Saa yɛkenga Baebolo ne a, yɛbahola yɛayɛ neɛnleanu amaa yɛade mɔɔ yɛgengale la abo kpalɛ. Noko tɛ kɛmɔ yɛkulo kɛ yɛnwu Baebolo ne anu edwɛkɛ dɔɔnwo la ati a yɛsukoa a. Yɛkulo kɛ yɛnwu Gyihova subane ngɛnlɛma ne mɔ anwo ninyɛne dɔɔnwo amaa ɛlɔlɛ mɔɔ yɛlɛ yɛmaa ye la ayɛ kpole. Amaa yɛayɛ ɛhye la, yɛbahola yɛabiza yɛ nwo kɛ, ‘Duzu a edwɛkɛ ɛhye kilehile me wɔ Gyihova anwo a?’

Yɛbahola yɛakpondɛ Gyihova subane titili ne mɔ, mɔɔ le ye ɛlɔlɛ, nrɛlɛbɛ, pɛlepɛlelilɛ yɛɛ tumi la anwo daselɛ. Noko tɛ subane titili ɛhye mɔ ala a Gyihova lɛ a. Ɔlɛ subane ngɛnlɛma gyɛne. Nienwu a ɛbanwu ye subane ne mɔ anwo edwɛkɛ dɔɔnwo a?

Wɔ Gyihova Alasevolɛ Neɛnleanu Buluku ne anu, nea edwɛkɛtile “Gyihova Nyamenle” yɛɛ akee “Gyihova Subane” abo. Eza saa ɛlɛkenga Baebolo ne a, fa wɔ adwenle sie ye subane ne mɔ mɔɔ ɛnwu ye wɔ edwɛkɛ ne anu la azo.