1. Duzu ati a ɛzɔnenlɛ nwo hyia ɛ? (Nea mɔlebɛbo nvoninli ne.)

ƐVOLƐ biala Baebolo sukoavoma dɔɔnwo maa bɛsɔne bɛ. Bɛ nuhua dɔɔnwo le ngakula mɔɔ bɛndwu ɛvolɛ 13 nee mɔɔ bɛtɛnyianle ɛvolɛ 20 a. Bie a bɛtetele bɛ wɔ nɔhalɛ ne anu. Ɛle bɛ nuhua ko ɔ? Ɔle zɔ a ɛnee yɛkanvo wɔ. Ɔwɔ kɛ Kilisienenli biala maa bɛsɔne ye, ɔluakɛ nwolɛ hyia maa ngoanelielɛ.​—Mat. 28:19, 20; 1 Pita 3:21.

2. Duzu ati a ɔnle kɛ ɛsulo kɛ ɛbayila ɛ nwo zo wɔamaa Gyihova ɛ?

² Ɛzɔnenlɛ maa bɛnyia nyilalɛ dɔɔnwo, noko ɛzonlelilɛ wɔ nwo. Adenle boni azo? Wɔ kenle mɔɔ bɛzɔnenle wɔ la, bɛbizale wɔ kɛ, “Ɔlua Gyisɛse Kelaese afɔlebɔlɛ ne azo, asoo wɔnlu ɛ nwo wɔvi wɔ ɛtane nwo na wɔyila ɛ nwo zo wɔmaa Gyihova kɛ ɛbayɛ ye ɛhulolɛdeɛ ɔ?” Ɛbuale kɛ ɛhɛe. Wɔ ɛzɔnenlɛ ne le ɛ nwo zo mɔɔ wɔyila la anwo sɛkɛlɛneɛ. Ɔle ɛwɔkɛ mɔɔ ɛvile wɔ ahonle nu ɛbɔle kɛ ɛbahulo Gyihova na wɔava ye ɛhulolɛdeɛyɛlɛ wɔalimoa debie biala anyunlu a. Ɛhye le ɛwɔkɛ mɔɔ anyebolo wɔ nu. Asoo ɔwɔ kɛ ɛnnu ɛ nwo wɔ nwo ɔ?  Kyɛkyɛ, ɔnle kɛ ɛnnu ɛ nwo. Ɛ nwo mɔɔ ɛfa wɔamaa Gyihova la ɛnle debie ɛtane. Suzu nwo wɔ adenle fofolɛ zo! Bɛdabɛ mɔɔ bɛnze Gyihova la boka Seetan ewiade ne anwo. Abɔnsam ɛngulo kɛ ɛbanyia ngoane. Nɔhalɛ nu, saa ɛkɔ ye afoa na ɛdwazo ɛtia Gyihova tumililɛ ne na wɔanyia dahuu ngoane a, ɔbayɛ ye fɛ.

3. Saa ɛyila ɛ nwo zo ɛmaa Gyihova a duzu nyilalɛ a ɛbanyia a?

³ Dwenle kɛzi Gyihova ɛyila wɔ kɛ ɛyilale ɛ nwo zo ɛmaanle ye na bɛzɔnenle wɔ la anwo nea. Kɛkala mɔɔ wɔva ɛ nwo wɔmaa Gyihova la, ɛbahola wɔava anwodozo kpole wɔaha kɛ: “[Gyihova] wɔ me afoa, menzulo. Duzu a sonla kɛhola kɛyɛ me a?” (Edw. 118:6) Enililɛ biala ɛndɛla ɛhye, kɛ ɛbahɔ Nyamenle afoa na wɔanwu kɛ ɔ nye die ɛ nwo.

4, 5. (a) Duzu ati a yɛbahola yɛaha kɛ ɔwɔ kɛ awie biala yɛ ɔ nwo zo ɛyilalɛ ne anwo gyima ɛ? (b) Duzu ngyegyelɛ a Kilisienema kɔsɔɔti yia a?

⁴ Kɛ Kilisienenli mɔɔ bɛzɔne wɔ la, agɔnwolɛvalɛ mɔɔ ɛ nee Gyihova lɛ la ɛnle kɛ nzule anzɛɛ laete mɔɔ ɛfa ɛdi gyima noko wɔ awovolɛ a tua nwolɛ kakɛ ne la. Saa ɛ nee wɔ awovolɛ tɛte bɔbɔ a, ɔwɔ kɛ ɛdawɔ mumua ne ɛyɛ ɛ nee Gyihova bɛ agɔnwolɛvalɛ ne anwo gyima. Duzu ati a ɔhyia kɛ ɛkakye ɛhye a? Ɔluakɛ ɛnrɛhola ɛnrɛnwu ngyegyelɛ mɔɔ ɛbayia ye kenle bie la. Kɛ neazo la, bie a bɛzɔnenle wɔ la ɛnee ɛtɛdwule ɛvolɛ 13. Noko kɛkala mɔɔ wɔbo la, ɛbanyia nganeɛdelɛ fofolɛ, eza ɛbayia ngyegyelɛ ngakyile. Kakula raalɛ ko mɔɔ yeli ɛvolɛ 18 la hanle kɛ: “Kakula mɔɔ ɔle Gyihova Dasevolɛ la ɛnrɛva ɛya kɛ bɛammaa ye awolɛkenle keeki wɔ sukulu. Noko saa ɛvolɛ ekyi gua nu na nla nwo atiakunluwɔzo ne anloa yɛ se a, ɔwɔ kɛ ɔnyia anwodozo bɔkɔɔ kɛ saa ɔtie Gyihova na ɔdi ye mɛla zo dahuu a yemɔ a le kpalɛ a.”

⁵ Tɛ ngakula angome a yia ngyegyelɛ ngakyile a. Bɛdabɛ mɔɔ bɛyɛle mgbanyinli na bɛazɔne bɛ la noko yia bɛ diedi ne anwo sɔnea dɔɔnwo mɔɔ bɛ nye ɛnla la. Sɔnea ɛhye mɔ bie fale agyalɛ, kpɔkɛdelɛ anzɛɛ gyima nwo. Nɔhalɛ nu, ɔnva nwo ɛvolɛ mɔɔ yɛ nuhua biala ɛli la, yɛbayia tɛnlabelɛ ngakyile mɔɔ ɔbahyia kɛ yɛdi nɔhalɛ yɛmaa Gyihova la.​—Gye. 1:12-14.

6. (a) Saa bɛka kɛ wɔvi wɔ ahonle muala anu wɔyila ɛ nwo zo wɔmaa Gyihova a, ɔkile duzu? (b) Duzu a ɛsukoa ɛfi Felepaema 4:11-13 anu a?

⁶ Amaa wɔali nɔhalɛ wɔ tɛnlabelɛ biala anu la, mmamaa ɛ rɛle fi kɛ ɛvile wɔ ahonle muala anu a ɛbɔle Gyihova ɛwɔkɛ a. Ɛhye kile kɛ wɔha wɔhile anwuma nee aze Belemgbunli ne kɛ ɛbahɔ zo wɔazonle ye saa ɛ gɔnwo mɔ anzɛɛ wɔ awovolɛ bɔbɔ gyakyi a. (Edw. 27:10) Ɔlua Gyihova moalɛ zo ɛbahola wɔanyia anwosesebɛ wɔali ɛ nwo zo ɛyilalɛ ɛwɔkɛ ne azo wɔ tɛnlabelɛ biala anu.​—Kenga Felepaema 4:11-13.

7. Saa bɛka kɛ fa “ɛzulolɛ nee anwowozolɛ” yɛ wɔ ngoanelielɛ nwo gyima a, ɔkile duzu?

⁷ Gyihova kulo kɛ ɛyɛ ɔ gɔnwo. Noko ɔwɔ kɛ ɛbɔ mɔdenle ɛyɛ zɔhane agɔnwolɛvalɛ ne nee wɔ ngoanelielɛ nwo gyima. Nɔhalɛ nu, Felepaema 2:12 ka kɛ: “Bɛhɔ zo bɛva ɛzulolɛ nee anwowozolɛ bɛyɛ bɛ ngoanelielɛ nwo gyima.” Zɔhane edwɛkɛ ne kile kɛ ɔwɔ kɛ ɛsuzu kɛzi ɛbamia ɛ nee Gyihova agɔnwolɛvalɛ ne anu na wɔali nɔhalɛ wɔamaa ye ɔnva nwo ngyegyelɛ biala mɔɔ ɛbayia la. Ɔnle kɛ ɛdie ɛ nwo ɛdi somaa. Nyamenle azonvolɛ bie mɔ mɔɔ ɛzonle ɛhyɛ bɔbɔ la anli nɔhalɛ. Ɔti, duzu a ɛbahola wɔayɛ wɔava wɔayɛ wɔ ngoanelielɛ nwo gyima ɛ?

8. Saa yɛsukoa debie yɛwie a, duzu bieko a ɔwɔ kɛ yɛyɛ a? Kɛmɔti a nwolɛ hyia ɛ?

⁸ Amaa yɛayɛ Gyihova agɔnwo la, ɔwɔ kɛ yɛtie ye na yɛka yɛ edwɛkɛ yɛkile ye. Adenle titili ko mɔɔ yɛdua zo yɛtie Gyihova la a le kɛ yɛbazukoa Baebolo ne. Nyamenle Edwɛkɛ ne nee yɛ mbuluku ne mɔ mɔɔ yɛbagenga na yɛadwenledwenle nwo la boka nwo. Noko ɔnle kɛ ɛsukoa Baebolo ne kɛ ɛkye nɔhalɛ edwɛkɛ bie wɔagua ɛ ti anu ala, kɛ mɔɔ ɛkayɛ sɔnea wɔ sukulu a ɛyɛ amaa wɔali konim la. Emomu, ɔle kɛ adendulɛ bie mɔɔ yɛ anyelielɛ mɔɔ ɔmaa ɛsukoa Gyihova anwo debie fofolɛ la. Ɛhye bamaa wɔabikye Nyamenle, na ɔdaye noko yeabikye wɔ.​—Gye. 4:8.

9. Duzu ninyɛne a ɛboa wɔ wɔ debiezukoalɛ nu a?

⁹ Gyihova ahyehyɛdeɛ ne ɛyɛ ninyɛne dɔɔnwo mɔɔ baboa wɔ yeamaa wɔazukoa debie kpalɛ a.Kɛ neazo la, “Baebolo Ɛzukoalɛ Nwo Gyimayɛlɛ” mɔɔ wɔ “Mgbavolɛ & Mbɛlɛra” foa ne abo wɔ jw.org azo la bahola amaa wɔanyia ɛzukoalɛdeɛ wɔavi Baebolo nu edwɛkɛ nu. Eza “Duzu A Baebolo Ne Kola Kilehile Yɛ A?” mɔɔ bɛfa bɛsukoa debie mɔɔ wɔ jw.org azo la bahola aboa wɔ yeamaa wɔanyia anwodozo wɔ ninyɛne mɔɔ ɛdie ɛdi la anu. Ninyɛne ɛhye mɔ bamaa wɔanwu kɛzi ɛbahilehile wɔ diedi ne anu wɔahile awie mɔ la. Debiezukoalɛ nwo nzuzulɛ gyɛne wɔ edwɛkɛ “Young People Ask . . . How Can I Make Bible Reading Enjoyable?” mɔɔ wɔ April 2009 Awake! ne anu la. Debiezukoalɛ nee nwolɛ ɛdwenlenlɛ boa maa ɛyɛ wɔ ngoanelielɛ nwo gyima.​—Kenga Edwɛndolɛ 119:105.

10. Duzu ati a ɔwɔ kɛ Kilisienenli mɔɔ bɛzɔne ye la yɛ asɔne ɛ?

¹⁰ Saa yɛsukoa Baebolo ne a ɛnee yɛlɛtie Gyihova, yɛɛ saa yɛyɛ asɔne a ɛnee yɛlɛtendɛ yɛahile ye. Ɔnle kɛ Kilisienenli bu asɔneyɛlɛ kɛ debie mɔɔ nvasoɛ ɛnle zo anzɛɛ ɔle “Saleɛ” mɔɔ bamaa yeali konim a. Emomu, asɔneyɛlɛ maa yɛ nee yɛ Bɔvolɛ ne di ngitanwo kpalɛ. Gyihova kulo kɛ ɔtie mɔɔ ɛbaha la. (Kenga Felepaema 4:6.) Saa ɛlɛyia ngyegyelɛ biala a, Baebolo ne tu folɛ kɛ, “fa wɔ adesoa ne maa Gyihova.” (Edw. 55:22) Ɛdie  ɛhye ɛdi ɔ? Mediema mrenyia nee mraalɛ dɔɔnwo bahola aha kɛ ɛhye ɛboa bɛ. Ɔbaboa ɛdawɔ noko!

11. Duzu ati a ɔwɔ kɛ yɛyɛ Gyihova mo dahuu ɛ?

¹¹ Noko, tɛ mekɛ mɔɔ yɛhyia Gyihova moalɛ la angome a ɔwɔ kɛ yɛyɛ asɔne a. Baebolo ne ka kɛ: “Bɛhile anyezɔlɛ.” (Kɔl. 3:15) Saa yɛdwenle yɛ ngyegyelɛ ne mɔ anwo somaa a, ɔyɛ a yɛ rɛle fi nyilalɛ dɔɔnwo ne mɔɔ yɛnyia la. Duzu ati a ɛmbɔ mɔdenle kɛ yeanyɛ boɛ fee la alehyenlɛ biala ɛbadwenle ninyɛne nsa mɔɔ ɛbahola wɔahile nwolɛ anyezɔlɛ la anwo ɛ? Akee yɛ Gyihova mo kɛ yeyila wɔ la. Abigail mɔɔ bɛzɔnenle ye la ɛnee yeli ɛvolɛ 12 la ka kɛ: “Mete nganeɛ kɛ ɔwɔ kɛ yɛyɛ Gyihova mo yɛtɛla awie biala wɔ ewiade. Ɔwɔ kɛ yɛyɛ ye mo mekɛ biala wɔ ahyɛlɛdeɛ ngakyile mɔɔ yeva yemaa yɛ la anwo. Mendele kpuya ɛhye mekɛ bie: Saa ɛhyema yɛkadwazo la ninyɛne mɔɔ yɛlale Gyihova ase wɔ nwolɛ ɛnɛ la ala a yɛlɛ a, ɛnee duzu a yɛlɛ a?”

12, 13. Duzu ati a nwolɛ hyia kɛ ɛbadwenle kɛzi ɛdawɔ mumua ne wɔnwu kɛ Gyihova le kpalɛ la anwo ɛ?

¹² Belemgbunli Devidi mɔɔ dɛnlanle aze tete ne na bɛliele ye bɛvile sɔnea mgbole dɔɔnwo anu la hanle ye wɔ edwɛndolɛ nu kɛ: “Bɛzɔ [Gyihova] bɛnlea na bɛkɛnwu kɛ ɔle kpalɛ! Nyilalɛ ɛha sonla ne mɔɔ nriandi kɔtane ye la.” (Edw. 34:8) Ngyɛnu zɔhane maa yɛnwu deɛmɔti awie anwubielɛ nwo hyia la. Saa ɛkenga Baebolo ne nee yɛ mbuluku ne mɔ na eza ɛkɔ yɛ ayia ne mɔ abo a ɛbade anwubielɛ ngɛnlɛma mɔɔ maa yɛnwu kɛzi Nyamenle ɛboa awie mɔ ɛmaa bɛli nɔhalɛ la. Noko mekɛ mɔɔ ɛlɛnyi wɔ sunsum nu la, ɔwɔ kɛ ɛnwu Gyihova asa wɔ wɔ ɛbɛlabɔlɛ nu. Kɛzi ɛdawɔ mumua ne wɔnwu Gyihova kpalɛyɛlɛ ne ɛ?

¹³ Kilisienenli biala ɛnwu Gyihova kpalɛyɛlɛ ne wɔ adenle titili bie azo. Yevɛlɛ yɛ nuhua biala kɛ yɛbikye ɔ nee ɔ Ra ne. Gyisɛse hanle kɛ: “Awie biala ɛnrɛhola ɛnrɛra me nwo kyesɛ Selɛ ne mɔɔ zoanle me la twe ye.” (Dwɔn 6:44) Ɛte nganeɛ kɛ zɔhane edwɛkɛ ne fale ɛ nwo ɔ? Bie a kakula bie bazuzu kɛ, ‘Gyihova hwenle me awovolɛ, yɛɛ medoa bɛ a.’ Noko mɔɔ ɛyilale ɛ nwo zo ɛmaanle Gyihova na bɛzɔnenle wɔ la, ɛmaanle ɔlale ali kɛ ɛ nee ye ɛnyia agɔnwolɛvalɛ titili bie. Kɛkala ɔze wɔ kpalɛ. Baebolo ne maa yɛ anwosesebɛ kɛ: “Saa awie kulo Nyamenle a, ɔdaye noko ɔze ye.” (1 Kɔl. 8:3) Bɔ mɔdenle kɛ ɛbamaa ɛ nye azɔ nwolɛ adenle mɔɔ ɛlɛ wɔ Gyihova ahyehyɛdeɛ ne anu la.

14, 15. Kɛzi daselɛlilɛ bahola amaa wɔanyia diedi kpole ɛ?

¹⁴ Adenle bieko mɔɔ ɛbahola wɔalua zo wɔanwu kɛ Gyihova le kpalɛ la a le kɛ ɛbanwu kɛ ɔlɛboa wɔ wɔ mekɛ mɔɔ ɛlɛka wɔ diedi ne anwo edwɛkɛ wɔahile awie mɔ la. Ɛbahola wɔayɛ ɛhye wɔ daselɛlilɛ nee sukulu nu. Ɔyɛ bie mɔ ɛse kɛ bɛbali bɛ gɔnwo mɔ daselɛ wɔ sukulu. Bie a ɛbade ɔ bo. Ɛngola ɛnwu kɛzi bɛbayɛ bɛ nyɛleɛ la. Ɛ nee ɛ gɔnwo mɔɔ ɛ nee ye kɔ sukulu la ɛlɛtendɛ a ɔnyɛ se, noko ɔnla aze kɛ ɛbadendɛ wɔahile menli dɔɔnwo. Duzu a baboa wɔ a?

¹⁵ Mɔɔ limoa, dwenle deɛmɔti ɛdie ninyɛne bie mɔ ɛdi la anwo. Ninyɛne mɔɔ bɛfa bɛsukoa mɔɔ wɔ jw.org azo la bie wɔ wɔ aneɛ nu ɔ? Saa ɛngola ɛnnwu ye a, nyia abotane kpondɛ. Bɛyɛ bɛ mɔɔ ɔbaboa wɔ yeamaa wɔadwenledwenle mɔɔ ɛdie ɛdi, deɛmɔti ɛdie ɛdi nee kɛzi ɛbahilehile wɔ diedi ne anu wɔahile awie mɔ  la anwo. Saa ɛnyia diedi kpole na ɛsiezie ɛ nwo kpalɛ a, ɔbamaa wɔali Gyihova duma ne anwo daselɛ.​—Gyɛ. 20:8, 9.

16. Kɛ ɔkɛyɛ na wɔanyia akɛnrasesebɛ wɔaha wɔ diedi ne anwo edwɛkɛ ɛ?

¹⁶ Noko akee, saa ɛsiezie ɛ nwo bɔbɔ a, bie a ɔbayɛ wɔ ɛse kɛ ɛbaha wɔ diedi ne anwo edwɛkɛ wɔahile awie mɔ. Adiema raalɛ bie mɔɔ yeli ɛvolɛ 18, mɔɔ bɛzɔnenle ye la ɛnee yeli ɛvolɛ 13 la ka kɛ, “Meze mɔɔ medie medi la, noko ɔyɛ a ɔyɛ se kɛ mebala me nzuzulɛ ali.” Kɛzi ɔlile ngyegyelɛ ɛhye anwo gyima ɛ? Ɔka kɛ, “Mebɔ mɔdenle kɛ mebava edwɛkɛ bie meabɔ ɔ bo. Me gɔnwo mɔ sukuluma ka ninyɛne mɔɔ bɛyɛ la anwo edwɛkɛ mɔɔ bɛnzulo. Ɔwɔ kɛ medame noko mekola meyɛ zɔ. Ɔti, meka debie bie mɔɔ menyɛle la, le kɛ ‘Ɛnee melɛka Baebolo ne anu edwɛkɛ meahile awie mɔ ɛkenle, na. . . ’ Akee mefa mɔɔ mekulo kɛ bɛnwu ye la metoa zo. Alimoa ne edwɛkɛ ne ɛnvale Baebolo ne anwo ɛdeɛ, noko fane dɔɔnwo ne ala awie mɔ kulo kɛ bɛnwu mɔɔ meyɛ wɔ mekɛ mɔɔ melɛkilehile awie mɔ Baebolo ne la. Ɔyɛ a bɛbiza nwolɛ kpuya. Mekɛ mɔɔ melɛfa adenle ɛhye meali gyima la ɔmmaa ɔnyɛ se. Ɛhye maa me nye die kpalɛ!”

17. Duzu a bahola aboa amaa wɔaha wɔ diedi ne anwo edwɛkɛ wɔahile awie mɔ a?

¹⁷ Saa ɛbu awie mɔ na ɛkɔ zo ɛkile bɛ nwo anyelielɛ a, ɔbamaa bɛahile ɛbulɛ bɛamaa wɔ nee wɔ diedi ne. Olivia mɔɔ ɛli ɛvolɛ 17, na bɛzɔnenle ye la ɛnee ɔtɛdwule ɛvolɛ 13 la hanle kɛ: “Ɛnee mesulo kɛ saa me nee awie mɔ ɛlɛbɔ adawu na mefa Baebolo nu edwɛkɛ meba nu biala a, bɛbaha kɛ mele kyengye.” Akee ɔbɔle ɔ bo kɛ ɔkakyi ye adwenle. Kɛ anrɛɛ Olivia badwenle kɛzi ɔsulo anwo somaa la, ɔdwenlenle kɛ: “Ngakula dɔɔnwo ɛnze Gyihova Alasevolɛ anwo ɛhwee. Yɛ ngome ala a yɛle Alasevolɛ mɔɔ bɛze yɛ a. Ɔti, mɔɔ yɛbayɛ la a bamaa bɛadie yɛ anzɛɛ bɛnrɛdie yɛ a. Na saa yɛse nyiane anzɛɛ ɔyɛ se ɔmaa yɛ kɛ yɛbaha yɛ diedi ne anwo edwɛkɛ anzɛɛ saa yɛlɛtendɛ a ɛnee yɛzi yɛ ti aze noko ɛ? Bie a ɔbamaa bɛabu yɛ kɛ yɛ nye ɛnlie kɛzi yɛde la anwo. Bie noko a, ɔnrɛmaa bɛnrɛdie edwɛkɛ ne ɔluakɛ yɛnlɛ anwodozo. Noko, saa yɛfi yɛ ɛhulolɛ nu yɛfa anwodozo yɛka yɛ diedi ne anwo edwɛkɛ mɔɔ yɛnzulo nee mekɛ mɔɔ yɛ nee awie mɔ ɛlɛbɔ adawu la a, bie a ɔbamaa bɛabu yɛ.”

18. Duzu a wɔ ngoanelielɛ nwo gyima mɔɔ ɛbayɛ la kile a?

¹⁸ Kɛ mɔɔ yɛnwu ye la, wɔ ngoanelielɛ nwo gyima mɔɔ ɛbayɛ la le ɛzonlelilɛ kpole. Ninyɛne mɔɔ ɔwɔ kɛ ɛyɛ la bie mɔ a le Nyamenle Edwɛkɛ ne mɔɔ ɛbagenga na wɔadwenledwenle nwo, asɔne mɔɔ ɛbayɛ yɛɛ kɛzi Gyihova ɛyila ɛdawɔ mumua ne mɔɔ ɛbadwenle nwo la. Ninyɛne ɛhye mɔ mɔɔ ɛbayɛ la bamaa wɔanyia anwodozo kpole kɛ ɛ nee Gyihova lɛ agɔnwolɛvalɛ. Ɛhye bamaa wɔaha wɔ diedi ne anwo edwɛkɛ wɔahile awie mɔ.​—Kenga Edwɛndolɛ 73:28.

19. Kɛmɔti a nvasoɛ wɔ zo kɛ ɛbayɛ wɔ ngoanelielɛ nwo gyima ɛ?

¹⁹ Gyisɛse hanle kɛ: “Saa awie kulo kɛ ɔtoa me a, maa ɔkpo ɔ nwo na ɔva ye amaneɛnwunlɛ baka ne na ɔhɔ zo ɔdoa me.” (Mat. 16:24) Nɔhalɛ nu, amaa Kilisienenli biala adoa Gyisɛse la, ɔwɔ kɛ ɔyila ɔ nwo zo ɔmaa Gyihova na bɛsɔne ye. Ɛhye bamaa yeanyia nyilalɛ dɔɔnwo ɛnɛ nee dahuu ngoane wɔ Nyamenle ewiade fofolɛ ne anu. Ɔti, yɛ biala mɔɔ ɛbahola la na kɔ zo yɛ wɔ ngoanelielɛ nwo gyima!