie mɔɔ ɛnee bɛlɛsukoa debie la, Yesica zunle dedee. Ɔti, adiema raalɛ ne bizale ye deɛmɔti ɔlɛsu la. Yesica hanle kɛ, kolaa na yeara Spain la, ɛnee ɔle ehyianli kpalɛ. Kenle ko bie, ɛnee ɔnlɛ aleɛ mɔɔ ɔbava yeamaa ɔ ra raalɛ ne la kɛ nzule ala. Yesica bɔle mɔdenle kɛ ɔbobo ɔ ra ne yeamaa yeala, wɔ mekɛ mɔɔ ɔlɛyɛ asɔne la. Yeangyɛ, Alasevolɛ nwiɔ hɔkpɔlale ye, noko Yesica anlie bɛ kɛnlɛma na ɔtetele magazine mɔɔ mediema mraalɛ ne mɔ vale maanle ye la anu. Ɔbizale kɛ: “Ɛhye le aleɛ mɔɔ bɛkulo kɛ mefa memaa me ra raalɛ ne ɔ? Mediema mraalɛ ne mɔ bɔle mɔdenle kɛ bɛkyekye ɔ rɛle, noko Yesica andie. Nzinlii, bɛvale kɛndɛne mɔɔ aleɛ wɔ nu la bɛraziele ye anlenkɛ ne anloa. Bɛ atiakunlukɛnlɛma ne hanle Yesica ahonle, na ɔyɛle ye nyane ɔluakɛ yeannwu kɛzi Nyamenle buale ye asɔneyɛlɛ ne la. Noko, kɛkala yebɔ kpɔkɛ kɛ ɔbazonle Gyihova. Ɔda ali kɛ, debie kpalɛ vi nyele mɔɔ mediema mraalɛ ne mɔ yɛle la anu rale.​—Nol. 11:1, 6.

9, 10. (a) Ndenle boni mɔ azo a Nyamenle menli luale dule bɛ nwo maanle yɛle gyima wɔ tete ne ɛ? (b) Kɛzi mediema mrenyia bahola aboa wɔ asafo ne anu ɛnɛ ɛ?

⁹ Tete Yizilayɛma kɛlɛtokɛ maa yɛnwu kɛ, ɛnee bɛhyia menli mɔɔ badu bɛ nwo amaa ayɛ gyima bie la wɔ mekɛ ngakyile nu. (Ade. 36:2; 1 Ek. 29:5; Nih. 11:2) Ɛnɛ, nwolɛ adenle dɔɔnwo wɔ ɛkɛ mɔɔ ɛbahola wɔalua zo wɔava wɔ mekɛ, wɔ anwonyia nee wɔ anwosesebɛ wɔaboa ɛ mediema a. Saa ɛyɛ ɛhye a, ɛ nye balie kpole na wɔanyia nyilalɛ dɔɔnwo.

¹⁰ Nyamenle Edwɛkɛ ne maa mrenyia mɔɔ wɔ asafo ne anu la anwosesebɛ kɛ bɛ nee Gyihova ɛyɛ gyima ɔlua awie mɔ mɔɔ bɛbazonle bɛ kɛ azonvolɛ nee mgbanyima la azo. (1 Tim. 3:1, 8, 9; 1 Pita 5:2, 3) Bɛdabɛ mɔɔ bɛyɛ ɛhye la kulo kɛ bɛboa awie mɔ wɔ nwonane nu nee sunsum afoa nu. (Gyi. 6:1-4) Mgbanyima ne mɔ ɛha ɛhile wɔ kɛ ɛlie nyɛvolɛ anzɛɛ ɛnlea mbuluku nee azɛlɛsinli zo na ɛziezie ninyɛne bie mɔ ɔ? Mediema mɔɔ boa wɔ ɛhye mɔ ɛyɛlɛ nu la ka kɛ bɛ nye die nwolɛ kpole.

11. Kɛzi mediema mɔɔ adiema raalɛ bie vale bɛ agɔnwolɛ wɔ suazilɛ gyima ne anu la boale ye ɛ?

¹¹ Menli mɔɔ boa suazilɛ gyima ne la ta nyia agɔnwolɛma fofolɛ. Fa Margie, adiema raalɛ bie mɔɔ yeva ɛvolɛ 18 yeboa yemaa bɛsisi Belemgbunlililɛ Asalo la kɛ  neazo. Wɔ ɛvolɛ dɔɔnwo mɔɔ ɛpɛ nu la, ɔvale mbɛlɛra dɔɔnwo agɔnwolɛ na ɔtetele bɛ. Yenwu ye kɛ ɛhye a le adenle kpalɛ mɔɔ ɔbahola yealua zo yeamaa awie mɔ anwosesebɛ wɔ sunsum nu a. (Wlo. 1:12) Mɔɔ Margie ɛlɛyia sɔnea la, mediema mɔɔ ɔvale bɛ agɔnwolɛ wɔ suazilɛ gyima ne anu la maanle ye anwosesebɛ. Wɔdu ɛ nwo wɔmaa wɔyɛ suazilɛ gyima ɛhye bie ɛlɛ ɔ? Ɛnlɛ ɛ sa anloa gyima bɔbɔ a, ɛbahola wɔadu ɛ nwo wɔamaa.

12. Kɛzi ɛbahola wɔaboa wɔ esiane mekɛ nu ɛ?

¹² Saa esiane bie si a, Nyamenle menli nyia nwolɛ adenle bɛ nee Nyamenle yɛ gyima ɔlua bɛ mediema mɔɔ bɛboa bɛ la azo. Kɛ neazo la, bɛfa ezukoa bɛboa bɛdabɛ mɔɔ esiane ɛdo bɛ la. (Dwɔn 13:34, 35; Gyi. 11:27-30) Adenle bieko a le kɛ yɛbaboa yɛamaa bɛaziezie anzɛɛ bɛazi sua bie fofolɛ. Adiema raalɛ bie mɔɔ bɛfɛlɛ ye Gabriela mɔɔ vi Poland mɔɔ asɛɛ azuyilɛ zɛkyele ye sua la anye liele wɔ mekɛ mɔɔ mediema mɔɔ wɔ asafo ngakyile mɔɔ bikye ye anu raboale ye la. Ɔka kɛ: “Mengulo kɛ meka ninyɛne mɔɔ ɛzɛkye la anwo edwɛkɛ, bɛle nwonane afoa nu ninyɛne ala. Emomu, mekulo kɛ memaa bɛnwu nvasoɛ mɔɔ menyia ye la. Mediema ne mɔ ɛmaa menwu kɛ, Kilisiene asafo ne mɔɔ mewɔ nu la le nwolɛ adenle kpole, ɔmaa me kunlu dwo me nwo yɛɛ me nye die.” Menli dɔɔnwo mɔɔ nyia moalɛ wɔ esiane mekɛ nu la noko te nganeɛ zɔhane ala. Menli mɔɔ bɛ nee Gyihova yɛ gyima boa bɛ mediema la anye die yɛɛ bɛ kunlu dwo bɛ nwo.​—Kenga Gyima ne 20:35; 2 Kɔlentema 9:6, 7.

13. Saa yɛtu yɛ nwo yɛmaa a, kɛzi ɔmaa yɛ nee Gyihova agɔnwolɛvalɛ ne anu mia ɛ? Maa neazo.

¹³ Stephanie nee nolobɔlɛma gyɛne anye liele kɛ bɛ nee Nyamenle yɛle gyima ɔlua Alasevolɛ mɔɔ bɛrale United States kɛ tutanema mɔɔ bɛboale bɛ la azo. Bɛboale tutanema ɛhye mɔ bɛmaanle bɛnyianle azua na bɛzieziele nuhua kɛnlɛma. Stephanie ka kɛ: “Bɛ nye liele, na anyezɔlɛ mɔɔ bɛhilele wɔ mekɛ mɔɔ bɛnwunle ɛlɔlɛ mɔɔ wɔ yɛ ewiade amuala mediemayɛlɛ ne anu la hanle yɛ kpole.  Mbusua ne mɔ dwenle kɛ yɛboa bɛ, noko bɛmɛ yɛɛ bɛboa yɛ kpalɛ a. Yɛ nwo mɔɔ yɛkulo, koyɛlɛ mɔɔ wɔ yɛ avinli yɛɛ Gyihova anu diedi nee anwodozo mɔɔ yɛlɛ la ɛmaa ɛlɔlɛ mɔɔ yɛlɛ yɛmaa Gyihova la anu ɛmia kpalɛ, na ɛhye ɛmaa yɛnyia anyezɔlɛ kpole yɛmaa ninyɛne mɔɔ yɛnyia yɛfi ye ahyehyɛdeɛ ne ɛkɛ la.”

14, 15. (a) Subane boni a ngapezonli Ayezaya lale ye ali a? (b) Kɛzi Belemgbunlililɛ nolobɔlɛma bahola azukoa Ayezaya subane ne ɛ?

¹⁴ Ɛkulo kɛ ɛ nee Gyihova yɛ gyima kpalɛ ɔ? Ɛlɛ ɛhulolɛ kɛ ɛbahɔzonle wɔ ɛleka mɔɔ bɛhyia nolobɔlɛma dɔɔnwo la ɔ? Nɔhalɛ nu ɔngyia kɛ yɛtu yɛkɔ moa na yɛahola yɛazonle Gyihova. Noko mediema bie mɔ bɛahola. Bɛlɛ ngapezonli Ayezaya subane ne bie. Gyihova bizale kɛ: “Nwane a menzoa ye a, nwane a kɛhɔ kɛmaa yɛ a?” Na ɔbuale kɛ, “Mewɔ ɛke! Soa me.” (Aye. 6:8) Ɛlɛ ɛhulolɛ ne yɛɛ wɔ tɛnlabelɛ ne bahola amaa wɔaboa Gyihova ahyehyɛdeɛ ne ɔ? Kɛzi ɛbahola wɔaboa ɛ?

¹⁵ Gyisɛse hanle ye wɔ edwɛkɛhanlɛ nee ɛdoavolɛyɛlɛ gyima ne anwo kɛ: “Ma ɛdelɛ gyima ne le kpole, noko gyimayɛvoma ne le ekyi. Yemɔti bɛzɛlɛ ma ɛdelɛ gyima ne Amenle kɛ ɔmaa gyimayɛvoma ɛrɛla ye ma ɛdelɛ gyima ne anu.” (Mat. 9:37, 38) Ɛbahola wɔazonle wɔ ɛleka mɔɔ bɛhyia moalɛ dɔɔnwo la kɛ adekpakyelɛnli ɔ? Anzɛɛ ɛbahola wɔaboa awie gyɛne wɔamaa yeayɛ zɔ ɔ? Mediema dɔɔnwo ɛnwu kɛ, adenle kpalɛ mɔɔ bɛbalua zo bɛahile kɛ bɛkulo Nyamenle nee bɛ gɔnwo mɔ la a le kɛ bɛbayɛ adekpakyelɛ wɔ azɛlɛsinli mɔɔ bɛhyia nolobɔlɛma dɔɔnwo la anu. Wɔnwu ndenle gyɛne mɔɔ ɛbahola wɔalua zo wɔadɛlɛ wɔ ɛzonlenlɛ gyima ne anu ɔ? Ɛyɛ zɔ a, ɛ nye balie kpole.

16, 17. Saa ɛkulo kɛ ɛyɛ dɔɔnwo wɔ Gyihova ɛzonlenlɛ nu a, nwolɛ adenle boni mɔ a wɔ ɛkɛ a?

¹⁶ Ɛkulo kɛ ɛkɔsonle wɔ Bɛtɛle anzɛɛ ɛfa mekɛ ekyi ɛboa suazilɛ gyima ne anzɛɛ ɛfi sua nu ɛkɔboa ɔ? Bɛhyia menli dɔɔnwo mɔɔ bazonle Gyihova wɔ ɛleka biala mɔɔ bɛbazoa bɛ na bɛayɛ gyima biala mɔɔ bɛbava bɛamaa bɛ la anwo. Bie a ɔbahyia kɛ bɛkɔyɛ gyima wɔ azɛlɛsinli mɔɔ bɛhyia moalɛ titili bie wɔ nu la anu, ɔnva nwo kɛ bɛlɛ bɛ sa anloa gyima nee anwubielɛ wɔ gyima gyɛne nu la. Noko Gyihova anye sɔ tunwomaa sunsum mɔɔ bɛdabɛ mɔɔ bɛkulo kɛ bɛsonle wɔ ɛleka mɔɔ bɛhyia moalɛ da ye ali la.​—Edw. 110:3.

¹⁷ Ɛkulo kɛ ɛnyia ndetelɛ dɔɔnwo amaa wɔahola wɔayɛ dɔɔnwo wɔ Gyihova ɛzonlenlɛ nu ɔ? Bie a ɛbahola wɔabiza Belemgbunlililɛ Edwɛkpakavolɛma Sukulu ne anwo adenle. Sukulu ɛhye tete mediema mɔɔ bɛlɛsonle Gyihova dɛba wɔ mekɛ kɔsɔɔti ɛzonlenlɛ gyima ne anu la amaa Gyihova ahyehyɛdeɛ ne ava bɛ ali gyima dɔɔnwo. Ɔwɔ kɛ bɛdabɛ mɔɔ bɛkulo kɛ bɛkɔ sukulu ɛhye bie la nyia ɛhulolɛ kɛ saa bɛwie sukulu ne a, bɛbahɔ ɛleka biala mɔɔ bɛkɛzoa bɛ la. Ɛlɛ ɛhulolɛ kɛ ɛbava nwolɛ adenle ɛhye wɔali gyima amaa wɔanyia ɛzonlenlɛ nu adenle dɔɔnwo ɔ?​—1 Kɔl. 9:23.

18. Yɛ nee Gyihova yɛ gyima dahuu a, nvasoɛ boni mɔ a yɛbanyia a?

¹⁸ Kɛ Gyihova menli la, kpalɛyɛlɛ, atiakunlukɛnlɛmayɛlɛ nee ɛlɔlɛ ka yɛ maa yɛda ahunlunyele ali yɛfa yɛboa awie mɔ dahuu. Saa yɛyɛ zɔ a, ɔmaa yɛnyia anyelielɛ nee anzodwolɛ yɛɛ yɛdi fɛlɛko. (Gal. 5:22, 23) Ɔnva nwo kɛzi wɔ tɛnlabelɛ ne de biala la, saa ɛsukoa Gyihova ahunlunyele subane ne na ɛkɔ zo ɛyɛ ɔ gɔnwo mɔ gyimayɛvoma mɔɔ ɔ nye die bɛ nwo la anu ko a, ɛ nye balie kpalɛ!​—Mrɛ. 3:9, 10.