Wɔgenga Ɛzinzalɛ Arane mɔɔ ɛra kenle nsa ye la kpalɛ ɔ? Nea saa ɛbahola wɔabua kpuya ɛhye mɔ a:

Kɛzi Ngɛlɛlera ne maa yɛnwu kɛ Nyamenle te yɛ nyane bo ɛ?

Mɔɔ ɛnee tete Yizilayɛma le ngɛkɛlɛ wɔ Yigyibiti la, Nyamenle nwunle bɛ amaneɛnwunlɛ na ɔdele bɛ nyane ne bie. (Ade. 3:7; Aye. 63:9) Bɛbɔle yɛ kɛ Nyamenle ɛsaso, ɔti saa awie ɛlɛnwu amaneɛ a, yɛdi nyane. Saa yɛte nganeɛ kɛ Nyamenle ɛngulo yɛ bɔbɔ a, ɔte nganeɛ ɔmaa yɛ.​—wp18.3, m. 8-9.

Kɛzi Gyisɛse ngilehilelɛ ne boale menli maanle bɛlile menli nwo adwenletane zo ɛ?

Wɔ Gyisɛse mekɛ zo, ɛnee Dwuuma dɔɔnwo lɛ menli nwo adwenletane. Kelaese zile kɛzi mɛlɛbɛnwoaze nwo hyia la azo na ɔdendɛle ɔtiale maanle mɔɔ awie vi nu mɔɔ ɔfa ɔtu ɔ nloa nu la. Ɔzele ye ɛdoavolɛma kɛ, bɛbu bɛ nwo kɛ bɛle mediema.​—w18.06, m. 9-10.

Duzu a yɛsukoa yɛfi deɛmɔti Nyamenle ammaa Mosisi angɔ Ɛwɔkɛ Azɛlɛ ne azo la anu a?

Ɛnee Mosisi nee Gyihova lɛ agɔnwolɛvalɛ kpalɛ. (Mɛla 34:10) Ɛvolɛ 40 mɔɔ Yizilayɛma lile ye wɔ fienemgbole ne anu ɛlɛkɔ ye awieleɛ la, menli ne dendɛle bɛ nzo abo bieko kɛ bɛnnyia nzule. Nyamenle zele Mosisi kɛ ɔdendɛ ɔhile bodane bie. Noko, Mosisi vale ye kpɔma ne bɔle bodane ne. Bie a Gyihova vale ɛya kɛ Mosisi anli Ye adehilelɛ zo anzɛɛ yeanva nwanwane gyima ne anwo nganvolɛ yeammaa Ye la. (Ɛdi. 20:6-12) Ɛhye maa yɛnwu kɛ ɔhyia kɛ yɛtie Gyihova na yɛwula ye anyunlunyia.​—w18.07, m. 13-14.

Saa yɛnea ɛnyelɛ zo yɛbua ndɛne a, kɛzi yɛbayɛ nvonleɛ ɛ?

Ndenle nsa wɔ ɛkɛ ne mɔɔ menli dua zo nea sonla nyunlu bua ndɛne a: maanle anzɛɛ abusua mɔɔ awie vi nu, ye ezukoa gyinlabelɛ nee ɛvolɛ mɔɔ yeli la. Ɔwɔ kɛ yɛnwu menli kɛ mɔɔ Nyamenle ne mɔɔ ɛnyɛ nyeyenu nwu bɛ la! (Gyi. 10:34, 35)​—w18.08, m. 8-12.

Ndenle boni mɔ azo a Kilisienema mɔɔ bɛnyi la bahola alua zo aboa a?

Nyamenle anye die Kilisienenli mɔɔ ɛnyi na bɛhakyi ye gyimalilɛ la anwo, na ɔbahola yeayɛ dɔɔnwo yeaboa awie mɔ. Ɔbahola yeaboa menli mɔɔ bɛ ye anzɛɛ bɛ hu mɔ ɛnle diedima la, menli mɔɔ bɛgyakyi debiezukoalɛ nee daselɛlilɛ ɛhɔlɛ, yeayɛ Baebolo ɛzukoalɛ na yeadɛlɛ ye ɛzonlenlɛ gyima ne anu.​—w18.09, m. 8-11.

Ninyɛne Titili Mɔɔ Yɛfa Yɛkilehile la boni a Kilisienema lɛ a?

Yɛlɛ ngitanwolilɛ kaade yɛɛ ɛsalɛdolɛ ngɛlata. Trate mɔtwɛ mɔɔ bɛziezie ye kɛnlɛma yɛɛ Ɛzinzalɛ Arane nee Awake! magazine boka nwo. Brohyua ngakyile, mbuluku titili nwiɔ mɔɔ yɛfa yɛyɛ Baebolo ɛzukoalɛ yɛɛ vidio ngɛnlɛma nna mɔɔ Duzu Ati A Ɔwɔ Kɛ Ɛsukoa Baebolo Ne A? boka nwo la.​—w18.10, m. 16.

Kɛ mɔɔ Mrɛlɛbulɛ 23:23 ka la, kɛzi Kilisienenli bahola ‘adɔ nɔhalɛ’ ne ɛ?

Tɛ ezukoa a yɛfa yɛtɔ nɔhalɛ ne a. Noko, ɔhyia mekɛ nee anwosesebɛ na yɛahola yɛadɔ nɔhalɛ ne.​—w18.11, m. 4.

Duzu a yɛsukoa yɛfi kɛzi Hozia nee ɔ ye Gomɛ lile la anu a?

Gomɛ zɛkyele agyalɛ fane dɔɔnwo, noko Hozia vale hyɛle ye, yeambɔ ye ewole. Saa Kilisienenli bie aye anzɛɛ ɔ hu bɔ nla nu ɛbɛlatane a, mɔɔ ɔ nwo ɛnlɛ edwɛkɛ la bahola ava ahyɛ ye. Saa ɔ nee mɔɔ bɔle nla nu ɛbɛlatane ne la nyia nla nu ngitanwo a, ɔbapɛ mɔɔ anrɛɛ ɔbahola yeagyinla zo yeabɔ ewole la anu.​—w18.12, m. 13.