1-2. Duzu a yɛbazuzu nwo wɔ edwɛkɛ ɛhye anu a?

SAA ɛ nye la nwanle bie mɔɔ ɛhyia nwo kpalɛ la ade na ɛ sa anga ye wɔ mekɛ nloa a, kɛzi ɛte nganeɛ ɛ? Ɔgyegye wɔ ɔ? Mrɛlɛbulɛ 13:12 ka kɛ: “Anyelazo kyɛ a ɔmaa ahonle ne anwo to ye.” Na saa ɛnwu deɛmɔti nwanle ne ɛhyɛ la noko ɛ? Yemɔ ɛbazi abotane wɔahendɛ.

² Wɔ edwɛkɛ ɛhye anu, yɛbazuzu Baebolo ngyinlazo bie mɔ mɔɔ ɔbaboa yɛ yeamaa yɛahɔ zo ‘yɛahendɛ’ la anwo. (Maeka 7:7) Eza yɛbanlea tɛnlabelɛ nwiɔ mɔɔ ɔwɔ kɛ yɛsi abotane yɛkendɛ Gyihova wɔ nu la. Mɔɔ li awieleɛ la, yɛbazuzu nyilalɛ mɔɔ bɛdabɛ mɔɔ bɛlɛ ɛhulolɛ kɛ bɛbahendɛ la banyia la anwo.

3. Duzu a ngyinlazo mɔɔ wɔ Mrɛlɛbulɛ 13:11 la maa yɛnwu ye a?

³ Neazo bie mɔɔ kile kɛ ɔwɔ kɛ yɛnyia abotane la wɔ Mrɛlɛbulɛ 13:11. Ɔse: “Anwonyia mɔɔ bɛnyia ye ndɛndɛ la azo bade, noko anwonyia mɔɔ bɛboɔboa ɔ nloa ngyikyingyikyi la bayɛ kpole.” Wɔnwu ngyinlazo mɔɔ wɔ nu la ɔ? Nrɛlɛbɛ wɔ nu kɛ ɛbazi abotane wɔayɛ ninyɛne, mmapele nwolɛ.

4. Duzu a ngyinlazo mɔɔ wɔ Mrɛlɛbulɛ 4:18 la maa yɛnwu ye a?

⁴ Mrɛlɛbulɛ 4:18 maa yɛnwu kɛ “tenlenema adenle le kɛ nwonlomɔ wienyi mɔɔ ta la. Ɔta ngyikyingyikyi too ɔkɔdwu ewia henlema.” Edwɛkɛ ɛhye fale adenle mɔɔ Gyihova dua zo da ye bodane ne ali kile ye menli la anwo​—ɔyɛ ye ngyikyingyikyi. Noko eza ngyɛnu ne kola fale kɛzi Kilisienenli bie nyia  sunsum nu anyuhɔlɛ ngyikyingyikyi la anwo. Ɔnle kenle ko debie. Ɔdie mekɛ. Saa yɛsukoa folɛdulɛ mɔɔ wɔ Nyamenle Edwɛkɛ ne anu nee mɔɔ yɛnyia yɛfi ye ahyehyɛdeɛ ne ɛkɛ la kpalɛ a, ngyikyingyikyi yɛbanyia Kelaese subane ne bie. Eza yɛbanyia Nyamenle anwo nrɛlɛbɛ kpole. Maa yɛzuzu kɛzi Gyisɛse yɛle ɛhye anwo ndonwo la anwo.

5. Ndonwo boni a Gyisɛse yɛle hilele kɛzi awie nyi ngyikyingyikyi la anu a?

⁵ Gyisɛse yɛle ndonwo hilele kɛzi Belemgbunlililɛ edwɛkɛ ne mɔɔ yɛka la le kɛ ma ekyi bie mɔɔ nyi ngyikyingyikyi wɔ ahonlekpalɛma ahonle nu la anu. Ɔhanle kɛ: “Ma ne mɔ fifi na bɛyɛ ndendenle​—ɔnze [ɛyazolɛnli ne] adenle mɔɔ bɛdua zo bɛyɛ zɔ a. Azɛlɛ mumua ne yɛ ye ngyikyi ngyikyi maa ɔso; ɔdimoa ɔwɔlɔ, akee ma ba zo, na nzinlii ma ne abolo.” (Maake 4:27, 28) Duzu a ɛnee Gyisɛse ɛlɛkile a? Ɛnee ɔlɛkile kɛ, kɛmɔ baka nyi ngyikyingyikyi la, zɔhane ala a awie mɔɔ die Belemgbunlililɛ edwɛkɛ ne to nu la nyi ngyikyingyikyi wɔ sunsum nu a. Kɛ neazo la, saa yɛ Baebolo sukoavoma bikye Gyihova kpalɛ a, akee yɛnwu nzenzaleɛ ngɛnlɛma dɔɔnwo mɔɔ bɛyɛ wɔ bɛ ɛbɛlabɔlɛ nu la. (Ɛfɛ. 4:22-24) Noko ɔwɔ kɛ yɛkakye kɛ Gyihova a maanle ma ekyi zɔhane nyinle a.​—1 Kɔl. 3:7.

6-7. Duzu a yɛsukoa yɛfi kɛzi Gyihova bɔle azɛlɛ ne la anu a?

⁶ Saa Gyihova ɛlɛyɛ debie a, ɔsi abotane ɔfa mekɛ dodo mɔɔ ɔbahyia nwo na yeawie la ɔyɛ. Ɔyɛ ye zɔ amaa yeawula ye duma ne anyunlunyia na yeaboa awie mɔ. Kɛ neazo la, suzu kɛzi Gyihova yɛle ye ngyikyingyikyi zieziele azɛlɛ ne maanle alesama la anwo nea.

⁷ Mɔɔ Baebolo ne ka kɛzi Gyihova bɔle azɛlɛ ne anwo edwɛkɛ la, ɔhanle kɛ ‘ɔzuzule,’ ɔdole ‘ye adiabo ne’ yɛɛ ‘ɔdole ye mgbɛnezo bolɛ ne.’ (Dwobu 38:5, 6) Ɔnyianle mekɛ bɔbɔ ɔnleanle gyima mɔɔ ɔyɛle la. (Gyn. 1:10, 12) Ɛbahola wɔapɛ kɛzi anwumabɔvolɛ ne mɔ dele nganeɛ wɔ mekɛ mɔɔ bɛnwunle kɛ Gyihova ɛlɛyɛ ye ngyikyingyikyi abɔ ninyɛne la anwo nvoninli ɔ? Ɔbayɛ kɛ bɛ nye liele kpalɛ! Ɛhye ati, bɛbɔle ɔ bo ‘bɛbɔle bɛ sa nu  bɛdeɛdeanle nu.’ (Dwobu 38:7) Duzu a yɛsukoa yɛfi nu a? Gyihova vale ɛvolɛ apenle dɔɔnwo a bɔle ninyɛne a, noko mɔɔ ɔdɔle alagye ɔnleanle debie biala mɔɔ yebɔ la, ɔhanle kɛ “ɔle kpalɛ bɔkɔɔ.”​—Gyn. 1:31.

8. Duzu a yɛbazuzu nwo kɛkala a?

⁸ Kɛ mɔɔ yɛnwu ye wɔ neazo ne mɔ mɔɔ yɛlimoa yɛha nwolɛ edwɛkɛ la anu la, yɛbahola yɛanwu ngyinlazo dɔɔnwo wɔ Nyamenle Edwɛkɛ ne anu mɔɔ maa yɛnwu deɛmɔti ɔhyia kɛ yɛsi abotane la. Kɛkala, yɛbanlea tɛnlabelɛ nwiɔ mɔɔ ɔwɔ kɛ yɛnyia ɛhulolɛ kɛ yɛbahendɛ Gyihova wɔ nu la.

9. Tɛnlabelɛ ko mɔɔ ɔwɔ kɛ yɛkendɛ Gyihova wɔ nu la a le boni?

⁹ Bie a ɔbahyia kɛ yɛkendɛ yɛmaa ɔbua yɛ asɔneyɛlɛ bie. Saa yɛyɛ asɔne kɛ Gyihova ɛmaa yɛ anwosesebɛ ɔmaa yɛgyinla sɔnea bie anloa anzɛɛ ɔboa yɛ ɔmaa yɛli yɛ sinlidɔlɛ bie azo a, wɔannea a yɛbade nganeɛ kɛ moalɛ mɔɔ yɛkpondɛ la ɛlɛkyɛ. Duzu ati a Gyihova ɛmbua yɛ asɔneyɛlɛ kɔsɔɔti ɛkɛ ne ala a?

10. Duzu ati a ɔhyia kɛ yɛnyia abotane yɛkendɛ Gyihova yɛmaa ɔbua yɛ asɔneyɛlɛ a?

¹⁰ Gyihova tie yɛ asɔneyɛlɛ kpalɛ. (Edw. 65:2) Ɔnwu yɛ asɔneyɛlɛ mɔɔ vi ahonle nu la kɛ ɔle daselɛ mɔɔ kile kɛ yɛlɛ diedi wɔ ye nu a. (Hib. 11:6) Eza Gyihova kulo kɛ ɔnwu kɛzi yɛbɔ kpɔkɛ kɛ yɛbabɔ yɛ asɔneyɛlɛ ne anwo ɛbɛla na yɛayɛ ye ɛhulolɛdeɛ la. (1 Dwɔn 3:22) Ɔti saa yɛyɛ asɔne kɛ Gyihova ɛboa yɛ ɛmaa yɛgyakyi subane ɛtane bie anzɛɛ yɛli yɛ sinlidɔlɛ zo a, bie a ɔbahyia kɛ yɛzi abotane na yɛyɛ biala mɔɔ yɛbahola la kɛ yɛbahakyi. Gyisɛse maanle yɛnwunle kɛ bɛnrɛbua yɛ asɔneyɛlɛ bie mɔ ɛkɛ ne ala. Ɔhanle kɛ: “Bɛhɔ zo bɛbiza, na bɛ sa baha ye; bɛhɔ zo bɛkpondɛ, na bɛbanwu ye; bɛhɔ zo bɛbɔ nu, na bɛbabuke bɛ; ɔluakɛ awie biala mɔɔ kɛbiza la asa ka ye, na awie biala mɔɔ kɛkpondɛ la nwu ye, yɛɛ awie biala mɔɔ kɛbɔ nu la, bɛbuke ye.” (Mat. 7:7, 8) Saa yɛdi folɛdulɛ ɛhye azo na ‘yɛkɔ zo yɛyɛ asɔne’ a, yɛbahola yɛanyia anwodozo kɛ, yɛ anwuma Selɛ ne badie yɛ na yeabua yɛ asɔneyɛlɛ.​—Kɔl. 4:2.

11. Saa bɛambua yɛ asɔneyɛlɛ ɛkɛ ne ala a, kɛzi Hibuluma 4:16 baboa yɛ ɛ?

¹¹ Ɔdwu mekɛ ne bie a, Gyihova ɛmbua yɛ asɔneyɛlɛ ɛkɛ ne ala, noko yebɔ ɛwɔkɛ kɛ ɔbabua yɛ asɔneyɛlɛ “wɔ mekɛ kpalɛ nu.” (Kenga Hibuluma 4:16.) Ɛhye ati a saa ninyɛne anyɛ ndɛndɛ kɛ mɔɔ yɛkpondɛ la a, ɔnle kɛ yɛbɔ Gyihova somolɛ la. Kɛ neazo la, menli dɔɔnwo ɛyɛ asɔne wɔ ɛvolɛ dɔɔnwo anu kɛ bɛkulo kɛ bɛnwu kɛ Nyamenle Belemgbunlililɛ ne ɛzɛkye ewiade ɛhye. Gyisɛse bɔbɔ hanle kɛ yɛyɛ nwolɛ asɔne. (Mat. 6:10) Noko nrɛlɛbɛ ɛnle nu kɛ awie bamaa diedi mɔɔ ɔlɛ wɔ Nyamenle anu la aha aze ɔluakɛ awieleɛ ne amba kɛmɔ alesama anye la la ati! (Hab. 2:3; Mat. 24:44) Ɔle kpalɛ kɛ yɛbahɔ zo yɛahendɛ Gyihova na yɛava diedi yɛayɛ asɔne. Awieleɛ ne bara wɔ ye mekɛ nloa pɛpɛɛpɛ, ɔluakɛ Gyihova ɛkpa “kenle zɔhane nee dɔnehwele ne” dɛbadɛba. Na zɔhane kenle ne baboa awie biala.​—Mat. 24:36; 2 Pita 3:15.

12. Mekɛ boni a bie a ɔbayɛ se yeamaa yɛ kɛ yɛbazi abotane a?

¹² Saa bɛ nee yɛ ɛnli ye boa a, ɔwɔ kɛ yɛsi abotane. Fane dɔɔnwo ne ala, menli nee bɛdabɛ mɔɔ asolo bɛ awodeɛ, bɛ nwo nane, bɛ aneɛ, bɛ amaamuo nee maanle mɔɔ bɛvi nu la ɛnli ye boɛ. Kɛmɔ bie mɔ le wuliravolɛma anzɛɛ bɛlɛ adwenle nu ngyegyelɛ la ati, bɛ nee bɛ ɛnli ye boɛ. Bɛ nee Gyihova menli dɔɔnwo ɛnli ye boɛ ɔlua bɛ diedi ne mɔɔ gyi  Baebolo ne azo la ati. Saa bɛ nee yɛ anli ye boɛ wɔ ndenle ɛhye mɔ bie azo a, ɔwɔ kɛ yɛkakye Gyisɛse edwɛkɛ mɔɔ ɔhanle la. Ɔse: “Mɔɔ kɛgyinla nu kɛhɔ awieleɛ la bɛbalie ye ngoane.” (Mat. 24:13) Noko saa ɛnwu kɛ awie bie mɔɔ wɔ asafo ne anu la ɛyɛ ɛtane bie mɔɔ anyebolo wɔ nu la a, duzu a ɔwɔ kɛ ɛyɛ a? Saa mgbanyima ne mɔ te edwɛkɛ ne a, asoo ɛbanyia abotane wɔagyakyi edwɛkɛ ne wɔamaa bɛ na wɔanyia anwodozo kɛ bɛbali nwolɛ gyima kɛ mɔɔ Gyihova adehilelɛ kile la ɔ? Duzu a ɔwɔ kɛ asafo nu mgbanyima ne mɔ yɛ a?

13. Saa awie yɛ ɛtane kpole a, duzu a Gyihova kulo kɛ asafo nu mgbanyima ne mɔ yɛ a?

¹³ Saa mgbanyima ne mɔ te kɛ awie ɛyɛ ɛtane kpole wɔ asafo ne anu a, bɛyɛ asɔne bɛkpondɛ “nrɛlɛbɛ ne mɔɔ vi anwuma la” amaa bɛanwu Gyihova adwenle wɔ edwɛkɛ ne anwo. (Gye. 3:17) Bɛ bodane a le kɛ bɛboa ahenle mɔɔ ɛlɛyɛ ɛtane ne la na saa ɔkɛyɛ boɛ a, ‘yeazia ɔ nzi yeavi ye adenle ɛtane ne azo.’ (Gye. 5:19, 20) Eza bɛkulo kɛ bɛyɛ biala mɔɔ bɛbahola la bɛbɔ asafo ne anwo bane na bɛkyekye bɛdabɛ mɔɔ edwɛkɛ ne ɛgyegye bɛ la arɛle. (2 Kɔl. 1:3, 4) Saa mgbanyima ne mɔ te kɛ awie ɛyɛ ɛtane kpole bie a, ɔwɔ kɛ bɛdimoa bɛnwu edwɛkɛ ne akunlu nee ɔ nzi, na bie a ɛhye balie mekɛ. Akee bɛyɛ asɔne bɛkpondɛ folɛdulɛ bɛfi Ngɛlɛlera ne anu na bɛtenrɛdenrɛ ahenle “kɛ mɔɔ ɔfɛta la.” (Gyɛ. 30:11) Asafo nu mgbanyima ne mɔ ɛnyɛ tusie ɛdeɛ, noko bɛmpele bɛ nwo bɛmbua ndɛne. Saa mgbanyima ne mɔ di edwɛkɛ ne anwo gyima kpalɛ a, ɔbaboa asafo ne amuala. Noko saa mgbanyima ne mɔ di tɛnlabelɛ ne anwo gyima kpalɛ bɔbɔ a, bie a awie mɔɔ ahenle nyɛleɛ ne hanle ye la bahɔ zo ali nyane. Saa bie ɛdo wɔ a, duzu a ɛbahola wɔayɛ amaa wɔanli nyane kpole a?

14. Saa adiema bie ɛyɛ debie ɛmaa yegyegye wɔ kpole a, Baebolo nu neazo boni a baboa wɔ yeamaa wɔagyinla ɔ nloa a?

¹⁴ Asoo awie anzɛɛ ɛ diema diedinli bie ɛyɛ debie ɛmaa yegyegye wɔ kpole ɔ? Ɛbanwu kɛzi yɛbahola yɛahendɛ Gyihova yɛamaa yeali ninyɛne nwo gyima la anwo neazo ngɛnlɛma dɔɔnwo wɔ Nyamenle Edwɛkɛ ne anu. Kɛ neazo la, Dwosefi amediema ne mɔ nee ye anli ye boɛ ɛdeɛ, noko yeandoa bɛ ɛtane ne yeanva bɛ nwo ɛya. Emomu, ɔhɔle zo ɔvale ye adwenle ɔziele Gyihova ɛzonlenlɛ zo, na Gyihova yilale ye kɛ ɔhɔle zo ɔzile  abotane ɔgyinlanle kpundii la. (Gyn. 39:21) Nzinlii, Dwosefi holale yele ye adwenle vile mɔɔ bɛvale bɛyɛle ye la azo na ɔnwunle kɛzi Gyihova ɛlɛyila ye la. (Gyn. 45:5) Kɛ mɔɔ Dwosefi yɛle la, saa yɛbikye Gyihova na yɛmaa ɔdi ninyɛne nwo gyima a, ɔkyekye yɛ rɛle.​—Edw. 7:17; 73:28.

15. Duzu a boale adiema raalɛ ko mɔɔ bɛ nee ye anli ye boɛ la ɔmaanle ɔgyakyile edwɛkɛ ne anu a?

¹⁵ Nɔhalɛ nu, tɛ mekɛ ne amuala a bɛ nee yɛ anli ye boɛ a, anyebolo wɔ nu kɛ Dwosefi ɛdeɛ ne la a. Noko saa bɛ nee yɛ anli ye boɛ wɔ adenle bie azo a, ɔyɛ yɛ nyane. Saa yɛ nee yɛ diema bie anzɛɛ awie mɔɔ ɛnzonle Gyihova la nyia edwɛkɛ na yɛfa Baebolo ngyinlazo yɛdi gyima a, ɔbaboa yɛ. (Fel. 2:3, 4) Anwubielɛ bie ɛne. Mɔɔ adiema raalɛ bie dele kɛ ɔ gɔnwo gyimayɛvo bie ɛlɛka ɔ nwo edwɛkɛ ɛtane mɔɔ ɛnle nɔhalɛ la ahile awie mɔ la, ɔyɛle ye nyane kpalɛ. Adiema raalɛ ne ampele ɔ nwo, na ɔzile abotane ɔdwenledwenlenle Gyisɛse neazo ne anwo. Mɔɔ awie mɔ bɔle ye aholoba la, yeambɔ bɛ bie. (1 Pita 2:21, 23) Ɛhye ati, ɔzile kpɔkɛ kɛ ɔbabu ɔ nye yeagua mɔɔ zile la azo. Nzinlii ɔdele kɛ, ɔ gɔnwo gyimayɛvo ne ɛnde kpɔkɛ fee na yemaa adwenleadwenle ɛdɔ ɔ nwo. Adiema raalɛ ne nwunle kɛ bie a ɔ gɔnwo gyimayɛvo ne hanle edwɛkɛ ne ala na ɔnlɛ adwenle ɛtane biala. Ɔti adiema raalɛ ne anye liele kɛ ɔzile abotane ɔgyinlanle tɛnlabelɛ ne anloa la na ɔmaanle ɔ nzo nu dwole ye.

16. Saa awie nee wɔ ɛnli ye boɛ a, duzu a bahola akyekye ɛ rɛle a? (1 Pita 3:12)

¹⁶ Saa awie nee wɔ ɛnli ye boɛ anzɛɛ yeyɛ debie yemaa yegyegye wɔ a, kakye kɛ Gyihova bikye bɛdabɛ mɔɔ bɛ ahonle ɛbubu la. (Edw. 34:18) Ɔkulo wɔ ɔluakɛ ɛlɛsi abotane yɛɛ ɛlɛfa wɔ adesoa ne wɔado ɔ nwo zo. (Edw. 55:22) Ɔle azɛlɛ ye kɔsɔɔti Ndɛnebuavolɛ. Ɔnwu debie biala mɔɔ ɛlɛkɔ zo la. (Kenga 1 Pita 3:12.) Saa ɛlɛyia ngyegyelɛ bie mɔɔ ɛnrɛhola ɛnrɛli nwolɛ gyima a, asoo ɛlɛ ɛhulolɛ kɛ ɛbahendɛ ye ɔ?

17. Ɛwɔkɛ boni a Gyihova ɛbɔ yɛ wɔ Ayezaya 30:18 a?

¹⁷ Ɔnrɛhyɛ, yɛ anwuma Selɛ ne balua ye Belemgbunlililɛ ne azo ayila yɛ kpole. Ayezaya 30:​18 ka kɛ: “Gyihova ɛlɛfa abotane ahendɛ kɛ ɔboa bɛ, na ɔbamaa ɔ nwo zo yeaze bɛ anwunvɔne. Ɔluakɛ Gyihova le pɛlepɛle Nyamenle. Anyelielɛ a le menli kɔsɔɔti mɔɔ bɛ nye la ɔ nwo zo la.” Menli mɔɔ bɛ nye la Gyihova anwo zo la banyia nyilalɛ dɔɔnwo ɛnɛ na bɛanyia bie wɔ ewiade fofolɛ ne mɔɔ ɛlɛba la anu.

18. Nyilalɛ boni mɔ a yɛ nye la bɛ ade a?

 ¹⁸ Saa Nyamenle menli kɔ ewiade fofolɛ ne anu a, ɔnrɛhyia kɛ bɛgyinla adwenleadwenle nee ngyegyelɛ mɔɔ bɛlɛyia ye kɛkala la anloa bieko. Nzisi bavi ɛkɛ yɛɛ yɛnrɛli nyane bieko. (Yek. 21:4) Ɔnrɛhyia kɛ yɛkendɛ na yɛ sa aha mɔɔ yɛhyia la ɔluakɛ ninyɛne mgbalɛ babu. (Edw. 72:16; Aye. 54:13) Ɛhye bayɛ nyilalɛ kpole!

19. Kɛkala, duzu a Gyihova ɛlɛsiezie yɛ ngyikyingyikyi yeamaa a?

¹⁹ Kɛkala, saa yɛdi subane ɛtane biala azo na yɛnyia subane kpalɛ biala a, ɛnee Gyihova ɛlɛsiezie yɛ yeamaa yɛadɛnla ye tumililɛ ne abo. Mmamaa ɛ sa nu to na ɛgyakyi Gyihova ɛzonlenlɛ. Ninyɛne mgbalɛ wɔ yɛ nyunlu! Kɛmɔ asetɛnla kpalɛ la yɛ nyunlu la ati, bɛmaa yɛhɔ zo yɛvi yɛ ɛhulolɛ nu yɛhendɛ Gyihova na yɛzi abotane yɛmaa ɔli ninyɛne nwo gyima ɔwie!