1. Kɛ mɔɔ Hibuluma 12:1 kile la, duzu a ɔhyia kɛ yɛyɛ amaa yɛazu ngoane nwo ɛnriandilɛ ne yɛawie a?

 BAEBOLO ne fa yɛ Kilisiene ɛbɛlabɔlɛ ne toto ɛnriandilɛ nwo. Bɛdabɛ mɔɔ bɛbazu ɛnriandilɛ ne bɛawie la bɛanyia dahuu ngoane. (2 Tim. 4:7, 8) Ɔwɔ kɛ yɛbɔ mɔdenle biala kɛ yɛnrɛgyakyi ɛnriandilɛ ne ɔluakɛ asɛɛ yɛwie. Ɛzoanvolɛ Pɔɔlo mɔɔ zule ye ngoane nwo ɛnriandilɛ ne wiele la hilele yɛ ninyɛne mɔɔ ɔbaboa yɛ yeamaa yɛazu ɛnriandilɛ ne yɛawie la. Ɔhanle kɛ ‘yɛvuandi adesoa biala yɛgua, na yɛva kpundiigyinlanlɛ yɛzu ɛnriandilɛ ne mɔɔ gyi yɛ nyunlu la.’​—Kenga Hibuluma 12:1.

2. Saa bɛka kɛ ‘yɛvuandi adesoa biala yɛgua’ a, ɔkile duzu?

² Mɔɔ Pɔɔlo hɛlɛle kɛ ɔwɔ kɛ ‘yɛfuandi adesoa biala yɛgua’ la, asoo ɛnee ɔlɛkile kɛ Kilisienenli ɛnlɛ adesoa biala mɔɔ ɔwɔ kɛ ɔsoa ɔ? Kyɛkyɛ, tɛ mɔɔ ɛnee ɔlɛkile la ɛne. Emomu, ɛnee ɔlɛkile kɛ ɔwɔ kɛ yɛfuandi adesoa biala mɔɔ nwolɛ ɛngyia la yɛgua ye lɔ. Adesoa ɛhye bahola adenda yɛ gyakɛ anu na yeamaa yɛavɛ. Amaa yɛahɔ zo yɛanriandi la, ɔwɔ kɛ yɛnwu adesoa biala mɔɔ nwolɛ ɛngyia mɔɔ ɔbahola yeamaa yɛado yɛ ɛnriandilɛ ne anu la ndɛndɛ na yɛfuandi yɛto ye lɔ. Noko akee ɔnle kɛ yɛsuhu adesoa mɔɔ ɔwɔ kɛ yɛsoa la yɛsie ahane. Saa yɛyɛ zɔ a, ɔnrɛmaa yɛnrɛfɛta bieko kɛ yɛbazu ɛnriandilɛ ne. (2 Tim. 2:5) Adesoa boni mɔ a ɔwɔ kɛ yɛsoa a?

3. (a) Kɛ mɔɔ Galeehyeama 6:5 kile la, duzu a ɔwɔ kɛ yɛsoa a? (b) Duzu a yɛbazuzu nwo wɔ edwɛkɛ ɛhye anu a, na duzu ati ɔ?

³ Kenga Galeehyeama 6:5. Pɔɔlo hilele debie mɔɔ ɔwɔ kɛ  yɛsoa la. Ɔhɛlɛle kɛ “awie biala ɔdaye ɔbazoa ye adesoa.” Wɔ ɛke, ɛnee Pɔɔlo ɛlɛka yɛ ɛzonlelilɛ mɔɔ yɛlɛ wɔ Nyamenle anyunlu la anwo adesoa, debie mɔɔ ɔwɔ kɛ yɛdayɛ mumua ne yɛsoa la anwo edwɛkɛ. Wɔ edwɛkɛ ɛhye anu, yɛbazuzu debie mɔɔ le yɛdayɛ mumua ne ‘yɛ adesoa’ nee kɛzi yɛbahola yɛazoa ye la anwo. Eza yɛbanwu adesoa mɔɔ nwolɛ ɛngyia mɔɔ bie a yɛzo na yɛazukoa kɛzi yɛbavuandi bɛ yɛagua bɛ lɔ la. Saa yɛsoa yɛdayɛ mumua ne yɛ adesoa na yɛfuandi mɔɔ nwolɛ ɛngyia la yɛgua ye lɔ a, ɔbaboa yɛ yeamaa yɛazu yɛ ngoane nwo ɛnriandilɛ ne yɛawie bɔkɔɔ.

4. Duzu ati a yɛnwozoyilalɛ ndane ne ɛnle adesoa mɔɔ yɛ ɛlomboɛ a? (Eza nea nvoninli ne.)

⁴ Yɛnwozoyilalɛ ndane ne. Mɔɔ yɛyilale yɛ nwo zo yɛmaanle Gyihova la, yɛhanle ndane kɛ yɛbazonle ye na yɛayɛ ye ɛhulolɛdeɛ. Ɔwɔ kɛ yɛdi zo. Yɛnwozoyilalɛ ndane ne mɔɔ yɛdi zo la le ɛzonlelilɛ kpole noko ɔnle adesoa mɔɔ yɛ ɛlomboɛ. Ɔluakɛ Gyihova bɔle yɛ kɛ yɛyɛ ye ɛhulolɛdeɛ. (Yek. 4:11) Ɔvale ɛhulolɛ mɔɔ yɛlɛ kɛ yɛbanwu ye na yɛazonle ye la ɔbɔle yɛ, yɛɛ ɔbɔle yɛ kɛ ye ɛsaso. Ɛhye ati, yɛkola yɛbikye ye yɛɛ yɛ nye die nwo kɛ yɛbayɛ ye  ɛhulolɛdeɛ. (Edw. 40:8) Eza saa yɛyɛ Nyamenle ɛhulolɛdeɛ na yɛdi ɔ Ra ne anzi a, ‘yɛ nwo tɔ yɛ.’​—Mat. 11:28-30.

5. Duzu a bahola aboa wɔ yeamaa wɔali ɛnwozoyilalɛ ndane ne azo a? (1 Dwɔn 5:3)

⁵ Kɛ ɔkɛyɛ na wɔazoa adesoa ne ɛ? Ninyɛne nwiɔ bahola aboa. Mɔɔ limoa, kɔ zo mia ɛlɔlɛ mɔɔ ɛlɛ ɛmaa Gyihova la anu. Amaa wɔahola wɔayɛ zɔ la, dwenledwenle ninyɛne mgbalɛ mɔɔ yeyɛ yemaa wɔ nee nyilalɛ mɔɔ ɔbamaa wɔanyia ye kenle bie la kɔsɔɔti anwo. Saa ɛlɔlɛ mɔɔ ɛlɛ ɛmaa Nyamenle la yɛ kpole a, ɔnrɛyɛ se kɛ ɛbadie ye. (Kenga 1 Dwɔn 5:3.) Mɔɔ tɔ zo nwiɔ, sukoa Gyisɛse. Gyisɛse holale yɛle Nyamenle ɛhulolɛdeɛ ɔluakɛ ɔzɛlɛle Gyihova ɔmaanle ɔboale ye yɛɛ ɔvale ye adwenle ɔziele ahatualɛ mɔɔ ɔbanyia la azo. (Hib. 5:7; 12:2) Kɛ mɔɔ Gyisɛse yɛle la, sɛlɛ Gyihova kɛ ɔmaa wɔ anwosesebɛ na maa dahuu ngoane nwo anyelazo ne ɛdɛnla wɔ adwenle nu kpalɛ. Mekɛ mɔɔ ɛlɛnyia Nyamenle anwo ɛlɔlɛ kpole na ɛlɛsukoa ɔ Ra ne la, ɛbahola wɔali ɛnwozoyilalɛ ndane ne azo.

6. Duzu ati a ɔwɔ kɛ yɛdi yɛ abusua nu ɛzonlelilɛ nwo gyima a? (Eza nea nvoninli ne.)

⁶ Yɛ abusua nu ɛzonlelilɛ. Wɔ yɛ ngoane nwo ɛnriandilɛ ne anu, ɔwɔ kɛ yɛkulo Gyihova nee Gyisɛse yɛtɛla yɛ mbusuafoɔ. (Mat. 10:37) Noko ɛhye ɛngile kɛ ɔwɔ kɛ yɛbu yɛ nye yɛgua ɛzonlelilɛ mɔɔ yɛlɛ wɔ yɛ abusua ne anu la azo, kɛ asɛɛ bɛmmaa yɛngola yɛnyɛ mɔɔ sɔ Nyamenle nee Kelaese anye la. Emomu, amaa Nyamenle nee Kelaese alie yɛ ado nu la, ɔhyia kɛ yɛyɛ gyima mɔɔ yɛlɛ wɔ abusua ne anu la. (1 Tim. 5:4, 8) Saa yɛyɛ zɔ a, yɛ nye balie kpalɛ. Ɔluakɛ Gyihova hyehyɛle mbusua mɔɔ saa bɛ nye balie a, kyesɛ kunli nee yelɛ ne da ɛlɔlɛ nee ɛbulɛ ali kile bɛ nwo, awovolɛ kulo bɛ mra yɛɛ ngakula noko bu bɛ awovolɛ.​—Ɛfɛ. 5:33; 6:1, 4.

7. Kɛ ɔkɛyɛ na wɔali ɛzonlelilɛ mɔɔ ɛlɛ wɔ abusua ne anu la anwo gyima ɛ?

⁷ Kɛ ɔkɛyɛ na wɔazoa adesoa ne ɛ? Saa ɛle kunli o, yelɛ o anzɛɛ kakula o, mmafa wɔ adwenle ɛsɔ kɛzi ɛte nganeɛ, amaamuo anzɛɛ mɔɔ mbɔlɔba bie mɔ ka la, emomu fa ɛ nwo to nrɛlɛbɛ mɔɔ wɔ Baebolo ne anu la azo. (Mrɛ. 24:3, 4) Fa yɛ mbuluku ne mɔ mɔɔ gyi Baebolo ne azo la di gyima kpalɛ. Bɛka nzuzulɛ mɔɔ ɔbaboa yɛ yeamaa yɛanwu kɛzi yɛbava Baebolo ngyinlazo yɛali gyima la anwo edwɛkɛ. Kɛ neazo la, yɛ jw.org wɛbsaete ne ka ngyegyelɛ fɔɔnwo mɔɔ agyalɛma, awovolɛ yɛɛ mgbavolɛ nee mbɛlɛra yia ye ɛnɛ la anwo edwɛkɛ. b Bɔ kpɔkɛ kɛ ɛbava mɔɔ Baebolo ne ka la wɔali gyima, saa bɔbɔ abusua ne anu amra mɔɔ ɛha la ɛnyɛ zɔ a. Saa ɛyɛ ye zɔ a, ɔbaboa wɔ abusua ne amuala na Gyihova bayila wɔ.​—1 Pita 3:1, 2.

8. Kɛzi yɛ kpɔkɛzilɛ bahola aha yɛ ɛ?

⁸ Ɛzonle mɔɔ yɛdi wɔ yɛ kpɔkɛzilɛ nwo la. Gyihova ɛmaa yɛ nwolɛ adenle mɔɔ yɛkola yɛsi yɛ ti anwo kpɔkɛ, na ɔkulo kɛ yɛsisi kpɔkɛ kpalɛ na yɛ nye die. Noko saa yɛsisi kpɔkɛ ɛtane a, ɔnzi mɔɔ bavi nu ara la adenle kɛ ɔbado yɛ. (Gal. 6:7, 8) Ɛhye ati saa yɛsisi kpɔkɛ ɛtane, yɛandendɛ boɛ anzɛɛ yɛpele yɛ nwo yɛyɛ debie a, mɔɔ bavi nu ara la le yɛdayɛ mumua ne yɛ edwɛkɛ. Bie a ɔlua mɔɔ yɛyɛ la ati, ɔbamaa yɛ adwenle abua yɛ fɔlɛ. Noko kɛmɔ yɛze kɛ yɛdi kpɔkɛ mɔɔ yɛsisi la anwo ɛzonle la ati, ɔbahola yeaha yɛ yeamaa yɛaha yɛ ɛtane, yɛayɛ nzenzaleɛ na yɛanlea kɛ yɛnrɛyɛ nvonleɛ ko ne ala bieko. Saa yɛyɛ ninyɛne  ɛhye mɔ a, ɔbaboa yɛ yeamaa yɛahɔ zo yɛazu ngoane nwo ɛnriandilɛ ne.

9. Saa wɔzi kpɔkɛ ɛtane bie a, duzu a ɛbahola wɔayɛ a? (Eza nea nvoninli ne.)

⁹ Kɛ ɔkɛyɛ na wɔazoa adesoa ne ɛ? Saa ɛnrɛhola ɛnrɛhakyi kpɔkɛ ɛtane mɔɔ wɔzi la a, die tɛnlabelɛ mɔɔ wɔhɔ nu la to nu. Nwu ye kɛ ɛnrɛhola ɛnrɛhakyi mɔɔ ɛze ɛhɔ la. Mmasɛkye wɔ mekɛ nee wɔ anwosesebɛ kɛ ɛbua ɛ nwo benle anzɛɛ ɛbɔ ɛ nwo anzɛɛ awie mɔ somolɛ wɔ wɔ nvonleɛ ne mɔ anwo. Emomu, die wɔ nvonleɛ ne mɔ to nu na bɔ mɔdenle kɛ ɛbayɛ biala mɔɔ ɛbahola la wɔ tɛnlabelɛ mɔɔ ɛwɔ nu kɛkala la anu. Saa ɛtane bie mɔɔ wɔyɛ la ɛlɛmaa wɔ adwenle abua wɔ fɔlɛ a, bɛlɛ ɛ nwo aze fa wɔ asɔneyɛlɛ to Gyihova anyunlu, die wɔ ɛtane ne to nu na sɛlɛ ye kɛ ɔva ɔhyɛ wɔ. (Edw. 25:11; 51:3, 4) Kpa bɛdabɛ mɔɔ bie a wɔvo bɛ la kyɛlɛ, na saa ɔbahyia a, kpondɛ moalɛ fi asafo nu mgbanyima ne mɔ ɛkɛ. (Gye. 5:14, 15) Sukoa debie fi wɔ nvonleɛ ne mɔ anu na bɔ mɔdenle kɛ ɛnrɛyɛ bieko. Saa ɛyɛ zɔ a, ɛbahola wɔalie wɔali kɛ, Gyihova baze wɔ anwunvɔne na yeava moalɛ mɔɔ ɛhyia la yeamaa wɔ.​—Edw. 103:8-13.

10. Duzu ati a anyelazo mɔɔ ɔnrɛra nu la le adesoa ɛlomboɛ a? (Galeehyeama 6:4)

¹⁰ Anyelazo mɔɔ ɔnrɛra nu. Saa yɛfa yɛ nwo yɛtoto awie mɔ anwo a, ɔbamaa anyelazo mɔɔ ɔnrɛra nu la ayɛ adesoa ɛlomboɛ amaa yɛ. (Kenga Galeehyeama 6:4.) Saa yɛta yɛfa yɛ nwo yɛtoto awie mɔ anwo a, ɔbamaa yɛ nye abolo bɛ na yɛ nee bɛ azu. (Gal. 5:26) Saa yɛbɔ mɔdenle kɛ yɛyɛ ninyɛne mɔɔ awie mɔ ɛlimoa ɛyɛ la bie a, wɔannea a ɔbamaa yɛayɛ ninyɛne mɔɔ bo yɛ anwosesebɛ nee tɛnlabelɛ mɔɔ yɛwɔ nu la azo la. Na saa “anyelazo kyɛ a ɔmaa ahonle ne anwo to ye” a, ɛnee nea kɛzi yɛfa yɛ nye yɛto ninyɛne mɔɔ ɔnrɛra nu ɛlɛ la azo a ɔbamaa yɛ nwo abubu yɛ a! (Mrɛ. 13:12) Saa yɛyɛ zɔ a ɔbamaa yɛavɛ na yɛado yɛ adwenle nu wɔ yɛ ngoane nwo ɛnriandilɛ ne anu.​—Mrɛ. 24:10.

11. Duzu a bahola aboa wɔ amaa wɔanva wɔ adwenle wɔanzie anyelazo mɔɔ ɔnrɛra nu la azo a?

¹¹ Kɛ ɔkɛyɛ na wɔavuandi zɔhane adesoa ne wɔado ye lɔ ɛ? Mmabɔ mɔdenle kɛ ɛyɛ ninyɛne dɔɔnwo wɔadɛla mɔɔ Gyihova kulo kɛ ɛyɛ la. Ɔ nye ɛnla kɛ ɛbava mɔɔ ɛnlɛ la wɔamaa. (2 Kɔl. 8:12) Nyia anwodozo kɛ Gyihova ɛnva mɔɔ ɛyɛ la ɛntoto mɔɔ awie mɔ yɛ la anwo. (Mat. 25:20-23) Wɔ ɛkɛla muala mɔɔ ɛfa ɛsonle ye, wɔ nɔhalɛlilɛ nee wɔ kpundiigyinlanlɛ ne sonle bolɛ maa ye. Bɛlɛ ɛ nwo aze die to nu kɛ bie a wɔ ɛvolɛ, wɔ kpɔkɛdelɛ nee wɔ tɛnlabelɛ ne ɛnrɛmaa ɛnrɛhola ɛnrɛyɛ ninyɛne bie mɔ kɛkala. Kɛ mɔɔ Bazelae yɛle la, saa wɔ ɛvolɛ nee wɔ kpɔkɛdelɛ ɛnrɛmaa adenle a, mmadie gyima bie mɔ ɛgua ɛ nwo zo. (2 Sa. 19:35, 36) Kɛ mɔɔ Mosisi yɛle la, maa awie mɔ ɛboa wɔ na saa ɔbayɛ boɛ a, fa gyima bie mɔ wulowula awie mɔ asa anu. (Ɛzɛ. 18:21, 22) Mɛlɛbɛnwoaze zɛhae ɛnrɛmaa ɛnrɛva wɔ adwenle ɛnrɛzie ninyɛne mɔɔ ɔnrɛra nu ɛlɛ mɔɔ ɔbamaa wɔavɛ wɔ wɔ ngoane nwo ɛnriandilɛ ne anu la azo.

12. Asoo yɛdi kpɔkɛ ɛtane mɔɔ awie mɔ sisi la anwo ɛzonle? Kilehile nu.

¹² Saa yɛte nganeɛ kɛ yɛdi kpɔkɛ ɛtane mɔɔ awie mɔ sisi la anwo ɛzonle a. Yɛnrɛhola yɛnrɛsisi kpɔkɛ yɛnrɛmaa awie mɔ; yɛɛ tɛ dahuu a yɛbahola yɛabɔ bɛ nwo bane yɛavi mɔɔ fi kpɔkɛ ɛtane mɔɔ bɛsisi anu ba la anwo a. Kɛ neazo la, bie a adiema bie ara bazi kpɔkɛ kɛ ɔnrɛzonle Gyihova bieko. Ɛhye bahola amaa ye awovolɛ ali nyane kpole. Noko awovolɛ mɔɔ bɔ bɛ nwo somolɛ wɔ bɛ ra ne kpɔkɛzilɛ ɛtane ne anwo la fa adesoa ɛlomboɛ bie to bɛ nwo zo. Ɔnle adesoa mɔɔ Gyihova anye la kɛ bɛbazoa a.​—Wlo. 14:12.

13. Duzu a awovolɛ bie bahola ayɛ wɔ ɔ ra bie kpɔkɛzilɛ ɛtane nwo a?

 ¹³ Kɛ ɔkɛyɛ na wɔavuandi zɔhane adesoa ne wɔado ye lɔ ɛ? Nwu ye kɛ Gyihova ɛmaa yɛ muala nwolɛ adenle mɔɔ yɛkola yɛkpa mɔɔ yɛkulo a. Ɔmaa awie biala si ɔ ti anwo kpɔkɛ. Bie a le kɛ yɛbakpa kɛ yɛbazonle ye anzɛɛ yɛnrɛzonle ye. Gyihova ze kɛ ɛnle awovolɛ mɔɔ ɛdi munli; ɔkulo kɛ ɛyɛ mɔɔ ɛbahola la ala. Ɛ ra ne a bali kpɔkɛ mɔɔ ɔsisi la anwo ɛzonle a, tɛ ɛdawɔ ɔ. (Mrɛ. 20:11) Noko kɛ awovolɛ la, bie a ɛbahɔ zo wɔadwenle nvonleɛ mɔɔ ɛyɛle la anwo. Saa zɔhane a ɔde a, ka kɛzi ɛte nganeɛ la kile Gyihova na sɛlɛ ye kɛ ɔva ɔhyɛ wɔ. Ɔze kɛ ɛnrɛhola ɛnrɛhakyi mɔɔ ɛzi dɛba la. Yɛɛ ɔ nye ɛnla kɛ ɛbayɛ debie mɔɔ ɔnrɛmaa ɛ ra ne ɛnrɛbu mɔɔ ɔluale la. Kakye kɛ, saa ɛ ra ne bɔ mɔdenle kɛ ɔsia yeara Gyihova ɛkɛ a, ɔbava anyelielɛ yealie ye bieko.​—Luku 15:18-20.

14. Duzu ati a adwenle mɔɔ bua bɛ fɔlɛ dahuu la le adesoa mɔɔ ɔwɔ kɛ yɛfuandi yɛto ye lɔ a?

¹⁴ Adwenle mɔɔ bua bɛ fɔlɛ dahuu. Saa yɛyɛ ɛtane na yɛ adwenle bua yɛ fɔlɛ a ɔle kpalɛ. Noko yɛ adwenle mɔɔ bua yɛ fɔlɛ dahuu la ɛnle adesoa mɔɔ ɔwɔ kɛ yɛsoa a. Ɔle adesoa mɔɔ ɔwɔ kɛ yɛfuandi yɛto ye lɔ a. Kɛ ɔkɛyɛ na yɛanwu kɛ yɛ adwenle ne bua yɛ fɔlɛ dahuu ɛ? Saa yɛka yɛ ɛtane, yɛnu yɛ nwo na yɛyɛ ninyɛne mɔɔ ɔnrɛmaa yɛnrɛyɛ ɛtane ne bieko la a, yɛbahola yɛanyia anwodozo kɛ Gyihova ɛva ɛhyɛ yɛ. (Gyi. 3:19) Saa yɛyɛ ninyɛne ɛhye mɔ a, yemɔ Gyihova ɛngulo kɛ yɛbamaa yɛ adwenle ahɔ zo abua yɛ fɔlɛ. Ɔze kɛzi yɛmaa yɛ adwenle bua yɛ fɔlɛ dahuu a, ɔbaboda yɛ la. (Edw. 31:10) Saa yɛmaa nyanelilɛ bo yɛ nwo zo a, bie a ɔbamaa yɛagyakyi yɛ ngoane nwo ɛnriandilɛ ne ɛzulɛ.​—2 Kɔl. 2:7.

15. Duzu a baboa wɔ amaa wɔ adwenle ambua wɔ fɔlɛ dahuu a? (1 Dwɔn 3:19, 20) (Eza nea nvoninli ne.)

¹⁵ Kɛ ɔkɛyɛ na wɔavuandi zɔhane adesoa ne wɔado ye lɔ ɛ? Saa wɔ adwenle bua wɔ fɔlɛ dahuu a, kakye “nɔhalɛ ɛtanefakyɛ” ne mɔɔ vi Nyamenle ɛkɛ la. (Edw. 130:4) Saa ɔfa bɛdabɛ mɔɔ bɛnlu bɛ nwo nɔhalɛ nu la ɛtane ɔkyɛ bɛ a, ɔbɔ bɛ ɛwɔkɛ kɛ: “Menrɛhakye bɛ ɛtane  ne bieko.” (Gyɛ. 31:34) Ɛhye kile kɛ Gyihova ɛnrɛdwenle ɛtane mɔɔ yeva yehyɛ wɔ la anwo bieko. Ɔti mmagyinla mɔɔ bavi wɔ nvonleɛ ne anu ara la azo ɛbu ye kɛ ɔtɛfale ɔtɛkyɛle wɔ. Yɛɛ mmakile ɛ nwo nyane ɔluakɛ wɔ nvonleɛ ne mɔ ɛmmaa ɛngola ɛnyɛ ninyɛne bie mɔ kɛkala wɔ Gyihova ɛzonlenlɛ nu la ati. Gyihova ɛngɔ zo ɛndwenle wɔ ɛtane ne mɔ anwo, na ɔnle kɛ ɛdawɔ noko ɛyɛ zɔ.​—Kenga 1 Dwɔn 3:19, 20.

16. Kɛ menli mɔɔ ɛlɛnriandi la, duzu a ɔwɔ kɛ yɛnwu ye a?

¹⁶ Mekɛ mɔɔ yɛlɛsu yɛ ngoane nwo ɛnriandilɛ ne la, ɔwɔ kɛ yɛnriandi wɔ adenle mɔɔ ɔbamaa ‘yɛanyia ahatualɛ ne’ la azo. (1 Kɔl. 9:24) Saa yɛbahola yɛayɛ zɔ a, kyesɛ yɛnwu ngakyile mɔɔ wɔ adesoa mɔɔ ɔwɔ kɛ yɛsoa nee mɔɔ ɔwɔ kɛ yɛfuandi bɛ yɛgua bɛ lɔ la anu la. Wɔ edwɛkɛ ɛhye anu, yɛzuzu adesoa mɔɔ ɔwɔ kɛ yɛsoa nee mɔɔ ɔwɔ kɛ yɛfuandi bɛ yɛgua bɛ lɔ la anwo neazo ekyi anwo. Noko bie mɔ tɛbɔ ɛkɛ. Gyisɛse hanle kɛ “aleɛlilɛ molozo nee nza dɔɔnwo ɛnlonlɛ yɛɛ ɛbɛlabɔlɛ nu adwenleadwenle” bahola ahomo yɛ nwo zo. (Luku 21:34) Ngɛlɛlera ɛhye nee gyɛne bahola aboa wɔ yeamaa wɔanwu nzenzaleɛ mɔɔ ɔhyia kɛ ɛyɛ wɔ mekɛ mɔɔ ɛlɛsu wɔ ngoane nwo ɛnriandilɛ ne la.

17. Duzu ati a yɛbahola yɛanyia anwodozo kɛ yɛbali konim wɔ yɛ ngoane nwo ɛnriandilɛ ne anu a?

¹⁷ Yɛbahola yɛanyia anwodozo kɛ yɛbali konim wɔ yɛ ngoane nwo ɛnriandilɛ ne anu, ɔluakɛ Gyihova bamaa yɛ anwosesebɛ mɔɔ yɛhyia la. (Aye. 40:29-31) Ɔti mmato wɔ ɛnriandilɛ ne anu! Sukoa ɛzoanvolɛ Pɔɔlo mɔɔ nriandile ɛsesebɛ amaa yeanyia ahatualɛ ne mɔɔ gyi ɔ nyunlu la. (Fel. 3:13, 14) Awie biala ɛnrɛhola ɛnrɛzu ɛnriandilɛ ɛhye ɛnrɛmaa wɔ, noko ɔlua Gyihova moalɛ zo, ɛbahola wɔali konim. Gyihova bahola aboa wɔ yeamaa wɔazoa wɔ adesoa ne mɔ na wɔavuandi mɔɔ nwolɛ ɛngyia la wɔagua bɛ lɔ. (Edw. 68:19) Kɛmɔ Gyihova wɔ wɔ afoa la ati, ɛbahola wɔava kpundiigyinlanlɛ wɔazu wɔ ɛnriandilɛ ne na wɔali konim!