EDWƐKƐ 33
Gyihova Anye Wɔ Ye Menli Nwo Zo
“Gyihova anye wɔ bɛdabɛ mɔɔ bɛsulo ye la anwo zo.”—EDW. 33:18.
EDWƐNE 4 “Gyihova Le Me Neavolɛ”
MƆƆ YƐBAZUKOA *
1. Duzu ati a Gyisɛse zɛlɛle Gyihova kɛ ɔnlea ye ɛdoavolɛma ne anwo zo a?
NƆE ne mɔɔ aleɛ kye a Gyisɛse bawu la, ɔzɛlɛle debie titili bie ɔvile ye anwuma Selɛ ne ɛkɛ. Ɔzɛlɛle Gyihova kɛ ɔnlea ye ɛdoavolɛma ne anwo zo. (Dwɔn 17:15, 20) Nɔhalɛ nu, Gyihova anye wɔ ye menli nwo zo dahuu—ɔnea bɛ yɛɛ ɔbɔ bɛ nwo bane. Noko ɛnee Gyisɛse ze kɛ Seetan badwazo atia ye ɛdoavolɛma ne ɛsesebɛ. Ɛnee eza ɔze kɛ ye ɛdoavolɛma ne bahyia Gyihova moalɛ amaa bɛahola bɛagyinla Abɔnsam atisesebɛ ɛtetalɛ ne mɔ anloa.
2. Kɛ mɔɔ Edwɛne 33:18-20 kile la, duzu ati a ɔnle kɛ yɛsulo ngyegyelɛ a?
2 Seetan ewiade ne maa Kilisienema yia ngyegyelɛ dɔɔnwo ɛnɛ. Yɛyia ngyegyelɛ mɔɔ kola maa yɛ sa nu to na ɔsɔ nɔhalɛ mɔɔ yɛdi yɛamaa Gyihova ɔnea bɔbɔ la. Noko kɛ mɔɔ yɛbanwu ye wɔ edwɛkɛ ɛhye anu la, ɔnle kɛ yɛsulo. Gyihova anye wɔ yɛ nwo zo—ɔnwu ngyegyelɛ mɔɔ yɛlɛyia la na yeziezie ɔ nwo kɛ ɔboa yɛ yeamaa yɛagyinla ɔ nloa. Maa yɛzuzu Baebolo nu neazo nwiɔ mɔɔ maa yɛnwu kɛzi Gyihova “anye wɔ bɛdabɛ mɔɔ bɛsulo ye” la anwo zo la anwo.—Kenga Edwɛne 33:18-20.
SAA YƐTE NGANEƐ KƐ YEHA YƐ NGOME A
3. Mekɛ boni a yɛbahola yɛade nganeɛ kɛ yeha yɛ ngome a?
3 Yɛwɔ abusua kpole mɔɔ bɛsonle Gyihova la anu ɛdeɛ, noko ɔyɛ a yɛbade nganeɛ kɛ yeha yɛ ngome. Kɛ neazo la, saa ngakula ɛlɛkilehile bɛ diedi ne anu ahile bɛ sukuluma anzɛɛ bɛkɔ asafo fofolɛ nu a, bɛbahola bɛade nganeɛ kɛ yeha bɛ ngome. Bie a yɛlɛdi nyane anzɛɛ yɛ sa nu ɛdo na yɛbade nganeɛ kɛ ɔwɔ kɛ yɛ ngomekye a yɛdi ngyegyelɛ ɛhye mɔ anwo gyima a. Bie a yɛnrɛhulo kɛ yɛbaha nwolɛ edwɛkɛ yɛahile awie mɔ ɔluakɛ yɛbahola yɛanyia adwenle kɛ bɛnrɛde ɔ bo. Ɔdwu mekɛ ne bie a, wɔannea a yɛbanyia adwenle kɛ awie biala ɛndwenle yɛ nwo. Ɔnva nwo debie mɔɔ maa yɛte nganeɛ kɛ yɛha yɛ ngome la, ɔkola ɔmaa yɛnyia adwenle kɛ yɛnlɛ moalɛ biala na adwenleadwenle tɔ yɛ nwo. Gyihova ɛngulo kɛ yɛte nganeɛ zɔ ɛlɛ. Duzu ati a yɛkola yɛka ye zɔ a?
4. Duzu ati a ngapezonli Yilaegya hanle kɛ: “Me ngome a meha a”?
4 Suzu nɔhavo Yilaegya neazo ne anwo. Kɛmɔ Gyɛzɛbɛle hanle ndane kɛ ɔbahu ye la ati, wɔ kenle mɔɔ bo 40 la anu ɛnee ɔlɛnriandi yeavi ɔ nye zo. (1 Arl. 19:1-9) Nzinlii mɔɔ ɛnee ɔ ngomekye ɔwɔ bɔne bie anu la, ɔhanle ɔhilele Gyihova kɛ: “Me ngome a [mele ngapezonli mɔɔ] meha a.” (1 Arl. 19:10) Ɛnee ngapezoma gyɛne wɔ maanle ne anu; Obadaya bɔle mɔdenle vale ngapezoma 100 veale amaa Gyɛzɛbɛle asa anga bɛ angu bɛ. (1 Arl. 18:7, 13) Ɔti, duzu ati a Yilaegya dele nganeɛ kɛ yeha ɔ ngome a? Asoo ɔnyianle adwenle kɛ ngapezoma ne mɔɔ Obadaya vale bɛ veale la amuala ɛwu ɔ? Kɛmɔ awie mɔ gyɛne amboka ɔ nwo bɛanzonle Gyihova wɔ mɔɔ zile wɔ Kamɛle Boka ne azo la anzi la ati a ɔdele nganeɛ zɔ ɔ? Asoo ɔdele nganeɛ kɛ awie biala ɛnze esiane mɔɔ ɔwɔ nu la anzɛɛ awie biala ɛndwenle ɔ nwo ɔ? Baebolo ne anga kɛzi Yilaegya dele nganeɛ la amuala. Noko mɔɔ yɛze ye bɔkɔɔ la a le kɛ Gyihova dele Yilaegya anwokoonwuyɛlɛ ne abo na ɛnee ɔze mɔɔ ɔbayɛ yeaboa ye la.
Saa yɛte nganeɛ kɛ yeha yɛ ngome a, kɛzi adenle mɔɔ Gyihova luale zo kyekyele Yilaegya arɛle la bahola aboa yɛ ɛ? (Nea ɛdendɛkpunli 5-6)
5. Kɛzi Gyihova maanle Yilaegya nwunle kɛ ɔtɛkale ɔ ngome ɛ?
5 Gyihova boale Yilaegya wɔ ndenle dɔɔnwo azo. Ɔhanle kɛ Yilaegya ɛha mɔɔ ɛlɛgyegye ye la. Ɔbizale Yilaegya fane nwiɔ kɛ: “Duzu a ɛlɛyɛ ye wɔ ɛke a?” (1 Arl. 19:9, 13) Mekɛ biala mɔɔ Yilaegya ɛlɛka ye ahonle nu edwɛkɛ la, Gyihova tie ye. Gyihova maanle Yilaegya nwunle kɛ ɔwɔ ɛkɛ yɛɛ ɔlɛ tumi kpole. Eza ɔmaanle Yilaegya nwunle kɛ ɔlɛ ɔ gɔnwo mɔ diedima dɔɔnwo wɔ ɛkɛ. (1 Arl. 19:11, 12, 18) Yemɔti a mɔɔ Yilaegya hanle ye ahonle nu edwɛkɛ hilele Gyihova na ɔdele Ye mualɛ ne la ye ahonle dɔle ye azule nu la. Gyihova vale gyimalilɛ ngakyile mɔɔ hyia la wulale Yilaegya asa. Ɔhanle ɔhilele ye kɛ ɔkpokpa Hazeeyɛle ɔyɛ ye Selea belemgbunli, Gyihu ɔyɛ ye Yizilayɛ belemgbunli yɛɛ Yilaehya ɔyɛ ye ngapezonli. (1 Arl. 19:15, ) Gyimalilɛ ɛhye mɔ mɔɔ Gyihova vale wulale Yilaegya asa la maanle ɔvale ye adwenle ɔziele ninyɛne mgbalɛ zo. Eza ɔmaanle Yilaehya rayɛle ɔ gɔnwo kpalɛ. Saa ɛte nganeɛ kɛ yeha ɛ ngome a, kɛ ɔkɛyɛ na wɔanyia moalɛ wɔavi Gyihova ɛkɛ ɛ? 16
6. Saa ɛte nganeɛ kɛ yeha ɛ ngome a, duzu a ɛbahola wɔayɛ nwolɛ asɔne a? (Edwɛne 62:8)
6 Gyihova se ɛva wɔ asɔneyɛlɛ ɛdo ɔ nyunlu. Ɔze ngyegyelɛ mɔɔ ɛlɛyia la na ɔkulo kɛ ɛnwu kɛ ɔbadie wɔ asɔneyɛlɛ mekɛ biala. (1 Tɛs. 5:17) Ɔ nye die nwo kɛ ɔbadie ye azonvolɛ asɔneyɛlɛ. (Mrɛ. 15:8) Saa ɛte nganeɛ kɛ yeha ɛ ngome a, duzu a ɛbahola wɔayɛ nwolɛ asɔne a? Ka wɔ ahonle nu edwɛkɛ kɔsɔɔti kile Gyihova kɛ mɔɔ Yilaegya yɛle la. (Kenga Edwɛne 62:8.) Ka mɔɔ ɛlɛgyegye wɔ nee kɛzi ɔmaa ɛte nganeɛ la kile ye. Sɛlɛ Gyihova kɛ ɔboa wɔ ɔmaa ɛgyinla ɔ nloa. Kɛ neazo la, saa ɛte nganeɛ kɛ yeha ɛ ngome anzɛɛ wɔ ahonle tu wɔ mekɛ mɔɔ ɔwɔ kɛ ɛdi daselɛ wɔ sukulu la a, sɛlɛ Gyihova kɛ ɔmaa wɔ akɛnrasesebɛ ɔmaa ɛdendɛ. Ɛbahola wɔazɛlɛ ye kɛ ɔmaa wɔ nrɛlɛbɛ ɔmaa ɛlua adenle kpalɛ zo ɛhilehile wɔ diedi ne anu. (Luku 21:14, 15) Saa ɛ rɛle bɔ anzɛɛ ɛ sa nu to a, sɛlɛ Gyihova kɛ ɔboa wɔ ɔmaa ɛha nwolɛ edwɛkɛ ɛhile adiema bie mɔɔ ɛnyi sunsum nu la. Ɛbahola wɔazɛlɛ ye kɛ ɔboa ahenle mɔɔ ɛkaha wɔ edwɛkɛ ne wɔahile ye la ɔmaa ɔdie wɔ na ɔde wɔ edwɛkɛ bo. Ka wɔ ahonle nu edwɛkɛ kile Gyihova, nea kɛzi ɔbabua wɔ asɔneyɛlɛ ne la na die moalɛ mɔɔ awie mɔ bava amaa wɔ la to nu; ɔnrɛmaa ɛnrɛde nganeɛ kɛ yeha ɛ ngome.
Ɛkpondɛ ndenle ɛdua zo ɛtɛlɛ wɔ ɛzonlenlɛ gyima ne anu na ɛ nee awie mɔ bɔ nu yɛ ɔ? (Nea ɛdendɛkpunli 7)
7. Duzu a ɛsukoa ɛfi Mauricio neazo ne anu a?
7 Gyihova ɛmaa yɛ muala gyima mɔɔ nvasoɛ wɔ zo. Ɛbahola wɔanyia anwodozo kɛ ɔnwu mɔdenle biala mɔɔ ɛlɛbɔ amaa wɔayɛ gyimalilɛ nee ɛzonlelilɛ biala mɔɔ ɛlɛ wɔ asafo ne nee ɛzonlenlɛ gyima ne anu la, na ɔ nye sɔ ye kpalɛ. (Edw. 110:3) Saa ɛ nye bolo wɔ gyima ɛhye ɛyɛlɛ nu a, kɛzi ɔbaboa wɔ amaa wɔande nganeɛ kɛ yeha ɛ ngome ɛ? Suzu adiema kpavolɛ bie mɔɔ bɛfɛlɛ ye Mauricio la neazo ne anwo. * Mɔɔ bɛzɔnenle Mauricio la, yeangyɛ, ngyikyingyikyi ɔ gɔnwo kpalɛ ko vile nɔhalɛ ne anu. Mauricio hanle kɛ: “Mɔɔ menwunle kɛ ɔlɛfi nɔhalɛ ne anu la, me sa nu dole. Ɛnee mengola mennwu ye saa mebahola meali me nwo zo ɛyilalɛ ɛwɔkɛ ne azo na meahɔ zo meadɛnla asafo ne anu a. Mendele nganeɛ kɛ yeha me ngome na menyianle adwenle kɛ awie biala ɛnrɛde me edwɛkɛ bo.” Duzu a boale Mauricio a? Ɔhanle kɛ: “Menyɛle dɔɔnwo wɔ ɛzonlenlɛ gyima ne anu. Ɛhye ammaa meandwenle me ngomekye nee kɛzi mete nganeɛ la anwo. Saa me nee awie mɔ bɔ nu kɔ daselɛlilɛ a, ɔmaa me nye die. Ɔmmaa mende nganeɛ kɛ yeha me ngome.” Nɔhalɛ nu, saa yɛnrɛhola yɛ nee yɛ mediema ɛnrɛlua nwo ɛnrɛhɔ daselɛlilɛ bɔbɔ a, yɛbahola yɛabɔ nu yɛalua kɛlata ɛhɛlɛlɛ nee fonu zo yɛali daselɛ na yemɔ bamaa yɛ anwosesebɛ. Duzu bieko a boale Mauricio a? Ɔdoale zolɛ kɛ: “Eza menyɛle gyima dɔɔnwo wɔ asafo ne anu. Saa menyia sukoavoma gyimalilɛ a, mesiezie me nwo kpalɛ na meyɛ ye kɛnlɛma. Gyimalilɛ ɛhye mɔ maanle mendele nganeɛ kɛ mesonle bolɛ memaa Gyihova nee awie mɔ.”
SAA YƐTE NGANEƐ KƐ SƆNEA MƆƆ ANU YƐ SE LA ƐLƐFO YƐ NWO ZO A
8. Kɛzi sɔnea mɔɔ anu yɛ se la kola ka yɛ ɛ?
8 Yɛ nye la kɛ yɛbayia sɔnea ngakyile wɔ mekɛ ɛhye mɔɔ li awieleɛ la anu. (2 Tim. 3:1) Noko mekɛ mɔɔ yɛbayia sɔnea ne nee kɛzi sɔnea ne de la bahola azi yɛ nwo. Bie a yɛ nwo bahyele yɛ wɔ ezukoa afoa anu, yɛbanyia ewule ɛzulolɛ bie anzɛɛ yɛ kulovolɛ bie bawu. Saa ɔba ye zɛhae a, bie a yɛ rɛle babɔ na yɛ sa nu ado, titili saa ɔzɔho kɛ sɔnea ne mɔ ba toɔdoa zo anzɛɛ yɛlɛyia sɔnea ngakyile wɔ mekɛ ko ne ala anu a. Noko kakye kɛ Gyihova anye wɔ yɛ nwo zo, na ɔlua ye moalɛ zo yɛbava anwodozo yɛagyinla sɔnea biala anloa.
9. Ka sɔnea mɔɔ Dwobu yiale la bie mɔ anwo edwɛkɛ.
9 Dwenle kɛzi Gyihova boale nɔhavo Dwobu la anwo. Ɔyiale sɔnea ngakyile mɔɔ anu yɛ se la wɔ mekɛ ezinraa bie anu. Wɔ kenle ko pɛ anu, Dwobu dele basabasayɛlɛ nee ninyɛne gyɛne mɔɔ yɛ azibɛnwo mɔɔ sisile mɔɔ maanle ye nyɛmoa, ye sonvolɛma yɛɛ mɔɔ yɛ nyane kpalɛ la, ɔ mra mɔɔ ɔkulo bɛ la wule la anwo edwɛkɛ. (Dwobu 1:13-19) Mɔɔ Dwobu tɛdi nyane la, yeangyɛ ɔnyianle ewule bie mɔɔ yɛ nyane na ɔzɛkyele ɔ nwo nane ne la. (Dwobu 2:7) Ɛnee Dwobu tɛnlabelɛ ne ɛnle kpalɛ fee ɔti ɔhanle kɛ: “Mekyi me ngoane; mengulo kɛ mekɔ zo metɛnla ngoane nu bieko.”—Dwobu 7:16.
Kɛmɔ ɛnee Gyihova kpondɛ kɛ Dwobu nwu kɛ ɔkulo ye la ati, ɔhanle ndenle ngakyile mɔɔ ɔdua zo ɔnea Ye abɔdeɛ la anwo edwɛkɛ ɔhilele ye (Nea ɛdendɛkpunli 10)
10. Kɛzi Gyihova maanle Dwobu nyianle mɔɔ ɔhyia nwo amaa yeahola yeagyinla ye sɔnea ne mɔ anloa la ɛ? (Nea ɔ nyunlu nvoninli ne.)
10 Ɛnee Gyihova anye wɔ Dwobu anwo zo. Kɛmɔ ɛnee Gyihova kulo Dwobu la ati, ɔvale mɔɔ ɔhyia nwo amaa yeahola yeagyinla ye sɔnea ne mɔ anloa la ɔmaanle ye. Gyihova nee Dwobu dendɛle na ɔmaanle ɔhakyele kɛzi Ye nrɛlɛbɛ le kpole na ɔfi ɛlɔlɛ nu ɔnea Ye abɔdeɛ la. Ɔhanle nane mɔɔ bɛ nwo yɛ ɛzulolɛ la dɔɔnwo anwo edwɛkɛ. (Dwobu 38:1, 2; 39:9, 13, 19, 27; 40:15; 41:1, 2) Eza Gyihova maanle kpavolɛ nɔhavo bie mɔɔ bɛfɛlɛ ye Ɛlaehu la maanle Dwobu anwosesebɛ na ɔkyekyele ɔ rɛle. Ɛlaehu maanle ɔnyianle anwodozo kɛ dahuu Gyihova yila Ye azonvolɛ wɔ bɛ kpundiigyinlanlɛ nwo. Noko eza Gyihova maanle Ɛlaehu vile ɛlɔlɛ nu dule Dwobu folɛ. Ɛlaehu maanle Dwobu hakyele kɛ saa ɛfa yɛ ɛtoto Gyihova, aleɛabo amuala Bɔvolɛ ne anwo a, yɛndwu bie. Na ɛhye maanle Dwobu gyakyile kɛ ɔbava ye adwenle yeazie ye tɛnlabelɛ ne azo somaa. (Dwobu 37:14) Eza Gyihova maanle Dwobu gyimalilɛ bie; ɛnee ɔwɔ kɛ ɔyɛ asɔne ɔmaa ɔ gɔnwo mɔ nsa ne mɔɔ yɛle ɛtane la. (Dwobu 42:8-10) Saa yɛlɛyia sɔnea mɔɔ anu yɛ se la ɛnɛ a, kɛzi Gyihova boa yɛ ɛ?
11. Saa yɛlɛyia sɔnea a, kɛzi Baebolo ne kyekye yɛ rɛle ɛ?
11 Gyihova nee yɛ ɛndendɛ kɛ mɔɔ ɔ nee Dwobu dendɛle la, noko ɔdua Ye Edwɛkɛ Baebolo ne azo ɔtendɛ ɔkile yɛ. (Wlo. 15:4) Ɔmaa yɛnyia kenle bie nwo anyelazo ɔfa ɔkyekye yɛ rɛle. Suzu edwɛkɛ ekyi mɔɔ wɔ Baebolo ne anu mɔɔ saa yɛlɛyia sɔnea a ɔkyekye yɛ rɛle la anwo. Gyihova ɛmaa yɛnyia anwodozo wɔ Ngɛlɛlera ne anu kɛ, debie biala, mɔɔ sɔnea mɔɔ anu yɛ se boka nwo la, “ɛnrɛhola ɛnrɛhwe yɛ ɛnrɛvi [ye] ɛlɔlɛ ne anwo.” (Wlo. 8:38, 39) Eza yemaa yɛnwu kɛ, ɔbikye “bɛdabɛ mɔɔ bɛfɛlɛ ye [wɔ asɔneyɛlɛ nu] la kɔsɔɔti.” (Edw. 145:18) Gyihova ɛha ɛhile yɛ kɛ saa yɛfa yɛ nwo yɛto ɔ nwo zo a, yɛbahola yɛagyinla sɔnea biala anloa na saa yɛlɛnwu amaneɛ bɔbɔ a, yɛ nye balie. (1 Kɔl. 10:13; Gye. 1:2, 12) Eza Nyamenle Edwɛkɛ ne kakye yɛ kɛ, saa yɛfa dahuu nyilalɛ mɔɔ Gyihova bava amaa yɛ la yɛtoto sɔnea mɔɔ yɛlɛyia ye kɛkala la anwo a, yɛ sɔnea ne mɔ le mekɛ ezinraa nu debie. (2 Kɔl. 4:16-18) Gyihova maa yɛnyia anyelazo kpalɛ kɛ, ɔbaye debie mɔɔ maa yɛyia sɔnea ngakyile, mɔɔ yemɔ a le Seetan Abɔnsam nee menli mɔɔ bɛsukoa ye amumuyɛ ndenle ne mɔ la yeavi ɛkɛ. (Edw. 37:10) Wɔhye Baebolo ne anu arɛlekyekyelɛ edwɛkɛ bie mɔ mɔɔ baboa wɔ yeamaa wɔagyinla sɔnea nloa kenle bie la wɔgua ɛ ti anu ɔ?
12. Duzu a Gyihova kulo kɛ yɛyɛ amaa yɛanyia ye Edwɛkɛ ne azo nvasoɛ kpalɛ a?
12 Gyihova kulo kɛ yɛye mekɛ yɛsie ahane yɛfa yɛkenga Baebolo ne na yɛdwenledwenle mɔɔ yɛkenga la anwo kpalɛ. Saa yɛfa mɔɔ yɛkenga la yɛyɛ gyima a, yɛ diedi bayɛ kpole na yɛabikye yɛ anwuma Selɛ ne kpalɛ. Ɛhye bamaa yɛanyia anwosesebɛ yɛagyinla sɔnea ngakyile nloa. Eza Gyihova fa ye sunsum nwuanzanwuanza ne maa bɛdabɛ mɔɔ bɛfa bɛ nwo bɛto ye Edwɛkɛ ne azo la. Zɔhane sunsum ne bahola amaa yɛanyia “tumi bedevinli ne” yɛagyinla sɔnea biala anloa.—2 Kɔl. 4:7-10.
13. Kɛzi sunsum nu aleɛ mɔɔ “akɛlɛ nɔhavo nee badwema ne” fa maa yɛ la boa yɛ maa yɛgyinla sɔnea nloa ɛ?
13 Ɔlua Gyihova moalɛ zo, “akɛlɛ nɔhavo nee badwema ne” maa yɛ sa ka edwɛkɛ, vidio nee edwɛne dɔɔnwo mɔɔ kola boa yɛ maa yɛ diedi nu yɛ se na yɛbikye Gyihova kpalɛ la. (Mat. 24:45) Ɔwɔ kɛ yɛfa ninyɛne ɛhye mɔ mɔɔ yɛ sa ka bɛ wɔ ye mekɛ nu la yɛdi gyima kpalɛ. Kenlensa ye, adiema raalɛ bie mɔɔ vi United States la hanle kɛzi ɔ nye sɔ sunsum nu aleɛ ɛhye mɔ amuala la anwo edwɛkɛ. Ɔhanle kɛ: “Wɔ ɛvolɛ 40 mɔɔ meva mezonle Gyihova la anu, bɛzɔ me nɔhalɛlilɛ ne bɛnlea fane dɔɔnwo.” Ɔyiale sɔnea ngakyile mɔɔ anu yɛ se la. Delava bie mɔɔ ɛbo la vale kale hunle ye nenyia, ye awovolɛ anwo dole bɛ na bɛwule yɛɛ ɔnyianle kansa fane nwiɔ. Duzu a boale ye maanle ɔholale ɔgyinlanle ɔ nloa a? Ɔhilehilele nu kɛ: “Gyihova boale me dahuu. Sunsum nu aleɛ mɔɔ ɔluale akɛlɛ nɔhavo nee badwema ne anwo zo ɔvale ɔmaanle yɛ la ɛboa me ɛmaa megyinla ɔ nloa. Ɛhye ati mete nganeɛ kɛ Dwobu mɔɔ hanle kɛ, ‘Kɔkpula kɛ mekɛwu la, menrɛgyakyi me nɔhalɛlilɛ nu ɛlɛ!’ la.—Dwobu 27:5.
Kɛ ɔkɛyɛ na yɛaboa awie mɔ wɔ asafo ne anu ɛ? (Nea ɛdendɛkpunli 14)
14. Kɛzi Gyihova dua yɛ mediema diedima nwo zo boa yɛ wɔ sɔnea nu ɛ? (1 Tɛsalonaekama 4:9)
14 Gyihova ɛtete ye menli kɛ bɛhulo bɛ nwo ngoko na bɛkyekye bɛ nuhua ko biala arɛle wɔ ngyegyelɛ mekɛ nu. (2 Kɔl. 1:3, 4; kenga 1 Tɛsalonaekama 4:9.) Kɛ mɔɔ Ɛlaehu yɛle la, yɛ mediema ɛziezie bɛ nwo kɛ bɛbaboa yɛ bɛamaa yɛali nɔhalɛ wɔ mekɛ mɔɔ yɛlɛyia ngyegyelɛ la. (Gyi. 14:22) Kɛ neazo la, suzu kɛzi Diane asafo ne anu amra boale ye bɛmaanle ɔgyinlanle kpundii wɔ sunsum nu wɔ mekɛ mɔɔ ɔ hu anwo dole ye kpole bie la. Ɔhanle kɛ: “Ɛnee ɔnla aze, noko Gyihova vile ɛlɔlɛ nu boale yɛ wɔ siane zɔhane mɔ mɔɔ anu yɛ se la anu. Yɛ asafo ne yɛle ninyɛne dɔɔnwo boale yɛ. Mediema ne mɔ kpɔlale yɛ, bɛvɛlɛle yɛ yɛɛ bɛnwu yɛ a bɛyɛ yɛ atuu na yemɔ boale yɛ maanle yɛgyinlanle ɔ nloa. Kɛmɔ menze kale ka la ati, ɛnee saa mebahɔ debiezukoalɛ anzɛɛ daselɛlilɛ a, mediema ne mɔ bafa me kɔ.” Ɔyɛ yɛ anyelielɛ kɛ yɛboka sunsum nu abusua mɔɔ ɛlɔlɛ wɔ bɛ avinli la anwo la!
YƐ NYE SƆ KƐZI GYIHOVA FI ƐLƆLƐ NU NEA YƐ LA
15. Duzu ati a yɛdie yɛdi kɛ yɛbahola yɛagyinla sɔnea nloa a?
15 Yɛ nuhua ko biala bayia ye sɔnea ɛdeɛ. Noko kɛ mɔɔ yɛnwu ye la, ɔnrɛra ye ɛlɛ kɛ yɛ ngome a yɛbagyinla sɔnea ne anloa a. Gyihova anye wɔ yɛ nwo zo dahuu kɛ mɔɔ selɛ mɔɔ lɛ ɛlɔlɛ la yɛ la. Ɔ nee yɛ lua na yeziezie ɔ nwo kɛ ɔbadie asɔne mɔɔ yɛyɛ kɛ ɔboa yɛ la yɛɛ ɔlɛ ɛhulolɛ kɛ ɔbaboa yɛ. (Aye. 43:2) Yɛze kɛ yɛbahola yɛagyinla sɔnea nloa, ɔluakɛ yevi ahunlunyele nu yeva debie biala mɔɔ yɛhyia nwo la yemaa yɛ. Yeva asɔneyɛlɛ nwo adenle, Baebolo ne, sunsum nu aleɛ dɔɔnwo yɛɛ yɛ mediema yemaa yɛ amaa bɛaboa yɛ wɔ yɛ ngyegyelɛ mekɛ nu.
16. Kɛ ɔkɛyɛ na yɛamaa Gyihova ahɔ zo anlea yɛ ɛ?
16 Ɔyɛ yɛ fɛ kɛ yɛlɛ anwuma Selɛ bie mɔɔ ɔ nye wɔ yɛ nwo zo la! “Yɛ ahonle di fɛlɛko wɔ ye nu.” (Edw. 33:21) Saa yɛfa ninyɛne mɔɔ Gyihova ɛva ɛmaa yɛ kɛ ɔfa yeaboa yɛ la amuala yɛdi gyima kpalɛ a, ɔbahile kɛ yɛ nye sɔ ɛlɔlɛ nu mɔɔ ɔlɛfi yeanlea yɛ la. Eza ɔwɔ kɛ yɛyɛ yɛ afoa nu ɛdeɛ amaa Nyamenle ahɔ zo anlea yɛ. Wɔ adenle fofolɛ zo, saa yɛkɔ zo yɛyɛ biala mɔɔ yɛbahola la yɛtie Gyihova, na yɛyɛ mɔɔ le kpalɛ wɔ ɔ nye zo la a, ɔbamaa ɔ nye ara yɛ nwo dahuu!—1 Pita 3:12.
EDWƐNE 30 Me Ze, Me Nyamenle Nee Me Gɔnwo