• “Mendele nganeɛ kɛ asɛɛ me hu ɛzɛkye agyalɛ fane dɔɔnwo.”

• “Mendele nganeɛ kɛ me nyunlu ɛgua aze, me nwo ɛnyɛ fɛ yɛɛ nvasoɛ ɛnle me nwo zo.”

• “Meangola meanga nwolɛ edwɛkɛ meangile awie biala. Menvale menveale me nwo.”

• “Mendele nganeɛ kɛ asɛɛ Gyihova ɛndwenle me nwo.”

Edwɛkɛ ɛhye mɔ maa yɛnwu kɛzi nrenyia bie nea nlanwonvoninli a ɔmaa ɔ ye di nyane la. Na saa yevea ɔ nwo yeyɛ zɔ, bie a siane anzɛɛ ɛvolɛ dɔɔnwo anu a, wɔannea a ɔ ye bade nganeɛ kɛ ɔnrɛhola ɔnrɛlie ye ɔnrɛli bieko. Yelɛ ko hanle kɛ: “Membizale me nwo kɛ, ‘Nrenyia boni a me nee ye de la? Asoo ninyɛne gyɛne wɔ ɛkɛ mɔɔ ɔngulo kɛ menwu ye ɔ?’”

Bɛzieziele edwɛkɛ ɛhye bɛmaanle yelɛ mɔɔ ɔ hu nea nlanwonvoninli la. a Ɔkilehile Baebolo ngyinlazo ngakyile mɔɔ ɔbamaa yeanyia arɛlekyekyelɛ, yeanyia anwodozo kɛ Gyihova bazɔ ye nu na yeaboa ye yeamaa yeanyia anzodwolɛ na yeahɔ zo yeabeta Gyihova la anu. b

Ɛnrɛhola ɛnrɛzi debie biala mɔɔ ɛ hu bayɛ la adenle ɛdeɛ, noko ɛbahola wɔayɛ debie wɔade nyane mɔɔ ɛbali la azo na wɔanyia anzodwolɛ kpole. Suzu ɛhye mɔ anwo.

Mmabua ɛ nwo fɔlɛ. Bie a yelɛ bie bade nganeɛ kɛ ɔdaye a ɔmaa ɔ hu nea nlanwonvoninli a. Alice c dele nganeɛ kɛ ɔzɔho kɛ ɔ nwo ɛnyɛ ɔ hu fɛ kpalɛ la ati ɔ. Ɔbizale ɔ nwo kɛ: ʼDuzu ati a me hu anye die nwo kɛ ɔbagyakyi me ɛkɛ na yeanlea mraalɛ gyɛne a?ʼ Yelɛma bie mɔ bua bɛ nwo fɔlɛ, bɛsuzu kɛ bɛdabɛ a akee bɛlɛmaa tɛnlabelɛ ne azɛkye bɔkɔɔ a. Danielle hanle kɛ: “Membule me nwo kɛ mele raalɛ mɔɔ melɛdi nyane la ati a melɛmaa ɛya kpole mɔɔ meva la azɛkye yɛ agyalɛ ne a.”

Saa zɔhane a ɛte nganeɛ a, nwu ye kɛ Gyihova ɛmbɔ wɔ somolɛ wɔ mɔɔ ɛ hu yɛ la anwo. Gyemise 1:14 ka kɛ: “Mɔɔ sɔ awie nea la a le ɔdaye ye atiakunluwɔzo mɔɔ twehwe ye na ɔbɛlɛbɛla ye la.” (Wlo. 14:12; Fel. 2:12) Gyihova ɛmbɔ wɔ somolɛ, emomu ɔ nye die wɔ nɔhalɛlilɛ ne anwo.​—2 Ek. 16:9.

 Eza ɔwɔ kɛ ɛte ɔ bo kɛ saa nrenyia nea nlanwonvoninli a, yemɔ ɛngile kɛ ɔ ye anwo ɛnyɛ fɛ. Bɛdabɛ mɔɔ bɛze nlanwonvoninli nwo edwɛkɛ kpalɛ la ka kɛ, saa awie nea nlanwonvoninli a, ɔmaa ɔnyia nla nwo nganeɛdelɛ mɔɔ raalɛ biala ɛnrɛhola ɛnrɛli nwolɛ gyima ɛnrɛmaa ye a.

Mmamaa adwenleadwenle fo ɛ nwo zo. Catherine hanle kɛ, kɛmɔ ɔ hu nea nlanwonvoninli la ati, yemɔ ala a ɛnee ɔdwenle nwo a. Frances hanle kɛ: “Saa mennwu ɛleka mɔɔ me hu wɔ la a, ɛnee adwenleadwenle ɛdɔ me nwo. Alehyenlɛ ne amuala, ɛnee mennwu ɛleka mɔɔ meluolua bɔbɔ a.” Yelɛma bie mɔ noko ɛha kɛ, saa bɛ nee bɛ mediema Kilisienema mɔɔ bɛze bɛ hu mɔ ngyegyelɛ ne la wɔ a, bɛ ti si aze. Bie mɔ noko se bɛ nwo yɛ bɛ koonwu ɔluakɛ bɛsuzu kɛ awie biala ɛnde bɛ tɛnlabelɛ ne abo.

Ɔnle ɛtane kɛ ɛbade nganeɛ zɔ. Noko saa ɛfa wɔ adwenle ɛsie zo somaa a, ɔbamaa adwenleadwenle adɔ ɛ nwo. Ɔti bɔ mɔdenle fa wɔ adwenle sie ɛ nee Gyihova agɔnwolɛvalɛ ne azo. Saa ɛyɛ zɔ a ɔbaboa wɔ yeamaa wɔagyinla ɔ nloa.​—Edw. 62:2; Ɛfɛ. 6:10.

Saa ɛkenga mraalɛ mɔɔ yiale ngyegyelɛ na bɛzɛlɛle Gyihova bɛmaanle ɔkyekyele bɛ rɛle la anwo edwɛkɛ mɔɔ wɔ Baebolo ne anu na ɛdwenledwenle nwolɛ a, bie a ɔbaboa wɔ. Tɛ dahuu a Gyihova yele bɛ ngyegyelɛ ne vile ɛkɛ a, noko ɔmaanle bɛnyianle anzodwolɛ. Kɛ neazo la, Hana tɛnlabelɛ ne ati, ɛnee ‘ɔlɛdi nyane kpalɛ.’ Noko mɔɔ ɔyɛle “asɔne mekɛ tendenle wɔ Gyihova anyunlu” ɔwiele la, ɔnyianle anzodwolɛ, ɔnva nwo kɛ ɛnee ɔnze mɔɔ ɔbado ye kenle bie la.​—1 Sa. 1:10, 12, 18; 2 Kɔl. 1:3, 4.

Kpondɛ moalɛ fi asafo nu mgbanyima ɛkɛ. Bɛbahola bɛayɛ “sua wɔ anwoma ɛdulɛ mekɛ nu, feabelɛ wɔ ahumudulɛ mekɛ nu.” (Aye. 32:2, ɔbdw.) Bie bɔbɔ a bɛbahile wɔ adiema raalɛ bie mɔɔ ɛbahola wɔaha wɔ edwɛkɛ ne wɔahile ye na yeakyekye ɛ rɛle la.​—Mrɛ. 17:17.

Ɛbahola wɔaboa ɛ hu wɔamaa yeagyakyi nlanwonvoninli ɛnleanlɛ ɔ? Bie a. Baebolo ne ka kɛ saa ɛlɛdi ngyegyelɛ bie anwo gyima anzɛɛ ɛlɛko wɔatia kpɔvolɛ bie mɔɔ anwo yɛ se la a, “menli nwiɔ le kpalɛ tɛla sonla ko.” (Nol. 4:9-12) Neɛnleanu kile kɛ, fane dɔɔnwo ne ala saa agyalɛma ne amu nwiɔ bɔ nu di ngyegyelɛ ne anwo gyima a, ɔmmaa ɔnyɛ se kɛ nrenyia ne bagyakyi nlanwonvoninli ɛnleanlɛ yɛɛ yelɛ ne noko bahola alie ɔ hu ali bieko.

 Nɔhalɛ nu, dɔɔnwo bagyinla ɛ hu anwo zo, saa ɔlɛ ɛhulolɛ ne na yebɔ kpɔkɛ kɛ ɔkulo kɛ ɔgyakyi nlanwonvoninli ɛnleanlɛ a. Asoo yebodo Gyihova kɛ ɔmaa ye anwosesebɛ na yekpondɛ moalɛ yevi mgbanyima ne mɔ ɛkɛ ɔ? (2 Kɔl. 4:7; Gye. 5:14, 15) Asoo yeyɛ ngyehyɛleɛ mɔɔ ɔbamaa yeahwe ɔ nwo yeavi nlanwonvoninli ɛnleanlɛ nwo la ɔ? Kɛ neazo la, asoo yeyɛ ngyehyɛleɛ mɔɔ ɔbamaa yeade fane dodo mɔɔ ɔfa ye ɛlɛtɔlɔneke ninyɛne ne mɔ ɔdi gyima la azo anzɛɛ ɔngɔ ɛleka mɔɔ ɔbamaa yeanwu nlanwonvoninli la ɔ? (Mrɛ. 27:12) Asoo ɔlɛ ɛhulolɛ kɛ ɔbamaa wɔaboa ye na yeaha nɔhalɛ biala mɔɔ wɔ edwɛkɛ ne anu la yeahile wɔ ɔ? Saa ɔyɛ ye zɔ a, bie a ɛbahola wɔaboa ye.

Wɔ adenle boni azo? Tie neazo ko. Ethan, mɔɔ nlanwonvoninli ɛnleanlɛ hale ɔ nwo wɔ ye ngakula nu la gyale Felicia. Felicia ammaa yeanyɛ se kɛ mekɛ biala mɔɔ Ethan bade nganeɛ kɛ ɔkulo kɛ ɔnea nlanwonvoninli la ɔbaha yeahile ye. Ethan hanle kɛ: “Meka nɔhalɛ ne amuala mekile me ye. Ɔfi ɛlɔlɛ nu ɔboa me amaa meanyɛ ninyɛne mɔɔ ɔbahwehwe me la yɛɛ ɔta ɔbiza me saa debie biala ɛlɛkɔ boɛ a. Yɛɛ ɔboa me amaa meanda meangɔ Yintanɛte ne azo.” Nɔhalɛ ne a le kɛ, ɔyɛ Felicia nyane kɛ ɔyɛ a Ethan kulo kɛ ɔnea nlanwonvoninli la. Ɔhanle kɛ: “Noko saa mefa ɛya na medi nwolɛ nyane a, yemɔ ɛmboa ye ɛmmaa ɔngyakyi subane ɛtane ɛhye. Mɔɔ yɛzuzule ye ngyegyelɛ ne mɔ anwo la, ɛnee yeziezie ɔ nwo kɛ ɔbaboa amaa medame noko meanli nyane.”

Saa bɛsuzu nwolɛ zɛhae a, ɔbaboa nrenyia ne yeamaa yeagyakyi nlanwonvoninli ɛnleanlɛ na yeaboa raalɛ ne noko yeamaa yealie ɔ hu yeali bieko. Ɔluakɛ saa nrenyia ne lɛ ɛhulolɛ kɛ ɔbaha ye sinlidɔlɛ, ninyɛne mɔɔ ɔyɛ wɔ alehyenlɛ ne anu, yɛɛ ɛleka mɔɔ ɔwɔ la anwo edwɛkɛ yeahile ɔ ye a, ɔbamaa ɔ ye alie ye ali ɔboalekɛ ɔnva ninyɛne ɔnvea ye bieko.

Ɛdie ɛdi kɛ ɛbahola wɔaboa ɛ hu wɔ adenle ko ne ala azo ɔ? Saa ɛbahola a, duzu ati a bɛ mu nwiɔ bɛmbɔ nu bɛngenga edwɛkɛ ɛhye a? Ɔbava yeayɛ ye bodane kɛ ɔbagyakyi subane ɛhye na wɔalie ye wɔali bieko. Ɔnle kɛ ɔfa mɔɔ ɛbaha la anwo ɛya, emomu ɔwɔ kɛ ɔbɔ mɔdenle kɛ ɔbade kɛzi ye nyɛleɛ ne gyegye wɔ la abo. Ɔwɔ kɛ ɛfa ɛyɛ wɔ bodane kɛ ɛboa ye wɔamaa yeabɔ mɔdenle yeagyakyi na wɔamaa yeanyia nwolɛ adenle yeahile kɛ ɛbahola wɔalie ye wɔali bieko. Ɔhyia kɛ bɛ mu nwiɔ bɛsukoa ninyɛne mɔɔ maa awie mɔ nea nlanwonvoninli la nee kɛzi bɛbali ngyegyelɛ ne azo la anwo debie. d

Saa ɛsulo kɛ bɛ adwelielilɛ ne bayɛ butule a,  nea saa bɛbaha bɛahile asafo nu kpanyinli bie mɔɔ bɛ mu nwiɔ bɛkola bɛbikye ye la bɛamaa yeadɛnla bɛ adwelielilɛ ne anu mekɛ ekyii na yeamaa bɛ adehilelɛ a. Nwu ye kɛ, saa ɛ hu gyakyi nlanwonvoninli ɛnleanlɛ bɔbɔ a, bie a ɔbalie mekɛ na wɔalie ye wɔali bieko. Mmamaa ɛ sa nu to. Nea kɛ ɛbanwu anyuhɔlɛ ngyikyi mɔɔ bɛlɛnyia la. Nyia anyelazo kɛ saa bɛsi abotane a, ngyikyingyikyi bɛ agyalɛ ne anu bamia bieko.​—Nol. 7:8; 1 Kɔl. 13:4.

Saa ɔwɔ nu too na ɛ hu kɔnea nlanwonvoninli bieko a, asoo ɔkile kɛ ɔtɛnunle ɔ nwo anzɛɛ ɔnrɛhola ye gyakyi ɔ? Ɔngile zɔ. Saa subane ɛhye ɛha ɔ nwo a, yemɔ bie a ɔwɔ kɛ ɔko ɔtia ye wɔ ye ngoane mekɛ kɔsɔɔti anu. Saa yegyakyi ye ɛnleanlɛ wɔ ɛvolɛ dɔɔnwo anu bɔbɔ a, kenle ko dedee bie a ɔbanlea ko yeava nu. Amaa yeanzia yeannea bieko la, ɔwɔ kɛ ɔbɔ mɔdenle ɛsesebɛ kpalɛ ɔkɔ zo ɔyɛ ninyɛne mɔɔ ɔnrɛmaa ɔnrɛnlea bieko la, saa bɔbɔ ɔzɔho kɛ yegyakyi a. (Mrɛ. 28:14; Mat. 5:29; 1 Kɔl. 10:12) Ɔwɔ kɛ ɔmaa ‘tumi ne mɔɔ kile ye adwenle ne adenle la’ yɛ fofolɛ na ɔsukoa kɛ ‘ɔbahyi ɛtane,’ bie a le nlanwonvoninli nee evinli nyɛleɛ le kɛ bɛnwobɔlɛ. (Ɛfɛ. 4:23; Edw. 97:10; Wlo. 12:9) Ɔlɛ ɛhulolɛ kɛ ɔbali ninyɛne ɛhye mɔ anwo gyima ɔ? Saa ɔbayɛ ye zɔ a, ɔkile kɛ ɔbahola yeagyakyi ye bɔkɔɔ. e

Na saa ɛ hu ɛnyɛ debie biala kɛ ɔfa yeali ye ngyegyelɛ ne anwo gyima ɛ? Nɔhalɛ nu bie a ɛ rɛle babɔ, ɛbava ɛya na wɔade nganeɛ kɛ yeye wɔ yemaa. Gyakyi edwɛkɛ ne maa Gyihova na ɔbamaa ɛ nzo nu adwo wɔ. (1 Pita 5:7) Dua debiezukoalɛ, asɔneyɛlɛ nee ninyɛne nwo ɛdwenledwenlenlɛ zo twe bikye Gyihova. Mekɛ mɔɔ ɛlɛyɛ ye zɔ la, nyia anwodozo kɛ ɔdaye noko ɔbabikye wɔ. Kɛ mɔɔ Ayezaya 57:15 kile la, ɔ nee menli mɔɔ “anwo ɛbubu bɛ nee bɛlɛvoma” a de a, ɔmaa bɛ sunsum yɛ se. Bɔ mɔdenle kɛ ɛbayɛ Kilisienenli kpalɛ. Maa mgbanyima ne mɔ ɛboa wɔ. Na kɔ zo nyia anyelazo kɛ, kenle ko dedee ɛ hu bahakyi bɔkɔɔ.​—Wlo. 2:4; 2 Pita 3:9.