1. Duzu a awie yɛ a ɔkile kɛ yenlu ɔ nwo a?

 SAA yɛyɛ debie mɔɔ ɛnle kpalɛ la a, ɔhyia kɛ yɛnu yɛ nwo. Baebolo ne ka kɛ awie ɛnlu ɔ nwo a, ɔkile kɛ yehakyi ye adwenle wɔ subane bie anwo, yegyakyi ye ɛyɛlɛ na yebɔ kpɔkɛ kɛ ɔnrɛyɛ bieko.—Nea Edwɛkɛbohilelɛ, “Anlubɛnwo.”

2. Duzu ati a ɔwɔ kɛ yɛ muala yɛsukoa anlubɛnwo nwo debie a? (Nihɛmaya 8:​9-11)

² Ɔwɔ kɛ sonla dasanli biala mɔɔ de aze la sukoa anlubɛnwo nwo debie. Duzu ati ɔ? Ɔluakɛ yɛ muala yɛyɛ ɛtane kenle ko biala. Kɛmɔ yɛle Adam nee Yive abozoamra la ati, bɛvale ɛtane nee ewule bɛwole yɛ. (Wlo. 3:23; 5:12) Yɛ nuhua ko biala ɛnle ɛkɛ mɔɔ ɔnyɛ ɛtane a. Ɛnee ɔnla aze ɔmmaa menli mɔɔ bɛlɛ diedi kpole mɔɔ bie a le ɛzoanvolɛ Pɔɔlo bɔbɔ la. (Wlo. 7:​21-24) Asoo ɛhye kile kɛ yɛ ɛtane ne mɔ ati ɔwɔ kɛ yɛdi nyane mekɛ biala ɔ? Kyɛkyɛ, Gyihova se anwunvɔne na ɔkulo kɛ yɛ nye die. Suzu Dwuuma mɔɔ ɛnee wɔ Nihɛmaya mekɛ zo la anwubielɛ ne anwo. (Kenga Nihɛmaya 8:​9-11.) Ɛnee Gyihova ɛngulo kɛ bɛkɔ zo bɛdi ɛtane mɔɔ bɛyɛle ye dɛba la anwo nyane, emomu ɛnee ɔkulo kɛ bɛfa anyelielɛ bɛsonle ye. Gyihova ze kɛ saa yɛnu yɛ nwo a ɔmaa yɛ nye die. Ɔti ɔkilehile yɛ nwolɛ debie. Saa yɛnu yɛ nwo wɔ yɛ ɛtane ne mɔ anwo a, yɛbahola yɛanyia anwodozo kɛ yɛ anwunvɔnezelɛ Selɛ ne bava yɛ ɛtane ahyɛ yɛ.

3. Duzu a yɛbazuzu nwo wɔ edwɛkɛ ɛhye anu a?

³ Maa yɛzukoa anlubɛnwo nwo ninyɛne dɔɔnwo. Wɔ edwɛkɛ ɛhye anu, yɛbazuzu ninyɛne nsa anwo. Mɔɔ limoa, yɛbazukoa  mɔɔ Gyihova hilehilele Yizilayɛma wɔ anlubɛnwo nwo la anwo debie. Akee yɛbazuzu kɛzi Gyihova boale ɛtanevolɛma bie ɔmaanle bɛnlunle bɛ nwo la anwo. Mɔɔ li awieleɛ, yɛbazuzu mɔɔ Gyisɛse ɛdoavolɛma ne zukoale ye wɔ anlubɛnwo nwo la anwo.

MƆƆ GYIHOVA HILEHILELE YIZILAYƐMA WƆ ANLUBƐNWO NWO LA

4. Duzu a Gyihova hilehilele Yizilayɛ maanle ne wɔ anlubɛnwo nwo a?

⁴ Mɔɔ Gyihova yɛle Yizilayɛma maanle la, ɔ nee bɛ yɛle ngyekyeleɛ. Ɔbɔle bɛ ɛwɔkɛ kɛ saa bɛdi ye mɛla ne mɔ azo a ɔbabɔ bɛ nwo bane na yeayila bɛ. Ɔhanle ye mɛla zɔhane mɔ anwo edwɛkɛ kɛ: “Mɛla ɛhye mɔɔ melɛfa meamaa bɛ ɛnɛ la ɛnyɛ se somaa yɛɛ ɔmbo bɛ nwo zo.” (Dit. 30:​11, 16) Noko saa bɛte ɔ nwo atua—kɛ neazo la, saa bɛkpa kɛ bɛbazonle nyamenle gyɛne a—ɔnrɛbɔ bɛ nwo bane bieko na bɛbanwu amaneɛ. Noko yemɔ ɛngile kɛ Nyamenle ɛkpo bɛ bɔkɔɔ. Bɛbahola ‘bɛazia bɛara Gyihova bɛ Nyamenle ne ɛkɛ, na bɛadie ɔ ne.’ (Dit. 30:​1-3, 17-20) Wɔ adenle fofolɛ zo, bɛbahola bɛanlu bɛ nwo. Saa bɛyɛ ye zɔ a, Gyihova babikye bɛ na yeayila bɛ bieko.

5. Kɛzi Gyihova hilele kɛ ɔtɛtole ye adwenle nu wɔ ye menli ne anwo ɛ? (2 Arelemgbunli 17:​13, 14)

⁵ Gyihova menli ne mɔɔ ɔkpale bɛ la dele ɔ nwo atua fane dɔɔnwo. Ɛye awozonle mɔɔ bɛzonlenle bɛ la ɛsie ahane a, eza bɛyɛle ninyɛndane gyɛne dɔɔnwo. Ɛhye ati bɛnwunle amaneɛ. Noko Gyihova ando ye adwenle nu wɔ ye menli anzosesebɛma ne anwo. Ɔzoanle ye ngapezoma wɔ bɛ nwo ɛkɛ fane dɔɔnwo kɛ bɛhɔboa bɛ bɛmaa bɛnlu bɛ nwo na bɛzia bɛrɛla ye ɛkɛ.—Kenga 2 Arelemgbunli 17:​13, 14.

6. Kɛzi Gyihova luale ye ngapezoma ne anwo zo hilehilele ye menli ne deɛmɔti ɔhyia kɛ bɛnu bɛ nwo la ɛ? (Eza nea nvoninli ne.)

⁶ Gyihova zoanle ye ngapezoma fane dɔɔnwo ɔmaanle bɛhɔbɔle ye menli ne kɔkɔ na bɛdenrɛle bɛ. Kɛ neazo la, Nyamenle luale Gyɛlɛmaya anwo zo hanle kɛ: “O Yizilayɛ mɔɔ ɛde atua, sia bɛla, . . . menrɛva ɛya menrɛnlea wɔ, ɔluakɛ mele nɔhavo, . . . menrɛva ɛ nwo ɛya dahuu. Wɔmɔ die wɔ fɔlɛlilɛ ne to  nu, ɔluakɛ wɔde Gyihova wɔ Nyamenle ne anwo atua.” (Gyɛ. 3:​12, 13) Gyihova luale Dwowɛle anwo zo hanle kɛ: “Bɛvi bɛ ahonle muala anu . . . bɛzia bɛrɛla me nwo ɛke.” (Dww. 2:​12, 13) Ɔmaanle Ayezaya hanle kɛ: “Bɛmaa bɛ nwo ɛde; bɛye bɛ ninyɛndane ne bɛvi me nye zo; bɛgyakyi ɛtaneyɛlɛ.” (Aye. 1:​16-19) Gyihova luale Yizikeɛle anwo zo hanle kɛ: “Asoo me nye die amumuyɛnli ewule nwo? . . . Asoo tɛ mɔɔ mekulo la a le kɛ ɔbahwe ɔ nwo yeavi ye ndenle nwo na yeanyia ngoane ɔ? Me nye ɛnlie awie biala ewule nwo fee. Ɔti bɛzia bɛ nzi na bɛnyia ngoane.” (Yiz. 18:​23, 32) Gyihova anye die nwo kɛ ɔbanwu kɛ menli ɛlɛnu bɛ nwo ɔluakɛ ɔkulo kɛ bɛtɛnla aze dahuu! Ɔti Gyihova ɛnde ɛkɛ ne kɛ ɔkendɛ yeamaa ɛtanevolɛma anlu bɛ nwo kolaa na yeaboa bɛ. Maa yɛnlea ɛhye anwo neazo gyɛne bie mɔ.

7. Duzu a Gyihova luale ngapezonli Hozia nee ɔ ye edwɛkɛ ne azo hilehilele ye menli ne a?

⁷ Nea mɔɔ Gyihova luale ngapezonli Hozia nee ɔ ye Goma edwɛkɛ ne azo hilehilele ye menli ne la. Mɔɔ Goma zɛkyele agyalɛ la anzi, eza ɔgyakyile ɔ hu Hozia na ɔhɔlile mrenyia gyɛne nzi. Asoo ɛnee ɔnrɛhola ɔnrɛhakyi? Gyihova mɔɔ nwu ahonle nu la hanle hilele Hozia kɛ: “Kɔ bieko, kulo raalɛ ne mɔɔ nrenyia fofolɛ ɛhulo ye na ɔlɛsɛkye agyalɛ la, kɛ mɔɔ Gyihova kulo menli mɔɔ wɔ Yizilayɛ wɔ mekɛ mɔɔ bɛtoa nyamenle gyɛne” la. (Hozia 3:1; Mrɛ. 16:2) Yɛ ye nzonlɛ kɛ ɛnee Hozia aye ne tɛgua ye ɛbɛlatane ne azo. Noko Gyihova hanle hilele Hozia kɛ ɔhɔkpondɛ ye, ɔva ye ɛtane ɔhyɛ ye na ɔva ye ɔyɛ ɔ ye bieko. a Zɔhane ala a Gyihova anye ye adwenle anvi ye menli anzosesebɛma ne anwo zo a. Ɛnee bɛtɛgua zo bɛtɛyɛ bɛ ninyɛndane ne mɔ ɛdeɛ, noko ɛnee ɔtɛkulo bɛ na ɔhɔle zo ɔkpondɛle bɛ kɛ ɔboa bɛ yeamaa bɛanlu bɛ nwo na bɛahakyi bɛ ɛbɛlabɔlɛ. Asoo neazo ɛhye kile kɛ Gyihova mɔɔ “neɛnlea ahonle nu” la babɔ mɔdenle kɛ ɔboa awie mɔɔ ɔgua zo ɔlɛyɛ ɛtane kpole la amaa yeanlu ɔ nwo ɔ? (Mrɛ. 17:3) Maa yɛnlea.

KƐZI GYIHOVA BOA ƐTANEVOLƐMA MAA BƐNU BƐ NWO LA

8. Duzu a Gyihova yɛle kɛ ɔfa yeaboa Keen yeamaa yeanlu ɔ nwo a? (Gyɛnɛsese 4:​3-7) (Eza nea nvoninli ne.)

⁸ Adam nee Yive belamunli ralɛ a le Keen. Ye awovolɛ vale nganeɛdelɛ mɔɔ twehwe sonla maa ɔyɛ ɛtane la bie wole ye. Eza Baebolo ne hanle ɔ nwo edwɛkɛ kɛ: “Ɛnee ye gyima ɛnle kpalɛ.” (1 Dwɔn 3:12) Ɔbayɛ kɛ Keen subane zɔhane ati a Gyihova anye “anzɔ Keen nee ye afɔlebɔlɛ ne” la. Kɛ anrɛɛ Keen bahakyi ye subane la, ɔvale “ɛya kpole na ɔ rɛle bɔle.” Duzu a Gyihova yɛle a? Ɔ nee Keen dendɛle. (Kenga Gyɛnɛsese 4:​3-7.) Yɛ ye nzonlɛ kɛ Gyihova dendɛle kɛnlɛma hilele Keen, ɔmaanle ɔnyianle anyelazo na ɔbɔle ye kɔkɔ kɛ saa yeannea boɛ a, ɔbayɛ ɛtane. Mɔɔ yɛ alɔbɔlɛ la a le kɛ, Keen andie Ye. Yeammaa Gyihova amboa ye yeammaa yeannu ɔ nwo. Noko kɛmɔ Keen andie Gyihova la ati, asoo yemɔ ɛmaa Gyihova ɛgyakyi kɛ ɔbaboa ɛtanevolɛma gyɛne yeamaa bɛanlu bɛ nwo ɔ? Kyɛkyɛ!

9. Kɛzi Gyihova boale Devidi maanle ɔnlunle ɔ nwo ɛ?

⁹ Ɛnee Gyihova kulo Belemgbunli Devidi edwɛkɛ kpole kpalɛ. Ɔhanle ye wɔ Devidi anwo bɔbɔ kɛ ɔle “nrenyia mɔɔ la me ahonle nwo” a. (Gyi. 13:22) Noko Devidi yɛle ɛtane mgbole, bie a le agyalɛzɛkyelɛ yɛɛ sonla ɛhunlɛ. Kɛ mɔɔ ɛnee Mosisi Mɛla ne kile la,  ɛnee ɔwɔ kɛ bɛku Devidi. (Lɛv. 20:10; Nɔm. 35:31) Noko Gyihova vile atiakunlukɛnlɛma nu vale ɔ nwo liele edwɛkɛ ne anu. b Ɔzoanle ye ngapezonli Neetan wɔ belemgbunli ne anwo ɛkɛ ɔnva nwo kɛ ɛnee Devidi ɛtɛyɛle debie biala mɔɔ kile kɛ yenlu ɔ nwo la. Neetan luale ndonwo zo boale Devidi maanle ɔdele ɔ bo kɛ yeyɛ ɛtane kpole. Kɛmɔ ɔnwunle kɛzi yeyɛ ɛtane kpole yetia Gyihova la ati, ɔnlunle ɔ nwo. (2 Sa. 12:​1-14) Ɔvile ye ahonle nu ɔhɛlɛle edwɛne bie mɔɔ kile kɛ ɔnlunle ɔ nwo amgba la. (Edw. 51, ɔtidwɛkɛ) Edwɛne zɔhane ɛkyekye ɛtanevolɛma dɔɔnwo arɛle na yeha bɛ yemaa bɛnlu bɛ nwo. Asoo ɔnyɛ yɛ fɛ kɛ Gyihova lale ɛlɔlɛ ali na ɔboale ye sonvolɛ Devidi ɔmaanle ɔnlunle ɔ nwo ɔ?

10. Kɛmɔ Gyihova lɛ alesama mɔɔ yɛle ɛtanevolɛma la anwo abotane na ɔfa yɛ ɛtane ɔkyɛ yɛ la ati, kɛzi ɔka wɔ ɛ?

¹⁰ Gyihova kyi ɛtane biala. (Edw. 5:​4, 5) Noko ɔze kɛ yɛ muala yɛle ɛtanevolɛma, na kɛmɔ ɔkulo yɛ la ati, ɔkpondɛ kɛ ɔboa yɛ ɔmaa yɛko yɛtia ɛtane. Dahuu ɔbɔ mɔdenle kɛ ɔboa menli mɔɔ bɛyɛ ɛtane mgbole kpalɛ bɔbɔ la yeamaa bɛanlu bɛ nwo na bɛabikye ye. Nea kɛzi ɛhye kyekye yɛ rɛle a! Saa yɛdwenle Gyihova abotanezilɛ nee ye ɛtanefakyɛ ne anwo a, ɔmaa yɛbɔ kpɔkɛ kɛ yɛbahɔ zo yɛali nɔhalɛ yɛamaa ye na yɛanlu yɛ nwo ndɛndɛ wɔ yɛ ɛtane ne mɔ anwo. Akee maa yɛzuzu mɔɔ Gyisɛse hilehilele Kilisienema wɔ anlubɛnwo nwo la anwo.

MƆƆ GYISƐSE ƐDOAVOLƐMA ZUKOALE YE WƆ ANLUBƐNWO NWO LA

11-12. Duzu a Gyisɛse hilehilele ye tievolɛma wɔ kɛzi ɔ Ze fa ɛtane kyɛ la anwo a? (Nea nvoninli ne.)

¹¹ Ɛnee ɔle ɛvoya mɔɔ limoa Y.M., na ɛnee mekɛ ɛdwu kɛ Mɛzaya ne da ɔ nwo ali. Kɛ mɔɔ yɛnwunle ye wɔ edwɛkɛ mɔɔ li ɛhye anyunlu la anu la, Gyihova luale Dwɔn Sɔnevolɛ ne nee Gyisɛse Kelaese anwo zo hilehilele menli kɛzi ɔhyia kɛ bɛnu bɛ nwo la anwo debie.—Mat. 3:​1, 2; 4:17.

¹² Wɔ Gyisɛse ɛzonlenlɛ gyima ne amuala anu, ɔhilehilele ye tievolɛma ne kɛzi ɔ Ze fa ɛtane kyɛ la anwo debie. Adenle kɛnlɛma ko  mɔɔ Gyisɛse luale zo yɛle zɔ la a le kakula ɛkobɔfo ne anwo ndonwo ne. Kpavolɛ zɔhane kpale kɛ ɔbavi sua nu na ɔyɛle ninyɛndane mekɛ bie. Noko “ɔ nye rale ɔ nwo zo” na ɔziale ɔhɔle sua nu. Duzu a ye papa yɛle a? Gyisɛse hanle kɛ “mekɛ mɔɔ ɔlua moamoa mɔɔ ɔlɛba la, ye papa nwunle ye na ɔ nwo yɛle ye alɔbɔlɛ, na ɔnriandile ɔhɔyɛle ye atuu na ɔvole ɔ nloa anwo.” Ɛnee kakula ne adwenle a le kɛ ɔsɛlɛ ye papa saa ɔbamaa yeayɛ ye sua nu ɛkɛ ne azonvolɛ ne mɔ ko a, noko ye papa vɛlɛle ye “me ra ɛhye” na ɔvale ye gyinlabelɛ mɔɔ ɔlɛ wɔ abusua ne anu la ɔmaanle ye bieko. Selɛ ne hanle kɛ: “Ɔminlinle na bɛnwu ye.” (Luku 15:​11-32) Kolaa na Gyisɛse vi anwuma ara azɛlɛ ye azo la, ye biala anu ɔnwunle kɛ ɔ Ze ɛlɛda ahunluyelɛyelalɛ ɛhye bie ali ahile ɛtanevolɛma mɔɔ bɛnlu bɛ nwo la. Ndonwo ɛhye kyekye yɛ rɛle na ɔmaa yɛnwu kɛzi yɛ Ze Gyihova se anwunvɔne la!

13-14. Duzu a ɛzoanvolɛ Pita zukoale ye wɔ anlubɛnwo nwo a, na duzu a ɔhilehilele awie mɔ gyɛne wɔ anlubɛnwo nwo a? (Eza nea nvoninli ne.)

¹³ Ɛzoanvolɛ Pita zukoale anlubɛnwo nee ɛtanefakyɛ nwo ninyɛne dɔɔnwo vile Gyisɛse ɛkɛ. Pita yɛle nvonleɛ fane dɔɔnwo na Gyisɛse vile ye ɛhulolɛ nu vale hyɛle ye. Kɛ neazo la, mɔɔ Pita kpole ye fane nsa kɛ ɔnze Gyisɛse la, ye adwenle buale ye fɔlɛ na ɔmaanle ɔlile nyane. (Mat. 26:​34, 35, 69-75) Noko mɔɔ Gyisɛse dwazole vile ewule nu la, ɔyele ɔ nwo ɔhilele Pita—ɔbayɛ kɛ ɛnee ɔ ngomekye a ɔwɔ ɛkɛ a. (Luku 24:​33, 34; 1 Kɔl. 15:​3-5) Wɔ mekɛ zɔhane, Gyisɛse vile ɛlɔlɛ nu vale ye ɛzoanvolɛ ne mɔɔ yenlu ɔ nwo la ɛtane hyɛle ye na ɔmaanle ɔnwunle kɛ yeva yehyɛ ye.

¹⁴ Kɛmɔ Pita mumua ne dele anlubɛnwo nee ɛtanefakyɛ abo kpalɛ la ati, ɔholale ɔhilehilele awie mɔ nwolɛ debie. Wɔ Pɛntekɔso ɛvoyia ne anzi mekɛ ekyii, Pita hilehilele  nu hilele Dwuuma ekpunli bie kɛ bɛdabɛ a bɛhunle Mɛzaya ne a. Noko ɔvile ɛlɔlɛ nu ɔzele bɛ kɛ: “Yemɔti bɛnlu bɛ nwo na bɛhakyi bɛ ɛbɛlabɔlɛ amaa bɛakyikyi bɛ ɛtane na anwodɔlɛ mekɛ vi Gyihova ɛkɛ ara.” (Gyi. 3:​14, 15, 17, 19) Ɔti Pita maanle ɔlale ali kɛ anlubɛnwo maa ɛtanevolɛ kakyi—ɔkakyi kɛzi ɔdwenle nee ye nyɛleɛ—na ɔbɔ ɛbɛla fofolɛ mɔɔ sɔ Nyamenle anye la. Eza Pita maanle ɔlale ali kɛ Gyihova bakyikyi bɛ ɛtane ne mɔ anzɛɛ ɔbamaa bɛ ɛtane ne mɔ aminliminli. Yɛɛ wɔ ɛvolɛ dɔɔnwo anzi, Pita maanle Kilisienema nyianle anwodozo kɛ: ‘Gyihova lɛ bɛ nwo abotane ɔluakɛ ɔngulo kɛ bɛsɛkye awie biala, emomu ɔkulo kɛ menli kɔsɔɔti nu bɛ nwo.’ (2 Pita 3:9) Ɔle anyelazo kɛnlɛma ɔmaa Kilisienema mɔɔ bɛyɛ ɛtane la—bɔbɔ bɛdabɛ mɔɔ bɛyɛ ɛtane kpole la!

15-16. (a) Kɛzi ɛzoanvolɛ Pɔɔlo zukoale ɛtanefakyɛ nwo debie ɛ? (1 Timote 1:​12-15) (b) Duzu a yɛbazuzu nwo wɔ edwɛkɛ bieko anu a?

¹⁵ Sɔɔlo mɔɔ vi Taasɛse la yɛle ninyɛndane dɔɔnwo. Ɛnee ɔyɛ Kelaese ɛdoavolɛma ne kpɔdekpɔde atisesebɛ nu. Ɔbayɛ kɛ Kilisienema bie mɔ bule ye kɛ ɔnrɛnlu ɔ nwo ɛlɛ na yeahakyi. Noko ɛnee Gyisɛse mɔɔ bɛdwazo ye bɛvi ewule nu la ɛnnwu ye zɔ. Ɔ nee ɔ Ze nwunle subane mgbalɛ mɔɔ Sɔɔlo lɛ la. Gyisɛse hanle kɛ: “Mekpa nrenyia ɛhye kɛ ɔli me duma ne anwo daselɛ.” (Gyi. 9:15) Gyisɛse luale nwanwane adenle zo bɔbɔ boale Sɔɔlo maanle ɔnlunle ɔ nwo. (Gyi. 7:58–8:3; 9:​1-9, 17-20) Mɔɔ Sɔɔlo—mɔɔ nzinlii bɛvɛlɛle ye ɛzoanvolɛ Pɔɔlo la rayɛle Kilisienenli la, ɛnee ɔta ɔka kɛzi ɔ nye sɔ atiakunlukɛnlɛma nee anwunvɔnezelɛ mɔɔ bɛlale ye ali bɛhilele ye la anwo edwɛkɛ. (Kenga 1 Timote 1:​12-15.) Pɔɔlo hilehilele awie mɔ kɛ: “Nyamenle ɛvi atiakunlukɛnlɛma nu ɛlɛbɔ mɔdenle ahile wɔ adenle ahɔ anlubɛnwo nu.”—Wlo. 2:4.

¹⁶ Mekɛ bie mɔɔ Pɔɔlo dele adwɔmane ɛbɛla bie mɔɔ ɛlɛkɔ zo wɔ Kɔlente asafo ne anu la anwo edwɛkɛ la, duzu a ɔyɛle a? Ɔlile nwolɛ gyima wɔ adenle mɔɔ maa yɛnwu kɛ Gyihova tenrɛdenrɛ yɛ wɔ ɛlɔlɛ nu la azo yɛɛ eza ɔmaa yɛnwu kɛzi ɔse yɛ anwunvɔne la. Yɛbazuzu mɔɔ zile la anwo dɔɔnwo wɔ edwɛkɛ mɔɔ doa zo la anu.